د افغانستان د سوداګرۍ او پانګونې اتاق د روسیې د خصوصي سکتور سره د ګډو پانګونو د جذب، د ترانزیټي اسانتیاوو رامنځته کولو، د دواړو هېوادونو د خصوصي سکتور ترمنځ د اقتصادي همکاریو پراختیا، د افغان صادراتي توکو لپاره د ترجیحي تعرفو د وړاندیز، ستونزو د پېژندنې او پر وخت د حل په موخه، له د روسیې د سوداګرۍ او صنایعو اتاق سره د همکاریو تفاهم‌لیک لاسلیک کړ.

یاد تفاهم‌لیک د افغانستان د سوداګرۍ او پانګونې اتاق د لومړي مرستیال ښاغلي محمد یونس مهمند او د روسیې د سوداګرۍ او صنایعو اتاق د مرستیال لخوا، د لاندې ښاغلیو: د افغانستان د ریاست‌الوزرا اقتصادي مرستیال ملا عبدالغني برادر، د روسیې د صدراعظم مرستیال الکسي اورچوک، د صنعت او تجارت وزارت سرپرست نورالدین عزیزی، د ترانسپورت او هوایي چلند وزارت سرپرست، د اتاق د تجارتي مرستیال ښاغلي خیرالدین مایل احمدي، د مشرتابه پلاوي د دارالانشأ رئیس ښاغلي خان محمد سرفراز باز، د مشرتابه پلاوي غړي سلطان محمد صافي، سید پرویز سادات هوفیاني، او داود یوسفزي، د عامل پلاوي د مالي او اداري مرستیال سرپرست میرزمان پوپل، د ننګرهار د اتاق غړی ښاغلي گل مراد عرب، د نیمروز د خونې رئیس حاجي عبیدالله نورزی او د دواړو هېوادونو یو شمېر سوداګرو او پانګه‌والو په حضور کې د افغانستان ـ روسیې د سوداګریز فورم د اختتامیې مراسمو په ترڅ کې، د تاتارستان جمهوریت په کازان ښار کې لاسلیک شو.

 

 

 

 

 

د افغانستان د سوداګرۍ او پانګونې اتاق د مشرتابه پلاوي غړو ښاغلي خیرالدین مایل احمدي د اتاق تجارتي مرستیال، شیرین آغا سخي د اتاق مالي ریاست رییس ، سید جاوید برهان د نړیوالو اړیکو رییس، خانجان الکوزی د مشرتابه پلاوي غړی او د افغان ـ پاک اتاق رییس او میر زمان پوپل د عامل پلاوي د مالي او اداري مرستیال سرپرست د خوست د سوداګرۍ او پانګونې اتاق له رییس ښاغلي شهباز تڼي او د دغې اتاق له مشرتابه سره وکتل او د هغوی ستونزې یې واورېدلې.

ښاغلي شهباز د خوست د اتاق د کلونو فعالیتونو، لاسته راوړنو او د ولایت د خصوصي سکتور د اوسنیو ستونزو په اړه د مرکزي اتاق مشرتابه ته معلومات وړاندې کړل او ترې ویې غوښتل چې د دغو ستونزو په حل کې ورسره مرسته وکړي.

ښاغلي مایل احمدي ښاغلي شهباز او ورسره مل پلاوي ته د ښه راغلاست ویلو ترڅنګ، خوست یې له مهمو اقتصادي ولایتونو څخه یاد کړ او ویې ویل چې دا ولایت له پاکستان سره د ګډ ترانزیټ وصل ټکی دی. نوموړي ډاډ ورکړ چې د خصوصي سکتور د ستونزو د حل لپاره به د اتاق له اساسنامې سره سم، هر اړخیز ملاتړ وشي. همداراز، ده د افغانستان د خصوصي سکتور غړو ته د لا زیاتو آسانتیاوو برابرولو په موخه لازمې لارښوونې هم وړاندې کړې.

 

 

 

 

 

د افغانستان د سوداګرۍ او پانګونې اتاق د مشرتابه پلاوي غړو ښاغلي خیرالدین مایل احمدی د اتاق تجارتي مرستیال، ښاغلي خان محمد سرفراز باز د مشرتابه پلاوي د دارالانشاء رئیس، ښاغلي سلطان محمد صافي، ښاغلي سید پرویز سادات هوفیاني، او ښاغلي محمد داود یوسفزی د مشرتابه پلاوي غړي، ښاغلي جان آقا صادقي دنفت اوگاز کمیته رئیس ښاغلي میرزمان پوپل د عامل پلاوي د مالي او اداري مرستیال سرپرست چې د ښاغلي ګل مراد عرب د ننګرهار د اتاق د مشرتابه غړی، حاجي عبیدالله نورزی د نیمروز ولایت د سوداګرۍ او پانګونې اتاق رئیس،زربت خان دلوګرولایت دمدیره هیات غړی او یو شمېر مطرحو سوداګرو او پانګوالو له خوا یې ملتیا کېده، د روسیې هېواد د کازان ښار د نندارتون د پرانیستې په مراسمو کې ګډون وکړ.

یادو مشرانو د سیمې د هېوادونو له تولیدي غرفو لیدنه وکړه او د بیلابیلو هېوادونو له سوداګرو سره یې د افغانستان په اقتصادي فرصتونو خبرې وکړې، څو هغوی پانګونې ته وهڅوي.

د سفر په ترڅ کې د اتاق مشرتابه پلاوي د روسیې د سوداګرۍ او صنایعو د اتاق له مرستیال سره هم لیدنه وکړه. د دې لیدنې پر مهال، ښاغلي مایل د افغانستان اوسني فرصتونه په تفصیل تشریح کړل او له روسي لوري یې وغوښتل چې خپل پانګه‌وال د افغانستان له خصوصي سکتور سره ګډو پانګونو ته وهڅوي.

نوموړي همداراز د دوو هېوادونو ترمنځ د ګډو نندارتونونو د ترسره کېدو پر اړتیا ټینګار وکړ.

ښاغلي سرفراز باز د دواړو هېوادونو ترمنځ د بانکي ستونزو د حل او سوداګرو ته د اسانتیاوو د برابرولو غوښتنه وکړه، څو د خصوصي سکتور ترمنځ خوندي تجارتي تبادلې ترسره شي.

ښاغلي پوپل بیا د افغان صادراتي مالونو لپاره د ترجیحی تعرفو، ترانزیتي او ګمرکي اسانتیاوو پر رامنځته کولو ټینګار وکړ او له روسي لوري یې وغوښتل چې دغه برخو ته جدي پام وکړي.

 

 

 

 

 

د افغانستان د سوداګرۍ او پانګونې اتاق له خوا د سوداګرۍ پراختیا، پانګونې جذب، نظریاتو تبادله او ګډو پانګونو لپاره، د افغانستان او ازبیکستان د خصوصي سکتور ترمنځ د سوداګریز پيوستون کنفرانس په کابل ګرند هوټل کې جوړ شو.

په دغه کنفرانس کې د افغانستان د سوداګرۍ او پانګونې اتاق مشرتابه پلاوي غړو ښاغلي محمد یونس مهمند د اتاق لومړی مرستیال، خیرالدین مایل احمدي سوداګریز مرستیال، خان محمد سرفراز باز، د اتاق د دارالانشا رئیس، شیرین آغا سخي، د اتاق مالي رئیس، سید جاوید برهان، د اتاق د نړیوالو اړیکو رئیس، خان جان الکوزی، د اتاق د مشرتابه پلاوي غړي او د افغان-پاک ګډ اتاق رئیس، خالد احمدي، احمدالله زاهد د صنعت او سوداګرۍ وزارت معین، آیبیک عثمانوف د ازبیکستان سفیر، دوران وهابوف د ازبیکستان د سوداګرۍ او صنایعو اتاق رئیس، میرزمان پوپل، د عامل پلاوي د مالي او اداري مرستیال سرپرست، محمد انور عارفي تخنیکي او پالیسي مرستیال همایون خواجه زاده د کابل اتاق سوداګریز مرستیال، جمشید د ازبیکستان تجارتي آتشه او د دواړو هیوادونو ګڼ شمېر پانګه‌والو او سوداګرو ګډون کړی و.

ښاغلي مهمند د ازبیکستان د سوداګریز پلاوي راتګ ته ښه راغلاست ووایه او یاد هېواد یې د افغانستان لپاره د منځنۍ آسیا، چین او روسیې د ترانزیت نقطه وبلله. هغه د دواړو هېوادونو ترمنځ د ترانزیتي همکاریو هوکړه‌لیک مهم وباله او د ازبیکستان د اورګاډي د لېږد لوړ مالیات یې د افغان سوداګرو اساسي ستونزه یاده کړه، چې باید حل شي.

ښاغلي مهمند د ترمز ګډ بازار اهمیت ته اشاره وکړه او پر ګډو پانګونو یې ټینګار وکړ، په ځانګړي ډول د درملو تولیدي فابریکو، او د افغان شریکانو سره د ازبیک پانګه‌والو ګډو همکاریو ته بلنه ورکړه.

همداراز نوموړي د افغانستان، ازبیکستان، قزاقستان، آذربایجان، ترکمنستان او ترکیې ترمنځ د ګډ اتاق جوړېدل د سیمې د تولیداتو د اروپا بازارونو ته د لاسرسي لپاره ارزښتناک وبلل. هغه د جرمني سفر او د امام ابوحنیفه (رح) ملي او نړیوال نندارتون په اړه معلومات ورکړل او له ازبیک چارواکو یې وغوښتل چې د خپلو سوداګرو ګډون ته زمینه برابره کړي.

ښاغلي وهابوف له اتاق څخه د کنفرانس د جوړېدو مننه وکړه او ویې ویل، د دوی د سفر اصلي موخه له افغان شریکانو سره ګډې پانګونې دي، په ځانګړي توګه د درملو، ساختماني او خامو موادو په برخو کې. نوموړي د ۲۰۲۴ کال د دواړو هېوادونو د سوداګرۍ احصایې وړاندې کړې او د افغانستان له تازه میوو او سبزیجاتو د صادراتو یادونه وکړه.

ښاغلي زاهد وویل، افغانستان او ازبیکستان د دیني او کلتوري ګډو تګلارو لرونکي دي. نوموړي د حیرتان په ګمرک کې د ظرفیت کمښت او اسانتیاوو نشتوالی د ستونزو لامل وباله او د ازبیکستان له سفیر څخه یې د پاملرنې غوښتنه وکړه. هغه د صنعت او سوداګرۍ وزارت د هر ډول ملاتړ ډاډ ورکړ.

ښاغلي مایل احمدي، دا ډول کنفرانسونه د دواړو هېوادونو ترمنځ د سوداګرۍ د پراخېدو لپاره مهم وبلل. نوموړي له دواړو هېوادونو د خصوصي سکتور ملاتړ کوونکو چارواکو څخه مننه وکړه او د افغانستان سوداګریزې اړیکې یې له سیمې هېوادونو سره ښې وارزولې.

ښاغلي میرزمان پوپل، ازبیکستان د افغانستان د تولیداتو لپاره یو ښه بازار وباله او د لاسلیک شویو هوکړه‌لیکونو ارقام یې وړاندې کړل، چې له مخې یې د ۴۵ میلیونه امریکایي ډالرو ارزښت لرونکي قراردادونه د روغتیا، خامو موادو، برقي وسایلو، ودانیزو موادو، درملو، وچو او تازه میوو په برخو کې لاسلیک شول.