د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند او د اتاق عامل پلاوي پالیسي او تخنیکي مرستیال ښاغلي محمد انور عارفي د افغانستان لپاره د قزاقستان د سوداګرۍ کور له رئیس ښاغلي ارمان یاسینتایف سره د لیدنې په ترڅ کې، د دواړو هېوادونو ترمنځ د سوداګريزو او اقتصادي اړیکو په پراختیا او غښتلتیا خبرې وکړې.

ښاغلي ارمان له افغانستان څخه قزاقستان ته د سوداګریزو توکو په ځانګړي ډول د وچې مېوې او نورو خامو موادو د صادراتو او وارداتو په برخه کې د قزاق سوداګرو د لیوالتیا خبر ورکولو ترڅنګ، د ګډو نندارتونونو او سوداګریزو ناستو جوړولو برخه کې يې د اتاق د هر اړخیزې همکارۍ غوښتنه وکړه.  

ښاغلي مهمند ښاغلي ارمان ته د ښه راغلاست ویلو وروسته، قزاقستان یو پخوانی دوست او د دیني او کلتوري مشترکاتو، اقتصادي، سوداګریزو او ټرانزیټي اړیکو لرونکی هېواد وباله او په یاده برخه کې يې د اتاق هر اړخیزې همکارۍ ډاډ ورکړ.

شنبه، وري ۱۸مه، ۱۴۰۳

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند د ځمکني ټرانسپورټ اتحادیو له یو شمیر غړو سره د ناستې په ترڅ کې، د هېواد د لویو لارو جوړولو په اړه بحث او د نظر تبادله وکړه.

ښاغلي مهمند د شمال ختیځو ولایتونو غوښتنې چې د ټرانسپورټ غړو له لوري دی د کابل – ننګرهار لويه لاره د "ټول پلازا" په شکل جوړه شي، د حکومت د مشرتابه مقام لارښوونو په اړه ګډون کوونکو ته معلومات وړاندی کړل او د ټرانسپورټ اتحادیو له غړو يې وغوښتل چې په دی برخه کې خپل نظرونه شریک کړي.

د اتاق لومړي مرستیال ټرانسپورټ یو له مهمو سکتورونو څخه وباله چې د هېواد ټولې برخې سره نښلوي او د مسافر وړونکو او بار وړونکو وسایطو د مالکینو له لوري يې د"ټول پلازا" په شکل د هېواد لویو لارو په بیارغونه کې د دوی رول اړین وګاڼه او د ټرانسپورټ سکتور ټولو غړو څخه يې وغوښتل چې په دی برخه کې هر اړخیزه همکاري وکړي.

د ټرانسپورټي شرکتونو استازو د معیاري سړکونو د جوړولو او د هېواد د لویو لارو د ښه والي په موخه د ټول پلازې د پلان له تطبیق څخه خوښي څرګنده کړه او په دې برخه کې یې د همکارۍ ژمنه وکړه.

پنجشنبه، وري ۹مه، ۱۴۰۳

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند او د اتاق مدیره پلاوي غړي ښاغلي خان جان الکوزي ننګرهار ولایت ته د خپل کاري سفر په ترڅ کې، په هغه مشورتي ناسته کې چې د هېواد لویو لارو په ځانګړې توګه د کابل – جلال آباد لويې لارې بیارغونې په موخه د ننګرهار ولایتي اتاق کنفرانسونو په تالار کې جوړه شوې وه، ګډون وکړ.
په یاده ناسته کې د ننګرهار ولایتي اتاق مدیره پلاوي غړو، د کسبګرو، کرنې او صنعت اتاقونو استازو، د ټرانسپورټ اتحاديې غړو او ختیځو ولایتونو ډیر شمیر سوداګرو او پانګوالو د ګډون کولو ترڅنګ، خپل د ارزښت وړ نظرونه او وړاندیزونه شریک کړل.

ښاغلي مهمند د شمال ختیځو ولایتونو غوښتنې چې د ټرانسپورټ غړو له لوري دی د کابل – ننګرهار لويه لاره د "ټول پلازا" په شکل جوړه شي، د حکومت د مشرتابه مقام لارښوونو په اړه ګډون کوونکو ته معلومات وړاندی کړل او د مختلفو اتحادیو له غړو او ختیځو ولایتونو سوداګرو يې وغوښتل چې په دی برخه کې خپل نظرونه شریک کړي.

د اتاق لومړي مرستيال د هېواد په بیارغونه کې د هېوادوالو رول اړین وباله او د کابل- جلال اباد لويه لاره يې د هېواد له مهمو لويو لارو څخه وبلله او د دې لويې لارې رغول يې د هېواد د اقتصاد په وده، د سوداګريزو مالونو په خوندي توګه د لېږد رالېږد، ټرانزیټ، د موټر چلوونکو لپاره د اسانتياوو رامنځته کولو او د ټرافیکي پېښو مخنیوي برخه کې له ارزښته ډکه وبلله.

ښاغلي مهمند ټرانسپورټ یو له مهمو سکتورونو څخه وباله چې د هېواد ټولې برخې سره نښلوي او د مسافر وړونکو او بار وړونکو وسایطو د مالکینو له لوري يې د"ټول پلازا" په شکل د هېواد لویو لارو په بیارغونه کې د دوی رول اړین وګاڼه او د ټرانسپورټ سکتور ټولو غړو څخه يې وغوښتل چې په دی برخه کې هر اړخیزه همکاري وکړي.

خان جان الکوزي د کابل-ننګرهار لويې لارې په جوړولو کې د ختيځو ولايتونو د سوداګرو رول مهم وباله او په اقتصادي، سياسي، امنيتي او ټولنيزو برخو کې يې د دې لويې لارې جوړول د ختيځو ولايتونو بنسټیزه اړتيا وګڼله او د یادې لارې د جوړولو برخه کې يې د اتاق د هر اړخیزې همکارۍ ډاډ ورکړ.

د ختیځو ولایتونو مختلفو سکتورونو استازو د دغه نیک اقدام له امله د حکومت د مشرتابه، د اقتصادي کمیسیون له محترم رئیس او د ننګرهار ولایت له محترم والي څخه مننه وکړه او د ټول پلازې په عملي کیدو یې خوښي څرګنده او د خپلې همکارۍ ډاډ يې ورکړ.

چهارشنبه، وري ۱۵مه، ۱۴۰۳

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند د آغلې جاقوب ینګ او مل ټیم سره د اتاق په مرکزي دفتر کې لیدنه ترسره او په افغانستان کې يې د پانګونې په اړه خبرې اترې وکړې.

آغلې جاقوب ینګ په افغانستان کې د ودانیو او انرژۍ د تولید سکتورونو کې د چیني پانګوالو د پانګونې چمتووالي څخه خبر ورکړ او په یاده برخه کې يې د اتاق د هر اړخیزې همکارۍ غوښته او لازمو آسانتیاوو برابرولو غوښتنه وکړه.

ښاغلي مهمند آغلې ینګ او د هغې ټیم ته د ښه راغلاست پرمهال په افغانستان کې د پانګونې لپاره شته فرصتونه او د حکومت له خوا د کورنیو او بهرنیو سوداګرو او پانګوالو لپاره په هېواد کې د پانګونې په برخه کې رامنځته کړې شوې آسانتیاوې تشریح کړې.

ښاغلي مهمند چینايي سوداګر وهڅول چې د افغانستان د برېښنا تولید او کانونو په برخو کې پانګونه وکړي او په صنایع سبز ښارګوټي کې د ځمکې د وېش په برخه کې یې د افغانستان د سوداګرۍ او پانګونې اتاق د همکارۍ ژمنه وکړه.

شنبه، وري ۴مه، ۱۴۰۳

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند د اتاق مدیره پلاوي غړي ښاغلي خان جان الکوزي او د افغانستان نړیوال نندراتون مرکز رئیس ښاغلي عبدالصابر لطیفي په ملتیا د صنعت اونۍ نندراتون چې د روان لمریز کال غويي په ۲۳مه نېټه په لاره اچول کیږي، د کاري څانګو څخه لیدنه ترسره او د یاد نندارتون څخه يې د خپل ملاتړ اعلان وکړ.

ښاغلي مهمند د صنعت اونۍ نندارتون د سیمې په کچه یو له ملي او نړیوالو نندارتونونو څخه وباله او له سوداګرو، پانګوالو، صنعتکارانو، خدماتي شبکو او نورو سکتورونو څخه یې وغوښتل چې په یاد نندارتون کې برخه واخلي او خپل تولیدات نندارې ته وړاندې کړي.

د اتاق لومړي مرستیال د دغه ډول نندارتونونو د جوړولو موخه د کورنیو تولیداتو، سوداګرۍ لاسته راوړنو، ټرانزیټ او کرنې په برخه کې د څو کلونو لاسته راوړنې وبللې او د هېواد له کورنیو تولیداتو څخه یې د خپل ملاتړ اعلان ترڅنګ، هېوادوال د کورنیو تولیداتو کارونې ته وهڅول.

ښاغلي مهمند ټولیز امنیت، د کوکنارو د کښت مخنیوی او د اداري فساد نه شتون د هېواد د اقتصاد د ودې لپاره ښه فرصتونه وبلل او له دولتي چارواکو یې وغوښتل چې د هېواد د خصوصي سکتور د ننګونو په هواري کې عملي ګامونه پورته کړي.

ښاغلي الکوزي په افغانستان کې د پانګونې لپاره شته فرصتونه مناسب وبلل او له ټولو کورنیو او بهرنیو سوداګرو یې وغوښتل چې د هېواد په بېلابېلو برخو کې پانګونه وکړي.

دوشنبه، وري ۱۳مه، ۱۴۰۳