د افغانستان او قزاقستان سوداګرو او پانګوالو ترمنځ دوه اړخیزه سوداګریزه ناسته د سوداګرۍ پراختیا، پانګونې جلب، او سوداګریزو فرصتونو رامنځته کولو په موخه په کابل ستار هوټل کې ترسره شوه.

په دې ناسته کې ښاغليو: نورالدین عزیزی د صنعت او سوداګرۍ وزارت سرپرست، محمد یونس مهمند د افغانستان د سوداګرۍ او پانګونې اتاق لومړی مرستیال، خیرالدین مایل احمدي د خونې سوداګریز مرستیال، شیرین آغا سخي د اتاق د مالي چارو رئیس، خانجان الکوزی د اتاق د مشرتابه پلاوي غړی او د افغان-پاک اتاق رئیس، ضیاوالدین اچکزی، ذکریا بریالی، او بهادر خیرخواه د اتاق د مشرتابه پلاوي غړي، توره بایوف د قزاقستان د صنعت او سوداګرۍ وزارت معین، په افغانستان کې د قزاقستان سفیر، احمدشاه حکیمی د کابل د سوداګرۍ او پانګونې اتاق لومړی مرستیال،میرزمان پول دعامل پلاوي د مالي او اداري چارو سرپرست مرستیال، محمد انور عارفی د اتاق د عامل پلاوي د پالیسۍ او تخنیکي چارو مرستیال، ناصر صمیم د اتاق د څارنې پلاوي غړی، همایون خواجه زاده د کابل اتاق سوداګریز مرستیال او د دواړو هېوادونو یو شمېر سوداګر او پانګوال ګډون درلود.

ښاغلي مهمند، د قزاقستان سوداګریز پلاوي ته د ښه راغلاست ویلو ترڅنګ، سرتاسري امنیت، د اداري فساد کمښت او د کوکنارو کر د بندیدو پرېکړه د سوداګرۍ او پانګونې د پراختیا لپاره ښه فرصت وګاڼه. نوموړي د افغان او قزاق سوداګرو ترمنځ د ګډو پانګونو پر پراختیا، په ځانګړي ډول د تولیدي فابریکو او نورو مهمو سکتورونو په برخه کې، ټینګار وکړ.

نوموړي، افغانستان د طبیعي زیرمو، په ځانګړي ډول د کانونو او کرنې له اړخه غني هېواد او د مرکزي آسیا او سویلي آسیا ترمنځ د ټرانزیټ او سوداګرۍ وصل ټکی یاد کړ.

ښاغلي مهمند، د افغانستان، قزاقستان او ازبکستان ترمنځ درې اړخیزه ګډه همکاري د سوداګرۍ اړیکو د پیاوړتیا، د تجارتي تبادلو زیاتوالي، د ټرانسپورټي زیربناوو د ښه والي، د انرژۍ سرچینو او خامو موادو ته د لاسرسي، د بهرنیو پانګونو زیاتېدو، د اقتصادي امنیت پیاوړتیا، د تولیدي او صنعتي وړتیاوو د پراختیا، او د افغانستان ستراتیژیک ځای پراخولو لپاره مهمه وبلله.

ښاغلي توره بایوف د دې ناستې له تنظیم څخه مننه وکړه او د افغانستان او قزاقستان د سوداګرۍ اړیکو د پراختیا، د تجارتي نظریاتو د تبادلې، او د خصوصي سکتور د غړو ترمنځ د همکارۍ تفاهمنامو لاسلیک د خپل سفر اساسي موخې یادې کړې.

ښاغلي عزیزی د ګاونډیو هېوادونو ته د خپلو سفرونو په اړه ګډونوالو ته معلومات ورکړل او د قزاقستان له حکومت څخه یې د خصوصي سکتور د ملاتړ او خلکو ته د بلاعوضه مرستو په اړه مننه وکړه.

 

 

 

 

 

د افغانستان د سوداګرۍ او پانګونې اتاق، د سوداګریزو اړیکو د پراختیا، په بهرنیو هیوادونو کې افغان سوداګرو ته د اسانتیاوو برابرولو، د ګاونډیو او سیمې هیوادونو سره د راکړې ورکړې د زیاتوالي په ځانګړي ډول د روسیې سره، او په افغانستان کې د پانګونې د جذب په موخه، د روسیې د سفارت سوداګریزې اتشه ښاغلي نیکولای سره د اتاق په کنفرانسونو تالار کې غونډه وکړه.

په دې غونډه کې د اتاق مشرتابه پلاوي غړي ښاغلو: محمد یونس مهمند د اتاق لومړي مرستیال، خان جان الکوزی د اتاق مشرتابه پلاوي غړی او د افغان-پاک اتاق رئیس، محمد ګردیزي، ضیاءالدین اچکزی، سید پرویز سادات هوفیاني د اتاق مشرتابه پلاوي غړي، احمد شاه حکیمي د کابل د اتاق لومړی مرستیال، میرزمان پوپل د اتاق مالي او اداري مرستیال سرپرست، محمد انور عارفي د پالیسۍ او تخنیکي مرستیال، همایون خواجه زاده د کابل اتاق د سوداګرۍ مرستیال، امید حیدري د اتاق ارشد سلاکار، د قیمتي او نیمه قیمتي ډبرو او وچې مېوې د اتحادیې مشران او یو شمېر مشهور سوداګر او پانګوال ګډون کړی و.

ښاغلي مهمند، د روسیې د سفارت سوداګریز اتشه او د غونډې ګډونوالو ته د ښه راغلاست ویلو ترڅنګ، د افغانستان خصوصي سکتور په ملاتړ کې د روسیې د حکومت او سفارت د هڅو قدرداني وکړه. نوموړي د افغانستان او روسیې د اوږدمهاله اړیکو یادونه وکړه او په ځانګړې توګه د تېرو درېیو کلونو پرمختګونو ته اشاره وکړه.

نوموړي، ټولو سوداګرو ته بلنه ورکړه چې خپلې ستونزې او غوښتنې چې د روسیې سره په سوداګریزو اړیکو کې ورسره مخ دي، له ښاغلي نیکولای سره شریکې کړي.

ښاغلي مهمند، د افغانستان، ازبیکستان او روسیې ترمنځ د درې اړخیزې ټرانزیټي هوکړې لاسلیک د سوداګریزو اړیکو د پراختیا، د ترانسپورټي لګښتونو د کمښت، د کاري فرصتونو زیاتوالي او د سیمه‌ییزې همکارۍ د تقویت لپاره ګټور وګاڼه. هغه، د روسیې په لویو بازارونو کې د افغان صادراتي توکو، په ځانګړې توګه تازه مېوې، وچې مېوې او قیمتي ډبرو لپاره د لاسرسي غوښتنه وکړه. نوموړي، د افغانستان د سوداګرۍ او پانګونې اتاق له خوا د روسیې سره د اقتصادي او سوداګریزو اړیکو د پیاوړتیا په برخه کې د بشپړې همکارۍ ډاډ ورکړ.

د اتاق لومړي مرستیال، روسیې سره د سوداګریزو اړیکو په پیاوړتیا ټینګار وکړ او له ښاغلي نیکولای څخه یې وغوښتل چې د روسیې د سکتوري مسئولینو سره نورې غونډې هم جوړې کړي تر څو د افغانستان د صادراتي توکو د زیاتوالي لپاره حل لارې وړاندې شي.

ښاغلي خان جان الکوزي، د روسیې او افغانستان ترمنځ د سوداګریزو اړیکو د نوې پاڼې پرانستل مهم وګڼل، د منځنۍ آسیا د هیوادونو له لارې د ټرانزیټي ستونزو حل او د روسیې د ستندردونو او بسته بندۍ د طریقو معرفي یې اړینه وبلله. هغه د قیمتي او نیمه قیمتي ډبرو لپاره د بازار موندنې غوښتنه وکړه او د تازه مېوو د صادراتو په اړه یې د روسیې همکارۍ ته اړتیا څرګنده کړه.

ښاغلي میرزمان پوپل، د افغانستان او روسیې ترمنځ د صادراتو او وارداتو د ارقامو په اړه معلومات وړاندې کړل او څرګنده یې کړه چې د ټرانزیټي اسانتیاوو نشتون، د ګمرکي تعرفو زیاتوالی او د روسیې خاورې ته د باروړونکو موټرو د تګ اجازه نه ورکول، هغه عوامل دي چې د دواړو هیوادونو ترمنځ د سوداګریزو راکړو ورکړو په کمښت کې رول لوبوي. هغه له ښاغلي نیکولای څخه وغوښتل چې د روسیې له حکومت سره په همغږۍ د افغان صادراتي توکو لپاره په ځانګړي ډول د تازه مېوو، وچو مېوو او سبزیجاتو لپاره تعرفې کمې کړي.

په غونډه کې ګډونوالو سوداګرو د خپلو ستونزو په اړه خبرې وکړې، په ځانګړې توګه د ګمرکي تعرفو لوړیدو، د ازبیکستان په بندرونو کې د معیاري سکنرونو نشتون، د ټولو صادراتي توکو فزیکي تلاشي، او د روسیې بانکونو څخه د افغانستان بانکونو ته د پیسو د انتقال ستونزې. دوی همدارنګه د یوریشیا شورا غړیتوب د سوداګریزو اسانتیاوو لپاره مهم وګاڼه او د اتاق مشرتابه پلاوي او ښاغلي نیکولای څخه یې د دې ستونزو د حل غوښتنه وکړه.

ښاغلي نیکولای د افغانستان د سوداګرۍ او پانګونې اتاق څخه د داسې غونډې د جوړیدو مننه وکړه او د دواړو هیوادونو ترمنځ د سوداګریزو اړیکو د پراختیا په اړه یې خبرې وکړې. هغه د روسیې، ایران او ازبیکستان ترمنځ د درې اړخیز دهلیز د جوړیدو خبر ورکړ او ډاډ یې ورکړ چې د افغان سوداګرو د ستونزو د حل لپاره به په ټرانزیټي برخو کې بشپړه همکاري کوي.

 

 

 

 

د افغانستان د سوداګرۍ او پانګونې اتاق د افغان او ایراني سوداګرو د ستونزو حل، د سوداګریزو او اقتصادي اړیکو پیاوړتیا، د سوداګریزو اسانتیاوو رامنځته کول او ګډو پانګونو د جلب لپاره، د افغانستان لپاره د ایران د اسلامي جمهوریت له نوي سفیر ښاغلي علي رضا بیک دلي سره تعارفي ناسته وکړه.

په دې ناسته کې ښاغلیو: د بهرنیو چارو وزارت سیاسي مرستیال ښاغلی عباس ستانکزی، د سوداګرۍ اتاق لومړی مرستیال ښاغلی محمد یونس مهمند، د مشرتابه پلاوي د دارالانشا رییس ښاغلی خان محمد سرفراز باز، د مالي چارو رییس ښاغلی شیرین آغا سخي، د افغان-پاک اتاق رییس او د اتاق د مشرتابه پلاوي غړی ښاغلی خان جان الکوزی، د مشرتابه پلاوي غړي ښاغلي محمد گردیزی، ذکریا بریالي او ضیاوالدین اچکزی، د کابل د سوداګرۍ اتاق رییس ښاغلی سید جمیل سادات، د کابل د سوداګرۍ اتاق لومړی مرستیال احمد شاه حکیمی، د عامل پلاوي د مالي او اداري چارو سرپرست میرزمان پوپل، د اتاق ارشد مشاور ښاغلی امید حیدري، د وچې میوې د اتحادیې رییس عبدالقاسم امرخیل او ګڼ شمېر سوداګرو او پانګوالو ګډون کړی وو.

ښاغلي محمد یونس مهمند، د ښاغلي علي رضا بیک دلي او د غونډې د ټولو ګډونوالو تود هرکلی وکړ. هغه، د افغانستان او ایران د سوداګریزو-اقتصادي فعالیتونو په اړه مفصل معلومات ورکړل او د دواړو هېوادونو ترمنځ د سیاسي، ترانزیتي، تجارتي او اقتصادي اړیکو پر لا پیاوړتیا ټینګار وکړ. هغه افغانستان د طبیعي سرچینو په ځانګړي ډول د کانونو او کرنې له پلوه یو غني هېواد وباله او د دغو سرچینو استخراج یې د ګاونډیانو د ښو اړیکو او همکارۍ پورې تړلی وګاڼه.

ښاغلي مهمند، د امنیت ټینګښت، د اداري فساد کمښت او د کوکنارو د کر د بندولو هڅې د افغانستان د حکومت لویې لاسته راوړنې وبللې او زیاته یې کړه چې دغه لاسته راوړنې د دواړو هېوادونو د سوداګرۍ او پانګونې اړیکو د پراختیا لپاره ښه فرصتونه برابروي. هغه له نوي سفیر څخه غوښتنه وکړه چې د دواړو هېوادونو د ملي ګټو په نظر کې نیولو سره، د سوداګرۍ په برخه کې لا زیاتې هڅې وکړي.

ښاغلي مهمند، د پخواني سفیر له هڅو مننه وکړه چې د افغانستان د خصوصي سکتور له غړو سره یې همکاري کړې وه او د سوداګرۍ په برخه کې یې اسانتیاوې برابرې کړې وې. هغه د افغانستان او ایران ترمنځ د سوداګرۍ په اړه تفصیلي معلومات وړاندې کړې او له نوي سفیر څخه یې غوښتنه وکړه چې د ایران د دولت په همکارۍ د افغانستان د وچې میوې لپاره تعرفوي اسانتیاوې برابرې کړي ترڅو صادرات او واردات په متوازنه توګه ترسره شي.

ښاغلي مهمند، د ایران حکومتي چارواکو څخه مننه وکړه چې د کلونو په اوږدو کې یې د افغانستان د صادراتي توکو پر وړاندې خپل بندرونه نه دي تړلي او سوداګریزو اسانتیاوو ته یې زمینه برابره کړې ده. هغه د چابهار بندر رول د افغانستان، د خلیج هېوادونو او هند ترمنځ د نړیوالې سوداګرۍ او ترانزیت په برخه کې ډېر مهم وباله. نوموړي په یاد بندر کې د سوداګرو لپاره د لا زیاتو سوداګریزو اسانتیاوو د برابرولو غوښتنه وکړه.

ښاغلي مهمند، د افغانستان، ایران او هند ترمنځ درې اړخیزې ناستې غوښتنه وکړه ترڅو د بندرونو ستونزې حل او سوداګریزو اسانتیاوو ته وده ورکړي. هغه ښاغلي علي رضا بیک دلي ته ډاډ ورکړ چې د افغانستان د پانګونې فرصتونه او ستونزې به له نوموړي سره په هر اړخیزه توګه شریکې کړي.

ښاغلي علي رضا بیک دلي، افغانستان د ایران نږدې دوست هېواد وباله او زیاته یې کړه چې د هېوادونو اقتصاد د سوداګرۍ او ګډو پانګونو پر محور څرخي. هغه، د سوداګرو د ستونزو د حل، د سوداګریزو، اقتصادي، ترانزیتي او سیاسي اړیکو د لا پراختیا او د سوداګریزو نندارتونونو او غونډو د ترسره کولو لپاره خپل ملاتړ اعلان کړ.

ښاغلي عباس ستانکزي د ایران د نوي سفیر ټاکنه د دواړو هېوادونو ترمنځ د سیاسي او سوداګریزو اړیکو د پراختیا لپاره یو ښه ګام وباله. هغه ایران د افغانستان نږدې دوست هېواد وګاڼه چې ګډ دیني، فرهنګي، تجارتي او ترانزیتي مشترکات لري. هغه، د سیمې د هېوادونو په ځانګړي ډول د افغانستان، ایران او چین ترمنځ د یووالی پر اړتیا ټینګار وکړ او د دواړو هېوادونو د اقتصاد پیاوړتیا یې د سوداګرۍ د زیاتوالي او د ګډو پانګونو لپاره د مناسبو شرایطو برابرولو پورې تړلې وبلله.

 

 

 

 

 

 

د سوداګرۍ او پانګونې اتاق مشرتابه پلاوي غړو، ښاغلي محمد یونس مهمند، د اتاق لومړی مرستیال؛ شیرین آغا سخي، د مدیره پلاوي مالي رئیس او خانجان الکوزی، د مدیره پلاوي غړی او د افغان-پاک اتاق رئیس، په داسې حال کې چې د حکومت لوړپوړي چارواکي، د IFC استازی ښاغلی چارلیس شنایدار، او د هېواد سوداګر او پانګوال هم ګډون درلود، د حرکت ادارې لخوا په کابل سرینا هوټل کې په جوړ شوي خبرو اترو کنفرانس کې ګډون وکړ.

ښاغلي مهمند، د دې ګفتمان د جوړیدو لپاره د حرکت ادارې مسوولینو څخه مننه وکړه او د افغان سوداګرو لپاره د ګاونډیو هیوادونو په ځانګړي ډول د پاکستان لخوا د رامنځته شويو ترانزیټي ستونزو یادونه وکړه. نوموړي دغه ستونزې د افغانستان او ګاونډیو هیوادونو ترمنځ د سوداګرۍ د کمیدو اصلي لامل وبللې او د معیاري ترانزیټ رول یې په صنعت او سوداګرۍ کې حیاتي وباله.

ښاغلي مهمند، وویل چې د افغان سوداګرو د سوداګریزو ستونزو حل د مرکزي اسیا هېوادونو د ترانزیټ او د چابهار بندر څخه په کار اخیستنې پورې تړاو لري. هغه، له ګاونډیو هېوادونو او نړیوالې ټولنې وغوښتل چې د افغان سوداګرو لپاره په ترانزیټي برخو کې عملي ګامونه پورته کړي.

د اتاق لومړي مرستیال، د زراعت د میکانیزه کولو، د لاسي صنایعو د ودې، او نړیوالو بازارونو ته د لاسرسي لپاره د کروندګرو او متشبثینو لپاره د وړو پورونو د ورکړې او له نړیوال بانک څخه یې په دې برخه کې د ځانګړې پاملرنې غوښتنه وکړه.

نوموړي، د افغانستان لپاره د اروپایي ټولنې له مسوولینو څخه د خصوصي سکتور د ملاتړ او د سترو سوداګریزو کنفرانسونو په ګډون کې د هغوی د ونډې مننه وکړه او له نړیوالې ټولنې په ځانګړي ډول د اروپایي ټولنې له مسوولینو څخه یې غوښتنه وکړه چې افغان سوداګرو ته د آسیايي او اروپایي هیوادونو د ویزې ورکولو او د افغان بانکونو د نړیوالو بانکونو سره د اړیکو بیا فعالولو په برخه کې ځانګړې پاملرنه وکړي.

ښاغلي مهمند، د ډیجیټلي پولي سیستم رول د سوداګریزو چارو د پرمختګ او د افغانۍ بانک نوټونو د ساتنې لپاره حیاتي وباله او له نړیوال بانک څخه یې وغوښتل چې د اړوندو حکومتي ادارو په ځانګړي ډول د مالیې وزارت، ملي بانک، او د سوداګرۍ وزارت سره په همغږۍ د ډیجیټلي پولي سیستم په رایج کولو کار وکړي.

د اتاق لومړي مرستیال، د افغانستان د بانکدارۍ سکتور پیاوړي کول د صادراتو او وارداتو د زیاتوالي او همدارنګه د ګاونډیو او سیمې هیوادونو ته د پیسو د انتقال د چټکتیا لپاره اړین وبلل او له نړیوال بانک او اروپایي ټولنې څخه یې وغوښتل چې د افغانستان د بانکدارۍ سیستم د پیاوړتیا لپاره ځانګړې پاملرنه وکړي.

 

 

 

 

 

د افغانستان د سوداګرۍ او پانګونې اتاق د خصوصي سکتور غړو ته د خدمتونو ښه وړاندې کولو او د مرکز او ولایتونو ترمنځ د همغږۍ د زیاتولو په موخه د ښاغلي میرزمان پوپل د عامل پلاوي مالی او اداري مرستیال سرپرست، عبدالسلام کوهی حقوقي سلاکار، امانت ذمه وار مالي مفتش، او د اتاق د مختلفو څانګو د مسوولینو په ګډون د هرات ولایتي اتاق اجرائیه مسوولینو سره انلاین غونډه وکړه.

ښاغلي پوپل، د غونډې اساسي موخه د هرات د سوداګرۍ او پانګونې اتاق ستونزو او وړاندیزونو اورېدنه یاده کړه او د مرکز او ولایتونو کارکوونکو د شپې او ورځې هلو ځلو ستاینه وکړه. نوموړي، د خصوصي سکتور د غړو لپاره د خدمتونو ښه وړاندې کولو، د مرکز او ولایتونو ترمنځ د همغږۍ زیاتولو، د هرات فرصتونو او ستونزو د پېژندلو لپاره غونډو جوړولو، او په بېلابېلو سکتورونو کې د پانګونې د هڅونې په اړه لازمې لارښوونې وکړې. هغه، د ولایتي اتاقونو د ستونزو پر حل، د غړو جذب، د صادراتو زیاتوالی، د کارکوونکو د ظرفیت لوړول او نورو اړوندو موضوعاتو باندې ټینګار وکړ.

همدارنګه د مرکزي اتاق سلاکار او د څانګو مسوولینو د حقوقي مسایلو او اړوندو برخو کې د خدمتونو د ښه وړاندې کولو په اړه خبرې وکړې.

د هرات ولایتي اتاق اجرائیوي مسوولینو د دې ډول انلاین غونډو هرکلی وکړ، خپلې ځانګړې ستونزې او وړاندیزونه یې وړاندې کړل او د افغانستان د سوداګرۍ او پانګونې اتاق د اجرائیه ریاست څخه د ولایتي اتاقونو د ستونزو په حل کې د لا زیات پام غوښتنه وکړه.