ښاغلی آرین زلگی عظیمي، د افغانستان د سوداګرۍ او پانګونې اتاق د پانګونې مرستیال، له ښاغلي احمدشاه حکیمي د کابل اتاق لومړي مرستیال او د یاد اتاق له یو شمېر د رهبري غړو سره د اتاق په مرکزي دفتر کې لیدنه وکړه او د پانګونو او خصوصي سکتور ته د غوره خدمتونو وړاندې کولو په اړه بحث او نظرونه تبادله شول.

ښاغلي عظیمي د مرکز اتاق او ولایتي اتاقونو ترمنځ د لا ډېرو همغږیو او پیاوړتیا ټینګار وکړ او د لویو سهامي شرکتونو او د هېواد د بنسټیزو پروژو په رامنځته کولو کې یې د هغوی ملاتړ مهم وباله.

نوموړي د کابل د اتاق له رهبري وغوښتل، چې خپلې طرحې د سوداګرۍ د ودې او په هېواد کې د پانګونې د جلبولو په موخه ورسره شریکې کړي.

 

 

ښاغلي حاجي سید کریم هاشمي، د افغانستان د سوداګرۍ او پانګونې اتاق عمومي رئیس ، د ترکمنستان هېواد د رسمي بلنې په اساس د هغه هېواد د پانګونې په فورم کې د ګډون لپاره، د خپل رسمي سفر پر مهال د ښاغلي نوکر ګلي اتاقلي یف، د ترکمنستان د صدراعظم د سوداګرۍ او صنعت مرستیال، سره په عشق‌آباد ښار کې لیدنه وکړه.

په دې لیدنه کې دواړو خواوو د اقتصادي همکاریو د پیاوړتیا، د سوداګریزو اړیکو د پراختیا او د ګډو پانګونو د فرصتونو د رامنځته کولو په اړه خبرې وکړې.

همدارنګه د پورته موضوعاتو تر څنګ، د ترکمنستان د صدراعظم مرستیال د سوداګرۍ او صنعت په چارو کې ژمنه وکړه چې د دواړو هېوادونو د خصوصي سکتور د اړیکو د پیاوړتیا، د سوداګرۍ د تبادلو د پراخوالي او د ګډو پانګونو د زیاتوالي لپاره به د ترکمنستان د تاجرانـو له یوې ډلې سره کابل یا مزارشریف ښار ته سفر وکړي.

 

 

ښاغلی آرین زلگی عظیمي، د افغانستان د سوداګرۍ او پانګونې اتاق د پانګونې مرستیال،د اتاق د مدیره پلاوي غړی ښاغلي حاجی حبیب الله په حضور کې

له ښاغلي یولبرس عطایي، د جوزجان د اتاق له رئیس سره د اتاق په مرکزي دفتر کې لیدنه وکړه.

ښاغلي عطایي د جوزجان ولایت د خصوصي سکتور د فعالیتونو، لاسته راوړنو او اساسي ستونزو په اړه معلومات وړاندې کړل او د اتاق له نوي مشرتابه څخه د خپل ملاتړ ترڅنګ، د ښاغلي عظیمي د همکارۍ غوښتنه وکړه ترڅو د یاد ولایت د سوداګرو ستونزې حل شي.

ښاغلي عظیمي د هېواد په اقتصادي وده کې د سوداګرو رول مهم وباله او د ټول هېواد د سوداګرو پر اتفاق او یووالي یې ټینګار وکړ.

نوموړي د هېواد د ټولو ولایتونو د خصوصي سکتور د ستونزو په حل کې د خپلې هر اړخیزې همکارۍ ډاډ ورکړ.

 

 

 

د مولانا جلال الدین بلخي هوايي ډګر څلورلارې چې د ښاغلي عبدالصبور مایل احمدي، د افغانستان د سوداګرۍ او پانګونې اتاق د مشرتابه پلاوي غړی او د بشیر نوید پټرولیم شرکت د رئیس له‌خوا رغول شوې وه، د بلخ ولایت د محلي حکومت د لوړپوړو چارواکو او د دې ولایت د سوداګرۍ او پانګونې اتاق د رهبري پلاوي، ښاغلي خیرالدین مایل احمدي د اتاق د پخواني تجارتي مرستیال او د بشیر نوید ګروپ رئیس، ښاغلي محمد یونس آرمان د اتاق د مشرتابه پلاوي غړي او د بلخ ولایت د خصوصي سکتور د ګڼ شمېر استازو په شتون کې پرانستل شوه.

 

 

ښاغلي الحاج سید کریم هاشمي، د افغانستان د سوداګرۍ او پانګونې اتاق عمومي رئیس، د ترکمنستان د بلنې پر بنسټ د رسمي سفر په ترڅ کې، د ښاغلي فیض احمد خوافي د اتاق ولایتي مرستیال، ښاغلي یونس قاضي زاده د مشرتابه پلاوي غړي او د یو شمېر نوموتو سوداګرو او پانګوالو په ملتیا، د ترکمنستان د پانګونې په فورم (TIF 2025) کې چې د دغه هېواد په ترکمن باشي ښار کې جوړ شوی و، ګډون او وینا وکړه.

ښاغلي هاشمي، افغانستان د طبیعي زیرمو ډک هېواد، د ستراتیژیک ترانزیټي موقعیت لرونکی او د بهرنیو پانګونو د جلب لپاره د چمتو کاري ځواک لرونکی هېواد وباله او زیاته یې کړه چې د افغانستان د سوداګرۍ او پانګونې اتاق چمتو دی څو د ترکمنستان او د سیمې د نورو هېوادونو له پانګوالو سره د ګډو همکاریو زمینه برابره کړي.

په دې فورم کې د آسیایي، اروپایي او امریکایي هېوادونو استازي، د نړیوالو مؤسسو او سازمانونو استازي او د ترکمنستان حکومتي چارواکي هم حاضر وو.

د یادونې وړ ده چې دا فورم د سیمې هېوادونو لپاره یوه مهمه موقع ګڼل کېږي، څو د اقتصادي ظرفیتونو او لومړیتوبونو په پېژندلو سره د ګډو همکاریو، پانګونې او دوامدار اقتصادي ودې زمینه برابره کړي.

همدارنګه، د دې فورم په څنډه کې، ښاغلي سید کریم هاشمي د اتاق عمومي رئیس، جلا لیدنې هم لرلې چې د ترکمنستان د نفتو له مرستیال وزیر، د آذربایجان د مالیې له معین او د ایران د اقتصاد له مرستیال وزیر سره ترسره شوې، چې په ترڅ کې یې د دغو هېوادونو د خصوصي سکتورونو ترمنځ د سوداګرۍ او ګډو پانګونو د پراختیا په اړه خبرې او نظرونه تبادله شول.