د افغانستان د سوداګرۍ او پانګونې اتاق د مشرتابه پلاوي لومړي مرستیال ښاغلي محمد یونس مهمند، د ښاغلي خان محمد سرفراز باز د اتاق د مشرتابه پلاوي د دارالانشأ رئیس، په حضور کې د موبل او فرنیچر ټولنې له یو شمېر غړو سره وکتل او د دوی ستونزې یې واورېدې.

د موبل فرنیچر ټولنې مسؤلینو خپله لویه ستونزه د مالیې وزارت د عوایدو ریاست له خوا پر یاد سکتور د لوړو مالیاتو د وضعې موضوع یاده کړه او له اتاق څخه یې وغوښتل چې د یادې ستونزې د حل لپاره له اړوندو دولتي ادارو سره همغږي او جدي توجه وکړي.

ښاغلي مهمند، د موبل فرنیچر ټولنې غړو ته د ښه راغلاست ویلو ترڅنګ، د فرنیچر رول د هېواد د اقتصاد د ودې او د کار زمینې د برابرولو په برخه کې مهم وباله او دا یې یوه اصیل او پخوانۍ افغاني صنعت یاد کړ. نوموړي یادونه وکړه چې ډېر ژر به د خصوصي سکتور د ستونزو د مطرح کولو په موخه د حکومت له یو لوړپوړي پلاوي سره غونډه وشي، او له موبل فرنیچر ټولنې څخه یې وغوښتل چې خپلې ستونزې په واضحه توګه په یاده غونډه کې له دولتي چارواکو سره مطرح کړي.

ښاغلي مهمند، د کورنیو سوداګرو ترمنځ د ګډو پانګونو په پایله کې د موبل فرنیچر د یوې سترې تولیدي سهامي شرکت د جوړېدو پر اړتیا ټینګار وکړ او ډاډ یې ورکړ چې اتاق به له اړوندو حکومتي ادارو سره په همغږۍ، هغو سوداګرو ته چې غواړي په هېواد کې پانګونه وکړي، د ځمکې د برابرولو په برخه کې هر اړخیزه همکاري کوي.

د اتاق لومړي مرستیال، د موبل فرنیچر د تولیداتو د معرفي، د کورنیو پیرودونکو د جذب، او د بهرنۍ پانګونې د جلب لپاره، د فرنیچر د ځانګړو نندارتونونو جوړول ارزښتناک وباله، او له ټولنې یې وغوښتل چې خپلې ټولې ستونزې په لیکلي ډول اتاق ته وسپاري.

 

 

 

 

 

دغه مقدماتي تخنیکي ناسته د دې لپاره جوړه شوې وه چې د TIR سیستم له لارې قزاقستان ته د لومړۍ سوداګریزه محمولې د انتقال زمینه برابره شي. دا ناسته د افغانستان د سوداګرۍ او پانګونې اتاق د مدیره پلاوي غړي او د افغان-پاک ګډ اتاق رئیس ښاغلي خانجان الکوزي، د اتاق د عامل پلاوي د پالیسي او تخنیکي مرستیال ښاغلي محمد انور عارفي، د ترانسپورت وزارت د ځمکنۍ ترانسپورت آمر ښاغلي محمدي او یو شمېر ترانسپورتي شرکتونو د استازو په ګډون، د اتاق په مرکزي دفتر کې ترسره شوه.

ښاغلي الکوزي د TIR سیستم د ترانزیتي اسانتیاوو او د سیمې هېوادونو ته د صادراتو د زیاتوالي په برخه کې مهم رول بیان کړ او د خصوصي سکتور لپاره یې د دغه سیستم فعالول یوه عاجله اړتیا وبلله.

هغه د دې سیستم د ستونزو د حل غوښتنه وکړه او د TIR سیستم د پیاوړتیا په برخه کې یې د اتاق بشپړ ملاتړ څرګند کړ.

ښاغلي محمدي د هغو ناستو یادونه وکړه چې څو ورځې وړاندې یې د ازبکستان او قزاقستان له حکومتي چارواکو سره د TIR سیستم له لارې د محمولې د انتقال د بیا پيل په موخه ترسره کړې وې، او د افغانستان د سوداګرۍ او پانګونې اتاق څخه یې د دې سیستم د فعالولو په برخه کې د همکاریو غوښتنه وکړه.

د ترانسپورتي شرکتونو مسوولینو هم خپلې ستونزې بیان کړې او ډاډ یې ورکړ چې د خپلو مالونو د انتقال لپاره به له TIR سیسټم څخه استفاده کوي او لازمې همکارۍ به ترسره کوي.

 

 

 

 

 

ښاغلي خان جان الکوزی، د افغانستان د سوداګرۍ او پانګونې اتاق د مدیره پلاوي غړی او د افغان-پاک ګډ اتاق رئیس، د ښاغلي میر زمان پوپل، د اتاق د عامل پلاوي د مالي او اداري مرستیال سرپرست، او ښاغلي نقیب‌الله صافي، د افغان-پاک ګډ اتاق اجرائیوي رئیس، په حضور کې د سکرو صادرونکو له یوې ډلې سره د اتاق په مرکزي دفتر کې لیدنه وکړه او د دوی ستونزې یې واورېدې.

د سکرو صادرونکو خپلې عمده ستونزې د هېواد په بندرونو، په ځانګړي ډول تورخم او غلام خان کې د صادراتي مالونو د بندېدو او پاکستان ته د نه پرېښودو په برخه کې یادې کړې، او د اتاق مشرتابه پلاوي څخه یې وغوښتل چې د یادو ستونزو د حل په موخه له اړوندو دولتي ادارو سره ځانګړې پاملرنه او همغږي وکړي.

ښاغلي الکوزي د سکرو صادرونکو ته د ښه راغلاست ویلو ترڅنګ، د سوداګرۍ او پانګونې اتاق د ټولو سوداګرو ګډ کور او د حکومت او خصوصي سکتور ترمنځ د اړیکې پُل وباله او د سکرو رول یې د هېواد د صادراتو او اقتصاد په پیاوړتیا کې مهم وباله.

هغه له صادرونکو وغوښتل چې خپلې ستونزې په لیکلي بڼه اتاق ته وسپاري، ترڅو اتاق وکولای شي د اړوندو دولتي ادارو سره په همکارۍ د یادو ستونزو لپاره مناسبه حل‌لاره پیدا کړي.

ښاغلي میر زمان پوپل د سکرو د صادراتو د اسنادو د ترتیب پروسې په اړه معلومات ورکړل او لازمه لارښوونه یې وکړه. هغه زیاته کړه چې صادرونکي دې خپلې ستونزې اتاق ته په تحریري ډول وسپاري، او د افغانستان د سوداګرۍ او پانګونې اتاق د مشرتابه پلاوي او عامل پلاوي له لوري به له اړوندو دولتي ادارو سره په همغږۍ د تورخم بندر د یادې ستونزې د حل لپاره جدي هڅې وشي.

 

 

 

 

 

 

ښاغلي خان محمد سرفراز باز، د افغانستان د سوداګرۍ او پانګونې اتاق د مشرتابه پلاوي د دارالانشأ رئیس، له ښاغلي کارال، د یوناما دفتر د اقتصادي برخې مسؤل، او د هغه له مل پلاوي سره، د اتاق د مشرتابه پلاوي په دفتر کې، وکتل او د هېواد د خصوصي سکتور د پیاوړتیا په اړه یې بحث او نظرونه تبادله کړل.

ښاغلي باز، د ښاغلي کارال او د هغه د ټیم تود هرکلی وکړ، د یوناما دفتر له دوامداره همکاریو څخه یې مننه وکړه، او د اتاق له خوا د خصوصي سکتور د ودې، د طرحو، وړاندیزونو او ستونزو د شریکولو او د هغو د حل لپاره له حکومتي ادارو سره د تعامل په اړه تفصیلي معلومات ورکړل. نوموړي ډاډ ورکړ چې د افغانستان اسلامي امارت د خصوصي سکتور ټولو ستونزو ته په وخت رسېدنه کړې او په تېرو درې کلونو کې یې مختلفو سکتورونو ته د پام وړ سوداګریزې اسانتیاوې برابرې کړې دي.

ښاغلي باز، د هېواد اقتصادي وضعیت په ښه‌والي روان وباله او د خصوصي سکتور لاسته راوړنې یې د هېواد د ځان بساینې په برخه کې مهمې وبللې. هغه د هغو سکتورونو په اړه معلومات ورکړل چې افغانستان پکې د ځان‌بساینې پر لور روان دی، او د افغاني اسعارو ثبات او د هغو په تجارتي معاملو کې عامول یې د خصوصي سکتور او اوسني حکومت یو لوی پرمختګ وباله.

د دارالانشأ رئیس، د سړکونو جوړولو او د کورنیو او بهرنیو پانګوالو ترمنځ د ګډو پانګونو یادونه وکړه او دا ډول پانګونې یې د هېواد اقتصادي ودې او په ځانګړي ډول له ایران او پاکستان څخه د ایستل شویو مهاجرینو لپاره د کار زمینې برابرولو په برخه کې ارزښتناکې وبللې.

ښاغلي باز، افغانستان یې یو له وچې محاط هېواد وباله او د هېواد ټولې سوداګریزې راکړې ورکړې یې له ګاونډیو هېوادونو سره د ترانزیټ تړاو لرونکې وبللې. هغه په ځانګړي ډول له پاکستان سره د خصوصي سکتور مهمو ستونزو ته اشاره وکړه او د یوناما دفتر د اقتصادي مسؤل څخه یې وغوښتل چې د بانکي بندیزونو د لرې کولو او د افغان خصوصي سکتور د ستونزو په دایمي حل کې له اتاق سره همکاري وکړي.

ښاغلي کارال، د خصوصي سکتور د ستونزو او د افغان چلوونکو لپاره د ویزو د ورکړې په برخه کې د اسانتیاوو د رامنځته کولو یادونه وکړه چې څه موده وړاندې د یوناما له خوا د پاکستان له حکومتي چارواکو سره مطرح شوې وه. نوموړي ډاډ ورکړ چې د افغان سوداګرو د دستونزو د حل او د نړیوالو پروګرامونو سره د شریکولو په برخه کې به هر اړخیزه همکاري وکړي.

 

 

 

 

 

 

یاده ناسته چې د اتاق په مرکزي دفتر کې وشوه، په کې ښاغلي خیرالدین مایل احمديد مدیره پلاوي تجارتي مرستیال، شیرین آغا سخي د مدیره پلاوي مالي رئیس، انجنیر سید جاوید برهان د مدیره پلاوي د نړیوالو اړیکو رئیس، خانجان الکوزی د مدیره پلاوي غړی او د افغان-پاک ګډ اتاق رئیس، ذکریا بریالی د مدیره پلاوي غړی، میرزمان پوپل د عامل پلاوي مالي او اداري سرپرست مرستیال، محمد انور عارفي د عامل پلاوي د پالیسۍ مرستیال، جان آقا نوید د عامه اړیکو آمر او جبران حکیمي د سوداګرۍ پراختیا آمر ګډون کړی و.

ښاغلي مایل احمدي، ښاغلي تي تي هیبار کاري ته ښه راغلاست وویلو او د اتاق د ۹۴ کلنو فعالیتونو، د ۲۸ ولایتونو او ۲ ولسوالیو لپاره د خدماتو وړاندې کولو په اړه معلومات ورکړل، او له ILO د همکارۍ مننه یې وکړه.

انجنیر سید جاوید برهان د اتاق او ILO ترمنځ د همکارۍ پر اهمیت خبرې وکړې او د اتاق له لوري د نړیوالو سازمانونو لپاره پر وړاندیز شویو طرحو یې ټینګار وکړ.

هغه زیاته کړه چې د اتاق مشرتابه غواړي د ILO پروګرامونه د اتاق په همکارۍ پلی شي.

ښاغلو شیرین آغا سخي او ذکریا بریالی هم د ناستې په اړه خپلې ګټورې څرګندونې وکړې.

ښاغلي میرزمان پوپل د اتاق د فعالیتونو، د صادراتو پروسې، د مبدأ سندونو، ملي او نړیوالو نندارتونونو، د هوایي دهلیز له لارې صادراتو، اروپايي اتحادیې ته صادرات، د اروپایي هیوادونو معیارونه، او د خصوصي سکتور لپاره د بېلابېلو خدمتونو په اړه مفصل معلومات وړاندې کړل.

ښاغلي تي تي له اتاق سره د دې لیدنې له امله خوښي وښوده او زیاته یې کړه چې له افغانستان سره د ماموریت له پیله یې غوښتل دا لیدنه ترسره شي.

هغه له اتاق مننه وکړه چې دا فرصت یې برابر کړ تر څو د ILO برنامې د اتاق له مشرتابه سره شریکې کړي.

هغه اتاق د ILO یو ښه او دوامدار شریک وباله او ژمنه یې وکړه چې د خصوصي سکتور وړاندیزونه به د نړیوالو سازمانونو، په ځانګړي ډول یوناما سره شریک او ملاتړ به ترې وشي، او همداراز د اروپايي هیوادونو ته د صادراتو پراخولو او د هوایي دهلیز پروګرام د ملاتړ لپاره به لازمې آسانتیاوې برابروي.

په پای کې، د ښاغلي خانجان الکوزي له خوا د خبرو جمع بندي وشوه او د اتاق او د کار نړیوال سازمان ترمنځ د یو تخنیکي کمیټې د جوړېدو، د همکاریو پراختیا او د ګډو پروژو د تطبیق لپاره ټینګار وشو.