ښاغلي محمد یونس مهمند، د افغانستان د سوداګرۍ او پانګونې اتاق لومړي مرستیال، د خپل سفر پر مهال په ډیلي کې د افغان-هند سوداګرو شورا له رئیس او غړو او همداراز د وچو میوو سوداګرو اتحادیې له رئیس او غړو سره وکتل او د سوداګرۍ او ګډو پانګونو د پراخوالي په اړه یې خبرې وکړې.

ښاغلي مهمند، د وچو میوو د سوداګرو د اتحادیې د غړو خبرې واورېدلې او د ویزې، صادراتو او ګمرکي ستونزو په برخه کې یې د هغوی اندېښنې وڅېړلې. نوموړي ژمنه وکړه چې د افغانستان د سوداګرۍ او پانګونې اتاق مشرتابه به د دوی ستونزې د افغانستان له اړوندو حکومتي مقاماتو، په ځانګړي ډول د بهرنیو چارو او صنعت او سوداګرۍ له وزارتونو سره شریکې کړي او د حل لپاره به اړین اقدامات وکړي.

د سوداګرۍ او پانګونې اتاق لومړي مرستیال د افغان-هند سوداګرو شورا له غړو سره د لیدنې پر مهال په افغانستان کې د پانګونې فرصتونو په اړه معلومات ورکړل او هندي سوداګر یې وهڅول چې په بېلابېلو اقتصادي برخو کې ګډې پانګونې وکړي.

 

 

 

 

ښاغلي محمد یونس مهمند، د افغانستان د سوداګرۍ او پانګونې اتاق لومړی مرستیال، هند هېواد ته د خپل سفر په دویمه او درېیمه ورځ په سورج کنج نندارتون کې د یاد هېواد د تولیداتو، په ځانګړي ډول د قالینو او نورو افغاني محصولاتو غرفو څخه، لیدنه وکړه او د افغان سوداګرو پر ستونزو یې بحث او خبرې وکړې.

ښاغلی مهمند نندارتون ته له رسېدو سره سم، د نندارتون د رئیس لخوا ورته تود هرکلي وشو. نوموړي، د افغانستان د محصولاتو غرفې وکتلې، له افغاناوهندی سوداګرو سره یې خبرې وکړې او د هغوی ستونزې چه دمجاهد صافی په دهلی کی دافغان سوداگرو دفترمسؤل لخوانه معلومات ورکول کیده واورېدې. هغه ژمنه وکړه چې دغه ستونزې به د افغانستان د صنعت او سوداګرۍ وزارت له مشرتابه سره شریکوي او د اړتیا په صورت کې به هر ډول همکاري ترسره کړي.

ښاغلي مهمند د امام ابوحنیفه (رح) کلني نندارتون او پکې د شته فرصتونو په اړه د سورج کنج نندارتون رئیس ته معلومات ورکړل او هغه ته یې بلنه ورکړه چې د افغانستان په راتلونکي نندارتون کې ګډون وکړي او همدارنګه، د ITF او هندي سوداګرو ته د یاد نندارتون د ګډون لپاره هڅونه وکړي.

په همدې ډول، ښاغلي محمد یونس مهمند د خپل سفر په څلورمه ورځ د افغان سوداګرو دفتر ته لاړ، او په یاد دفتر کې یې له هندي سوداګرو سره وکتل. نوموړي، د افغانستان د پانګونې فرصتونه تشریح کړل او له هندي سوداګرو او پانګوالو یې وغوښتل چې د افغانستان په بېلابېلو اقتصادي برخو کې ګډې پانګونې وکړي. هغه، د حکومت د مشرتابه مقام لخواه د پانګونې به برخه کې د اسانتیاوو برابرولو د لارښونو او د حکومت د اقتصاد-محوره سیاست یادونه وکړه.

همداراز، ښاغلي مهمند، د دوشنبې په ورځ، د سلواغې په ٢٩مه، له افغان سوداګرو سره جلا ناسته وکړه، د دوی ستونزې یې واورېدې او ژمنه یې وکړه چې د اړوندو دولتي ادارو سره به د ستونزو د حل لپاره بشپړه همغږي رامنځته کړي.

 

 

 

ښاغلي محمد یونس مهمند، د افغانستان د سوداګرۍ او پانګونې اتاق لومړي مرستیال، هندوستان ته د خپل سفر په لړ کې، د پراګمتي میدان نندارتون (ITF) له مسؤلینو سره وکتل او د افغان سوداګرو د ګډون په اړه یې ورسره خبرې وکړې.

ښاغلي مهمند، د هند د پراګمتي میدان نندارتون (ITF) کې د افغان سوداګرو د ګډون په اړه، چې باید د افغانستان د سوداګرۍ او پانګونې اتاق تر چتر لاندې تنظیم شي، له مسؤلینو سره خبرې وکړې. هغه همداراز د یاد نندارتون په تېرو کلونو کې د افغانستان د محصولاتو د لاسته راوړنو یادونه وکړه.

د افغانستان د سوداګرۍ او پانګونې اتاق لومړي مرستیال، د امام ابوحنیفه (رح) کلني نندارتون او په افغانستان کې د پانګونې فرصتونو په اړه د پراګمتي میدان نندارتون له مسؤلینو سره معلومات شریک کړل. همداراز، د ITF له رئیس او هندي سوداګرو یې غوښتنه وکړه چې د راتلونکي کال ندارتون کې ګډون وکړي.

 

 

 

ښاغلي محمد یونس مهمند، د افغانستان د سوداګرۍ او پانګونې اتاق لومړي مرستیال، تېره چهارشنبه هندوستان ته د خپل سفر پر مهال، په هندوستان کې د افغانستان سفارت له سرپرست ښاغلي ابراهیم خیل سره وکتل او د افغان سوداګرو د ستونزو په اړه یې بحث او نظرونه تبادله کړل.

ښاغلي مهمند، په هندوستان کې د افغان سوداګرو د ستونزو د حل په برخه کې د افغانستان سفارت د سرپرست د ښې همکارۍ له امله مننه وکړه، او د افغان سوداګرو او هلته مېشتو افغانانو د ځینو موجوده ستونزو په اړه یې خبرې وکړې. نوموړي له ښاغلي ابراهیم خیل څخه وغوښتل چې په دې برخه کې لا زیاته همکاري وکړي. هغه د افغانستان د سفارت له سرپرست څخه وغوښتل چې له افغان سوداګرو سره د ملاقات زمینه برابره کړي، ترڅو اتاق وکولی شي د دوی ستونزې د ریاست الوزراء، د صنعت او سوداګرۍ وزارت، د مالیې وزارت او د افغانستان د حکومت له نورو اړوندو ادارو سره شریکې کړي او د حل لپاره یې لازم اقدامات ترسره کړي.

ښاغلي ابراهیم خیل، د افغانستان د سوداګرۍ او پانګونې اتاق لومړي مرستیال د راتګ هرکلی وکړ، او په هندوستان کې د افغان سوداګرو د ستونزو د حل په برخه کې د افغانستان د سفارت له فعالیتونو او ترسره شویو اقداماتو په اړه معلومات ورکړل. نوموړي ښاغلي مهمند ته ډاډ ورکړ چې د افغان سوداګرو د ستونزو د رفع کولو لپاره به هر اړخیزه همکاري و کړي.

 

 

 

 

دا ناسته د ښاغلي میر زمان پوپل، د مالي او اداري معاونیت سرپرست، ښاغلي امانت خان زمه ‌وار مالي مفتش، د مرکزي اتاق د بېلابېلو ریاستونو آمرینو او د ولایتونو اتاقونو د عامل پلاوي مدیرانو په ګډون ترسره شوه.

په پیل کې، ښاغلي پوپل د روان کال د اتاق د فعالیتونو په اړه خبرې وکړې او له ولایتي اتاقونو یې وغوښتل چې خپل کاري راپورونه چمتو او وړاندې کړي. همدارنګه، نوموړي د تشکیل، بودیجې او د راتلونکي کال د کاري پلانونو په اړه هم لارښوونې وکړې، ترڅو اتاق وکولی شي د روان کال لاسته راوړنې پراخې کړي او راتلونکي کال ته دقیق پلانونه عملي کړي.

وروسته، د بېلابېلو څانګو آمرینو خپلې نظریې او وړاندیزونه له ناستې سره شریک کړل او د ولایتي کارمندانو هڅې یې وستایلې، هغوی ته یې مسلکي مشورې ورکړې او د خصوصي سکتور د خدماتو وړاندې کولو ته یې وهڅول.

په پای کې، د ولایتي اتاقونو عامل مدیرانو خپلې نظریې، طرحې او وړاندیزونه له ناستې سره شریک کړل. د مالي او اداري معاونیت سرپرست ژمنه وکړه چې د هغوی ستونزې به له مشرتابه پلاوي سره شریکې کړي او د حل لپاره به لازم اقدامات ترسره کړي.