د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند او د اتاق مدیره پلاوي غړي ښاغلي احمد فواد دوست د افغانستان لپاره د جاپان سفیر ښاغلي تکایوشي کورومیا سره لیدنه ترسره او د اقتصادي موضوعګانو، د دوه اړخیزو سوداګریزو اړیکو ودې او د شته فرصتونو په اړه يې خبرې اترې او د نظر تبادله وکړه.

ښاغلي مهمند د زیربنایي پروژو د تطبیق او د افغان وګړو په ځانګړې توګه د وروستیو سیلاب ځپلو کورنیو سره د جاپان د دوامداره همکارۍ او د دغه هېواد فعاله ونډه وستایله او د دوه اړخیزو سوداګریزو او پانګه ایزو اړیکو ښه والي او افغان سوداګرو ته د جاپان په لازمو همکاریو يې ټنیګار وکړ.

ښاغلي مهمند د هېواد عمومي شرایط د زیربنایي پروژو په تطبیق کې د ګډې پانګونې لپاره مناسب وګڼل او زیاته یې کړه "د کوکنارو د کښت په مخنیوي، د اداري فساد په له منځه تلو او په افغانستان کې د ټولیز امنیت په تامین سره د پانګونې فرصتونه زیات شوي دي چي باید اعظمي ګټه تری پورته کړی شي.
نوموړي د جاپان سفارت له مشرتابه وغوښتل، چې افغان سوداګرو ته د ویزو د ورکړې په برخه کې د لازمو اسانتیاوو د رامنځته کولو په برخه کې خپلې هیڅ ډول مرستې او همکارۍ ونه سپموي.

ښاغلي تاکایوشي د افغانستان خلکو ته د پانګونې او کاري فرصتونو د رامنځته کولو په برخه کې د خصوصي سکتور د مشرتابه هڅې وستایلې او د ویزو د ورکړې او د سوداګرو د ستونزو حل برخه کې يې د جاپان سفارت د هر اړخیزې همکارۍ ډاډ ورکړ.

دوشنبه، غويي ۲۴مه، ۱۴۰۳

د افغانستان د سوداګرۍ او پانګونې اتاق مدیره پلاوي دریمې دورې پنځه ویشتمه ناسته د اتاق د عمومي رئیس ښاغلي توکل احمدیار په مشرۍ او د اتاق لومړي مرستیال ښاغلي محمد یونس مهمند، د سوداګریزو چارو مرستیال ښاغلي خیرالدین مایل احمدي، د اتاق د دارالإنشاء رئیس ښاغلي خان محمد سرفراز باز، مالي رئیس ښاغلي شیرین آغا سخي، د نړیوالو اړیکو رئیس ښاغلي انجنیر سید جاوید برهان، د مدیره پلاوي غړو هر یو ښاغلي خان جان الکوزي، ذکریا بریالي، ضیاءالدین اچکزي، محمد داود یوسفزي، جان آقا صادقي، محمد ګردیزي، سید پرویز سادات هوفیاني، بهادر خیرخواه، فواد احمد دوست او احمد شکیب احمدیار، او د اتاق پالیسۍ او تخنیکي مرستیال ښاغلي محمد انور عارفي په ګډون د افغانستان د سوداګرۍ او پانګونې اتاق مدیره پلاوي په دفتر کې ترسره شوه.

په دی ناسته کې چې د مشرتابه پلاوي ځینو غړو په آنلاین ډول ګډون درلود، د پنځه ویشتمې ناستې د اجنډا موضوعګانې او د څلور ویشتمې ناستې مصوبات او د یادې ناستې د محتویاتو لاسلیک د ښاغلي ذکریا بریالي لخوا د ناستې ګډونوالو ته وړاندې کړی شول.

ورپسې د عامل پلاوي پالیسۍ او تخنیکي مرستیال ښاغلي محمد انور عارفي د عامل پلاوي راپورونه د ناستې ګډونوالو ته وړاندی کړل.

د افغانستان د سوداګرۍ او پانګونې اتاق په اړه د ځینو مهمو مسایلو او د مدیره او عامل پلاوو وړاندیزونو په اړه تر هر اړخیز بحث وروسته، لازمې پریکړې ونیول شوې.

شنبه، غويي ۲۲مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په داسی حال کې چې، د اتاق مدیره پلاوي مالي رئیس ښاغلي شیرین آغا سخي، د مدیره پلاوي غړي ښاغلي خان جان الکوزي، د صنعت او سوداګرۍ وزیر، د سکتوري وزارتونو مسؤلینو، د کابل سوداګرۍ اتاق لومړي مرستیال ښاغلي احمد شاه حکیمي او د هېواد یو شمیر سوداګرو او پانګوالو هم حضور درلود، د صنعت اونۍ نندراتون په پرانیست غونډه کې ګډون وکړ.

ښاغلي مهمند د دغه ډول نندارتونونو جوړول د کورنیو تولیداتو د ودې او معرفي کولو، د خصوصي سکتور د یووالي او د سیمې او نړۍ له هېوادونو سره د سوداګریزو اړیکو د پیاوړتیا لپاره ښه فرصتونه وبلل او د هېواد له ټولو خلکو یې وغوښتل چې د هېواد اقتصاد پیاوړتیا او د خصوصي سکتور ملاتړ په موخه، د کورنیو تولیداتو څخه کار واخلي.

د اتاق لومړي مرستیال د افغان سوداګرو د پیسو کنګل کیدل د افغانستان د خصوصي سکتور لپاره زیانمن وبلل او د نړۍ له ټولو هېوادونو په ځانګړې توګه له ګاونډیو هېوادونو یې وغوښتل چې د سوداګرو د پیسو د ازادولو په برخه کې ورسره همکاري وکړي.
ښاغلي مهمند د هېواد له خصوصي سکتور سره د دولت د لوړ پوړو چارواکو د همکارۍ مننه وکړه او د هغو فابریکو لپاره یې د ځمکې د وېش په برخه کې د لازیاتو همکاریو غوښتنه وکړه چې په بهر کې فعالیت کوي او اوس غواړي هېواد ته راستانه شي او پانګونه وکړي.

په پای کې، د افغانستان د سوداګرۍ او پانګونې لومړي مرستیال ښاغلي محمد یونس مهمند او د مشرتابه پلاوي نورو غړو د کورنیو تولیداتو له غرفو څخه لیدنه وکړه.

دوشنبه، غويي ۲۴مه، ۱۴۰۳

د کوچنیو او منځنیو سوداګریو څخه د ملاتړ محدود المسؤلیت شرکت، دکوچنیو او منځنیو سوداګریو ملاتړ په موخه، د اسلامي پورونو خدماتو روزنیز پروګرام په اتاق کې جوړ چې د افغانستان د سوداګرۍ او پانګونې اتاق عامل پلاوي پالیسۍ او تخنیکي مرستیال ښاغلي محمد انور عارفي او د هېواد یو شمیر سوداګرو او پانګوالو پکې ګډون درلود.

ښاغلي عارفي د یاد شرکت له مسؤلینو څخه د مننې په څرګندولو سره، ورته روزنیز پروګرامونه اړین وبلل او زیاته يې کړه چې د خصوصي سکتور وده او رغښت په حلالو سوداګریزو معاملو ترسره کولو او له سودي معاملو څخه په ډډه کولو پوری تړلی دی.
همدارنګه، ښاغلي عارفي له سوداګرو او پانګوالو وغوښتل چې په خپلو ورځنیو چارو کې له سودي معاملو څخه ډډه وکړي او اسلامي احکام په ځان تطبیق کړي.
دغه راز، ښاغلي عارفي د خصوصي سکتور ودې په موخه، د اړینو او ګټورو پروګرامونو جوړولو خبرداری ورکړ.

د پروګرام په جریان کې، د یاد شرکت مسؤلینو له لوري معلوماتي پریزنټیشن وړاندی چې له مخې يې ګډون کوونکو ته د اسلامي پورونو د لاسته راوړنې او له سودي بیعو څخه د ډډې کولو لارې چارې وښودل شوې او ګډون کوونکو هم خپل نظرونه او وړاندیزونه څرګند کړل.

پنجشنبه، غويي ۲۰مه، ۱۴۰۳

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند د نړیوالو اړیکو ډيپارټمنټ، غړو ډيپارټمنټ او صادراتو پراختیا ډيپارټمنټ مسؤلینو په شتون کې، د ننګرهار او بلخ ولایتي اتاقونو له مسؤلینو سره او مشرتابه سره آنلاین ناسته ترسره او د ګمرکي خدمتونو په اړه يې خبرې اترې وکړې.

ښاغلي مهمند د هغې ناستې په اړه چې څه موده وړاندې يې د ټرانسپورټ او هوايي چلند له وزیر سره د هېواد په لویو لارو کې د سوداګرو د ستونزو د هواري په موخه کړې وه، ګډونوالو ته یې د حیرتان او تورخم بندرونو کې د ۲۴ ساعته ګمرکي خدمتونو په اړه معلومات وړاندی کړل.
نوموړي د يادو اتاقونو له مشرتابه او مسؤلینو وغوښتل، چې د ګمرک په برخه کې د يادو ولايتونو د سوداګرو نظرونه او وړانديزونه په ليکلي ډول مرکزي اتاق سره شريک کړي.

د ننګرهار او بلخ د سوداګرۍ اتاقونو مشرتابه غړو او مسؤلینو په خپل وار سره د خپلو ولایتونو د سوداګرو ستونزې د مرکزي اتاق له لومړي مرستیال سره شریکې کړې او د حل په موخه یې د خپلو ولایتونو د سوداګرو د نظریاتو او وړاندیزونو په راټولولو کې د همکارۍ ډاډ ورکړ.

دوشنبه، غويي ۱۷مه، ۱۴۰۳