د بشیر نوید ګروپ بنسټ د بې ‌وزله ناروغانو لپاره د هیموډیالیز کټونو د چمتو کولو په موخه، د افغانستان د سوداګرۍ او پانګونې اتاق سوداګریز مرستیال ښاغلي خیرالدین مایل احمدي او د بلخ ولایت د عامې روغتیا مرستیال ښاغلي احمد شاداب په حضور کې د همکارۍ هوکړه لیک لاسلیک کړ.

ښاغلي مایل د بلخ د عامې روغتیا د ریاست د مسوولینو د شپه او ورځې هڅو ستاینه وکړه او د بشیر نوید ګروپ فعالیتونو ته په اشارې سره وویل: دغه بنسټ د بې ‌وزلو وګړو لپاره په بېلابېلو ولایتونو کې مالي او لومړني مرستې کړې دي او دغه هڅې به دوام لري.

د بلخ د ولایتي روغتون آمر، د سوداګرۍ او پانګونې اتاق سوداګریز مرستیال، د بشیر نوید ګروپ بنسټ او د اتاق مشرتابه پلاوي څخه له روغتیا سکتور سره د اوږدمهاله همکاریو ستاینه وکړه او د ناروغانو د درملنې او د مړینې د کچې په کمولو کې د خصوصي سکتور مرستې مهمې وبللې.

د ناستې په پای کې، د سوداګرۍ مرستیال او د یاد روغتون مسوولینو د بشیر نوید ګروپ د تجهیزاتو او ناروغانو څخه لیدنه وکړه او د ناروغانو د عاجلې شفا لپاره یې دعا وکړه.

 

 

 

د افغانستان د سوداګرۍ او پانګونې اتاق لومړي مرستیال، ښاغلي محمد یونس مهمند، په داسې حال کې چې د اتاق د مشرتابه پلاوي غړي ښاغلی خانجان الکوزی، د اتاق ارشد سلاکار ښاغلی حاجي شرف الدین او د صنایعو او کانونو د اتاق رئیس ښاغلی شیرباز کمین زاده او د بهیر ګروپ د فابریکو رئیس هم ورسره ملګري وو، د بهیر ګروپ فابریکو له بېلابېلو برخو او تولیداتو څخه لیدنه وکړه.

نوموړي د دغو فابریکو رول د دندو په رامنځته کولو، د تولیدي توکو د وارداتو کمولو، اقتصادي پرمختګ، صادراتو پیاوړتیا، د پانګونې جذب او د هېواد په پرمختګ کې مهم وباله او له ټولو تولیدوونکو یې وغوښتل چې د خپلو فابریکو تولیدات د نړیوالو معیارونو سره سم بازار ته وړاندې کړي.

 

 

 

 

 

د افغانستان د سوداګرۍ او پانګونې اتاق د سوداګرۍ بهیر د اسانتیا او د خصوصي سکتور د غړو د مالیاتي ستونزو د حل په موخه، مقدماتي ناسته د مختلفو اتحادیو د مسؤولینو او مطرح سوداګرو په ګډون په اتاق کې ترسره کړه.

په دې ناسته کې د اتاق د مشرتابه غړي هر یو: ښاغلي محمد یونس مهمند د اتاق لومړی مرستیال، ښاغلي شیرین آغا سخي د اتاق مدیره پلاوي مالی رئیس، ښاغلي خانجان الکوزي د اتاق مدیره پلاوي غړي او دافغان پاک ګد اتاق رئیس او ضیاالدین اچکزی د مدیره پلاوي غړي، ښاغلي احمد شاه حکیمی د کابل د سوداګرۍ او پانګونې اتاق لومړی مرستیال او میر زمان پوپل د عامل پلاوي مالي او اداري مرستیال، د اتاق حقوقي مشاور او د بېلابېلو څانګو مسؤولین حضور درلود.

ښاغلي میر زمان پوپل د دې ناستې اساسي هدف د خصوصي سکتور د غړو نظریات او وړاندیزونه راټولول وبلل، ترڅو پر عوایدو ړ مالیاتو په قانون کې ځینې تعدیلات رامنځته شي چې په تېرو وختونو کې یې په مالیاتي چارو کې ستونزې جوړې کړې وې. هغه زیاته کړه چې د خصوصي سکتور د مختلفو برخو پرله‌پسې غوښتنې او د حکومت په ځانګړې توګه د مالیې وزارت سره د ناستو په پایله کې، اتاق غوښتنه کړې چې د دې قانون ځینې مواد تعدیل شي. هغه غوښتنه وکړه چې د خصوصي سکتور غړي باید د خپلو اړوند اتحادیو له لارې خپل مشخص نظریات او وړاندیزونه په لیکلي ډول د اتاق سره شریک کړي، ترڅو وروسته د حکومت له رهبرۍ سره وویشل شي.

ښاغلي محمد یونس مهمند د دې ناستې ګډونوالو ته د ښه راغلاست ترڅنګ د خصوصي سکتور له‌خوا د بې‌وزله خلکو او د طبیعي افتونو له امله زیانمن شویو کسانو سره د مرستو ستاینه وکړه. هغه مالیه د اقتصادي نظام د پیاوړتیا، د زیربنايي پروژو د تطبیق، او د ستراتیژیکو پروژو لکه د قوش‌تپه کانال او د سالنګ لویې لارې د جوړولو لپاره حیاتي عنصر وګاڼه. هغه له ټولو سوداګرو او پانګه‌والو وغوښتل چې خپلې مالیې په ټاکلي وخت او په بشپړه توګه تحویل کړي.

ښاغلي مهمند د قانون د تعدیلاتو اړوند د حکومت وروستیو اقداماتو په اړه معلومات ورکړل او دا تعدیلات یې د سوداګرۍ د بهیر ګړندي کولو، صادراتو او وارداتو د زیاتوالي، او د قاچاقي مالونو د مخنیوي لپاره مهم وبلل. هغه له ټولو ګډونوالو غوښتنه وکړه چې د قانون د موادو د تعدیلاتو په برخه کې خپل نظریات د اتاق له رهبرۍ سره شریک کړي، ترڅو اتاق د حکومتي ادارو سره په همغږۍ ګامونه پورته کړي.

ښاغلي خانجان الکوزي د خصوصي سکتور د غړو پر اتحاد او همکارۍ ټینګار وکړ او له سوداګرو یې وغوښتل چې خپل معقول نظریات او وړاندیزونه د قانون د تعدیلاتو په برخه کې له رهبرۍ سره شریک کړي. هغه ګډونوالو ته ډاډ ورکړ چې اتاق د حکومتي ادارو په همکارۍ د مالیاتي سیسټم د اسانتیا لپاره هڅې کوي.

ښاغلي ضیاالدین اچکزي د مالیاتو د تعدیلاتو په اهمیت خبرې وکړې او زیاته یې کړه چې د قانون تعدیلات به د شرکتونو د مالیاتي پورونو د تصفیې او د خصوصي سکتور له‌خوا د مالیاتو د پر وخت ورکولو لپاره هڅونه وکړي، چې دا به د سوداګرو او پانګه‌والو لپاره شفافیت او ډاډمنتیا رامنځته کړي.

د مختلفو اتحادیو مسؤولینو هم د مالیاتي چارو په برخه کې خپلې ستونزې بیان کړې او خپلې نظریې او وړاندیزونه د قانون د تعدیلاتو په اړه له رهبرۍ سره شریک کړل.

په پای کې، ښاغلي شیرین آغا سخي د ناستې په اړه خپله جمعبندي وړاندې کړه او زیاته یې کړه چې د دې ناستې اساسي هدف د عوایدو مالیاتو قانون په اړه د سوداګرو پوهاوی زیاتول او د تعدیل وړ مواردو مشخص کول دي. هغه له ټولو ګډونوالو غوښتنه وکړه چې د قانون د موادو د تعدیلاتو په اړه خپلې نظریې په لیکلي ډول د اتاق سره شریکې کړي، ترڅو اتاق وکولای شي د حکومت له رهبرۍ سره خبرې وکړي او مناسبې لارې چارې ولټوي.

 

 

 

 

ښاغلي محمد یونس مهمند، د افغانستان د سوداګرۍ او پانګونې اتاق لومړی مرستیال د عامل پلاوي د تخنیکي او پالیسۍ مرستیال ښاغلي محمد انور عارفي په حضور کې له لوژستیکي او ساختماني شرکتونو مسوولینو سره ولیدل او د دوی ستونزې یې واورېدې.

د لوژستیکي او ساختماني شرکتونو مسوولینو د خپلو بشپړ شوو پروژو د پیسو د نه ورکړې ستونزې یادې کړې چې د ځینو حکومتي وزارتونو له لوري ورته ورکړې شوې نه دي. هغوی له ښاغلي مهمند څخه وغوښتل چې د دې ستونزو د هواري لپاره دې له اړوندو حکومتي ادارو سره جدي هڅې وکړي.

ښاغلي مهمند، د دې غونډې ټولو ګډونوالو ته د ښه راغلاست ویلو ترڅنګ، د سوداګرو، پانګه والو او لوژستیکي او ساختماني شرکتونو رول د کارموندنې، اقتصادي ودې، صادراتو او وارداتو پراختیا او د هېواد د بیا رغونې په برخه کې مهم وباله. هغه له ټولو ګډونوالو شرکتونو وغوښتل چې خپلې ستونزې او وړاندیزونه په لیکلې بڼه اتاق ته وسپاري، تر څو د دې ستونزو د حل لپاره د حکومتي ادارو سره په همغږۍ هڅې وشي.

 

 

 

 

د افغانستان د سوداګرۍ او پانګونې اتاق لومړي مرستیال، ښاغلي محمد یونس مهمند، د کابل د سوداګرۍ اتاق د لومړي مرستیال احمدشاه حکیمي، د عامل پلاوي د مالي او اداري مرستیال میرزمان پوپل، د اتاق حقوقي مشاور عبدالسلام کوهي او د دولت سره د اړیکو مسؤل صمیم هاشمي په شتون کې، د هرات د نفتو اتحادیې مرستیال عبدالودود عزیزی او د هغه ملګرو سره په مرکزي دفتر کې ولیدل او د هغوی ستونزې یې واورېدلې.

ښاغلي عزیزی د افغانستان د سوداګرۍ او پانګونې اتاق د دوامداره همکارۍ مننه وکړه او خپلې ستونزې یې د اتاق له مشرتابه سره شریکې کړې. هغه له حکومتي اړوندو ادارو سره د ستونزو د حل په برخه کې د اتاق د مشرتابه همکاري وغوښته او غوښتنه یې وکړه چې د دولت له‌خوا دې د نفتو ذخیرو جوړولو لپاره په یاده حوزه کې ځمکه ورکړل شي.

ښاغلي مهمند، د ښاغلي عزیزی او د هغه د ټیم د راتګ هرکلی وکړ او هرات ولایت یې د هېواد له مهمو اقتصادي ولایتونو څخه یاد کړ. هغه ګډونوالو ته د مالیې محترم وزیر او د اړوندو حکومتي ادارو سره د تیلو د واردونکو ستونزو د حل او د بې‌کیفیته نفتو د وارداتو د مخنیوي په اړه د ترسره شوو غونډو معلومات ورکړل.

ښاغلي مهمند، ډاډ ورکړ چې اتاق د هغو سوداګرو ملاتړ کوي چې د سویل لوېدیځې حوزې لپاره د نفتو ذخیرو جوړولو غوښتونکي دي.

هغه، د سوداګرۍ او پانګونې اتاق د خصوصي سکتور ملاتړ کوونکې او د دولت سره د مستقیم ارتباط پل وباله او ټینګار یې وکړ چې باکیفیته نفت د خلکو اړتیاوې پوره کولو، د چاپېریال د ککړتیا مخنیوي او د ناروغیو د کمولو په برخه کې مهم رول لري. نوموړي له ټولو نفت واردونکو څخه وغوښتل چې د نفتو د معیاري کولو لپاره هڅې وکړي او د بې‌کیفیته تیلو واردولو او د بازار د انحصار څخه ډډه وکړي.

ښاغلي پوپل، د سویل لوېدیځې حوزې د نفتو اتحادیې له مسؤلینو څخه وغوښتل چې خپلې ستونزې د ولایتي اتاقونو سره شریکې کړي، څو اتاق وکولای شي د هغوی ستونزو ته په اغېزمنه توګه رسیدنه وکړي. هغه د افغانستان د سوداګرۍ او پانګونې اتاق له لوري د اتحادیې د ستونزو د حل په برخه کې د هر اړخیزې همکارۍ ډاډ ورکړ.