ښاغلي محمد یونس مهمند، د افغانستان د سوداګرۍ او پانګونې اتاق لومړی مرستیال، د اتاق د حقوقي سلاکار ښاغلي عبدالسلام کوهي په حضور کې، د کار او ټولنیزو چارو وزارت د تخنیکي زده کړو انسټیټیوټ او د افغانستان د ملي کارکوونکو ادارې (امکا) له لوري، د امکا ادارې د نوي سرپرست د معرفي په مناسبت، د دې انسټیټیوټ د کنفرانسونو په تالار کې جوړ شوي محفل ته د هېواد د کارفرمایانو او د خصوصي سکتور د فعالینو په استازیتوب ګډون وکړ او د افغانستان د سوداګرۍ او پانګونې اتاق د رول په اړه، چې د خصوصي سکتور رښتینی استازی دی، د هېواد د اقتصادي ودې او د کاري فرصتونو د ایجاد لپاره، د ۹۴ کلونو په اوږدو کې، وینا وکړه.

ښاغلي مهمند، د افغانستان د سوداګرۍ او پانګونې اتاق د فعالیتونو او د خصوصي سکتور د اقتصادي ودې او پرمختګ په برخه کې د فعال رول په اړه تفصیلي معلومات وړاندې کړل. نوموړي د افغانستان د سوداګرۍ او پانګونې اتاق ۹۴ کلنې ویاړلې تاریخچې او د دولت، کارفرما او کارګر د ټولنیز مثلث د شریک په توګه د کارآفرینۍ او د کاري فرصتونو د ایجاد په برخه کې د هغې د ونډې یادونه وکړه. همداراز، ژمنه یې وکړه چې اتاق به له خپلو دواړو ټولنیزو شریکانو سره دغه همکارۍ ته دوام ورکړي.

 

 

 

 

 

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په کابل کې د چین د ولسي جمهوریت له سفیر ښاغلي جاوشینګ سره د دغه هېواد په سفارت کې وکتل.

په دې غونډه کې د ننګرهار د سوداګرۍ او پانګونې اتاق لمړی معاون حضرت علی هډه وال، د اتاق عامل پلاوي مالی او اداری سرپرست مرستیال ښاغلي میرزمان پوپل، چین ته د صادراتو په برخه کې د اتاق ستر سلاکار ښاغلي سردار ولي پښتون او د اتاق د نړیوالو اړیکو د دیپارتمنت مسوول ښاغلي عبدالمتین غالب هم حضور درلود.

ښاغلي مهمند، د افغانستان له خصوصي سکتور سره په ځانګړې توګه افغان سوداګرو ته د چین د ویزې د اسانتیا په برخه کې د چین د ولسي جمهوریت د سفارت او د دغه هېواد د بهرنیو چارو وزارت له همکاریو مننه وکړه. نوموړي د افغانستان او چين ترمنځ د سوداګريزو اړيکو پر پراختيا ټينګار وکړ او د افغانستان د کرنيزو محصولاتو په ځانګړي ډول شکرپاره، وچې مېوې، زعفرانو او نورو طبي بوټو صادراتو ته يې پاملرنه وکړه.

ښاغلي مهمند، په کابل کې د امام ابوحنيفه (رح) د څلورم ملي او نړيوال نندارتون د جوړېدو يادونه هم وکړه او د چين له سفير څخه يې وغوښتل چې چينايي شرکتونه او پانګوال په ځانګړي ډول هغه شرکتونه چې د برېښنايي انرژۍ په برخه کې پانګونه کوي، په دغه نندارتون کې ګډون ته وهڅوي. نوموړي دغه پروګرام د دواړو هېوادونو ترمنځ د سوداګريزو اړيکو د پراختيا لپاره يو ښه فرصت وباله.

همدارنګه نوموړي کندهار ولایت ته د چین د سفیر وروستی سفر مثبت و ارزاوه او د هېواد نورو ولایتونو ته یې د چین د سفیر د سفر په اړه د افغانستان د خصوصي سکټور د لېوالتیا په اړه معلومات ورکړل.

ښاغلي مهمند، بدخشان ولایت ته د واخان دهلېز د لیدنې په موخه د خصوصي سکتور د پلاوي د سفر په اړه خبرې وکړې او د دواړو هېوادونو د سوداګرو لپاره یې د واخان پولې په اوږدو کې د یوه کوچني بازار د جوړولو وړاندیز وکړ. دغه راز هغه له پاکستان سره د سرحدي خنډونو په لرې کولو کې د چین د خصوصي سکتور د همکارۍ غوښتنه وکړه، څو د تورخم له لارې د سوداګرۍ او ټرانزیټ کچه لوړه شي.

د چين د ولسي جمهوريت سفير ښاغلي جاوشينګ له افغانستان سره د خصوصي سکټور د همکارۍ او ملاتړ د دوام ډاډ ورکړ او په يادو برخو کې يې د خپل هېواد پر ژمنتيا ټينګار وکړ. نوموړي دغه راز ویلي، چې چین په افغانستان کې پانګونې ته لېواله دی او هڅه به وکړي، چې د امام ابوحنیفه (رح) نندارتون ته چینايي شرکتونه او پانګوال دعوت کړي.

 

 

 

 

ښاغلی محمد یونس مهمند، د افغانستان سوداګرۍ او پانګونې اتاق لومړی مرستیال، او ښاغلی خانجان الکوزی، د مشرتابه پلاوي غړی او د افغان ـ پاک ګډ اتاق رئیس، د افغانستان لپاره د پاکستان له ځانګړي استازي ښاغلي صادق خان او په کابل کې د پاکستان له سفیر عبیدالرحمان نظاماني سره وکتل.

په دې ناسته کې د افغانستان او پاکستان ترمنځ د سوداګریزو اړیکو د پراخولو او د شته ستونزو د حل په اړه خبرې وشوې.

ښاغلي مهمند، د ښاغلي صادق خان راتګ ته ښه راغلاست ووايه او د سوداګرۍ، ترانزیت، د شته ستونزو د حل، او د خصوصي سکتور لپاره د اسانتیاوو پر رامنځته کولو ټینګار وکړ. نوموړي د پاکستان له ځانګړي استازي وغوښتل، چې د دواړو هېوادونو ترمنځ سوداګري له سیاست څخه جلا وساتي، ترڅو د خصوصي سکتور غړي وکولی شي خپلې سوداګریزې تبادلې په خوندي توګه ترسره کړي.

همداراز، ښاغلي مهمند د افغانستان او پاکستان ترمنځ د سرحدي لارو اقتصادي اهمیت ته اشاره وکړه او وویل، چې دا لارې د مرکزي آسیا، جنوبي آسیا، او منځني ختیځ د لوی ترانزیتي دهلیز یوه مهمه برخه ده. هغه زیاته کړه، چې د دغو لارو تړل کولی شي د دواړو هېوادونو خصوصي سکتور ته ستر اقتصادي زیان ورسوي.

ښاغلي مهمند له پاکستاني استازي څخه وغوښتل، چې د افغانستان او پاکستان ترمنځ د سرحدي لارو د تلپاتې خلاصون لپاره جدي هلې ځلې وکړي.

همداراز، ښاغلي الکوزي د افغانستان او پاکستان ترمنځ د سوداګریزو مالونو د تبادلې لپاره د سرحدونو خلاصون خورا مهم وباله او له پاکستاني لوري یې وغوښتل، چې له هغو اقداماتو ډډه وکړي، چې د دواړو هېوادونو خصوصي سکتور ته زیان رسوي.

ښاغلي صادق خان د افغانستان او پاکستان ترمنځ د سوداګریزو اړیکو د پیاوړتیا او د سوداګریزو لارو د پرانیستو لپاره د سوداګرۍ هڅې وستایلې. هغه ژمنه وکړه، چې د افغانستان د خصوصي سکتور ستونزې او وړاندیزونه به د پاکستان حکومت ته ورسوي.

 

 

 

 

د سیمه‌ییزو اقتصادي همکاریو نړیوال کنفرانس د ترکمنستان په عشق آباد ښار کې د افغانستان د سوداګرۍ او پانګونې اتاق د عمومي رئیس ښاغلي توکل احمدیار، د ترکمنستان د ملي رهبر، د افغانستان د برښنا شرکت رئیس، د نفتو اتحادیې رئیس ښاغلي سید کریم آغا، د سیمې د دولتي او خصوصي سکتور استازو په ګډون د یوې ورځې لپاره ترسره شو.

دا کنفرانس د اقتصادي تعاملاتو د پراختیا، سوداګریزو اړیکو د پیاوړتیا، د ګډو پانګونو د جذب، سیمه‌ییز اتصال او د (تاپي) په څېر د لویو پروژو د تطبیق په موخه د ترکمنستان له لوري تنظیم شوی وو.

د ترکمنستان ملي مشر (تاپي) د سیمې له سترو پروژو وبلله او د افغانستان جغرافیوي موقعیت یې د دې پروژې د تطبیق لپاره مهم یاد کړ. هغه له نړیوال بانک، د آسیایي پرمختیایي بانک او نورو بنسټونو وغوښتل چې د دې پروژې د مالي ملاتړ په برخه کې مرسته وکړي.

د افغانستان د سوداګرۍ او پانګونې اتاق عمومي رئیس د دې کنفرانس هرکلی وکړ او دا یې د افغانستان او ترکمنستان د خصوصي سکتور ترمنځ د اعتماد جوړولو، سوداګریزو اړیکو پراخولو او اقتصادي ودې لپاره ارزښتناک وباله. هغه له بېلابېلو هېوادونو د عامه او خصوصي سکتور له استازو سره د پانګونې پر فرصتونو خبرې وکړې او د راتلونکي لپاره یې د دې ډول کنفرانسونو د تنظیم وړاندیز وکړ.

 

 

 

 

ښاغلي محمد یونس مهمند، د افغانستان د سوداګرۍ او پانګونې اتاق لومړی مرستیال، د ښاغلي خان جان الکوزي، د مشرتابه پلاوي غړي او د افغان-پاک ګډ اتاق رئیس، او ښاغلي سردار ولي پښتون، د اتاق لوړپوړي سلاکار، په حضور کې له ښاغلي نورآقا ابراهیمي، د میدان-وردګ د سوداګرۍ او پانګونې اتاق له رئیس او د مشرتابه یو شمېر غړو سره په مرکزي دفتر کې وکتل او د هغوی پر ستونزو یې بحث او نظرونه تبادله کړل.

ښاغلي ابراهیمي د خصوصي سکتور د ودې او د هغوی د ستونزو د حل په برخه کې د میدان-وردګ اتاق لاسته راوړنې او فعالیتونه یاد کړل او د افغانستان د سوداګرۍ او پانګونې اتاق مشرتابه یې وغوښتل چې د پانګونو د زیاتوالي او د خصوصي سکتور د ستونزو د حل په برخه کې ورسره همکاري وکړي.

ښاغلي مهمند، د میدان-وردګ د سوداګرۍ او پانګونې اتاق رئیس او د مشرتابه پلاوي ته د ښه راغلاست ویلو تر څنګ، د یوې همغږۍ کمیټې پر جوړولو ټینګار وکړ، تر څو د خصوصي سکتور وړاندیزونه او ستونزې د یاد ولایت له سیمه‌ییزو چارواکو سره شریکې کړي. نوموړي د کرنیزو محصولاتو د ودې، د سړو خونو د جوړولو، او د تازه او وچو میوو د صادراتو د زیاتوالي لپاره د کنفرانسونو او روزنیزو برنامو پر ارزښت ټینګار وکړ او ډاډ یې ورکړ چې د افغانستان د سوداګرۍ او پانګونې اتاق به د یاد ولایت د سوداګرو د ستونزو د حل لپاره هر اړخیزه همکاري کوي.