ښاغلي میراجان سلیمانخېل، د افغانستان د سوداګرۍ او پانګونې اتاق د پالیسي او د حکومت سره د اړیکو مرستیال، له ښاغلي انجنیر سیادت، د ایران – افغانستان د ګډ سوداګرۍ اتاق له رئیس او یو شمېر افغان سوداګرو سره په مشهد کې وکتل.
په دې ناسته کې، دواړو لورو د اقتصادي اړیکو د پیاوړتیا، د ګډو تجارتي غونډو او نندارتونونو د جوړولو په اړه خبرې وکړې.
ښاغلي سلیمانخېل د اتاق د فعالیتونو او پروګرامونو یادونه وکړه، چې موخه یې د خصوصي سکتور وده او د سیمې او نړۍ له هېوادونو سره د تجارتي راکړې ورکړې زیاتوالی دی، او د اتاق بشپړ ملاتړ یې له ټولو اقتصادي فعالیتونو څرګند کړ.
ښاغلي سیادت د اقتصادي همکاریو پراختیا، د تجارتي اړیکو پیاوړتیا، ګډو پانګونو او د دواړو هېوادونو تر منځ د سوداګرۍ د کچې د لوړوالي پر اهمیت ټینګار وکړ.
