د افغانستان د سوداګرۍ او پانګونې اتاق مشرتابه غړو، ښاغلي: محمد یونس مهمند د اتاق لومړی مرستیال، عصمت‌الله وردګ د پانګونې مرستیال، خانجان الکوزی د اتاق د مدیره هیئت غړی او د افغان-پاک ګډ اتاق رئیس، او سیدپرویز سادات هوفیاني د اتاق د مدیره هیئت غړی، د ښاغلي میرزمان پوپل د عامل پلاوی مالی او اداري سرپرست مرستیال په شتون کې، له ښاغلي علیشیر عالموف، د ازبیکستان د UZVTORCETMET شرکت رئیس سره د اتاق په مرکزي دفتر کې لیدنه وکړه او د افغانستان پر پانګونې یې بحث او خبرې وکړې.

ښاغلي عالموف د خپل شرکت د فعالیتونو په اړه معلومات ورکړل او په افغانستان کې یې د فلزاتو د پروسس په برخه کې د پانګونې لیوالتیا څرګنده کړه. هغه د افغانستان د سوداګرۍ او پانګونې له اتاق څخه د همکارۍ غوښتنه وکړه.

ښاغلي مهمند، ښاغلي عالموف ته د ښه راغلاست ویلو تر څنګ، په افغانستان کې د پانګونې د موجودو فرصتونو په اړه معلومات وړاندې کړل، او ویې ویل چې په هېواد کې عمومي امنیت، د کوکنارو کر کیله بندېدل او په ادارو کې د فساد له منځه تلل، د پانګونې لپاره مناسب چاپېریال برابر کړی دی.

نوموړي زیاته کړه، اتاق د هغو پانګوالو هرکلی کوي چې د ملي ګټو په پام کې نیولو سره وکولای شي تولیدي فابریکې تاسیس کړي او د خلکو لپاره د کار زمینه برابره کړي. همدارنګه، اتاق به د اړوندو حکومتی ادارو سره په همغږۍ لازمه همکاري وکړي.

ښاغلو عصمت‌الله وردګ، خانجان الکوزي، او سادات هوفیاني د تولیدي فابریکو، په ځانګړې توګه د اوسپنې د ذوب فابریکو، د سیخ ګول تولید، او د هېواد د خامو او بیا پروسس شوو موادو څخه د استفادې اړوند خبرې وکړې. دوی وویل، چې اوس مهال د افغانستان مهمه اړتیا پانګونه د کانونو، په ځانګړي ډول د حاجي‌ګک د اوسپنې کان او نورو کانونو، د استخراج او پروسس په برخه کې ده.

 

 

 

 

 

 

د افغانستان د سوداګرۍ او پانګونې اتاق، د خپلو همکاریو د دوام په ترڅ کې له خصوصي لوړو زده‌ کړو مؤسسو سره، کارآموزي پروګرام چې یو میاشت مخکې یې د «جهان» او «جهان کابل» د لوړو زده‌ کړو مؤسسو د ۲۵ تنه محصلینو لپاره پیل کړی و، په بریالیتوب سره پای ته ورساوه.

په دې ښوونیز پروګرام د فراغت په مراسمو کې، ښاغلي میرزمان پوپل، د اتاق د عامل پلاوي مالي او اداري سرپرست مرستیال، ښاغلی حنیف الله بشار، د «جهان کابل» د لوړو زده‌ کړو مؤسسې رئیس، د اتاق د بېلابېلو دیپارتمنټونو یو شمېر مسوولین، او همدارنګه د «جهان» او «جهان کابل» مؤسسو استادانو ګډون درلود.

ښاغلي پوپل د تحصیلي سکتور رول د هېواد د اقتصاد په ودې او بیارغونه کې مهم وباله، او هېله‌یې وښوده هغه محصلین چې د افغانستان د سوداګرۍ او پانګونې اتاق په بېلابېلو دیپارتمنتونو کې یې یوه میاشتنی کارآموزي دوره یې تېره کړې، وکولای شي له ترلاسه شویو تجربو څخه په خپلو راتلونکو عملي کارونو کې ګټوره استفاده وکړي.

د جهان او «جهان کابل» د لوړو زده‌ کړو مؤسسو مسؤلینو د افغانستان د سوداګرۍ او پانګونې له اتاق څخه د محصلینو د کارآموزۍ په برخه کې د تیرو کلونو د دوامداره همکاریو او په ځانګړي ډول د روان کال د ۲۵ تنو محصلینو د کارآموزۍ په برخه کې د بېلابېلو دیپارتمنتونو له ښې همکارۍ څخه مننه او قدرداني وکړه، او غوښتنه یې وکړه چې دغه همکارۍ دې په راتلونکي کې هم دوام ومومي.

 

 

 

 

 

 

ښاغلي محمد یونس مهمند، د افغانستان د سوداګرۍ او پانګونې اتاق لومړي مرستیال، د خپل کاري سفر په ترڅ کې د قطر هېواد ته ولاړ او د دوحی درېیمه کاري ګروپی ناسته کې ګډون وکړ.

دا ناسته د افغانستان د خصوصي سکتور د پیاوړتیا، د تېرو اقداماتو د ارزونې، او د سیمې د هېوادونو او نړیوالو سازمانونو ترمنځ د اقتصادي او ټولنیز ثبات د ملاتړ لپاره د همغږۍ په موخه، د ۲۰۲۵ کال د جون له ۳۰مې تر جولای ۱مې پورې، په دوحه ښار کې د ۲۵ څخه د زیاتو هېوادونو او ۵ نړیوالو سازمانونو د استازو په ګډون ترسره شو.

ښاغلي مهمند د هېواد د خصوصي سکتور لپاره د نړیوالې ټولنې د لا زیات او مؤثر ملاتړ غوښتنه وکړه او زیاته یې کړه چې د کوکنارو د کر کیلې بندیز، د اداري فساد له منځه وړل، او سرتاسري امنیت د افغانستان د اوسني حکومت سترې لاسته راوړنې دي. نوموړي دا اقدامات د صادراتو د زیاتوالي او د پانګوالو لپاره د پانګونې د زمینې برابرولو په لور یو لوی ګام وباله.

هغه له نړیوالې ټولنې وغوښتل چې د خصوصي سکتور کنګل شوې شتمنۍ آزادې کړي، د بانکي اسانتیاوو او د پیسو د انتقال زمینه برابره کړي، او پانګوال وهڅوي چې په بېلابېلو سکتورونو، په ځانګړي ډول د انرژۍ تولید، ودانیزو چارو او د کرنې د میکانیزه کولو په برخو کې پانګونه وکړي.

ښاغلي محمد یونس مهمند د افغانستان د خصوصي سکتور شته ظرفیتونه د هېواد د اقتصادي ودې لپاره مهم وبلل او له نړیوالو استازو یې وغوښتل چې د خصوصي سکتور ملاتړ وکړي، څو افغانستان وکولای شي د ځان بساینې پر لور ګام واخلي.

د سوداګرۍ او پانګونې اتاق لومړي مرستیال له ټولو هېوادونو وغوښتل چې سوداګري له سیاست څخه جلا کړي او د خصوصي سکتور د همغږۍ لپاره هڅې وکړي. نوموړي همداراز له ملګرو ملتونو او مرسته کوونکو هېوادونو وغوښتل چې د لنډمهاله بشري مرستو پر ځای، د افغانستان پر دوامدارو اقتصادي پروژو پانګونه وکړي

 

 

 

 

 

د نوي کیدونکي انرژۍ د تولید فرصتونو د پېژندنې او ترویج په موخه، د افغانستان د سوداګرۍ او پانګونې اتاق په همکارۍ یو دوه ورځنی سوداګریز کنفرانس د کابل ګرانډ هوټل کې د اتاق د مشرتابه پلاوي، حکومتي چارواکو او د ملي او نړیوالو ادارو د استازو په ګډون ترسره شو.

د دې کنفرانس د پرانیستې پر مهال، د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند د خصوصي سکتور د رول په اړه په تودو، اوبو او لمرنیو باندنیو انرژیانو کې خبرې وکړې او نوي کیدونکې انرژي یې د اقتصادي ودې، د کار پیدا کولو او د وارداتي برېښنا د اړتیا د کمولو لپاره یوه غوره موقع وبلله.

نوموړي د کورنیو او بهرنیو پانګوالو سره د همکارۍ لپاره د اتاق بشپړه چمتووالی وښود او له حکومته یې د تشویقي کڅوړو غوښتنه وکړه.

د کنفرانس په دوهمه ورځ، د اتاق مشرتابه پلاوي غړو ښاغلي محمد یونس مهمند، خیرالدین مایل احمدي، خانجان الکوزی، عبدالمتین قلندری، احمدشاه حکیمي، میرزمان پوپل، کمین زاده، د نړیوالو ادارو مسؤولینو، د حکومتي سکتوري ادارو استازو او ګڼو پانګوالو او سوداګرو ګډون درلود.

ښاغلي مایل احمدي د نړیوالو بنسټونو له همکاریو مننه وکړه او د برېښنا د تولید په برخه کې د پانګونې پر فرصتونو خبرې وکړې.

هغه خصوصي سکتور ته په لمرینې، تودې او اوبیزې انرژۍ کې د پانګونې بلنه وکره.

ښاغلي الکوزي، دا ډول کنفرانسونه د برېښنا تولید، د پانګونې فرصتونو پېژندنې، صادراتو زیاتوالي، زراعت د میکانیزه کولو، روغتیايي خدماتو او د تولیدي فابریکو د پراختیا لپاره مهم وبلل.

هغه له نړۍ وغوښتل چې سوداګرۍ له سیاست څخه جلا کړي.

ښاغلي قلندري، د برېښنا پر ارزښت خبرې وکړې او ویې ویل چې برېښنا کولی شي زراعتي محصولات په سړه خونه کې وساتي او د چاپېریال له ککړتیا مخنیوی وکړي.

نوموړي له نړیوالې ټولنې وغوښتل چې پر افغان خصوصي سکتور لګېدلو بندیزونو ته پاملرنه وکړي.

ښاغلي کمین زاده، د فابریکو فعالیتونو ته اشاره وکړه او د برېښنا نشتوالی او د پیسو لیږد ستونزې یې یادې کړې.

هغه له پانګوالو وغوښتل چې په یو موټي ډول د هیواد مختلفو برخو کې پانګونه وکړي.

د غونډې په دوهمه برخه کې، یو شمېر ملي او نړیوالو ادارو چې په لمرینې انرژۍ کې کار کوي، خپل معلوماتي پرېزنتیشنونه وړاندې کړل، او همداراز یو افغان انجنیر د برېښنا تولید یوه یوه میګاواټه بید مصرف ماشین معرفي کړ.

په پای کې، ښاغلي محمد یونس مهمند د اتاق د لومړي مرستیال په توګه، د غونډې د دوو ورځو پایلې راټولې کړې، له ټولو ګډونوالو، د حکومتي سکتوري ادارو چارواکو او د اتاق له کارکوونکو یې مننه وکړه.

نوموړي ژمنه وکړه چې اتاق به د مطرح شویو موضوعاتو په عملي کولو کار وکړي او هیله یې وښوده چې په راتلونکي کې هم ورته ستر پروګرامونه د خصوصي سکتور، اتاق، او اړوندو ملي او نړیوالو ادارو په همکارۍ ترسره شي.

 

 

 

 

 

 

 

د افغانستان د سوداګرۍ او پانګونې اتاق عمومي رئیس، ښاغلی توکل احمدیار، د یوه رسمي سفر په ترڅ کې آذربایجان هېواد ته، د ایکو سازمان د سوداګریز فورم کې ګډون وکړ.

په دې سفر کې، د اتاق د مشرتابه غړی ښاغلي سلطان محمد صافي، د هېواد نومیالی تاجر حاجي زلګی عظیمی، او یو شمېر نور افغان پانګوال هم ورسره مل وو.

ښاغلي احمدیار د ایکو سازمان له غړو او د فورم له تنظیموونکو مننه وکړه او هېله یې وښوده چې دا ډول ناستې د سیمه‌ییزو هېوادونو ترمنځ د اقتصادي او سوداګریزو همکاریو لپاره نوې لارې پرانیزي.

نوموړي افغانستان د مرکزي او جنوبي آسیا ترمنځ د نښلونکي پُل په توګه یاد کړ او ویې ویل چې هېواد مو د خپل ژیو-استراتیژیک موقعیت له مخې کولای شي د ترانزیت، سوداګرۍ او سیمه‌ییزو همکاریو د پراختیا لپاره مهم رول ولوبوي.

هغه له ایکو غړو وغوښتل چې د ګډو پانګونو، ترانزیتی دهلېزونو جوړولو او د سیمه‌ییزو همکاریو د پراخوالي له لارې دې د دوامداره پرمختګ زمینه برابره کړي.

دا ناسته د آذربایجان د فزیولی ښار کې ترسره شوه چې پکې د یاد هېواد لوړپوړو چارواکو، د پاکستان، ایران، ترکیې، آذربایجان، قزاقستان، ازبکستان او قرغیزستان د سوداګرۍ اتاقونو رئیسانو او اقتصادي ادارو استازو ګډون کړی و.