د افغانستان د سوداګرۍ او پانګونې اتاق د رهبري پلاوي غړي، ښاغلي: آرين زلګی عظیمي د پانګونې مرستيال، عنايت الله صدیق‌زي د خدماتو مرستيال، ميرا جان سليمان خيل د پالیسي او د حکومت سره د اړیکو مرستيال، او ذبیح الله عمرخيل دارالانشای رئیس، د يو شمېر لوړ پوړو حکومتي چارواکو او د هېواد د نامتو سوداګرو په شتون کې، د صنايعو او کانونو د اتاق د نوې مشرتابه د معرفۍ په مراسمو کې چې په کابل ګرند هوټل کې ترسره شول، ګډون وکړ.

ښاغلي محمد ولي امیني، د افغانستان د سوداګرۍ او پانګونې اتاق د عامل رئيس، د اتاق په استازيتوب د افغانستان د کانونو د اهميت او په ملي اقتصاد کې د کانونو د مثبتو اغېزو په اړه وينا وکړه او زياته يې کړه: افغانستان د لويو کانونو او بډایو طبيعي زېرمو په لرلو سره د سيمې په کچه مخکښ هېواد ګڼل کېږي، چې د حکومت له لوري د معیاري استخراج ملاتړ کولای شي د هېواد د اقتصادي ودې او د هېوادوالو لپاره د کارموندنې په برخه کې مهم رول ولوبوي. نوموړي صنعت او سوداګري د يو بل ممد وبلل او د سوداګرۍ او پانګونې اتاق او د صنايعو او کانونو اتاق ترمنځ همکاري یې د سوداګرۍ د پراختيا او د پانګونې د جلبولو لپاره مهمه وبلله.

 

 

 

ښاغلی آرین زلگی عظیمي، د افغانستان د سوداګرۍ او پانګونې اتاق د پانګونې مرستیال، «د افغانستان د سوداګرۍ د پرمختګ او د اړیکو د رامنځته کولو په نړیواله غونډه کې چې په ترکیه، استانبول ښار کې جوړه شوې وه، آنلاین ګډون وکړ.

ښاغلي عظیمي د خصوصي سکتور د ستونزو او لاسته راوړنو په اړه د څو کلونو په اوږدو کې خبرې وکړې او زیاته یې کړه: د افغانستان سوداګري د څو هېوادونو سره د پخوا په پرتله ښه شوې او د منځنۍ آسیا له هېوادونو څخه د اروپايي هېوادونو پر لور د افغان سوداګریزو توکو لپاره نوې لارې پرانیستل شوې دي.

نوموړي همدارنګه یادونه وکړه چې د افغانستان اوسنی حکومت د پانګه‌والو لپاره سوداګریزو اسانتیاوو ته پام کړی دی.

ښاغلي عظیمي د افغان سوداګرو او د بېلابېلو هېوادونو د سوداګرو ترمنځ د ګډو پانګونو په ځانګړې توګه د انرژۍ د تولید او نورو اقتصادي سکتورونو په برخه کې خبرې وکړې او د افغانستان سوداګري یې له نورو هېوادونو سره په پراختیا کې وبلله. نوموړي د هېواد پر کچه د امنیت ټینګښت او په ادارو کې د فساد له منځه وړل یې د ګډو پانګونو لپاره ښه موقع وګڼله.