د افغانستان د سوداګرۍ او پانګونې اتاق مشرتابه پلاوي د درېیم پړاو دیرشمه غونډه د ښاغلي توکل احمدیار، د اتاق د عمومي رئیس په مشرۍ د

ښاغلي محمد یونس مهمند، د مشرتابه پلاوي لومړی مرستیال؛

ښاغلي خیرالدین مایل احمدي، د مشرتابه پلاوي د سوداګرۍ مرستیال؛ ښاغلي عصمت الله وردګ، د مشرتابه پلاوي پانګونې مرستیال؛ ښاغلي خان محمد سرفراز باز، د مشرتابه پلاوي د دارالانشاء رئیس؛ ښاغلي شیرین آغا سخي، د مشرتابه پلاوي د مالي چارو رئیس؛ ښاغلي انجنیر سید جاوید برهان، د مشرتابه پلاوي د نړیوالو اړیکو رئیس؛

او د مشرتابه پلاوي نور غړي: سلطان محمد صافي، خانجان الکوزی، محمد داود یوسفزی، محمد گردیزی، ذکریا بریالی، سید پرویز سادات هوفیانی، ضیاءالدین اچکزی، جان آقاصادقی، بهادر خیرخواه، فواد دوست او احمد شکیب احمدیار په حضور کې ترسره شوه.

همداراز، ښاغلي عبدالحامد حمیدی، د څارنې پلاوي رئیس، ښاغلي عبدالمتین قلندري، د څارنې پلاوي منشي، ښاغلي ناصر صمیم، د څارنې پلاوي غړی، ښاغلي میر زمان پوپل، د عامل پلاوي د مالي او اداري مرستیال سرپرست، او ښاغلي محمد انور عارفي، د عامل پلاوي د پالیسۍ او تخنیکي مرستیال، هم په دې غونډه کې ګډون کړی و.

د غونډې په پیل کې، د دیرشمي غونډې اجندا، د نهه ویشتمې غونډې د پرېکړو لوستل او د هغې د صورت جلسې لاسلیک، د دارالانشاء رئیس ښاغلي خان محمد سرفراز باز له خوا وړاندې شول.

وروسته، د عامل پلاوي د مالي او اداري مرستیال سرپرست ښاغلي میرزمان پوپل له خوا راپورونه او وړاندیزونه، غونډې ته وړاندې شول.

په غونډه کې د ۱۴۰۴ مالي کال د تشکیلاتو او بودیجې تر څنګ، د مشرتابه پلاوي او عامل ریاست لخوا پر نورو وړاندیزونو هم بحث وشو، او اړینې پرېکړې ونیول شوې.

 

 

 

 

 

ښاغلي محمد یونس مهمند، د افغانستان د سوداګرۍ او پانګونې اتاق لومړی مرستیال، او ښاغلی خانجان الکوزی، د اتاق د مشرتابه پلاوي غړی او د افغانستان – پاکستان د ګډ اتاق رئیس، چې د هېواد د خصوصي سکتور په استازیتوب د حکومت له لوړپوړي پلاوي سره اسلام‌اباد ته تللي وو، د پاکستان د سوداګرۍ فدراسیون د اتاقونو له عمومي رئیس ښاغلي عاطف اکرم شیخ سره یې لیدنه وکړه.

په دې لیدنه کې ښاغلي خان محمد فروتن، د کرنیزو او مالدارۍ محصولاتو اتاق د مشرتابه پلاوي رئیس، هم ګډون درلود.

ښاغلي مهمند په دې ناسته کې د دواړو هېوادونو ترمنځ د سوداګرۍ او ترانزیت پر وړاندې پر شته ستونزو مفصلې خبرې وکړې او د ترانزیت او سوداګرۍ په برخه کې د اسانتیاوو برابرول یې د دواړو هېوادونو د خلکو او خصوصي سکتورونو لپاره ګټور وبلل. نوموړي هیله وښوده چې د دواړو هېوادونو خصوصي سکتورونه به وکولای شي دا ستونزې له خپلو حکومتونو سره شریکې کړي او یوه دایمي حل‌لاره ورته پیدا کړي.

ښاغلي مهمند زیاته کړه: افغانستان تر دې دمه د پاکستان د ترانزیتي توکو د منځنۍ آسیا پر لور هیڅ ډول ستونزه نه ده رامنځته کړې، او تمه دا ده چې د پاکستان حکومت هم ورته چلند وکړي او د افغانستان د تجارتي او ترانزیتي توکو پرمخ لازمې اسانتیاوې برابرې کړي. نوموړي د روان کال په ترڅ کې په افغانستان کې د «څلورم ملي او نړیوال نندارتون امام ابو حنیفه (رح)» د جوړېدو په اړه معلومات ورکړل او د پاکستان د سوداګرۍ فدراسیون د اتاقونو له عمومي رئیس څخه یې غوښتنه وکړه چې پاکستانی تجاران دې یاد نندارتون ته د پراخ ګډون لپاره وهڅوي.

ښاغلي خانجان الکوزي، د دواړو هېوادونو ترمنځ د سوداګرۍ پراختیا او د تجارتي او ترانزیتي ستونزو د حل ټینګار وکړ او دا یې د خصوصي سکتورونو، او همداراز د افغانستان او پاکستان د اقتصادي ودې لپاره ګټور وباله. هغه زیاته کړه: موږ تل هڅه کړې چې سوداګري او اقتصاد له نورو موضوعاتو جلا وساتو ترڅو زموږ تجاران وکولای شي له سیاسي ستونزو لرې خپل تجارت او ترانزیت ته دوام ورکړي.

په دې ناسته کې د پاکستان د سوداګرۍ فدراسیون عمومي رئیس د دواړو هېوادونو د خصوصي سکتورونو هڅې د شته تجارتي او ترانزیتي ستونزو په حل کې ارزښتناکې وبللې او ټینګار یې وکړ چې د خصوصي سکتورونو استازي باید ستونزې له خپلو حکومتونو سره شریکې کړي او د حل لارې ورته پیدا کړي.

 

 

 

 

 

 

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د کابل او د چین د ارومچي ښار ترمنځ د آریانا هوايي شرکت اونیزو سوداګریزو الوتنو د پيل په مناسبت په مطبوعاتي ناسته کې ګډون وکړ. دا ناسته د کابل ګراند هوټل کې د معادن او پټرولیم وزیر، د افغانستان بانک عمومي رئیس، د بهرنیو چارو او مالیې وزارتونو معینانو، د چین د خلق جمهوریت سفیر، او د آریانا هوايي شرکت رئیس په حضور کې جوړه شوې وه.

ښاغلي مهمند د آریانا هوايي شرکت د پخوا فعالیتونو او د څلورو لسیزو جګړو له امله رامنځته شویو ستونزو یادونه وکړه او ویې ویل چې خوشبختانه آریانا شرکت په تېرو درې کلونو کې توانېدلی خپل پخوانی ظرفیت بېرته تر لاسه کړي. نوموړي د کابل – ارومچي د مستقیمو اونیزو الوتنو پیل د افغانستان او چین ترمنځ د سوداګریزو او اقتصادي اړیکو په پراخېدو کې یو مثبت ګام وباله او هیله یې څرګنده کړه چې د هوايي سوداګرۍ او اورګاډي لارو تر څنګ، د واخان دهلېز هم وکولای شي د سوداګرۍ او ترانزیت د وصل یوه مهمه لاره شي او له افغانستانه د چین له لارې اروپا ته وصل رامنځته کړي. نوموړي له چین څخه وغوښتل چې د واخان دهلېز پراختیا ته پاملرنه وکړي.

ښاغلي مهمند د چین سره مستقیمې سوداګریزې – اقتصادي اړیکې د افغانستان د اقتصاد او سوداګرۍ د ودې لپاره مهمې وبللې او زیاته یې کړه چې افغان سوداګر چې له چین سره سوداګري کوي، د کابل – ارومچي د الوتنو هرکلی کوي او له دې لارې به خپلو صادراتو ته، په ځانګړي ډول د جلغوزیو په برخه کې، دوام ورکړي. نوموړي له چین څخه د ویزو د ورکړې د آسانتیاوو او همداراز د تېر دوه کلونو په ترڅ کې د صادراتي توکو، په ځانګړي ډول د شکرپاره لپاره د تعرفو د تخفیف له امله مننه او قدرداني وکړه، او د دواړو هېوادونو د خصوصي سکتورونو ترمنځ د لا همکارۍ غوښتنه وکړه.

ښاغلي مهمند د چین د یووې ښار کې د افغان سوداګرو او شرکتونو د فعالیتونو یادونه وکړه او له د چین دولت او آریانا شرکت څخه یې غوښتنه وکړه چې د کابل – یوو لپاره هم په اونۍ کې یوه الوتنه ځانګړې کړي.

د آریانا هوايي شرکت رئیس وویل چې دوی به خصوصي سکتور ته لومړیتوب ورکړي او هر اړخیزه همکاري به ورسره وکړي.

د چین محترم سفیر وویل چې د افغانستان او چین ترمنځ سوداګرۍ ۱۹ سلنه ډېروالی موندلی او ژمنه یې وکړه چې د چین سفارت به له افغان خصوصي سکتور سره هر ډول همکاري وکړي.

 

 

 

 

 

 

ښاغلي توکل احمدیار، د افغانستان د سوداګرۍ او پانګونې اتاق عمومي رئیس، د ښاغلیو: خان محمد سرفراز باز د مشرتابه پلاوي د دارالانشاء رئیس، سید جاوید برهان د مشرتابه پلاوي د نړیوالو اړیکو رئیس، سلطان محمد صافي او ضیاءالدین اچکزی د مدیره پلاوي غړي، او میرزمان پوپل د عامل پلاوي د مالي او اداري مرستیال سرپرست په شتون کې، له ښاغلي عتیق الله مومن زاده د ننګرهار د سوداګرۍ او پانګونې اتاق رئیس او د یاد ولایت له یو شمېر مخکښو سوداګرو سره، د اتاق په مرکزي دفتر کې ولیدل، او د اوسنیو ستونزو او د سوداګرۍ د پراختیا په اړه یې بحث او نظرونه تبادله کړل.

ښاغلي مومن زاده د افغانستان د سوداګرۍ او ترانزیت په برخه کې له ځینو ګاونډیو هېوادونو سره پر شته ستونزو خبرې وکړې، او له عمومي رئیس څخه یې وغوښتل چې د افغانستان د سوداګرۍ د لا پراختیا لپاره، له سیمه ییزو او نړیوالو هېوادونو سره د لازمو اسانتیاوو برابرولو په برخه کې له اړوندو حکومتي ادارو سره ځانګړې پاملرنه وکړي.

ښاغلي توکل احمدیار، د ننګرهار د اتاق رئیس او د یاد ولایت سوداګرو ته د ښه راغلاست ویلو ترڅنګ، د سوداګرۍ اتاق یې د خصوصي سکتور او حکومت ترمنځ د ارتباط پُل وباله، او له ټولو ګاونډیو، سیمه ییزو او نړیوالو هېوادونو سره یې د افغانستان د ملي ګټو د ساتنې تر چتر لاندې د سوداګرۍ د پراختیا پر اهمیت ټینګار وکړ. نوموړي، له سیمې سره د افغانستان د سوداګریزو اړیکو ښه‌والی د هېواد د اقتصاد د ودې لپاره مهم وباله، او زیاته یې کړه چې د افغانستان د سوداګرۍ او پانګونې اتاق به تل هڅه وکړي څو د سوداګرو او پانګه‌والو ستونزو ته رسېدنه وشي او له بېلابېلو هېوادونو سره د سوداګرۍ، پانګونې او ترانزیت په برخه کې لا ډېرې اسانتیاوې برابرې شي.