د افغانستان د سوداګرۍ او پانګونې اتاق مشرتابه پلاوي، د پاکستان د سوداګرۍ اتاقونو فدراسیون، د خیبر پښتونخوا د صنایعو اتاق، د ننګرهار د سوداګرۍ او پانګونې اتاق او د تورخم امنیتي مقاماتو او د ننګرهار سیمه‌ییز حکومت په پرله‌پسې هڅو سره، د تورخم دروازه چې له وويشت ورځو زیات بنده وه، نن چهارشنبه د دواړو هېوادونو د سوداګریزو توکو د لېږد رالېږد لپاره بېرته خلاصه شوه.

د تورخم دروازې د پرانیستلو په مراسمو کې، ښاغلي محمد یونس مهمند، د افغانستان د سوداګرۍ او پانګونې اتاق لومړی مرستیال، میرزمان پوپل، د عامل پلاوي مالی او اداري سرپرست مرستیال، حضرت علي هده وال، د ننګرهار د سوداګرۍ او پانګونې اتاق لومړی مرستیال، نقیب‌الله صافي، د افغان-پاک ګډ اتاق اجرائیوي رئیس، د پاکستان د سوداګرۍ د اتاقونو د فدراسیون مشرتابه، محمد یوسف افریدي، د خیبر پښتونخوا د صنایعو اتاق رئیس، او د دواړو هېوادونو یو شمېر سوداګر او پانګوال حضور درلود.

ښاغلي محمد یونس مهمند، د دواړو هېوادونو د خصوصي سکتور د هڅو او د افغانستان او پاکستان د حکومتونو د همکارۍ ستاینه وکړه او هیله‌یې وښوده چې تورخم دروازه له دې وروسته تل د خلکو او د سوداګریزو او ترانزیټي توکو د تګ راتګ لپاره خلاصه وساتل شي.

ټاکل شوې چې د تورخم دروازه، له تخنیکي ستونزو د هواري او د اړوندو ادارو د چمتووالي وروسته، د جمعې په ورځ، د ۱۴۰۴ کال د وري د میاشتې په لومړۍ نېټه د عامو خلکو پر مخ هم خلاصه شي.

 

 

 

 

د افغانستان د سوداګرۍ او پانګونې اتاق د تورخم دروازې د بیا پرانستلو د هڅو په لړ کې خپله دویمه غونډه د اتاق د لومړي مرستیال ښاغلي محمد یونس مهمند په مشرۍ په داسې حال کې چې د اتاق د عامل پلاوي مالي او اداري سرپرست مرستیال ښاغلي میرزمان پوپل، د ننګرهار د سوداګرۍ اتاق لومړي مرستیال ښاغلي حضرت علی هډوال، د افغان-پاک ګډ اتاق اجرائیوي رئیس ښاغلي نقیب‌الله صافي او یو شمیر سوداګرو او پانګوالو ګډون درلود، د پاکستان د سوداګریزو اتاقونو فدراسیون مرستیال ښاغلي محمد جواد کاظمي، د خیبر پښتونخوا د صنایعو د اتاق رئیس ښاغلي محمد یوسف افریدي، او یو شمېر پاکستانی سوداګرو سره د ۱۴۰۳ کال د کب د میاشتې په ۲۷ نیټه په تورخم دروازه کې ناسته ترسره کړه.

په دې ناسته کې د دواړو لورو قومې مشرانو د ډيورنډ فرضي کرښې دواړو غاړو ته د تورخم لارې په بندېدو د منفي اغېزو او د خلکو پر سوداګریزو ستونزو، ننګونو خبرې وکړې او د سوداګرۍ اتاق له لومړي مرستيال او د دواړو هېوادونو له حکومتی چارواکو يې وغوښتل چې د يادې پولې پرانېستلو ته ځانګړې پاملرنه وکړي.

په دې کتنه کې دواړو لورو د تورخم بندر په اهمیت او د سیمې په اقتصادي وضعیت کې د هغې د رول په اړه خبرې وکړې او د افغانستان - پاکستان ترمنځ د سوداګرۍ پر پراختیا یې ټینګار وکړ، ځکه د دوی په وینا د دې لارې بندېدو د دواړو هېوادونو د خصوصي سکتور غړو ته په میلیونونو ډالره زیان اړولی او د تورخم دروازه باید د تل لپاره د سوداګریزو مالونو او د عامو خلکو د تګ راتګ پر مخ خلاصه شي.

 

 

 

 

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په کابل کې د روسیې فدراسیون له سفیر ښاغلي دیمیتري ژیرنوف سره وکتل.

په دې ناسته کې د افغانستان د سوداګرۍ او پانګونې اتاق د نړیوالو اړیکو مسوول ښاغلي عبدالمتین غالب او د روسیې سفارت سوداګریز آتشه ډاکټر نیکولای هم حضور درلود.

په پیل کې، ښاغلي مهمند د افغانستان له خصوصي سکټور سره د روسیې د سفارت د همکاریو قدرداني وکړه او د دواړو هېوادونو ترمنځ یې د سوداګریزو اړیکو پر پراختیا ټینګار وکړ. هغه په ځانګړې توګه د روسیې بازارونو ته د افغانستان د صادراتي محصولاتو لکه تازه مېوې، وچې مېوې او زعفرانو ارزښت ته اشاره وکړه.

د افغانستان د سوداګرۍ او پانګونې اتاق لومړي مرستیال، د امام ابوحنیفه (رح) ملي او نړیوال نندارتون په اړه چې هر کال په کابل کې د سوداګرۍ او پانګونې اتاق له خوا جوړیږي، هر اړخیز معلومات وړاندې کړل او د روسیې له سفیر څخه یې وغوښتل چې د روسیې سوداګر وهڅوي چې د ۱۴۰۴ کال په دغه مهم نندارتون کې ګډون وکړي.

هغه زياته کړه، په افغانستان کې د پخوا په پرتله د پانګونې زمينه لا پیاوړي شوې، ځکه بشپړ امنيت تامين شوى، د کوکنارو کښت صفر ته رسېدلى او فساد له منځه تللى دى.

روسیې سفیر، د روسیې کازان ښار ته د افغانستان د خصوصي سکتور د یوه پلاوي سفر په اړه معلومات وړاندې کړل او په دغه سفر کې یې د افغان سوداګرو پر حضور ټینګار وکړ. نوموړی، همداراز ژمنه یې وکړه چې د دواړو هېوادونو ترمنځ د سوداګرۍ د حجم د زیاتولو لپاره به لا زیاتې هڅې وکړي.

 

 

 

ښاغلي توکل احمدیار، د افغانستان د سوداګرۍ او پانګونې اتاق عمومي رئیس، د یو شمېر سوداګرو په حضور کې له محترم مرگن قوردوف سره وکتل او د سوداګریزو اړیکو د پراخوالي او ګډو پانګونو په اړه یې بحث وکړ.

ښاغلي قوردوف، ښاغلي احمدیار ته د ترکمنستان د خصوصي سکتور نندارتون ته د ښه راغلاست تر څنګ، د یاد نندارتون، د پانګونې د پراختیا فورم، او د ترکمنستان د سوداګرۍ او صنایعو اتاق د هڅو په اړه مفصل معلومات ورکړل.

ښاغلي قوردوف، افغانستان د ترکمنستان مهم سوداګریز شریک وباله او ژمنه یې وکړه چې د افغان سوداګرو لپاره د لازمو اسانتیاوو رامنځته کولو او د افغان پانګوالو د جلب لپاره به هر اړخیزې هڅې وکړي.

د سوداګرۍ او پانګونې اتاق رئیس، ترکمنستان یې د افغانستان له نېکو ګاونډیانو څخه یاد کړ او د دواړو هېوادونو د دیني او کلتوري ګډو ارزښتونو ته په اشاره، د ترکمنستان اتاق له رئیس یې وغوښتل چې پانګوال وهڅوي ترڅو د ترکمنستان د برېښنا له انرژۍ په ګټې اخیستنې د افغانستان د سترو کانونو په استخراج او پروسس کې پانګونه وکړي.

ښاغلي احمدیار، همداراز د افغان سوداګرو ستونزې، په ځانګړي ډول د تېلو او ګازو واردات، له ښاغلي قوردوف سره شریکې کړې او د دې ستونزو د حل او د سوداګرو لپاره د اسانتیاوو غوښتنه یې وکړه.

نوموړي، د دې لیدنې په څنډه کې د ترکمنستان له یو شمېر سوداګرو سره هم وکتل او د سوداګریزو اړیکو د پراخوالي، ګډو پانګونو، او د سوداګرۍ د اسانتیاوو په اړه یې ورسره بحث وکړ.

 

 

 

 

 

ښاغلي توکل احمدیار، د افغانستان د سوداګرۍ او پانګونې اتاق عمومي رئیس، د ترکمنستان د ولسمشر مرستیال، د دغه هېواد لوړپوړو چارواکو، د خصوصي سکتور غړو او نړیوالو بنسټونو استازو په حضور کې، د ترکمنستان ٢٠٢٥ پانګونې فورم کې ګډون وکړ.

دغه فورم د داخلي او بهرنیو پانګوالو لپاره د پانګونې فرصتونو او اسانتیاوو د معلوماتو وړاندې کولو، د ګډو پانګونو د چارو برابرولو، د پانګونې قانوني چوکاټ او میکانیزم وضاحت، د کورنیو تولیداتو احصائیه، د تېر کال اقتصادي وده او راتلونکو پلانونو د تشریح په موخه جوړ شوی و.

په دې پروګرام کې د ترانسپورت، انرژۍ، مخابراتو، الکترونیکي سوداګرۍ او د بانکي تضمینونو د صادرولو په برخو کې بحث او نظرونه تبادله شول.

همداراز، ښاغلي احمدیار د ترکمنستان د ولسمشر له مرستیال سره تعارفي لیدنه وکړه او پدې کتنه کې یې د افغانستان د خصوصي سکتور لاسته راوړنې او د سوداګرۍ او پانګونې اتاق هڅې توضیح کړې.