د افغان سوداګرو لپاره د سوداګریزو او ترانزیټي اسانتیاوو د رامنځته کولو او ستونزو د حل په موخه، د افغانستان د سوداګرۍ او پانګونې اتاق په افغانستان کې د چین د سوداګریز اتشه ښاغلي چینګ وانګ او د هغه له ټیم سره ناسته وکړه. په یاده ناسته کې ښاغلي محمد یونس مهمند، د اتاق لومړی مرستیال؛ سید جاوید برهان، د مشرتابه پلاوي د نړیوالو اړیکو رئیس؛ خانجان الکوزی، محمد گردیزی، ضیاءالدین اچکزی، او داود یوسفزی د اتاق د مشرتابه پلاوي غړي؛ میرزمان پوپل، د عامل پلاوي د مالي او اداري معاونیت سرپرست؛ احمد شاه حکیمی، د کابل د سوداګرۍ او پانګونې اتاق لومړی مرستیال؛ شرف الدین او سردار ولی پښتون د اتاق لوړپوړي مشاورین؛ او د وچو میوو، قیمتي او نیمه قیمتي ډبرو، الیکترونیک اتحادیو مشران او یو شمېر مطرح سوداګر او پانګوال شامل وو.
ښاغلي محمد یونس مهمند، په افغانستان کې د چین سوداګریز اتشه او د دې ناستې ټولو ګډونوالو ته د ښه راغلاست وینا وکړه، او د چین له سفارت او حکومت څخه یې په تیرو کلونو کې د طبیعي پیښو له امله زیانمنو افغانانو سره د مرستو او په افغانستان کې د عامه ګټو پروژو کې د دوی پانګونې له امله مننه وکړه. هغه، له ښاغلي وانګ څخه وغوښتل چې د دواړو هیوادونو ترمنځ د سوداګرۍ لا زیاتې پراختیا ته هڅه وکړي.
ښاغلي مهمند، د افغانستان د صادراتي توکو لپاره د چین لخوا د ګمرکي معافیت د راوړلو له امله خوشالي څرګنده کړه او د دغو معافیتونو رول یې د اقتصاد په وده او د دواړو هیوادونو ترمنځ د سوداګریزو اړیکو په پراختیا کې مهم وباله. نوموړي جلغوزه د افغانستان له مهمو زراعتي توکو څخه وګڼله او په افغانستان کې د چین د سوداګریز اتشه څخه یې وغوښتل چې افغان سوداګرو ته د ویزې د صدور په برخه کې لا زیاتې اسانتیاوې برابرې کړي ترڅو د دواړو هیوادونو ترمنځ صادرات او واردات زیات شي.
د اتاق لومړي مرستیال، د چین کلني صادرات افغانستان ته تر ۹۰۰ میلیونه امریکایي ډالرو زیات یاد کړل، د واخان دهلېز یې د سوداګرۍ د زیاتوالي او افغانستان او چین ترمنځ د مستقیمې اړیکې نقطه وبلله او همدارنګه یاد دهلیز یې د چین د ایران او اروپایي هیوادونو سره د وصل نقطه په توګه یاده کړه. هغه د چین سفارت او اتاق ترمنځ د یوه ګډې ناستې غوښتنه وکړه چې په افغانستان کې پانګونه او کاروبار کوونکي چینایي سوداګر پکې ګډون وکړي.
محترم مهمند د کونړ په ولایت کې د یوه ستر قیمتي او نیمه قیمتي ډبرو سوداګریز مارکیټ جوړولو باندې ټینګار وکړ او له ټولو سوداګرو ګډونوالو یې وغوښتل چې په کتبي توګه خپلې نظریې او وړاندیزونه اتاق ته وسپاري.
ښاغلي مهمند په پاکستان کې د افغان سوداګرو ترانزیټي ستونزې له ښاغلي وانګ سره شریکه کړه او له هغه څخه یې وغوښتل چې د افغان سوداګرو د ستونزو په حل کې او په افغانستان کې د انرژۍ د تولید په برخه کې د چینایي سوداګرو د پانګونې د هڅولو لپاره همکاري وکړي.
ګډون کوونکو سوداګرو خپلې ستونزې، لکه د چین د تولیدي فابریکو لخوا د سوداګریزو تفاهمنامو نه عملي کول، د پیسو د انتقال په برخه کې بانکي اسانتیاوو نشتوالی، او د پاکستان لخوا د چینایي وارداتي توکو په تعرفو کې زیاتوالی، د اتاق مشرتابه پلاوي او په افغانستان کې د چین د سوداګریز اتشه سره شریکې کړې او له دوی څخه یې وغوښتل چې د دوی ستونزو ته جدي پاملرنه وکړي.
ښاغلي الکوزي د پاکستان لخوا په کراچۍ بندر کې د ځینو افغان سوداګریزو توکو بندول او د ګمرکي تعرفو لوړول د افغانستان او پاکستان ترمنځ د اپټا هوکړه او د سوداګرۍ کنوانسیون خلاف وبلل او له ښاغلي وانګ څخه یې وغوښتل چې له خپلو سوداګریزو اړیکو څخه په استفادې د افغان سوداګرو د ستونزو لپاره مناسبې حل لارې ومومي. هغه د کنړ ولایت د قیمتي او نیمه قیمتي ډبرو له طبیعي سرچینو څخه بډای وباله، په دغه ولایت کې د قیمتي ډبرو د سوداګریز مرکز جوړول یوه اساسي اړتیا وبلله او له ښاغلي وانګ څخه یې وغوښتل چې چینایي سوداګر دې د کنر د سیند د اوبو څخه د هایدرو انرژۍ تولید په سکتور کې پانګونې ته وهڅوي.
ښاغلي میرزمان پوپل د افغانستان د صادراتي توکو د طی مراحلو په محدودیت چې یواځې یو بندر چین ته ځانګړی دی، ستونزمن وګڼه او د دواړو هیوادونو ترمنځ د سوداګریز تفاهمنامې لاسلیک کول یې د افغانستان د صادراتي زراعتي محصولاتو، په ځانګړې توګه شکرپاره، انار، زعفران او شیرین بویه د بسته بندۍ او ضد عفوني کولو په برخه کې اړین وبلل.
ښاغلي چینګ وانګ، د افغانستان د سوداګرۍ او پانګونې اتاق د مشرتابه پلاوي څخه د دې ناستې د ترسره کولو او د افغانستان د خصوصي سکتور ستونزو د شریکولو له امله مننه وکړه او دا ډول ناستې یې د افغان او چینایي سوداګرو د ستونزو د حل لپاره مهمې وبللې. هغه په سوداګریزو-اقتصادي اړیکو کې د پرمختګ او د سوداګرو ستونزو په حل کې د خپل ملاتړ ډاډ ورکړ.
