د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند د اتاق مدیره پلاوي غړي ښاغلي خان جان الکوزي په حضور کې په ترکیه کې د مېشتو افغان سوداګرو اتحادیې له رئیس ښاغلي احسان الله کامه وال سره لیدنه ترسره او په ترکیه کې د افغان سوداګرو شته ستونزو په اړه يې بحث او د نظر تبادله وکړه.

ښاغلي کامه وال په ترکیه کې د مېشتو افغان سوداګرو د اتحادیې د فعالیتونو او د هغوی د ستونزو په اړه هر اړخیز معلومات وړاندې کړل. هغه د سوداګرۍ او پانګونې اتاق د هېواد د خصوصي سکتور یوازینی استازی وګاڼه او ډاډ یې ورکړ، چې د سوداګرۍ او پانګونې اتاق سره په همغږۍ به د کانونو او روغتیا په برخه کې د بهرنیو هېوادونو سوداګر او پانګوال پانګونې ته وهڅوي.

ښاغلي مهمند په ترکیه کې د مېشتو افغان سوداګرو د اتحادیې رئیس ته د ښه راغلاست په ترڅ کې د سوداګریزو خدمتونو د وړاندې کولو او د افغان سوداګرو د ستونزو په حل کې د دغې اتحادیې د مشرتابه هڅې وستایلې او په ترکیه کې د مېشتو افغان سوداګرو ستونزو حل او تخنیکي مرستو برخه کې يې د افغانستان د سوداګرۍ او پانګونې اتاق د همکاریو ډاډ ورکړ.

ښاغلي مهمند په نږدې راتلونکي کې ترکیې ته د خپل سفر په اړه معلومات ورکړل او د اتحادیې له مشرتابه یې وغوښتل چې د افغان سوداګرو پر وړاندې شته ننګونې او ستونزې ترتیب او له ده سره شریکې کړي څو د حل لپاره یې عملي ګامونه پورته کړی شي.

سه شنبه، غبرګولي ۲۲مه، ۱۴۰۳

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په داسی حال کې چې، د ټوکر اتحاديې رئیس ښاغلي حاجي عبیدالله او یو شمیر سوداګرو يې ملتیا کوله د ګمرکونو له عمومي رئیس سره لیدنه ترسره او د ټوکر سوداګرو ستونزې يې ورسره شریکې کړې.

ښاغلي مهمند سوداګرو او پانګوالو ته د لازمو آسانتیاوو رامنځته کولو برخه کې د ښاغلي سعید هڅې وستایلې او په ګمرکونو کې د سوداګرو شته ستونزو حل په موخه د کوټلو ګامونو اخیستلو غوښتنه يې تری وکړه.

د ګمرکونو عمومي رئیس، د سوداګرو ستونزو او ننګونو اوریدو وروسته، ژمنه وکړه چې د حل برخه کې به يې خپلې هیڅ ډول مرستې ونه سپموي.

‌دغه راز، ښاغلي مهمند د ګمرکونو معینیت عمومي عوایدو له رئیس سره د یوې جلا ناستې په ترڅ کې، د سوداګرو ځینې ستونزې يې ورسره شریکې او د ستونزو او ننګونو د له منځه وړلو برخه کې یې د هغوی د همکارۍ غوښتنه وکړه.

سه شنبه، غبرګولي ۸مه، ۱۴۰۳

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د اتاق د پانګه ایزو چارو مرستیال ښاغلي عصمت الله وردګ، د اتاق مالي رئیس ښاغلي شیرین آغا سخي، د اتاق مدیره پلاوي غړو هر یو ښاغلي خان جان الکوزي او سید پرویز سادات هوفیاني، د ریاست الوزراء اقتصادي معاونیت محترم مقام، د صنعت او سوداګرۍ وزارت سرپرست، د کابل سوداګرۍ اتاق لومړي اتاق ښاغلي احمد شاه حکیمي، د کابل سوداګرۍ اتاق د سوداګریزو چارو مرستیال ښاغلي همایون خواجه زاده، د نورو اتاقونو مشرتابه پلاوو غړو، د اتحادیو مشرانو، سوداګرو او پانګوالو د خصوصي سکتور څخه د ملاتړ پرانیست غونډه کې ګډون وکړاو د یاد صندوق پرانیسته يې د هېواد اقتصادي ودې او خصوصي سکتور څخه د ملاتړ برخه کې یو اړین ګام وباله.

ښاغلي مهمند د خپلو وینا په جریان کې، د خصوصي سکتور ملاتړ صندوق پرانیستې په پار د حکومت د مشرتابه مقام په ځانګړې توګه د ریاست الوزراء اقتصادي مرستیال هڅې او همکارۍ وستایلې او د هېواد اقتصادي رغښت کې يې د خصوصي سکتور رول اړین وباله.

نوموړي زیاته کړه "موږ پخوا د هویو او د چرګانو د غوښو د ۲۵۰ میلیون ډالرو په ارزښت واردات درولودل چې له نیکه مرغه، د حکومت اقتصادي معاونیت په پاملرنې سره یاد واردات ۶ میلیون ډالرو ته راښکته شول."

نوموړي هیله څرګند کړه چې د حکومت او خصوصي سکتور ترمنځ ښه همکاري او همغږي د هېواد د ځان بساینې سبب وګرځي او ډاډ ور کړ چې افغان خصوصي سکتور تل د هېواد اقتصادي پروګرامونو تطبیق څخه ملاتړ او په دی برخه کې همکارۍ ته چمتو دی.

ښاغلي مهمند د یاد صندوق رامنځته کیدل د سوداګرو څخه ملاتړ، کورنیو تولیداتو زیاتوالي، د پانګونو جلب، په بندرونو کې د سوداګرو ستونزو حل، اقتصادي ودې او د خصوصي سکتور څخه د ملاتړ برخه کې یو بی ساری او ګټور ګام وباله.

د اتاق لومړي مرستیال د اصنافو د مالیاتو کمښت او معافیت په پار د حکومت څخه د مننې څرګندولو ترڅنګ، وړاندیز وکړ چې د خصوصي سکتور نورو برخو کې هم د مالیاتي تصفيې اړوند آسانتیاوې رامنځته او د ډیر ځلې ګمرکي محصول اخیستلو پرځای، ګمرکونو ته د سوداګریزو مالونو ورود وخت کې یوازی یو ځل محصول اخذ کړی شي.

ښاغلي خان جان الکوزي د خصوصي سکتور څخه ملاتړ په موخه د صندوق رامنځته کیدو هرکلی وکړ او په ډیر ځلې ګمرکي محصول اخیستو يې د نقد کولو ترڅنګ، هیله څرګنده کړه څو اخیستل شوې پیسې په مناسبو ځایونو کې مصرف شي.

پنجشنبه، غبرګولي ۱۷مه، ۱۴۰۳

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند او د اتاق عامل پلاوي د دولت سره د اړیکو ډیپارټمنټ آمر د تعمیراتي رنګ اتحاديې له رئیس ښاغلي حاجي عمر باز او د یادې اتحاديې له یو شمیر غړو سره لیدنه ترسره او د دوی د ستونزو او مناسبو حل لارو په اړه يې بحث او د نظر تبادله وکړه.

ښاغلي عمر باز او د رنګ واردونکو شرکتونو مسؤلینو په تعمیراتي رنګ باندی د لوړې ګمرکي تعرفې او په ګمرکونو کې نورې شته ستونزې د اتاق لومړي مرستیال سره شریکې او د حل لارو موندلو غوښتنه يې وکړه.

ښاغلي مهمند ښاغلي عمر باز او د تعمیراتي رنګ واردونکو شرکتونو مسؤلینو ته د ښه راغلاست ویلو ترڅنګ زیاته کړه چې اتاق د هېواد د ټولو سوداګرو او پانګوالو ګډ کور دی او د دوی د ستونزو حل برخه کې به خپلې هیڅ ډول مرستې ونه سپموي.

همدارنګه، ښاغلي مهمند د ټیلفوني اړیکي له لارې د تعمیراتي رنګ واردونکو ستونزې د ګمرکونو له عمومي رئیس سره شریکې او د نوموړي څخه يې د دوی ستونزو ته د پای ټکي کیښودو غوښتنه وکړه.

یکشنبه، غبرګولي ۶مه، ۱۴۰۳

د افغانستان د سوداګرۍ او پانګونې اتاق د صاراتو ودې او پانګونې جلب په موخه، د صادراتو او پانګونې ودې تر عنوان لاندی یو کنفرانس جوړ چې د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د مدیره پلاوي غړو هر یو ښاغلي خان جان الکوزي او ضیاءالدین اچکزي، د کابل سوداګرۍ اتاق لومړي مرستیال ښاغلي احمد شاه حکیمي، د مرکزي اتاق عامل پلاوي پالیسۍ او تخنیکي مرستیال ښاغلي محمد انور عارفي، د ګمرکونو عمومي رئیس، د ماليې وزارت د عوایدو معینیت مرستیال، او د قیمتي او نیمه قیمتي ډبرو، ټوکر، ټرانسپورټ، تازه میوو او سبزیجاتو، ښوونځیو، خصوصي پوهنتونونو، درملو، حیواني محصولاتو، سون توکو، ودانۍ، غالۍ، ډبرو سکرو او د مستعملو پرزو اتحادیو مسؤلینو پکې ګډون درلود.

ښاغلي مهمند د کوچنیو متشبثینو مالیاتي معافیت په اړه د حکومت د مشرتابه د وروستي فرمان ستاینه وکړه او یاد ګام يې د حکومت او ملت ترمنځ د ښې همکارۍ نمونې بللو ترڅنګ، د هېواد صادرونکو لپاره د حکومت له لوري په لا زیاتو آسانتیاوو رامنځته کولو غوښتونکی شو.

دغه راز، د اتاق لومړي مرستیال د هېواد په اقتصادي ودې او رغښت کې د سوداګرو رول اړین وباله او د ماليې وزارت ګمرکونو معینیت له مسؤلینو يې وغوښتل څو د تولیدي فابریکو ستونزو حل او د مالیاتو تادیې برخه کې د هېواد سوداګرو ته لازمې آسانتیاوې رامنځته کړي.

ښاغلي الکوزي په تیرو ۳ کلونو کې د سوداګرو ستونزو حل برخه کې، د ګمرکونو معینیت مسؤلینو هڅې د قدر وړ وبللې او زیاته يې کړه چې ورته کنفرانسونه د هېواد د اقتصادي ودې لپاره ګټور دي او باید په ولایتونو کې هم جوړ کړی شي.

نوموړي د ګمرکونو له مسؤلینو وغوښتل چې د تازه میوو صادراتو جدي پاملرنه وکړي.

د اتحادیو مسؤلینو په

• عباس او کراچۍ بندرونو کې د کانیتینرونو انتقال برخه کې د لازمو خدماتو نه شتون
• د تعلیمي سکتور لپاره د معیاري پاکونو نه شتون
• د ماليې وزارت عوایدو ریاست له لوري د مالیو د معیاري څیړنې نه شتون
• د حیواني پوستکو صادراتو برخه کې د دولت له لوري د لازمې پاملرنې نه شتون
• د حیواناتو لپاره د معیاري مالګو نه شتون
• د هېواد د قیمتي او نیمه قیمتي ډبرو قاچاق کیدل
• د معیاري سړو خونو نه شتون
• د دولت له لوري د شرکتونو د نیمه کاره پروژو د پیسو نه تادیه کول
• او په ډبرو سکرو د لوړې ګمرکي تعرفې وضع کول خپلې عمده ستونزې وبللې

او د ګمرکونو له مسؤلینو يې وغوښتل چې د دوی د ستونزو حل برخه کې رښتوني او ګړندي ګامونه پورته کړي.

د ګمرکونو عمومي رئیس د سوداګرو ستونزو له اوریدو وروسته، ډاډ ورکړ چې دوی به یادو ستونزو ته د مناسبو حل لارو موندلو برخه کې خپلې هیڅ ډول مرستې او همکارۍ ونه سپموي او د هېواد له سوداګرو يې وغوښتل چې د هغو توکو چې دوی يې واردوي، کیفیت ته جدي پاملرنه وکړي.

چهارشنبه، غبرګولي ۹مه، ۱۴۰۳