د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د اتاق د عامل پلاوي مالي او اداري مرستیال سرپرست ښاغلي میر زمان پوپل، د پالیسي او تخنیکي مرستیال ښاغلي محمد انور عارفي او ګڼو خبریالانو په شتون کې، د یوې خبري ناستې له لارې د روسیې د تاتارستان جمهوریت ته د اتاق د مشرتابه پلاوي د سفر لاسته راوړنې اعلان کړې.
ښاغلي مهمند د کنفرانس ګډونوالو ته ښه راغلاست ووایه، او د اتاق د مشرتابه پلاوي د یاد سفر او د تاتارستان د اقتصادي سوداګریز فورم د ګډون په اړه یې رسنیو ته معلومات ورکړل. هغه زیاته کړه: د روسیې د اقتصادي فورم د پای مراسمو پر مهال، د افغانستان د سوداګرۍ او پانګونې اتاق او د روسیې د سوداګرۍ او صنایعو اتاق ترمنځ د همکارۍ تفاهملیک لاسلیک شو. دغه تفاهملیک د ترانزیتي اسانتیاوو رامنځته کولو، د دواړو هېوادونو د خصوصي سکتور ترمنځ د ګډو نندارتونونو، سوداګریزو غونډو، په افغانستان کې په ځانګړي ډول د کانونو، بانکدارۍ او نورو سکتورونو کې د ګډو پانګونو د جلب، او د ویزو د صادرولو پروسې د اسانتیا لپاره ترتیب شوی.
ښاغلي مهمند افغانستان د منځنۍ آسیا او جنوبي آسیا د ترانزیتي اړیکو نقطه وبلله او ټینګار یې وکړ چې د افغانستان د سوداګرۍ او پانګونې اتاق د هېواد له ملي ګټو سره سم د سیمې او نړۍ له ټولو هېوادونو سره د سوداګریزو اړیکو د پراختیا لپاره هڅې کوي. هغه زیاته کړه چې د خپل سفر پر مهال چې د روسیې د تاتارستان جمهوریت د قازان ښار ته ترسره شوی و، د تاتارستان لومړي وزیر ژمنه وکړه چې د افغان صادراتي توکو لپاره به د خپلو ګمرکونو په کچه ترجیحي تعرفې رامنځته کړي.
ښاغلي مهمند همداراز د آلمان هېواد سره د ګډ سوداګریز اتاق د جوړولو لپاره د اتاق د هڅو یادونه وکړه، او د داسې اتاقونو جوړول یې د هېوادونو ترمنځ د سوداګرۍ د اسانتیا لپاره مهم وبلل. هغه له ټولو سیمهییزو سوداګرو او پانګوالو وغوښتل چې د امام ابوحنیفه (رح) په څلورم ملي او نړیوال نندارتون کې ګډون وکړي.
د اتاق لومړي مرستیال له ټولو رسنیو مننه وکړه چې د افغانستان د خصوصي سکتور لاسته راوړنې او ستونزې پر وخت خپروي، او د هېوادونو ترمنځ د سوداګریزو اړیکو د ټینګېدو په برخه کې یې د رسنیو رول مهم وباله.
ښاغلي پوپل د تاتارستان د اقتصادي فورم پر مهال د لاسلیک شویو تفاهملیکونو په اړه معلومات وړاندې کړل، او یادونه یې وکړه چې د یاد سفر پر مهال د اتاق مشرتابه پلاوي له هغو افغان متشبثینو سره هم لیدنې درلودې چې په مسکو کې مېشت دي، او د دوی د ستونزو د حل په برخه کې یې د اتاق د همکارۍ ډاډ ورکړ.
سهشنبه، د غویی ٣٠مه، ۱۴۰۴
د افغانستان د سوداګرۍ او پانګونې اتاق د عامل پلاوي د مالي او اداري مرستیال سرپرست ښاغلي میرزمان پوپل، د اکتید مؤسسې له سلاکار ښاغلي جوناتن روبینسن او د هغه له ملګرو سره په خپل کاري دفتر کې ولیدل او د دواړو لورو ترمنځ د ګډو همکاریو پر امکاناتو بحث او نظریات تبادله کړل.
ښاغلي روبینسن، د اکتید مؤسسې د فعالیت ساحې او پلي شویو پروژو په اړه چې میکانیزه کرنه، د مالدارۍ سکتور پیاوړتیا، او د هېواد د صادراتو وده پکې شامله ده، ښاغلي پوپل ته معلومات وړاندې کړل او ترې یې غوښتنه وکړه چې په دې برخو کې له مؤسسې سره د همکاریو زمینه برابره کړي.
ښاغلي پوپل، د اکتید مؤسسې سلاکار او د هغه ملګرو ته د ښه راغلاست ویلو ترڅنګ، د مؤسسو رول د کوچنیو او منځنیو متشبثینو د وده او د کاري فرصتونو د ایجاد په برخه کې ارزښتناک وباله او غوښتنه یی وکړه چې د یادو متشبثینو د ملاتړ په برخه کې له اتاق سره همکاري وکړي. نوموړي ډاډ ورکړ چې د ټولګټو بنسټیزو پروژو په پلي کېدو کې به د سوداګرۍ او پانګونې اتاق هر اړخیزه همکاري کوي او د اتاق او یادې مؤسسې ترمنځ د دوامدارو ناستو پر ضرورت یې ټینګار وکړ.
سهشنبه، د ۱۴۰۴ د غویی ۳۰مه
د افغانستان د سوداګرۍ او پانګونې اتاق د عامل پلاوي د پالیسي او تخنیکي مرستیال ښاغلي محمد انور عارفي، د نړیوالو اړیکو مسؤل ښاغلي عبدالمتین غالب، او د صادراتو او پانګونې د پراختیایي اړیکو مسؤل ښاغلي ګل احمد حاجي زاده په شتون کې، د قزاقستان د سوداګرۍ او صنایعو د اتاق له عامل رئیس ښاغلي چنګیز خان ممانوف او د هغه له ملګري ټیم سره آنلاین لیدنه وکړه او د دواړو هېوادونو تر منځ د سوداګریزو اړیکو د پراختیا په اړه یې بحث او نظرونه تبادله کړل.
ښاغلي عارفي، قزاقستان د افغانستان یو ښه ملګری او د نیکو سوداګریزو اړیکو لرونکی هېواد یاد کړ او د دواړو هېوادونو د خصوصي سکتور ترمنځ د ګډو نندارتونونو او سوداګریزو ناستو د جوړولو پر اړتیا ټینګار وکړ. نوموړي، د افغان سوداګرو عمده ستونزې لکه د قزاقستان له لورې پر افغان صادراتي توکو، په ځانګړې توګه پر تازه مېوو، د لوړو ګمرکي تعرفو وضع کول، د معیاري سړې خونې نشتوالی د قزاقستان په ګمرکونو کې، او د بانکي اسانتیاوو نشتوالی یاد کړل او له ښاغلي چنګیز خان څخه یې وغوښتل چې د قزاقستان له حکومتي ادارو سره په همغږۍ د یادو ستونزو د حل لپاره ځانګړې پاملرنه وکړي.
ښاغلي عارفي، د افغان خصوصي سکتور له لورې له قزاق سوداګرو سره د ګډو پانګونو د لیوالتیا یادونه وکړه او د قزاقستان له اړوندو ادارو څخه د افغان سوداګرو لپاره د ویزې د اسانتیاوو نشتوالی یې د دواړو هېوادونو ترمنځ د سوداګرۍ او پانګونې د خنډونو په توګه یاد کړ. نوموړي له د قزاقستان د سوداګرۍ او صنایعو د اتاق له رئیس څخه وغوښتل چې د هغه هېواد سوداګر د امام ابوحنیفه (رح) په ملي او نړیوال نندارتون کې د ګډون لپاره وهڅوي.
ښاغلي چنګیز، د اتاق د عامل پلاوي د پالیسي او تخنیکي مرستیال وړاندیزونه واورېدل او د قزاق سوداګرو له خوا په افغانستان کې د مختلفو اقتصادي سکتورونو لپاره د پانګونې د علاقې یادونه وکړه. نوموړي ژمنه وکړه چې قزاق سوداګر به د امام ابوحنیفه (رح) په ملي او نړیوال نندارتون کې د ګډون لپاره تشویق کړي، د دواړو هېوادونو د اتاقونو د مشرانو ترمنځ به آنلاین ناسته ترسره شي، او د نږدې راتلونکي لپاره به د افغان ـ قزاق خصوصي سکتور ترمنځ د سوداګرۍ غونډه د قزاقستان په الماتا ښار کې جوړه کړي. نوموړي له ښاغلي عارفي څخه وغوښتل چې د هغو افغان سوداګرو نوملړ ورسره شریک کړي چې غواړي له قزاق سوداګرو سره په مختلفو اقتصادي برخو کې ګډې پانګونې وکړي.
سهشنبه، د ۱۴۰۴ د غویی ۳۰مه
د افغانستان د سوداګرۍ او پانګونې اتاق مشرتابه پلاوی: ښاغلي خان محمد سرفراز باز د اتاق د مشرتابه پلاوي د دارالانشا رئیس، ښاغلی سید پرویز سادات هوفیانی د مشرتابه پلاوي غړی او ښاغلی میرزمان پوپل د عامل پلاوي د مالي او اداري مرستیال سرپرست، روسیې هېواد ته د خپل سفر په ترڅ کې، د مسکو ښار د افغان متشبثینو له سوداګریزو مارکیټونو لیدنه وکړه او د هغوی ستونزې یې واورېدې.
افغان متشبثینو د اتاق مشرتابه پلاوي ته ښه راغلاست وویلو او خپلې لویې سوداګریزې ستونزې یې ورسره شریکې کړې. دوی له مشرتابه پلاوي وغوښتل چې د دغو ستونزو د حل لپاره جدي پاملرنه وکړي.
ښاغلي سرفراز باز، د مسکو مېشتو افغان متشبثینو ستونزې په دقت واورېدې، د هېوادونو په اقتصادي ودې او بیا رغونه کې د سوداګرو رول مهم وباله، او ډاډ یې ورکړ چې د روسیې له حکومت سره د لاسلیک شوې همکارۍ تفاهمنامې پر بنسټ، به یادې ستونزې د اړوندو حکومتي مسوولینو سره شریکې کړي. نوموړي همداراز افغان سوداګر د افغانستان په بېلابېلو اقتصادي سکتورونو کې پانګونې ته وهڅول.
ښاغلي پوپل، له ټولو افغان متشبثینو نه چې په مسکو کې مېشت دي غوښتنه وکړه چې ټولې ستونزې او وړاندیزونه یې په لیکلي بڼه اتاق ته وسپاري. تر څو اتاق وکولای شي د یادو ستونزو په حل کې د هېواد اړوندو حکومتی ادارو سره په همغږي کې عملي ګامونه پورته کړي.
سې شنبې، د غویی ۳۰مه، ۱۴۰۴
د ولايتي اتاقونو خبرونه
د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د اتاق مدیره پلاوي غړي ښاغلي خان جان الکوزي، د ننګرهار ولایت مقام مرستیال، د یاد ولایتي اتاق د مدیره پلاوي غړو، د ننګرهار یو شمیر سوداګرو او پانګوالو په حضور کې، د ننګرهار ولایتي اتاق مدیره پلاوي غړو ترمنځ ټاکنې ترسره چې په پایله کې ښاغلي عتیق الله مؤمن زاده د ننګرهار سوداګرۍ او پانګونې اتاق نوي رئیس په توګه انتخاب او معرفي شو.
ښاغلي مهمند د ننګرهار د سوداګرۍ او پانګونې اتاق پخواني رئیس ښاغلي ګلمراد عرب د خپلې دندې په موده کې د خصوصي سکتور د ستونزو د حل په برخه کې د هغه د ښو هڅو ستاینه وکړه او له نوي رئیس څخه یې غوښتنه وکړه چې د هېواد د خصوصي سکتور د پياوړتيا او په ځانګړې توګه د ننګرهار ولايت د پياوړتيا په برخه کې لا ډېره همکاري وکړي.
ښاغلي مهمند د هېواد د سوداګرۍ په برخه کې پرمختګونه وستایل او د ختیځو ولایتونو له سوداګرو یې وغوښتل چې د ننګرهار د سوداګرۍ اتاق له نوي رئیس سره ښه همکاري وکړي.
د ننګرهار د والي مرستیال له ولایتي ادارې سره د خصوصي سکتور د ستونزو د شریکولو او د ختیځو ولایتونو د خصوصي سکتور د غړو د ویاړلو په خاطر د ښاغلي ګل مراد عرب د فعالیتونو او لاسته راوړنو ستاینه وکړه او د خصوصي سکتور پر یووالي یې ټینګار وکړ.
ښاغلي مؤمن زاده په ده باندی د ننګرهار ولایت د سوداګرۍ او پانګونې اتاق مدیره پلاوي غړو، سوداګرو او پانګوالو باور وستایه او په ختیځ زون کې یې د خصوصي سکتور د پیاوړتیا په برخه کې د لا زیاتو هلو ځلو ډاډ ورکړ.
دوشنبه، کب ۷مه، ۱۴۰۲
د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند تورخم ته د خپل کاري سفر په ترڅ کې، په داسی حال کې چې د اتاق مدیره پلاوي غړي ښاغلي خان جان الکوزي او د ننګرهار ولایتي اتاق رئیس ښاغلي ګل مراد عرب يې ملتیا کوله د تورخم څخه لیدنه ترسره او د افغان سوداګرو ستونزې يې د تورخم له مسؤلینو سره شریکې کړې.
ښاغلي مهمند په تورخم کې د وارداتي او صادراتي اموالو لېږد رالېږد ته اسانتیاوې،د ګمرک او افغانستان بانک په څلرویشت ساعته خدماتو ټینګار،وارداتي کانتینرو کې د صادراتي اموالو بېرته لېږد مخنیوي،د اموالو د زیات وزن ښودلو تلې ستونزې اساسي حلول،خصوصي بانک فعالیت ته زمینه سازي او په یوشمېر نورو سوداګریزو موضوعاتو خبرې وکړې او په یادو برخو کې يې د عملي ګامونو پورته غښتنه وکړه.
په دغه ناسته کې د ملي سوداګرو یوشمېر استازو هم ګډون کړی و، چې د صادراتي او وارداتي اموالو په محصول او نورو برخو کې شته ستونزې یې له مسولینو سره شریکې کړې او مسؤلینو هم یادو ستونزو د حل لارو پیداکولو او تورخم کې د لازمو آسانتیاوو رامنځته کولو ژمنه وکړه.
یکشنبه، کب ۶مه، ۱۴۰۲
د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند د کندز ولایتي اتاق رئیس ښاغلي ګل محمد رجب زاده او د سمنګان ولایت د یو شمیر سوداګرو او پانګوالو په ملتیا د سمنګان له والي سره لیدنه ترسره او په سمنګان ولایت کې د سوداګرۍ او پانګونې اتاق د جوړولو، د افغانستان د سوداګرۍ او پانګونې اتاق هڅې او فعالیتونو او د سمنګان ولایت د سوداګرو او پانګوالو ستونزو ته د حل لارو پیداکولو په اړه يې خبرې اترې وکړې.
ښاغلي مهمند سمنګان د هېواد په شمال زون کې د مهم جغرافیايي موقعیت په لرلو سره یو له کرنیزو ولایتونو څخه یاد کړ او د سمنګان ولایت خصوصي سکتور ته د سیمه ییزې ادارې خدمات وړاندی کول او هڅې وستایلې.
ښاغلي مهمند د سمنګان د ولایتي اتاق د جوړېدو د پرېکړې یادونه وکړه او د دغه ولایت له سوداګرو او پانګوالو یې وغوښتل چې په دغه ولایت کې د اتاق د جوړیدو برخه کې همکاري وکړي.
نوموړي د دغه ولايت د کرنيزو توليداتو په اړه خبرې وکړې او د دغه ولايت له خلکو يې وغوښتل چې د کورنيو توليداتو په کارولو سره د دغه ولايت په وده او پرمختګ کې خپل رول ولوبوي.
د سمنګان والي د دغه ولایت د انکشافي پلانونو په اړه خبرې وکړې او په سمنګان ولایت کې یې د سوداګرۍ او پانګونې اتاق جوړېدل د سوداګرۍ د پراختیا او د سوداګرۍ او پانګونې د خدمتونو د اسانتیا په برخه کې یو مهم ګام وباله.
نوموړي د خصوصي سکتور سره د سمنګان ولایت مقام د هر اړخیزو همکاریو ډاډ ورکړ.
چهارشنبه، سلواغې ۲۵مه، ۱۴۰۲
د عمومي ریس ژوندلیک
