د افغانستان د سوداګرۍ او پانګونې اتاق د سوداګریزو-اقتصادي اړیکو د پراختیا، د پانګونې فرصتونو د پېژندنې او د پانګوالو د هڅولو په موخه، د ازبیکستان د صنعت او ساختماني موادو د اتحادیې له رئیس ښاغلي بختیار بابا قلوف او د هغه له پلاوي سره، د اتاق په کنفرانس هال کې ناسته ترسره کړه.

په دې ناسته کې، د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د اتاق د نړیوالو اړیکو رئیس ښاغلي سید جاوید برهان، د اتاق غړي او د افغان-پاک اتاق رئیس خانجان الکوزی، د مدیره پلاوي غړي محمد داود یوسفزی او سید پرویز سادات هوفیانی، د غضنفر ګروپ رئیس اسماعیل غضنفر، د اتاق د عامل پلاوي د پالیسي او تخنیکي چارو مرستیال محمد انور عارفي، او د ساختماني، بریښنایي وسایلو، قیمتي او نیمه قیمتي ډبرو او وچو مېوو د اتحادیو رئیسانو ګډون درلود.

ښاغلي مهمند، د ازبیکستاني سوداګریز پلاوي ته د ښه راغلاست ویلو ترڅنګ، ازبیکستان د افغانستان ښه دوست وباله او د دواړو هېوادونو ترمنځ ګډ دیني، کلتوري، اقتصادي او ترانزیټي اړیکې یې مهمې وبللې. نوموړي، د سوداګریزو نندارتونونو او ګډو سوداګریزو ناستو ترسره کول، د سوداګریزو راکړو ورکړو د زیاتوالي او د سیاسي اړیکو د ښه کېدو لپاره ارزښتناک وبلل.

ښاغلي مهمند، اوسنی افغانستان د پانګونې لپاره مناسب فرصت وباله او د ازبییکستان له سوداګرو یې وغوښتل، چې د افغانستان له سوداګرو سره په ګډه، په بېلابېلو برخو، په ځانګړي ډول د کانونو او صنعت په سکتورونو کې پانګونه وکړي.

همداراز، نوموړي د ازبیکستان د ولسمشر او د هغه هېواد د سفارت د چارواکو د ملاتړ، د افغان صادراتي مالونو لپاره د ګمرکي اسانتیاوو برابرولو، او د افغان سوداګرو لپاره د ویزو د صادرولو د اسانتیاوو له امله، قدرداني وکړه.

ښاغلي مهمند، د سوداګرۍ او پانګونې اتاق د فعالیتونو په اړه ازبیکستاني سوداګریز پلاوي ته معلومات ورکړل او ویې ویل، چې اتاق د خصوصي سکتور او حکومت ترمنځ د پله حیثیت لري او تل هڅه کوي، چې د افغانستان د پانګونې فرصتونه او ننګونې وپېژني، ترڅو پانګوال په خوندي ډول، د مختلفو سکتورونو په پېژندل شویو برخو کې پانګونه وکړي.

نوموړي، افغانستان د مرکزي او سویلي آسیا ترمنځ د اتصال نقطه وبلله، او ازبیکستان یې له چین او روسیې سره د نښلولو مهم مرکز وباله. همداراز، نوموړي د افغانستان د سوداګرۍ او پانګونې اتاق او د ازبیکستان د سوداګرۍ اتاق ترمنځ د یوې ګډې تخصصي سوداګریزې کمیټې د جوړېدو پر اړتیا ټینګار وکړ، چې د دواړو هېوادونو سوداګریز فرصتونه وپېژني او د سوداګرو ستونزو ته رسېدنه وکړي.

ښاغلي برهان، د دواړو هېوادونو ترمنځ د سوداګرۍ په اړه خبرې وکړې، د سوداګریزو توکو د تبادلې د پراخوالي او د ویزو د اسانتیاوو پر اړتیا یې ټینګار وکړ.

د ازبیکستان د صنعت او ساختماني موادو د اتحادیې رئیس، ښاغلي بختیار بابا قلوف، د دې ناستې له جوړېدو خوښي څرګنده کړه او د خپل سفر اساسي هدف یې د "افغان-ازبک سوداګریز ګډ کور" د جوړولو اعلان وکړ، چې د کابل او مزارشریف په ښارونو کې به موقعیت ولري. نوموړي، د سمنټو په برخه کې د پانګونې هوډ څرګند کړ او د قوش تپه کانال یې د افغانستان د اقتصاد د ودې او د کرنې د میکانیزه کېدو لپاره مهم وباله.

ښاغلي الکوزي، د افغانستان او ازبیکستان سوداګریزې اړیکې بې سارې وبللې او د ازبیکستان له حکومتي چارواکو یې د سوداګرو لپاره د اوږدمهاله اسانتیاوو برابرولو له امله مننه وکړه.

همداراز، نوموړي د پاکستان له لوري د افغان صادراتي مالونو د بندرونو بندول، د نړیوالو سوداګریزو اصولو خلاف وبلل او د ازبیکستان له سوداګریز پلاوي یې وغوښتل، چې د پاکستان له اړخه د ترانزیټي ستونزو د حل لپاره، له افغانستان سوداګرۍ او پانګونې اتاق سره اوږدمهاله همکاري وکړي.

 

 

 

 

 

ښاغلي محمد یونس مهمند، د افغانستان د سوداګرۍ او پانګونې اتاق لومړي مرستیال، هرات ولایت ته د خپل سفر په ترڅ کې، د خراسان زمین صرافانو د ودانیزو پروژو، د لوېدیځ زون صرافانو د سترې پروژې چې د خصوصي سکتور لخوا په سهامي ډول د هرات په ښار کې جوړیږي، او همدارنګه د ګازو او تیلو سوداګریز مجتمع چې کار یې بشپړ شوی، لیدنه وکړه. نوموړي د دغو پروژو د تطبیق پر نړیوالو ستندردونو، د لوړ کیفیت ساختماني موادو پر کارولو، د معلولینو لپاره د بدیلو لارو پر جوړولو، د اوروژنې سیستم او د چاپېریال ساتنې پر مراعاتولو ټینګار وکړ.

ښاغلي مهمند، له ټولو پانګوالو مننه وکړه چې په دې پروژو کې یې خپل رول ادا کړی. هغه یادې پانګونې د اقتصاد د ودې، د کاري فرصتونو د ایجاد، د ښار د ښکلا، د بنسټونو د پیاوړتیا، د ښاري پراختیا او د پانګوالو د جذب لپاره مهمې وبللې. نوموړي له هغو افغان سوداګرو څخه چې په بهر کې پانګونه کړې، وغوښتل چې بیرته هېواد ته راستانه شي او د هېواد په بیارغونه کې خپل سهم ادا کړي.

د خراسان زمین صرافانو پروژه، چې له ۳۰ میلیونه ډالرو څخه په زیاته پانګونه د هرات په ښار کې په ۱۴ پوړیزه ودانۍ کې د جوړېدو په حال کې ده، او ټاکل شوې چې په راتلونکي کې د بانکدارۍ، صرافۍ او اداري واحدونو لپاره ترې استفاده وشي.

د لوېدیځ زون صرافانو ستره پروژه، چې له ۵۰ میلیونه امریکایي ډالرو څخه په زیاته پانګونه د یو ستر سوداګریز کمپلکس د جوړېدو لپاره د خصوصي سکتور لخوا په سهامي ډول په هرات کې جوړیږي، د ودانیزو کارونو ډېرې برخې یې بشپړې شوې، او ټاکل شوې چې ډېر ژر د تجارتي فعالیتونو لکه د سرو زرو پلورنځي، صرافۍ، بانکدارۍ، سوداګریزو او اداري واحدونو، سونا، او سوپرمارکېټونو لپاره پرانستل شي.

د هرات د ګازو او تیلو سوداګریز مجتمع، چې له ۷ میلیونه امریکایي ډالرو څخه په زیاته پانګونه او د ۲۵۰۰ متر مربع ځمکې پر مساحت په ۸ پوړونو کې د تیلو سوداګرو لخوا په ګډه جوړ شوی، ټاکل شوې چې ډېر ژر د سوداګریزو فعالیتونو لپاره پرانیستل شي.

 

 

 

 

د افغانستان د سوداګرۍ او پانګونې اتاق لومړي مرستیال، ښاغلي محمد یونس مهمند، د افغانستان لپاره د اروپایي اتحادیې له رئیسې، اغلې ویرونیکا بوسکویک پوهار، سره د دې اتحادیې په دفتر کې وکتل.

ښاغلي مهمند د افغانستان لپاره د اروپایي ټولنې له رئیسې څخه د لیدنې لپاره د وخت ځانګړي کولو مننه وکړه، او همدارنګه یې د اروپایي هېوادونو له مرستو، چې د هېواد له بې‌وزلو خلکو سره په سختو شرایطو کې کړي او همدارنګه د خصوصی سکتور له ملاتړ څخه مننه وکړه او ټینګار یې وکړ چې د افغانستان او اروپایي هېوادونو ترمنځ سوداګریزې اړیکې پراخې شي. هغه وویل چې د هېواد د کرنیزو محصولاتو، په ځانګړي ډول وچه او تازه مېوه او زعفران، صادرات اروپایي هېوادونو ته زیات شوي دي.

د اتاق لومړي مرستیال، په ټول هېواد کې د امنیت ټینګښت، د کوکنارو د کرکیلې منع کېدل، او د اداري فساد له منځه وړل د حکومت مهمې لاسته راوړنې وبللې. هغه د اروپایي اتحادیې له استازې څخه وغوښتل چې د افغانستان د سوداګرۍ او پانګونې اتاق او د اروپایي هېوادونو د سوداګرۍ اتاقونو ترمنځ د اړیکو پراختیا، او همدارنګه د افغانستان د زعفران نړیوالو بازارونو ته د معرفي کولو په برخه کې مرسته وکړي.

اغلې ویرونیکا بوسکویک پوهار، د افغانستان او اروپایي هېوادونو ترمنځ د سوداګریزو اړیکو له پراخېدو هرکلی وکړ، او زیاته یې کړه چې د افغانستان سوداګرۍ پر هیڅ بندیز نه ده مخ شوې، او اروپایي اتحادیه غواړي چې د افغانستان صادرات دې براعظم ته زیات شي. هغې ټینګار وکړ چې د کرنیزو محصولاتو د وارداتو لپاره ځانګړي گمرکي قوانین او مقررات شتون لري، او افغان صادرونکي باید د دغو مقرراتو سره سم عمل وکړي.

په پای کې، اغلې پوهار د افغانستان او اروپا ترمنځ د سوداګریزو اړیکو د پیاوړتیا او د صادراتو د اسانولو لپاره د اروپایي اتحادیې پر هر اړخیزې همکارۍ ټینګار وکړ.

 

 

 

 

ښاغلي محمد یونس مهمند، د افغانستان د سوداګرۍ او پانګونې اتاق لومړي مرستیال، هرات ولایت ته د خپل سفر په ترڅ کې د حاجي محمد ابراهیم، د زعفرانو ټولنې له رئيس او د یادې ټولنې

له مشرتابه سره وکتل او د دوی ستونزې یې واورېدلې.

ښاغلي مهمند، د متحده عربي اماراتو د سوداګرۍ اتاق له رئیس سره د شوې ناستې، د بهرنیو چارو د محترم وزیر او د یاد هیواد د سوداګرۍ وزیر ترمنځ د لیدنې، او همدارنګه د هند هیواد ته د سوداګریزو اړیکو د ښه والي او د افغانستان د صادراتي توکو لپاره د معیاري بازارونو د موندلو په موخه د سفر په اړه ګډونوالو ته معلومات ورکړل.

هغه زیاته کړه چې د افغان سوداګرو ګډون په پراګتي میدان نندارتون کې د افغانستان د سوداګرۍ او پانګونې اتاق په تنظیم او مدیریت، د سوداګرۍ وزارت او نورو ادارو په همکارۍ ترسره کېږي.

همدارنګه، نوموړي ډاډ ورکړ چې اتاق به د اړوندو حکومتي ادارو په همغږۍ د خصوصي سکتور د ستونزو د حل په برخه کې هر اړخیزه همکاري وکړي.

ښاغلي محمد ابراهیم، د زعفرانو اتحادیې د فعالیتونو، تاریخچې، غړو، د زعفرانو د کر ساحې او د کلونو په اوږدو کې د هغوی د حاصلاتو په اړه د افغانستان د سوداګرۍ او پانګونې اتاق له لومړي مرستیال سره معلومات شریک کړل. نوموړي وویل، چې د تېرو کلونو په پرتله د زعفرانو حاصلات مخ پر زیاتېدو دي. هغه، خپلې سترې ستونزې د زعفرانو د معاینو د اسانتیاوو نشتوالی، د دې محصول د سیمې او نړۍ هېوادونو ته د انتقال لپاره د سبسایډي نه شتون، د هېواد په هوایي ډګرونو کې د زعفرانو د سکن او معیاري ارزونې نشتوالی او د سیمې له هېوادونو څخه د دې برخې سوداګرو ته د ویزې د ورکړې د اسانتیاوو نشتوالی یاد کړل. نوموړي له د سوداګرۍ او پانګونې اتاق له لومړي مرستیال څخه وغوښتل، چې د اړوندو دولتي ادارو سره په همغږۍ د دوی د ستونزو د حل لپاره هڅې وکړي.

ښاغلي مهمند، زعفران د افغانستان له مهمو صادراتي محصولاتو څخه یاد کړل، چې لوړ اقتصادي ارزښت لري او د هېواد د اقتصاد د ودې او د هېوادوالو لپاره د کارموندنې په برخه کې مهم رول لري. هغه، د افغانستان د سوداګرۍ او پانګونې اتاق له لوري د زعفرانو لپاره د بازار موندنې او د دې سکتور د سوداګرو د ستونزو د حل په برخه کې د هر اړخیزې همکارۍ ډاډ ورکړ.

 

 

 

 

ښاغلي خیرالدین مایل احمدي، د افغانستان د سوداګرۍ او پانګونې اتاق تجارتي مرستیال، د خپل ازبیکستان سفر پر مهال، چې ښاغلي میرزمان پوپل، د اتاق عامل پلاوي د مالي او اداري مرستیال او د هېواد یو شمېر سوداګر او پانګوال یې ملګري وو، د ازبیک بیلد نندارتون د پرانیستې مراسمو کې چې په تاشکند ښار کې جوړ شوی و، ګډون وکړ.

ښاغلي احمدي، د قزاقستان، روسیې، چین، ازبیکستان، افغانستان او د آسیا د نورو هېوادونو د تولیدي محصولاتو غرفې وکتلې او د افغانستان اوسني فرصتونه یې د پانګونې لپاره مناسب وبلل. نوموړي د ګډونوالو هېوادونو له سوداګرو وغوښتل چې د افغانستان له فرصتونو ګټه پورته کړي او له افغان سوداګرو سره په مختلفو برخو کې ګډې پانګونې وکړي.

د یادولو وړ ده چې د ازبیک بیلد نندارتون کې د افغان او آسیايي سوداګرو ترمنځ ګڼ سوداګریز هوکړه‌لیکونه لاسلیک شوي، او ۳۰۰ ساختماني شرکتونو خپل محصولات د درې ورځو لپاره نندارې ته وړاندې کړي دي.