د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په داسی حال کې چې، د ایران لپاره افغان سوداګریز چاروال ښاغلي معین خوافي، د افغانستان نړیوال نندارتونونو مرکز رئیس ښاغلي محمد صابر لطیفي او د اتاق ستر سلاکار ښاغلي ډاکټر حسام الدین همراه يې ملتیا کوله دایران سوداګرۍ، صنعت او کانونو وزارت له معین ښاغلي ډاکټر موسوي سره لیدنه ترسره کړه.
 
ښاغلي مهمند د ایران هېواد د افغانانو د ښه او زوړ ګاونډي په توګه یاد کړ او افغان مهاجرینو ته یې د یاد هېواد له پاملرنې مننه وکړه. هغه په افغانستان کې د ایران د پانګونې حجم د جغرافیایی نژدیوالی او کلتوری مشترکاتو لرلو سربیره، لږ او کم وباله او په دغه هیواد کې یې د انرژۍ د تولید، کانونو، کرنې او روغتیا په برخو کې شته فرصتونه تشریح او د ایراني سوداګرو څخه يې وغوښتل چې په افغانستان کې پانګونه وکړي.

د اتاق مرستیال د دواړو هېوادونو لپاره د واخان ځمکني دهلېز د اهمیت په اړه د معلوماتو ورکولو پرمهال د دواړو هېوادونو ترمنځ د سوداګریزو اړیکو د پراختیا لپاره د سوداګریزو زونونو او د ګډ ترانسپورتي سیستم رامنځته کول مهم وبلل. هغه د ګډو نندارتونونو جوړولو او د ایراني سوداګرو لپاره په افغانستان کې د بازارونو او پانګونې د فرصتونو د لیدو او کتنې لپاره د لازمو شرایط برابرلو برخه کې د افغانستان د سوداګرۍ او پانګونې اتاق د مشرتابه د همکارۍ ډاډ ورکړ.

ښاغلي موسوي د اتاق لومړي مرستیال ته د ښه راغلاست ویلو او د هغه د خبرو د اوریدو وروسته، د خصوصي سکتور رول د هېوادونو په پرمختګ کې مهم وباله او د ګډو پانګونو لپاره د ایراني سوداګرو هڅولو برخه کې يې د هر اړخیزې همکارۍ ډاډ ورکړ.

ښاغلي مهمند او ورسره مل پلاوي د ایران د کرنې او معمارۍ ادارې له رئیس ښاغلي ډاکټر اشرفي، د سوداګرۍ پراختیا او صنعت کور سازمانونو له مسؤلینو سره هم جلا لیدنې ترسره کړې. هغه د کرنې سکتور یو له مهمو سکتورونو څخه وباله او د قوش تیپې کانال یې د افغانستان د کرنې د ودې لپاره یو له مهمو فرصتونو څخه وباله. نوموړي د يادې ادارې له مسؤلينو وغوښتل، چې د دواړو هېوادونو د سوداګرو د پیوستون، د فني او تخنیکي تجربو لیږد او  کرنې برخه کې د سوداګریز پلاوي استولو برخه کې همکاري وکړي.

ښاغلي مهمند د آفتاب شهر نندارتون د ترسره کولو، په افغانستان کې د صنعت کور ادارې د جوړېدو برخه کې د اتاق د همکارۍ او د طبي وسایلو او درملو برخه کې د پانګونې په اړه خبرې وکړې.

پنجشنبه، مرغومي ۷مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند ایران د خپل سفر په ترڅ کې په داسی حال کې چې د ایران لپاره د افغانستان سوداګریز چاروال ښاغلي معین خوافي او د ایران – افغان ګډ اتاق رئیس ښاغلي میراجان سلیمان خیل يې ملتیا کوله د خراسان رضوي صنعت، سوداګرۍ، کرنې او کانونو اتاق له رئیس ښاغلي توکلي زاده او د ایران یو شمیر سوداګرو او پانګوالو سره لیده کاته وکړل.

ښاغلي مهمند په افغانستان د سوداګرۍ او پانګونې شته فرصتونو تشریح کولو او د ایران او افغانستان ترمنځ ګډو دیني او کلتوري ارزښتونو په نظر کې نیولو سره د هېواد په اقتصادي وده او پراختیا کې د ایراني سوداګرو رول اړین وباله او د ایران سوداګرو او پانګوالو يې وغوښتل چې په افغانستان کې پانګونه وکړي.

نوموړي په هېواد کې بهرنیو پانګوالو ته د پانګونې لازمو آسانتیاوو لکه: په صنعتي پارکونو کې دوی ته د ځمکې له ویش، د بهرنیو سوداګرو او پانګوالو د شتمنیو خوندیتوب او په افغانستان کې د ټولیز امنیت ډاډ ورکړ. هغه همدارنګه، په افغانستان کې د ایراني سوداګرو لپاره د پانګونې په برخه کې د لازمو آسانتیاوو رامنځته کولو په موخه د افغانستان د سوداګرۍ او پانګونې اتاق د مشرتابه د بشپړ چمتووالي خبر ورکړ او په دی برخه کې يې د هر ډول همکارۍ ژمنه وکړه.

سربیره پردی، ښاغلي مهمند د ګډو نندارتونونو جوړول د تولیدي وړتیاوو پیژندنې او سوداګریزو راکړو ورکړو پراختیا برخه کې اړین وبلل او د ایران سوداګرو او پانګوالو څخه وغوښتل چې د ګډو نندارتونونو په جوړولو کې لازمه همکاري ترسره کړي.

ښاغلي مهمند ایران ته د خپل سفر په جریان کې، د مشهد سوداګرۍ، صنعت او کانونو له کور څخه لیدنه ترسره او د ایران سوداګرو او پانګوالو یو شمیر اندیښنو او سوالونو ته قناعت ورکوونکي ځوابونه وویل. هغه همدارنګه، په مشهد کې د افغان جنرال قونسل ښاغلي جابر انصار، کارکوونکو او یو شمیر افغان سوداګرو سره لیدنه ترسره، په هېواد کې د پانګونې د وضعیت په اړه د مفصلو معلوماتو ورکولو ترڅنګ يې د افغان سوداګرو څخه وغوښتل چې هېواد ته راستانه او په بیلا بیلو برخو کې پانګونه وکړي.

د لیدنو په پای کې، ښاغلي مهمند او ورسره ټیم يې د طوس خراسان صنعتي ښارګوټي تاسیسات و ارزول او د یاد صنعتي ښارګوټي په څیر په افغانستان کې د صنعتي ښارګوټو رامنځته کولو په اړه يې د اړوندو مسؤلینو سره خبرې اترې او سلا مشورې وکړې.

سه شنبه، مرغومي ۵مه، ۱۴۰۲

د افغانستان د سوداګرۍ او پانګونې اتاق عامل پلاوي سرپرست رئیس ښاغلي میرویس هوتک پاکستان ته د خپل کاري سفر په ترڅ کې په داسی حال کې چې، د پاکستان پیښور ښار کې افغان قونسل او سوداګریز چاروال، د افغان – پاک ګډ اتاق اجرائیوي رئیس ښاغلي نقیب الله صافي، د ننګرهار سوداګرۍ او پانګونې اتاق مشرتابه پلاوي غړو او د هېواد یو شمیر سوداګرو او پانګوالو يې ملتیا کوله د پاکستان اتاقونو فدراسیون له مسؤلینو سره لیدنه ترسره کړه.

په دی ناسته کې، د دواړو هېوادونو اتاقونو ترمنځ د لا ډیرې کاري همغږۍ، ګډو نندارتونونو جوړولو، د سوداګرو ترمنځ د اړیکو زیاتولو، د دواړو هېوادونو سوداګرو لپاره د لازمو آسانتاوو رامنځته کولو، په تورخم، انګور اډه او خیبر پښتونخوا کې افغان سوداګرو ته د لازمو آسانتیاوو رامنځته کولو، له کراچۍ بندر څخه د افغان سوداګرو ۴۰۰ کانتینرونو خلاصون، افغان سوداګرو لپاره د ویزو صدور آسانتیاوو رامنځته کولو او د دواړو هېوادونو ترمنځ د سوداګرۍ پراختیا فرصتونو رامنځته کولو په اړه خبرې اترې او د نظر تبادله ترسره شوه.

پنجشنبه، مرغومي ۷مه، ۱۴۰۲

د افغانستان د سوداګرۍ او پانګونې اتاق خدماتي چارو مرستیال ښاغلي نصیر احمد عرب، د اتاق مدیره پلاوي مالي رئیس ښاغلي شیرین آغا سخي، د مدیره پلاوي غړو هر یو ښاغلي خان جان الکوزي، سید پرویز سادات هوفیاني او ضیاءالدین اچکزي، د اتاق عامل پلاوي سرپرست رئیس ښاغلي میرویس هوتک، د کابل سوداګرۍ اتاق لومړي مرستیال ښاغلي احمد شاه حکیمي، د غزني ولایتي اتاق رئیس او د مرکزي اتاق څارنې پلاوي منشي ښاغلي عبدالمتین قلندري، د مرکزي اتاق عامل پلاوي پالیسۍ او تخنیکي مرستیال ښاغلي محمد انور عارفي، د حرکت ادارې رئیس ښاغلي حجت الله فضلي، د خصوصي سکتور ملاتړ پروګرام سکرتریت مسؤل ښاغلي سلیمان بن شاه او د هېواد یو شمیر سوداګرو او پانګوالو د خصوصي سکتور ملاتړ  او  همغږۍ بنسټ جوړونې لپاره مشورتي ناسته چې د حرکت، IFC او نړیوال بانک له لوري د افغانستان د سوداګرۍ او پانګونې اتاق مرکزي دفتر کې جوړه شوې وه، ګډون وکړ.
 
ښاغلي حجت فضلي د حرکت ادارې فعالیتونو په اړه مفصل معلومات وړاندې کړل او د یو واحد میکانیزم او ساختار په جوړولو یې چې د خصوصي سکتور څخه به ملاتړ او د هېواد حکومتي ادارو او نړیوالو بنسټونو سره لازمه همغږي رامنځته کوي د ټینګار کولو ترڅنګ، د خصوصي سکتور له مشرتابه يې وغوښتل د ياد شوي ميکانيزم د رامنځته کېدو په اړه خپل وړانديزونه او نظرونه له حرکت ادارې سره شريک کړي.

ښاغلي عرب د دغې غونډې ګډونوالو ته د ښه راغلاست په ترڅ کې د خصوصي سکتور  انسجام، د نړیوالو بنسټونو په همکارۍ د سوداګرو د ستونزو د حل، په هېواد کې د پانګونې د جلبولو برخه کې اړین وبلل او د یو لوی کنفرانس چې د خصوصي سکتور ټول اړخونه او برخې پکې موجودې وي، د جوړولو غوښتنه وکړه.  

ښاغلي شیرین آغا سخي او الکوزي د یوه واحد دفتر جوړېدل چې د هېواد د خصوصي سکتور ټولو برخو استازیتوب وکړي او د اتاق له قوانینو سره په ټکر کې نه وي د هېواد په اوسني وضعیت کې مهم وباله او په دې برخه کې یې د اتاق د هر اړخیزې همکارۍ ډاډ ورکړ.

ښاغلي عبدالمتین قلندري او احمد شاه حکیمي او سوداګرو او پانګوالو د خپلو خبرو په ترڅ کې، د داسی یو دفتر چې د اتاق له قوانینو سره په تضاد کې نه وي رامنځته کول اړین او یو نیک ګام وباله.

یکشنبه، مرغومي ۳مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د بهرنیو چارو وزارت ښاغلي وزیر، د افغان – ایران ګډ اتاق رئیس ښاغلي میراجان سلیمان خیل او د اتاق ستر سلاکار ښاغلي ډاکټر حسام الدین همراه د خراسان رضوي له والي ښاغلي یعقوب علي نظري، ایراني دولتي چارواکو او د ایران خصوصي سکتور غړو سره لیدنه ترسره او د ګډو ټرانزیټي، سوداګریزو او صنعتي فرصتونو او په ایران شته افغان سوداګرو ستونزو په اړه يې خبرې اترې وکړې.

ښاغلي مهمند د دواړو هېوادونو ترمنځ د ګډې پانګونې او سوداګرۍ له فرصتونو څخه د ګټې اخیستنې په برخه کې د افغانستان د سوداګرۍ او پانګونې اتاق فعالیتونه او هڅې وستایلې او د ایران د سکتوري ادارو له مسؤلینو یې وغوښتل چې د ترجیحي تعرفو او سوداګریزو توکو د کرايې کمولو برخه کې جدي پاملرنه وکړي.

د اتاق لومړي مرستیال په هغه غونډه کې چې د افغانستان-ایران اتاق له خوا جوړه شوې وه، د افغانستان د بهرنیو چارو د وزیر او ورسره ملګري ټیم په حضور کې ګډون وکړ او له افغان سوداګرو سره يې د افغان حکومت د هر اړخیزو همکاریو او مرستو ډاډ ورکړ.
نوموړي د ټولیز امنيت تامين، د صادراتو زياتوالى، د ناقانونه اخاذیو له منځه تلل او د اداري فساد نشتوالى د افغانستان د اقتصادي ودې او پرمختګ په لاره کې مثبت ګامونه وبلل.

چهارشنبه، مرغومي ۶مه، ۱۴۰۲