ښاغلي توکل احمدیار، د افغانستان د سوداګرۍ او پانګونې اتاق عمومي رئیس، په داسې حال کې چې ښاغلیو: احمد شکیب احمدیار د مشرتابه پلاوي غړی، محمد انور عارفي د پالیسۍ او تخنیکي چارو مرستیال، میر زمان پوپل مالي او اداري مرستیال سرپرست، عبدالسلام کوهي حقوقي سلاکار، امانت خان زمه وار مالي سر مفتش، توکل خرم د شخړو د حل مرکز رئیس او یو شمېر د اتاق د دیپارتمنټونو مسؤلین هم ورسره وو، د امام ابو حنیفه (رح) له درېیم ملي او نړیوال نندارتون او د کورنیو او بهرنیو تولیدي شرکتونو له غرفو څخه یې لیدنه وکړه.

ښاغلي احمدیار، د کورنیو شرکتونو د محصولاتو، تولیداتو او خدمتونو له غرفو لیدنه وکړه او د کورنیو تولیداتو د ملاتړ په برخه کې یې د هغوی وړاندیزونه او نظریات واورېدل، او د افغانستان د سوداګرۍ او پانګونې اتاق د مشرتابه له خوا د کورنیو تولیداتو په وده او د هغوی ستونزو په حل کې، د اړوندو حکومتي ادارو په همغږۍ کې د همکارۍ ژمنه وکړه.

د اتاق عمومي رئیس همدارنګه د ایران هېواد د تولیداتو له غرفو څخه هم لیدنه وکړه او د شرکتونو له استازو او د ایران د نندارتون له مسؤلینو سره په خبرو کې د سوداګریزو اړیکو او پانګونو د پراختیا، ګډو نندارتونونو د جوړولو او د دواړو هېوادونو د صادراتو او وارداتو په توازن ټینګار وکړ.

یکشنبه، تلې ۱۵مه، ۱۴۰۳

ښاغلي محمد یونس مهمند د افغانستان د سوداګرۍ او پانګونې اتاق لومړی مرستیال، په داسې حال کې چې د صنعت او سوداګرۍ وزارت مرستیال، د بهرنیو چارو وزارت سیاسي مرستیال، د لوګر ولایت حکومتي چارواکي او د یاد ولایت یو شمېر سوداګر او پانګوال هم حضور درلود، په پل علم ښار کې د لوګر ولایت د تازه میوو او سبزیجاتو سوداګرو د ستونزو د اورېدنې او پېژندنې غونډه کې ګډون وکړ.

د لوګر د تازه میوو او سبزیجاتو سوداګرو خپلې لویې ستونزې د معیاري سړو خونو نشتوالی، د پاکستان له خوا په ځینو صادراتي توکو د ګمرکي تعرفو زیاتوالی، د پاکستان له خوا د هېواد په صادراتي مالونو بندرونه تړل، د بهرنیو مرسته کوونکو له خوا د کوچنیو او منځنیو متشبثینو د ملاتړ نشتوالی او د معیاري تولیدي فابریکو نشتوالی وبللې او له حکومتي چارواکو او د اتاق له مشرتابه یې وغوښتل چې په دې برخه کې ورسره همکاري وکړي.

ښاغلي محمد یونس مهمند، د دې غونډې د جوړولو له امله د لوګر ولایت حکومتي چارواکو او د سوداګرۍ اتاق څخه مننه وکړه او د سړو خونو جوړول یې د تازه میوو او سبزیجاتو د زیات صادراتو او ساتنې په برخه کې اساسي اړتیا وبلله او له ټولو سوداګرو یې وغوښتل چې په لوګر کې د نړیوالو ستندردونو مطابق د شراکت په ډول لویې معیاري سړې خونې د لمر انرژۍ د تولید امکاناتو سره جوړې کړي.

ښاغلي مهمند، د هېواد د صادراتي مالونو لپاره د بدیلو ترانزیټي لارو موندلو څخه یادونه وکړه، د ګاونډیو هېوادونو له خوا د بندرونو تړل او د ګمرکي تعرفو لوړول یې د نړیوالو سوداګریزو قوانینو خلاف وبلل او د سوداګرو حوصله یې وستایله.

د اتاق لومړي مرستیال، د افغانستان د صنعت او سوداګرۍ وزارت او د ازبیکستان هېواد ترمنځ د څو ورځو وړاندې د لاسلیک شوي سوداګریز تفاهم لیک په اړه یادونه وکړه او دا ډول تفاهم لیکونه یې د هېواد د صادراتو د زیاتوالي لپاره د ازبیکستان له لارې روسیې ته د ترانزیت په برخه کې لوی ګام وبلل.

ښاغلي مهمند، د کورنیو تولیداتو کارول د هېواد په اقتصادي وده کې مهم وبلل او له ټولو هوټل لرونکو او هېوادوالو یې وغوښتل چې په خپلو خوښیو کې له کورنیو محصولاتو څخه ګټه پورته کړي.

ښاغلي مهمند، د امام ابوحنیفه (رح) لوی ملي او نړیوال نندارتون چې څو ورځې وروسته د سوداګرۍ او پانګونې اتاق له خوا د صنعت او سوداګرۍ وزارت په همکارۍ په کابل ښار کې جوړېږي، ګډونوالو ته معلومات ورکړل او له ټولو حکومتي مقاماتو او د لوګر ولایت سوداګرو یې وغوښتل چې د نندارتون د پرانیستې په مراسمو کې ګډون وکړي.

د اتاق لومړي مرستیال، سرتاسري امنیت، د کوکنارو کر منع او له اداري فساد سره مبارزه د حکومت لویې لاسته راوړنې وبللې او له ټولو بهرنیو مرسته کوونکو یې وغوښتل چې په بدیلو کرهڼیزو بوټو کې له بزګرو سره لازمې همکارۍ وکړي.

ښاغلي مهمند، په یاد ولایت کې د معیاري مارکېټ په جوړولو باندې چې د نړیوالو ستندردونو سره برابر وي، ټینګار وکړ او د لوګر ولایت له مقاماتو یې وغوښتل چې د یاد مارکېټ او د سوداګرۍ اتاق د دفتر د جوړولو لپاره د ځمکې په برابرولو کې له سوداګرو سره لازمې همکارۍ وکړي.

پنجشنبه، د تلې ۱۲مه ۱۴۰۳

 ښاغلي توکل احمدیار، د افغانستان د سوداګرۍ او پانګونې اتاق عمومي رئیس، د ښاغلي خان محمد سرفراز باز د اتاق دارالانشاء رئیس په حضور کې له اغلې کرن دیکر، د افغانستان لپاره د متحده ایالاتو د سفارت له سفیرې سره وکتل او په اقتصادي موضوعاتو، د افغان سوداګرو د ستونزو او د حل لارو په اړه بحث او خبرې اترې وکړې.

دغه ناسته، چې په دوستانه فضا کې ترسره شوه، د افغانستان د خصوصي سکتور پر اقتصادي مهمو مسئلو او ستونزو متمرکزه وه.

د افغانستان د سوداګرۍ او پانګونې اتاق رئیس، د نړیوالې ټولنې له دوامداره ملاتړ او د افغانستان د خصوصي سکتور د اقتصادي وضعیت په ښه کولو کې د دوی له مرستو څخه مننه وکړه. نوموړي، یادونه وکړه چې نړیوالې همکارۍ او د خصوصي سکتور ملاتړ کولای شي په افغانستان کې د اقتصادي بیارغونې په برخه کې مهم رول ولوبوي.

، ښاغلي احمدیار، له ګاونډیو هېوادونو په ځانګړې توګه پاکستان سره د صادراتو په مخکې شته ستونزو او خنډونو ته اشاره وکړه او د یادو خنډونو په لمنځه وړلو يې ټینګار وکړ. هغه، وویل چی د بهرنۍ پانګونې د جلب لپاره د مناسبې فضا رامنځته کول او د سوداګرۍ وضعیت ښه کول د افغانستان او د نړیوالو شریکانو په ځانګړي ډول د متحده ایالاتو د نږدې همکارۍ اړینه ده. هغه، همدارنګه د سوداګریزو زیربناوو د پیاوړتیا، د صادراتو او وارداتو د شرایطو د ښه کولو او د افغانستان خصوصي سکتور لپاره د لازمې اسانتیاوو د رامنځته کولو اهمیت ته اشاره وکړه.

د اتاق د دارالانشاء رئیس، د سوداګرۍ او اقتصادي اړیکو اړوند کلیدي موضوعات لکه: د سوداګرۍ اسانتیاوې، په افغانستان کې د بهرنۍ پانګونې زیاتوالی، د بندیزونو له امله را پیدا شوې ستونزې او د یادو ستونزو پر کورني او نړیوال سوداګریزو اړیکو اغیزې، او همدارنګه د بانکي او مالي انتقالاتو ستونزې مطرح کړې. نوموړي، له اغلې دیکر، څخه وغوښتل چې د افغانستان د خصوصي سکتور د مهم والي په نظر کې نیولو سره د افغان سوداګرو د ستونزو په حل کې عملي ګامونه واخلي.

له بلې خوا، اغلې کرن دیکر، د افغانستان د خصوصي سکتور د ملاتړ په برخه کې د خپلې ژمنتیا خبر ورکړ.
اغلې دیکر، هیله څرګنده کړه چې د دواړو اړخونو په همکارۍ سره به په افغانستان کې د اقتصادي پرمختګ او د کاري فرصتونو د رامنځته کولو لپاره مناسبه فضا رامنځته شي.

په پای کې، دواړو لوریو د همکاریو د دوام او د دواړو هېوادونو ترمنځ د اقتصادي اړیکو په پیاوړتیا ټینګار وکړ.

سه شنبه، د ۱۴۰۳ کال تلې ۱۰مه

د افغانستان د سوداګرۍ او پانګونې اتاق د اقتصادي او سوداګریزو اړیکو د پراختیا په موخه د ایران د سوداګریزې ډلې لپاره په کابل ستار هوټل کې یوه ضیافتي ناسته جوړه کړه. په دې ناسته کې د اتاق لومړي مرستیال ښاغلي محمد یونس مهمند، د صنعت او سوداګرۍ سرپرست وزیر ښاغلي نورالدین عزیزي، د افغانستان لپاره د ایران ځانګړي استازي ښاغلي حسن کاظمي قمي، د اتاق سوداګریز مرستیال ښاغلۍ خیرالدین مایل احمدي، د پانګونې مرستیال ښاغلي عصمت الله وردګ، د اتاق مالي رئیس ښاغلي شیرین آغا سخي، سلطان محمد صافي، خان جان الکوزی، بهادر خیرخواه، سید پرویز سادات هوفیانی او داوود یوسفزی د اتاق مشرتابه پلاوي غړي، عبدالمتین قلندري د څارنې پلاوي منشي او د غزني د سوداګرۍ اتاق رئیس، سید جمیل سادات د کابل د سوداګرۍ رئیس، محمد انور عارفي د اتاق د عامل پلاوي تخنیکي او پالیسۍ مرستیال، د ایران د سیستان او بلوچستان والي ښاغلی محمد کریمي او د دواړو هېوادونو ګڼ شمېر سوداګرو ګډون درلود.

ښاغلي محمد یونس مهمند، د ایران سوداګریزې ډلې راتګ ته ښه راغلاست ووایه او ایران یې د افغانستان پخوانی دوست او په دیني، فرهنګي او سوداګریزو اړیکو کې نږدې هېواد وباله. نوموړي د دواړو هېوادونو ترمنځ په ځانګړي ډول د صنعتي پارکونو په برخه کې د ګډو پروژو د پلي کولو پر اهمیت ټینګار وکړ.

د اتاق لومړي مرستیال، ایران د افغانستان یو له مهمو ترانزیټي شریکانو څخه وباله او د افغان سوداګرو د ستونزو په اړه یې د چابهار په بندر کې له ایراني چارواکو سره خبرې وکړې او د ښاغلي قمي څخه یې په دې برخه کې د هر اړخیزې همکارۍ غوښتنه وکړه.

ښاغلي مهمند، د دواړو هېوادونو سوداګرو تر منځ د نندارتونونو او سوداګریزو ناستو جوړول د اقتصادي اړیکو د پراختیا او ګډو پانګونو لپاره یوه غوره زمینه وګڼله او له ټولو ایراني سوداګرو یې وغوښتل چې په بېلابېلو سکتورونو، په ځانګړي ډول د روغتیا په برخه کې له افغان سوداګرو سره ګډې پانګونې وکړي.

د صنعت او سوداګرۍ وزیر، ایران هېواد ته د خپل کاري سفر د لاسته راوړنو او فعالیتونو معلومات وړاندې کړل او د خصوصي سکتور د ملاتړ او اسانتیاوو په برخه کې یې د افغانستان حکومت له هر اړخیزې همکارۍ څخه ډاډ ورکړ.

ښاغلي حسن قمي، د ګډو سیمه ییزو سوداګریزو همکاریو پر اهمیت ټینګار وکړ او د هېوادونو په اقتصادي پرمختګ کې یې د خصوصي سکتور رول مهم وباله. نوموړي افغان سوداګرو ته ډاډ ورکړ چې د ایران په بندرونو کې به د دوی ستونزې حل کړي.

یکشنبه، تلې ۱۵مه، ۱۴۰۳