ښاغلي محمد یونس مهمند د افغانستان د سوداګرۍ او پانګونې اتاق لومړي مرستیال، د ښاغلي خانجان الکوزي د اتاق مدیره پلاوي غړي او ښاغلي میرزمان پوپل د اتاق عامل پلاوي مالي او اداري مرستیال سرپرست په شتون کې، له ښاغلي نصیر احمد د کابل وچو مېوو صادرکونکو ټولنې رئیس او مل پلاوي سره د اتاق په مرکزی دفتر کې ولیدل او د هغوۍ د ستونزو په اړه یې خبرې اترې وکړې.

ښاغلي نصیر احمد، د هند ویزې د صدور سهولتونو نشتوالی او د هندي سوداګرو له لوري د افغان صادرونکو د مالونو پیسې نه ورکول یې سترې ستونزې یادې کړې، او د اتاق له مشرتابه پلاوي یې وغوښتل چې ستونزې یې د اړوندو حکومتي ادارو او د هند له سفارت سره شریکې کړي.

ښاغلي محمد یونس مهمند، ښاغلي نصیر احمد او ورسره مل ټیم ته د ښه راغلاست ویلو ترڅنګ، د صادرونکو سوداګرو رول یې د هېواد په اقتصادی پرمختګ کې مهم وباله او د دوی له نه ستړي کېدونکو هڅو یې مننه یې وکړه.

ښاغلي مهمند، د ګاونډیو او سیمې هیوادونو مارکېټونو ته د لاسرسي موضوع د هېواد په صادراتو کې مهمه وبلله او د حکومت پالیسي یې اقتصاد محور یاده کړه. هغه د سیمې او نړۍ په ځانګړي ډول د ګاونډیو هیوادونو سره د ښو اقتصادي-سوداګریزو اړیکو غوښتنه وکړه.

د اتاق لومړي مرستیال، د هند سفیر سره د وچو مېوو د صادراتو د زیاتوالي او د سوداګرو لپاره د ویزې د اسانتیاوو د رامنځته کولو په موخه د څو ورځو وړاندې شوې ناستې په اړه ګډونوالو ته معلومات ورکړل او له ټولو صادرونکو یې وغوښتل چې د صادراتي توکو لیست او انوایسونه په لیکلي ډول د افغانستان سوداګرۍ او پانګونې اتاق ته وسپاري، ترڅو اتاق د دوی د ویزو په ترلاسه کولو کې عملي ګامونه واخلي.

ښاغلي مهمند، اروپایي او آسیایي هیوادونو ته په ځانګړي ډول روسیې ته د صادراتو پر زیاتوالي ټینګار وکړ او له ټولو وچو مېوو سوداګرو یې وغوښتل چې په یو بل سره لاس ورکړي او په کابل ښار کې یو معیاري لوی سوداګریز مارکېټ جوړ کړي، چې په کې ټول نړیوال ستندردونه په ځانګړي ډول یخچالونه په پام کې نیول شوي وي.

د اتاق لومړي مرستیال، د امام ابوحنیفه (رح) په نوم د درېیم ملي او نړیوال نندارتون په اړه ګډونوالو ته معلومات ورکړل چې په نږدې راتلونکي کې به د افغانستان د سوداګرۍ او پانګونې اتاق له خوا په کابل کې جوړ شي، او له ټولو صادرونکو یې وغوښتل چې په یاد نندارتون کې د هېواد هر ډول وچې مېوې نندارې ته وړاندې کړي.

ښاغلي خانجان الکوزي، د افغانستان سوداګرۍ او پانګونې اتاق یې د ټولو سوداګرو ګډ کور وباله او د حکومت نه یې وغوښتل چې د صادرونکو سوداګرو لپاره اسانتیاوې برابرې کړي. هغه د یاد سوداګرو د ستونزو د حل په برخه کې د اتاق د هر اړخیزې همکارۍ ډاډ ورکړ.

 

 

 

په هرات ولایت کې د چهارسوی گذره څلور لاره، چې د برادران مهمند د خوراکي توکو او غیر الکولي مشروباتو شرکت په نوښت په معیاري ډول جوړه شوې وه، د یوې غونډې په ترڅ کې پرانیستل شوه. په دې مراسمو کې ښاغلي محمد یونس مهمند د افغانستان د سوداګرۍ او پانګونې اتاق لومړی مرستیال، د هرات ولایت مقام مرستیال، ښاغلي محمد اسحاق آخوندزاده، د افغانستان د ښاروالیو رئیس، ښاغلي عبدالمتین قلندری، د اتاق څارنې پلاوي منشي او د غزني اتاق رئیس، ښاغلي محمد یونس قاضي زاده، د هرات اتاق رئیس، ښاغلي عبدالله دشتي، د هرات اتاق خدماتي مرستیال، ښاغلي میرزمان پوپل، د عامل پلاوي مالي او اداري سرپرست مرستیال، محترم غلام فاروق مهمند، د برادران مهمند شرکتونو د ګروپ رئیس، محترم جان آقا نوید، د اتاق د عامه اړیکو مسئول، سوداګر او پانګوال او د سیمې خلک ګډون درلود.

ښاغلي مهمند، د برادران مهمند د خوراکي توکو او غیر الکولي مشروباتو شرکت له مشرتابه څخه د دوی د لویو پانګونو او د دې معیاري څلور لارې د جوړولو له امله مننه وکړه او دا یې د وطنپالنې او هیواد او خلکو ته د ژمنتیا نښه وبلله. هغه خصوصي سکتور د حکومت همکار وباله او له ټولو سوداګرو یې وغوښتل چې د هیواد په آبادۍ او بیارغونه کې فعاله ونډه واخلي.

د اتاق لومړي مرستیال، هرات د هیواد یو له ستراتیژیکو اقتصادي ولایتونو څخه یاد کړ او د دې ولایت له خصوصي سکتور څخه یې وغوښتل چې د موجوده فرصتونو په پام کې نیولو سره هیواد کې په رغنیزو چارو کې لاس یو کړي.

ښاغلي مهمند وویل: افغانستان د پرمختګ په حال کې دی او له نړۍ سره یې ښې سوداګریزې اړیکې رامنځته کړي دي. هغه د اصنافو د مالیاتو په کمولو کې د مشرتابه مقام وروستۍ هڅه وستایله.

دا څلور لاره د څو میاشتو په اوږدو کې په معیاري ډول او د ۱۴ میلیونه افغانیو په ارزښت جوړه شوې ده، چې د هرات ښار په ځانګړي توګه د گذره سیمې ښکلا یې زیاته کړې ده.

 

 

په هغه غونډه کې چې د افغانستان د سوداګرۍ او پانګونې اتاق لومړي مرستیال محمد یونس مهمند او په کابل کې د قطر سفارت د سلاکار مردیف علي القشاتي، په شتون کې جوړه شوې وه، ښاغلي مهمند د قطر له خلکو څخه د مننې ترڅنګ، د افغان سوداګرو او پانګوالو د ملاتړ په برخه کې د قطر سفارت د هڅو ستاینه وکړه او په دې یې ټینګار وکړ چې د دواړو هیوادونو ترمنځ سوداګریزې او اقتصادي اړیکې پراخې شي.

له بله خواه، په دې غونډه کې، په افغانستان کې د پانګونې لپاره د قطري پانګوالو د هڅولو او بلنې څرنګوالي په اړه خبرې اترې وشوې.

ښاغلي مهمند، همدارنګه د امام ابوحنیفه د درېیم ملی او نړیوال نندارتون د جوړیدو په اړه خبرې وکړې او د قطر سفیر او لیوالو قطري شرکتونو څخه یې وغوښتل چې په یاد نندارتون کې ګډون وکړي.

په پای کې، د قطر سفارت سلاکارد مطرح شویو موضوعاتو د اورېدو تر څنګ، د افغانستان د سوداګرۍ او پانګونې اتاق سره د هر اړخیزې همکارۍ ژمنه وکړه.

 

 

ښاغلي محمد یونس مهمند د افغانستان د سوداګرۍ او پانګونې اتاق لومړی مرستیال، هرات ولایت ته د خپل سفر په ترڅ کې، چې ښاغلي میرزمان پوپل د عامل پلاوي مالي او اداري مرستیال سرپرست او ښاغلي جان آقا نوید د اتاق د عامه اړیکو مسئول، هم ورسره ملګري وو، د ښاغلي محمد یونس قاضي زاده، د هرات د اتاق رئیس، محترم احمد سعید صدیقي، د هرات د اتاق تجارتي مرستیال، محترم محمد اسحاق آخوندزاده، د افغانستان د ښاروالیو عمومی رئیس، او محترم عبدالله دشتي، د هرات اتاق خدماتي مرستیال په شتون کې د تلاسیمیا ناروغیو د درملنې روغتون د جوړولو بهیر څخه لیدنه وکړه، چې په هرات کې د خصوصي سکتور د غړو او د سوداګرۍ او پانګونې اتاق د ملاتړ او نوښت په پایله کې جوړېږي.

ښاغلي محمد یونس قاضي زاده، د اتاق مرستیال او د دوی مل پلاوي ته د ښه راغلاست ویلو ترڅنګ، ددې روغتون په اړه یې مفصل معلومات وړاندې کړل او زیاته یې کړه چې دغه روغتون د سوداګرو په ملاتړ او د هرات د سوداګرۍ او پانګونې اتاق په نوښت جوړېږي.

ښاغلي محمد یونس مهمند، د دې روغتون د بېلابېلو برخو څخه د لیدنې په ترڅ کې د هېواد د خصوصي سکتور د غړو د دې نوښت قدرداني وکړه او دا ګام یې د هېواد او د خلکو په وړاندې د ژمنې نښه وبلله.

ښاغلي مهمند، د تلاسیمیا د ناروغیو د درملنې روغتون د جوړولو اړتیا ته اشاره وکړه او په دې برخه کې یې د اړوندو حکومتي ادارو د همکارۍ پر اهمیت ټینګار وکړ. هغه ډاډ ورکړ چې د افغانستان د سوداګرۍ او پانګونې اتاق به د خصوصي سکتور د ستونزو د حل لپاره له دولتي ادارو سره په همغږۍ کې هر اړخیز ملاتړ وکړي.

 

 

 

محترم محمد یونس مهمند، د افغانستان د سوداګرۍ او پانګونې اتاق لومړي مرستيال، په داسې حال کې چې ښاغلیو: محمد یونس قاضي زاده، د هرات د اتاق رئیس، محمد اسحاق آخوندزاده، د افغانستان د ښارواليو رئیس، عبدالله دشتي، د هرات اتاق د خدماتو مرستيال، ميرزاعمان پوپل، د اتاق عامل پلاوي د مالي او اداري مرستيال سرپرست او يو شمېر سوداګر ور سره مل وو، د هرات ښار له حبيب یار نړیوال روغتون څخه ليدنه وکړه او د دې مرکز د مسوولانو سره يې د فعاليتونو، صحي خدماتو او بېلابېلو برخو په اړه خبرې وکړې.

د ياد روغتون مسوولانو، د دې روغتيايي مرکز د فعاليتونو او بېلابېلو څانګو په اړه معلومات وړاندې کړل او زياته يې کړه چې: حبيب یار نړیوال روغتون په ۸ پوړونو کې د نړيوالو معيارونو سره سم جوړ شوی، چې تر ۳۰ ميليونه ډالرو زياته پانګونه پکې شوې او د کورنيو او بهرنيو ډاکټرانو په لرلو سره د روغتيا په بېلابېلو څانګو کې، په ځانګړي ډول د ګردو پیوند، د اعصابو جراحي، د تېرو لسو کلونو راهيسې ۲۴ ساعته خدمتونه وړاندې کوي. هغوی خپل موجوده ستونزې د افغانستان د سوداګرۍ او پانګونې اتاق لومړي مرستيال سره شريکې کړې او د حل غوښتنه يې وکړه.

د اتاق لومړي مرستيال د دې روغتون د مسوولانو د خبرو اورېدو ترڅنګ، د ټول هېواد ډاکټرانو څخه خلکو ته د ۲۴ ساعته خدمتونو وړاندې کولو قدرداني وکړه.

ښاغلي مهمند په هېواد کې د سرتاسري امنيت ټينګښت، د کوکنارو د کرکيلې منع او د فساد په کچه کې د پام وړ کموالی د تېرو درې کلونو مهمې لاسته راوړنې وبللې او د دې روغتون د مسوولانو څخه يې وغوښتل چې د هېواد د کړاو ځپلو خلکو ته د صحي خدمتونو په وړاندې کولو کې له پخوا زياتې هلې ځلې وکړي.

د افغانستان د ښارواليو رئیس، د دې روغتون د مسوولانو د ستونزو تر اورېدو وروسته له هغوی وغوښتل چې د دې روغتون ټول اړوند معلومات له خپلو ستونزو سره يو ځای په ليکلې بڼه ترتيب کړي.