د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د اتاق د عامل پلاوي مالي او اداري مرستیال سرپرست ښاغلي میر زمان پوپل، د پالیسي او تخنیکي مرستیال ښاغلي محمد انور عارفي او ګڼو خبریالانو په شتون کې، د یوې خبري ناستې له لارې د روسیې د تاتارستان جمهوریت ته د اتاق د مشرتابه پلاوي د سفر لاسته راوړنې اعلان کړې.

ښاغلي مهمند د کنفرانس ګډونوالو ته ښه راغلاست ووایه، او د اتاق د مشرتابه پلاوي د یاد سفر او د تاتارستان د اقتصادي سوداګریز فورم د ګډون په اړه یې رسنیو ته معلومات ورکړل. هغه زیاته کړه: د روسیې د اقتصادي فورم د پای مراسمو پر مهال، د افغانستان د سوداګرۍ او پانګونې اتاق او د روسیې د سوداګرۍ او صنایعو اتاق ترمنځ د همکارۍ تفاهم‌لیک لاسلیک شو. دغه تفاهم‌لیک د ترانزیتي اسانتیاوو رامنځته کولو، د دواړو هېوادونو د خصوصي سکتور ترمنځ د ګډو نندارتونونو، سوداګریزو غونډو، په افغانستان کې په ځانګړي ډول د کانونو، بانکدارۍ او نورو سکتورونو کې د ګډو پانګونو د جلب، او د ویزو د صادرولو پروسې د اسانتیا لپاره ترتیب شوی.

ښاغلي مهمند افغانستان د منځنۍ آسیا او جنوبي آسیا د ترانزیتي اړیکو نقطه وبلله او ټینګار یې وکړ چې د افغانستان د سوداګرۍ او پانګونې اتاق د هېواد له ملي ګټو سره سم د سیمې او نړۍ له ټولو هېوادونو سره د سوداګریزو اړیکو د پراختیا لپاره هڅې کوي. هغه زیاته کړه چې د خپل سفر پر مهال چې د روسیې د تاتارستان جمهوریت د قازان ښار ته ترسره شوی و، د تاتارستان لومړي وزیر ژمنه وکړه چې د افغان صادراتي توکو لپاره به د خپلو ګمرکونو په کچه ترجیحي تعرفې رامنځته کړي.

ښاغلي مهمند همداراز د آلمان هېواد سره د ګډ سوداګریز اتاق د جوړولو لپاره د اتاق د هڅو یادونه وکړه، او د داسې اتاقونو جوړول یې د هېوادونو ترمنځ د سوداګرۍ د اسانتیا لپاره مهم وبلل. هغه له ټولو سیمه‌ییزو سوداګرو او پانګوالو وغوښتل چې د امام ابوحنیفه (رح) په څلورم ملي او نړیوال نندارتون کې ګډون وکړي.

د اتاق لومړي مرستیال له ټولو رسنیو مننه وکړه چې د افغانستان د خصوصي سکتور لاسته راوړنې او ستونزې پر وخت خپروي، او د هېوادونو ترمنځ د سوداګریزو اړیکو د ټینګېدو په برخه کې یې د رسنیو رول مهم وباله.

ښاغلي پوپل د تاتارستان د اقتصادي فورم پر مهال د لاسلیک شویو تفاهم‌لیکونو په اړه معلومات وړاندې کړل، او یادونه یې وکړه چې د یاد سفر پر مهال د اتاق مشرتابه پلاوي له هغو افغان متشبثینو سره هم لیدنې درلودې چې په مسکو کې مېشت دي، او د دوی د ستونزو د حل په برخه کې یې د اتاق د همکارۍ ډاډ ورکړ.

 

 

 

 

 

د افغانستان د سوداګرۍ او پانګونې اتاق مشرتابه پلاوی: ښاغلي خان محمد سرفراز باز د اتاق د مشرتابه پلاوي د دارالانشا رئیس، ښاغلی سید پرویز سادات هوفیانی د مشرتابه پلاوي غړی او ښاغلی میرزمان پوپل د عامل پلاوي د مالي او اداري مرستیال سرپرست، روسیې هېواد ته د خپل سفر په ترڅ کې، د مسکو ښار د افغان متشبثینو له سوداګریزو مارکیټونو لیدنه وکړه او د هغوی ستونزې یې واورېدې.

افغان متشبثینو د اتاق مشرتابه پلاوي ته ښه راغلاست وویلو او خپلې لویې سوداګریزې ستونزې یې ورسره شریکې کړې. دوی له مشرتابه پلاوي وغوښتل چې د دغو ستونزو د حل لپاره جدي پاملرنه وکړي.

ښاغلي سرفراز باز، د مسکو مېشتو افغان متشبثینو ستونزې په دقت واورېدې، د هېوادونو په اقتصادي ودې او بیا رغونه کې د سوداګرو رول مهم وباله، او ډاډ یې ورکړ چې د روسیې له حکومت سره د لاسلیک شوې همکارۍ تفاهمنامې پر بنسټ، به یادې ستونزې د اړوندو حکومتي مسوولینو سره شریکې کړي. نوموړي همداراز افغان سوداګر د افغانستان په بېلابېلو اقتصادي سکتورونو کې پانګونې ته وهڅول.

ښاغلي پوپل، له ټولو افغان متشبثینو نه چې په مسکو کې مېشت دي غوښتنه وکړه چې ټولې ستونزې او وړاندیزونه یې په لیکلي بڼه اتاق ته وسپاري. تر څو اتاق وکولای شي د یادو ستونزو په حل کې د هېواد اړوندو حکومتی ادارو سره په همغږي کې عملي ګامونه پورته کړي.

 

 

 

 

 

د افغانستان د سوداګرۍ او پانګونې اتاق د عامل پلاوي د مالي او اداري مرستیال سرپرست ښاغلي میرزمان پوپل، د اکتید مؤسسې له سلاکار ښاغلي جوناتن روبینسن او د هغه له ملګرو سره په خپل کاري دفتر کې ولیدل او د دواړو لورو ترمنځ د ګډو همکاریو پر امکاناتو بحث او نظریات تبادله کړل.

ښاغلي روبینسن، د اکتید مؤسسې د فعالیت ساحې او پلي شویو پروژو په اړه چې میکانیزه کرنه، د مالدارۍ سکتور پیاوړتیا، او د هېواد د صادراتو وده پکې شامله ده، ښاغلي پوپل ته معلومات وړاندې کړل او ترې یې غوښتنه وکړه چې په دې برخو کې له مؤسسې سره د همکاریو زمینه برابره کړي.

ښاغلي پوپل، د اکتید مؤسسې سلاکار او د هغه ملګرو ته د ښه راغلاست ویلو ترڅنګ، د مؤسسو رول د کوچنیو او منځنیو متشبثینو د وده او د کاري فرصتونو د ایجاد په برخه کې ارزښتناک وباله او غوښتنه یی وکړه چې د یادو متشبثینو د ملاتړ په برخه کې له اتاق سره همکاري وکړي. نوموړي ډاډ ورکړ چې د ټولګټو بنسټیزو پروژو په پلي کېدو کې به د سوداګرۍ او پانګونې اتاق هر اړخیزه همکاري کوي او د اتاق او یادې مؤسسې ترمنځ د دوامدارو ناستو پر ضرورت یې ټینګار وکړ.

 

 

 

 

 

 

د افغانستان د سوداګرۍ او پانګونې اتاق لومړي مرستیال، محترم محمد یونس مهمند، د پالیسۍ او تخنیکي مرستیال ښاغلي محمد انور عارفي، د دولت سره د اړیکو د دیپارتمنت مسؤول ښاغلي صمیم هاشمي، او د بریښنایي وسایلو د تخصصي کمېټې رئیس ښاغلي محمد ابراهیم رسولی په حضور کې، له یو شمېر هغو دوکاندارانو سره لیدنه وکړه چې د ۱۳۹۷ هـ.ش کال د اورلګیدنې له امله یې په خیرخواه مارکېټ کې زیان لیدلی و، او د دوی ستونزې یې واورېدې.

ښاغلي رسولی، د ۱۳۹۷ هـ.ش کال د کابل د نادر پشتون سړک د اورلګیدنې په اړه معلومات ورکړل، چې په ځانګړې توګه خیرخواه مارکېټ کې ۸۳۸ دوکانونه سوځیدلي وو او شاوخوا ۱۱۴ میلیونه ډالر زیان یې دوکاندارانو ته اړولی و. هغه زیاته کړه، چې د هغه وخت د قرارداد او طرزالعمل پر بنسټ باید دوکانونه له بیارغونې او د نرخونو له ټاکلو وروسته، اصلي متضررینو ته وسپارل شي، خو اوس داسې ښکاري چې ډېری متضررین خپلو حقونو ته نه دي رسېدلي. نوموړي له اتاق وغوښتل چې د دوی ستونزې اړوندو حکومتي ادارو ته ورسوي او د عادلانه توزیع په برخه کې ورسره همکاري وکړي.

د خیرخواه مارکېټ دوکاندارانو هم د خپلو موجوده ستونزو په اړه خبرې وکړې، په ځانګړې توګه د دوکانونو ناعادلانه ویش، چې د پخوا ټاکل شویو نرخونو خلاف تر سره شوی دی. هغوی غوښتنه وکړه چې مخکې تصویب شوی قرارداد او طرزالعمل دې تطبیق شي، او ادعا یې وکړه چې د ویش په بهیر کې عدالت نه دی مراعات شوی، او اصلي متضررین د عادلانه ویش غوښتونکي دي.

ښاغلي مهمند، له خیرخواه مارکېټ دوکاندارانو څخه د دوی د ستونزو تر اورېدو وروسته وویل، چې د افغانستان د سوداګرۍ او پانګونې اتاق تل د خصوصي سکتور د زیانمنو شویو غړو، په ځانګړې توګه د هغو سوداګرو او دوکاندارانو ستونزو ته چې په پیښو او اورلګیدنو کې زیانمن شوي، جدي پاملرنه کړې ده. نوموړي زیاته کړه، چې د نادر پشتون د سړک اورلګیدنه، په ځانګړې توګه د خیرخواه مارکېټ پېښه، د کابل په زړه کې یوه ستره ضایعه وه چې ډېر زیانونه یې واړول، او اتاق هڅه وکړه چې بیارغول شوي دوکانونه اصلي متضررینو ته وسپارل شي.

ښاغلي مهمند ټینګار وکړ، چې د اتاق مشرتابه د دوکانونو د عادلانه ویش ملاتړ کوي، او له معترضو دوکاندارانو یې وغوښتل، چې له منځه دې پنځه تنه د استازو په توګه وټاکي، څو اتاق وکولای شي له هر اړخیزې ارزونې او له اړوندو خواوو سره تر خبرو وروسته، له حکومتي ادارو سره په همغږۍ، عملي ګامونه واخلي.

 

 

 

 

 

 

د افغانستان د سوداګرۍ او پانګونې اتاق د عامل پلاوي د پالیسي او تخنیکي مرستیال ښاغلي محمد انور عارفي، د نړیوالو اړیکو مسؤل ښاغلي عبدالمتین غالب، او د صادراتو او پانګونې د پراختیایي اړیکو مسؤل ښاغلي ګل احمد حاجي زاده په شتون کې، د قزاقستان د سوداګرۍ او صنایعو د اتاق له عامل رئیس ښاغلي چنګیز خان ممانوف او د هغه له ملګري ټیم سره آنلاین لیدنه وکړه او د دواړو هېوادونو تر منځ د سوداګریزو اړیکو د پراختیا په اړه یې بحث او نظرونه تبادله کړل.

ښاغلي عارفي، قزاقستان د افغانستان یو ښه ملګری او د نیکو سوداګریزو اړیکو لرونکی هېواد یاد کړ او د دواړو هېوادونو د خصوصي سکتور ترمنځ د ګډو نندارتونونو او سوداګریزو ناستو د جوړولو پر اړتیا ټینګار وکړ. نوموړي، د افغان سوداګرو عمده ستونزې لکه د قزاقستان له لورې پر افغان صادراتي توکو، په ځانګړې توګه پر تازه مېوو، د لوړو ګمرکي تعرفو وضع کول، د معیاري سړې خونې نشتوالی د قزاقستان په ګمرکونو کې، او د بانکي اسانتیاوو نشتوالی یاد کړل او له ښاغلي چنګیز خان څخه یې وغوښتل چې د قزاقستان له حکومتي ادارو سره په همغږۍ د یادو ستونزو د حل لپاره ځانګړې پاملرنه وکړي.

ښاغلي عارفي، د افغان خصوصي سکتور له لورې له قزاق سوداګرو سره د ګډو پانګونو د لیوالتیا یادونه وکړه او د قزاقستان له اړوندو ادارو څخه د افغان سوداګرو لپاره د ویزې د اسانتیاوو نشتوالی یې د دواړو هېوادونو ترمنځ د سوداګرۍ او پانګونې د خنډونو په توګه یاد کړ. نوموړي له د قزاقستان د سوداګرۍ او صنایعو د اتاق له رئیس څخه وغوښتل چې د هغه هېواد سوداګر د امام ابوحنیفه (رح) په ملي او نړیوال نندارتون کې د ګډون لپاره وهڅوي.

ښاغلي چنګیز، د اتاق د عامل پلاوي د پالیسي او تخنیکي مرستیال وړاندیزونه واورېدل او د قزاق سوداګرو له خوا په افغانستان کې د مختلفو اقتصادي سکتورونو لپاره د پانګونې د علاقې یادونه وکړه. نوموړي ژمنه وکړه چې قزاق سوداګر به د امام ابوحنیفه (رح) په ملي او نړیوال نندارتون کې د ګډون لپاره تشویق کړي، د دواړو هېوادونو د اتاقونو د مشرانو ترمنځ به آنلاین ناسته ترسره شي، او د نږدې راتلونکي لپاره به د افغان ـ قزاق خصوصي سکتور ترمنځ د سوداګرۍ غونډه د قزاقستان په الماتا ښار کې جوړه کړي. نوموړي له ښاغلي عارفي څخه وغوښتل چې د هغو افغان سوداګرو نوملړ ورسره شریک کړي چې غواړي له قزاق سوداګرو سره په مختلفو اقتصادي برخو کې ګډې پانګونې وکړي.