د افغانستان د سوداګرۍ او پانګونې اتاق د مشرتابه پلاوي د درېیم پړاو اته ويشتمه غونډه د اتاق د عمومي رئیس ښاغلي توکل احمدیار په مشرۍ او د نورو ښاغلیو مشرانو هر یو: محمد یونس مهمند، عصمت الله وردک، سلطان محمد صافي، خان محمد سرفراز باز، شیرین آغا سخي، انجینر سید جاوید برهان، خانجان الکوزي، محمد داود یوسفزی، محمد گردیزی، ذکریا بریالي، سید پرویز سادات هوفیانی، جان آقا صادقي، ضیاء الدین اچکزی، بهادر خیرخواه او احمد شکیب احمدیار په ګډون؛ او همدارنګه د پالیسۍ او تخنیکي چارو مرستیال محمد انور عارفي او د عامل پلاوي د مالي او اداري چارو سرپرست میر زمان پوپل په ګډون، د سوداګرۍ او پانګونې اتاق د مشرتابه پلاوي په دفتر کې چې د کابل په شهرنو کې موقعیت لري، ترسره شوه.

په پیل کې د اته ويشتمې ناستې اجنډا او د مشرتابه پلاوي د درېیم پړاو اووه ويشتمې غونډې مصوبات او د ناستې صورت جلسه د محترم ذکریا بریالي، د مشرتابه پلاوي غړي، لخوا غونډې ته وړاندې شول او امضا شول.

وروسته د اتاق د هیات عامل راپورونه د پالیسۍ او تخنیکي چارو مرستیال ښاغلي محمد انور عارفي لخوا غونډې ته وړاندې شول، او همدارنګه د مالي او اداري چارو سرپرست میر زمان پوپل د مشرتابه پلاوي غړو ته په اړه د وړاندیزونو او راپورونو مفصل معلومات وړاندې کړل.

همدارنګه په وروستیو کې د سپین بولدک او د هرات ولایت د ګمرک په تجارتي مارکېټونو کې د وروستیو اورلګېدنو راپور او د دغو اورلګېدنو له امله شوي زیانونه د محترم ضیاءالدین اچکزي لخوا غونډې ته وړاندې شول او د اړوند دولتي مقاماتو سره شریک شول.

د امام ابوحنیفه (رح) د درېیم ملي او نړیوال نندارتون د تدویر په اړه او د افغانستان د سوداګرۍ او پانګونې اتاق اړوند مسایلو، او نورو وړاندیز شویو موضوعاتو په اړه بحث وشو، او اړین فیصلې ترسره شوې.

 

 

ښاغلي محمد یونس مهمند د افغانستان د سوداګرۍ او پانګونې اتاق لومړي مرستیال، د هېواد له یو شمېر سوداګرو او پانګوالو سره د چین په ګیانګیین ښار کې د سوداګرۍ او پانګونې د پراختیا په نندارتون او کنفرانس کې ګډون وکړ.

په دې کنفرانس کې د یاد شوي ښار تولیدي وړتیاوې ګډونوالو ته تشریح شوې او چینايي شرکتونو خپل محصولات نندارې ته وړاندې کړل. همدارنګه، د افغان او چینايي سوداګرو او پانګوالو ترمنځ د پانګونې او د سوداګرۍ د بهیر د چټکتیا په اړه بحث او خبرې وشوې.

د دې ناستو په څنډه کې؛ ښاغلي مهمند او ورسره مل ټیم د دې ښار له لویو تولیدي فابریکو لکه د خوراکي توکو او اوسپنې فابریکو څخه لیدنه وکړه او د دې فابریکو له مسؤلینو سره یې خبرې اترې وکړې.

 

 

ښاغلي محمد یونس مهمند د افغانستان د سوداګرۍ او پانګونې اتاق لومړي مرستیال، د ښاغلي بهادر خیرخواه د اتاق مدیره پلاوي غړی او ښاغلي میر زمان پوپل، د عامل پلاوي مالي او اداري چارو مرستیال سرپرست، په شتون کې له ښاغلي یادګار خواجه شادمانوف، د ازبیکستان سفیر او ورسره مل پلاوي سره وکتل او د ښاغلي سفیر له هڅو او لاسته راوړنو څخه یې په دوه اړخیزه سوداګریزو اړیکو، له ازبیکستان هېواد سره د ناستو په ترتیبولو او د سوداګرۍ او پانګونې د کچې په لوړولو کې مننه وکړه.

ښاغلي مهمند، د ښاغلي شادمانوف خدمتونو ته اشاره وکړه چې په خپله دنده کې یې ترسره کړي او په تېرو درې کلونو کې یې د سوداګرۍ او پانګونې په برخه کې د دواړو هېوادونو د اړیکو په ښه کولو او د خصوصي سکتور لپاره د اسانتیاوو په برابرولو کې د هغه رول وستایه.

ښاغلي مهمند، د امام ابوحنیفه (رح) ملي او نړیوال نندارتون په اړه معلومات وړاندې کړل او له ښاغلي سفیر څخه یې وغوښتل چې دې لوی نندارتون ته د ازبیکستان سوداګر د ګډون په موخه وهڅوي او محصولات نندارې ته وړاندې کړي.

هغه، ډاډ ورکړ چې اتاق به تل په افغانستان کې د ازبیکستان سفارت سره همکاري وکړي او د دواړو خواوو سوداګرو ستونزو ته به رسېدنه وکړي.

ښاغلي شادمانوف، د افغانستان د سوداګرۍ او پانګونې اتاق له مشرتابه څخه د داسې ناستې د جوړولو له امله مننه وکړه او د افغانستان د سوداګرۍ او پانګونې اتاق رول یې په سوداګرۍ کې د اسانتیاوو رامنځته کولو، په ځانګړې توګه د افغان-ازبیک نندارتون، د ترمز ګډ بازار پرانستلو او ځینو نورو مسایلو کې وستایه او په راتلونکې کې د همکارۍ ژمنه یې وکړه.

 

 

 

ښاغلي محمد یونس مهمند د افغانستان د سوداګرۍ او پانګونې اتاق لومړي مرستیال، چین ته د خپل سفر په ترڅ کې د هېواد له یو شمېر سوداګرو او پانګوالو سره یو ځای د سیچوان - سویل او سویل ختیځ آسیا ۲۰۲۴ سوداګریزې همکارۍ د پراختیا کنفرانس کې ګډون وکړ. دغه کنفرانس د سیمې په کچه د همکارۍ پراختیا، د شته سوداګریزو او پانګونې فرصتونو څخه ګټه اخیستنه او اقتصادي پرمختګ په موخه د سویل او سویل ختیځ آسیا هېوادونو او چین لوړپوړو استازو په حضور کې په سیچوان ښار کې جوړ شوی و.

ښاغلي مهمند، افغانستان یې د سویلی آسیا او مرکزي آسیا ترمنځ د وصل نقطه وبلله او د ختیځ او لوېدیځ ترمنځ یې په سوداګریزه لاره کې د دې هېواد مهم رول یاد کړ. هغه زیاته کړه چې افغانستان د قیمتي ډبرو او بې شمېره کانونو بډایه هېواد دی او په ارګانیک محصولاتو لکه زعفران، جلغوزې، وچه مېوه، دوایي بوټو او نورو کرنیزو توکو کې لوړ پوتانسیل لري.

ښاغلي مهمند، په ټولو ولایتونو کې د امنیت په ښه والي، د مخدره توکو د کر کښت او سوداګرۍ په وړاندې جدي مبارزه او د اداري فساد په برخه کې د سختو اقداماتو یادونه وکړه او دا یې د وروستیو دریو کلونو مهمې لاسته راوړنې وګڼلې چې د داخلي او نړیوالو شرکتونو لپاره یې خوندي سوداګریز لارې برابرې کړي، قانوني او پایدار اقتصاد رامنځته کړی او په سوداګریزو معاملو کې یې د بهرنۍ پانګونې د شفافیت تضمین کړی. نوموړي له بهرنیو پانګوالو څخه وغوښتل چې په بشپړ اعتماد سره د هېواد بازارونو ته داخل شي.

هغه، د سیمې په کچه د لا قوي همکارۍ لپاره په دې کنفرانس کې د ګډ بانک جوړول، د سوداګریزو قوانینو او مقرراتو معیاري کول، د ټرانسپورټ او انرژۍ بنسټيزه پراختیا، د ګډو پانګونې صندوقونو جوړول او د ازادو سوداګریزو زونونو رامنځته کولو وړاندیز یې وکړل.

ښاغلي مهمند، د واخان دهلیز د افغانستان او چین ترمنځ د نښلونې او همدارنګه چین لپاره د ایران او منځني ختیځ بازرونه ته د لاسرسی په موخه مهم وګاڼه او د هېواد د خصوصي سکتور د ملاتړ ډاډ یې ورکړ.

په پای کې یې د کنفرانس له ګډونوالو هېوادونو څخه وغوښتل چې په کابل کې د امام ابوحنیفه (رح) په ملي او نړیوال نندارتون کې ګډون وکړي او له نېږدې د افغانستان سوداګریز ظرفیتونه او فرصتونه وګوري.

 

 

ښاغلي محمد یونس مهمند د افغانستان د سوداګرۍ او پانګونې اتاق لومړي مرستیال، په افغانستان کې د جاپان له سفیر ښاغلي تاکایوشي کورومیا، سره وکتل او د افغانستان او جاپان ترمنځ د سوداګریزو اړیکو د پراختیا لارو چارو په اړه بحث او خبرې وکړې. په یاده ناسته کې مېرمن ریکا اوماګاري، د جاپان سفارت لومړۍ سکرتره، او عبدالمتین غالب، د اتاق د نړیوالو اړیکو مسئول، هم حضور درلود.

ښاغلي مهمند، له جاپان هېواد سره د سوداګریزو او اقتصادي اړیکو د پراختیا د اهمیت یادونه وکړه او د هېواد چمتووالی یې د سوداګرۍ او پانګونې په برخه کې د همکاریو د پیاوړتیا لپاره څرګند کړ. نوموړي، د موجودو خنډونو د لرې کولو پر اړتیا هم ټینګار وکړ، په ځانګړي ډول د سوداګریزو ویزو د اسانتیاوو په اړه، تر څو د دواړو هېوادونو ترمنځ سوداګریز تعاملات زیات شي.

ښاغلي مهمند، د افغانستان د سوداګرۍ او پانګونې اتاق په استازیتوب، د جاپان ښاغلي سفیر او د جاپان د سوداګرۍ اتاق رئیس ته بلنه ورکړه چې د امام ابوحنیفه (رح) د درېیم ملي او نړیوال نندارتون په مراسمو کې ګډون وکړي. هغه له جاپاني سفیر څخه وغوښتل چې د جاپان د لیوالو شرکتونو استازي په دې نندارتون کې د ګډون په موخه وهڅوي او یاد ندارتون یې د دواړو هېوادونو د سوداګریزو همکاریو په پیاوړتیا کې مهم وګاڼه.

همدارنګه، ښاغلي مهمند، د یو نوي ټرانزیټي دهلیز د جوړولو وړاندیز وکړ چې د روسیې د ولادی وستوک ولایت له لارې جاپان ته تېر شي تر څو د دې لارې په وسیله د افغانستان مېوه‌ جات، په ځانګړي ډول مڼې، جاپان ته صادر شي. په همدې لړ کې، هغه د افغانستان د مڼو یوه ډالۍ د جاپان سفیر ته وړاندې کړه.

د دې ناستې په پای کې ، ښاغلي کورومیا، په افغانستان کې د جاپان سفیر، د خپل هېواد ژمنتیا یې د افغانستان سره د سوداګریزو اړیکو په پیاوړتیا کې څرګنده کړه او چمتووالی یې د اړینو همکاریو د وړاندې کولو لپاره اعلان کړ. هغه د افغانستان د حکومت هڅې په بیلابیلو برخو کې لکه: د ټول هېواد د امنیت د ټینګښت، د فساد سره د مبارزې، د کوکنارو د کښت د مخنیوي او د لویو پروژو لکه د قوش‌تیپه کانال او ټاپي پروژې د پیل ستاینه وکړه او د سوداګرۍ د اسانتیا او د پانګونې لپاره د مناسبو شرایطو په رامنځته کولو ټینګار وکړ. ښاغلي سفیر، د افغانستان د خصوصي سکتور څخه یې بلنه وکړه چې په زیاتې همکارۍ سره د دواړو هېوادونو ترمنځ اقتصادي اړیکې پیاوړي کړي.

همدارنګه، د جاپان سفیر د نوي ټرانزیټي دهلیز له طرحې هرکلی وکړ او د افغانستان د مېوه ‌جاتو، په ځانګړي ډول مڼو، د لوړ کیفیت یادونه یې وکړه.

د دې ملاقات په پایله کې هوکړه وشوه چې د افغانستان او جاپان ترمنځ د سوداګریزو اړیکو د پراختیا لپاره به د جاپان د سفارت له لارې همکارۍ او مشورې دوام ومومي او ګډې هڅې به د دواړو هېوادونو ترمنځ د سوداګرۍ د اسانتیا لپاره ترسره شي.