د افغانستان د سوداګرۍ او پانګونې اتاق عمومي رئیس ښاغلي توکل احمدیار مکې مکرمې ته د خپل کاري سفر په ترڅ کې په داسی حال کې چې د اتاق مدیره پلاوي غړو هر یو جان آقا صادقي او ضیاءالدین اچکزي، د اتاق عامل پلاوي سوداګریزو شخړو حل مرکز رئیس ښاغلي توکل خرم او د نړیوالو اړیکو ډیپارټمنټ مسؤل ښاغلي امید غفورزي يې ملتیا کوله د مکې ښار نړیوال نندارتون څخه لیدنه ترسره کړه.
ښاغلي احمدیار همدارنګه، د آذربایجان اتاق له رئیسې آغلې نتاو ممادو، د مالیزیا حلال ادارې عامل رئیس ښاغلي هیرول اریفین ساحري او دي جي بوتي اتاق رئیس ښاغلي یوسف موسی سره جلا لیدنو په ترڅ کې، د سوداګرۍ پراختیا، پانګونو جلب او سوداګریزو پلاوو تبادلې په اړه خبرې اترې وکړې.

ښاغلي احمدیار د آذربایجان د سوداګرۍ اتاق له رئیسې سره په کتنه کې د دواړو هېوادونو تر منځ د سوداګرۍ او پانګونې پر شته فرصتونو او د سوداګریزو پلاويو د تبادلې په اړه خبرې وکړې او اذربایجان یې د افغاني محصولاتو لکه قیمتي او نیمه قیمتي ډبرو او غالیو لپاره  د ښه بازار په توګه یاد کړ.

آغلې نتاو ممادو د افغانستان او آذربایجان ترمنځ د ښو سوداګریزو فرصتونو په ځانګړې توګه د صادراتو او وارداتو په اړه خبرې وکړې او د دغه هېواد بازارونه یې د حلالو محصولاتو د واردولو لپاره مناسب وګڼل. نوموړې د دواړو هېوادونو ترمنځ د سوداګریزو پلاويو د تبادلې هرکلی وکړ او په دې برخه کې یې د همکارۍ ژمنه وکړه.

سربیره پردی، ښاغلي احمدیار د حلال ادارې له عامل رئیس سره د کتنې په ترڅ کې، په هېواد کې د افغاني محصولاتو لپاره د حلال سرټیفیکیټ عدم صدور په اړه خبرې وکړې او له ښاغلي ساحري څخه وغوښتل چې په هېواد کې د محصولاتو لپاره د حلال سرټیفیکیټ صادرولو، د ظرفیت لوړونې او په معیار برابرولو برخه کې یې ورسره همکاري وکړي.

ښاغلي ساحري د نړۍ په بېلابېلو بازارونو کې د حلال محصولاتو د زیاتېدونکي لېوالتیا په اړه د معلوماتو ورکولو پر مهال په افغانستان کې د حلال محصولاتو د تولید لپاره د ظرفیت لوړونې په برخه کې د همکارۍ ژمنه وکړه او په دې برخه کې یې د افغانستان سوداګریز پلاوي ته بلنه ورکړه چې اندونیزیا ته سفر وکړي څو د همکارۍ په جزیاتو سره د نظر تبادله وکړي.

همدا راز، ښاغلي احمدیار له ښاغلي یوسف موسی سره په کتنه کې د افغانستان د سوداګرۍ او پانګونې اتاق د فعالیتونو او په هېواد کې د شته سوداګرۍ او پانګونې د فرصتونو په اړه معلومات وړاندې کړل او دواړو لورو د سوداګریزو اړیکو پر پراختیا او ګډو همکاریو زیاتوالي په زیاتوالي ټینګار وکړ.

چهارشنبه، سلواغې ۴مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د اتاق سوداګریزو چارو مرستیال ښاغلي خیرالدین مایل احمدي، د اتاق مالي رئیس ښاغلي شیرین آغا سخي، د مدیره پلاوي غړي ښاغلي خان جان الکوزي، د عامل پلاوي سرپرست رئیس ښاغلي میرویس هوتک، د کابل سوداګرۍ او پانګونې اتاق لومړي مرستیال ښاغلي احمد شاه حکیمي، د مرکزي اتاق عامل پلاوي پالیسۍ او تخنیکي مرستیال ښاغلي محمد انور عارفي، د کابل اتاق مدیره پلاوي غړي ښاغلي شاه محمود شریفي، د مارکیټونو د تنظیم ریاست مرستیال ښاغلي عصمت الله انصار، د ماليې، کورنیو چارو، عدليې، سوداګرۍ او صنعت وزارتونو، د افغانستان بانک او د نورم او سټنډرډ ادارې استازو د مرکزي اتاق د کنفرانسونو په تالار کې د خوراکي توکو د بیو کنترول او د احتکار منع کولو په موخه يې ناسته ترسره کړه.
 
ښاغلي مهمند د دغې ناستې ګډونوالو ته د ښه راغلاست په ترڅ کې د افغانستان د سوداګرۍ او پانګونې اتاق د فعالیتونو او لاسته راوړنو په اړه معلومات وړاندې کړل او په بازارونو کې یې د توکو د بیو د کنټرول په برخه کې د دغه کمیسیون د هڅو ستاینه وکړه.

د اتاق لومړي مرستیال په کراچۍ بندر کې د افغان سوداګرو د سوداګریزو توکو د کانټینرونو توقف د خوراکي توکو د بیو په لوړوالي کې اغیزمن وبلل او د یادو سوداګریزو توکو د خلاصون په برخه کې یې د سوداګرۍ اتاق د هڅو ډاډ ورکړ. هغه د زون په کچه د یوې ډلې پر جوړولو ټینګار وکړ چې د ټولو خامو موادو او سونګ توکو اتحادیې پکې شاملې وي.

ښاغلي مهمند د تېرو کلونو په پرتله د هېواد د صادراتو د زیاتوالي یادونه وکړه او د اومو موادو او نفتي توکو د نرخونو په ټاکلو کې یې د سوداګرۍ اتاق د هر اړخیزې همکارۍ ډاډ ورکړ.

ښاغلي خیرالدین مایل د نرخونو کنترول کمیسیون له مسؤلینو وغوښتل چې د توکو د بیو د لوړوالي او کموالي په کنټرول کې د نړیوال بازار نرخ په پام کې ونیسي او د داسې میکانیزم په جوړولو یې ټینګار وکړ چې سوداګرو او مصرفوونکو ته زیان ونه رسوي.

ښاغلي انصاري د یاد کمېسیون د فعالیتونو په اړه هر اړخیز معلومات وړاندې کړل او ویې ویل، چې د دغه کمېسیون له جوړېدو څخه یې موخه د خوراکي موادو د بیو کنترول او د احتکار څخه مخنیوی او کنټرول دی. هغه له دغه کمیسیون سره د اومو موادو او نفتي توکو د بیو په مشخصولو او ټاکلو کې د اتاق د همکارۍ غوښتنه وکړه.

ښاغلي شیرین اغا سخي د کسبګرو اتاق د فعالیتونو په اړه معلومات وړاندې کړل او د دې ډول غونډو جوړول یې د خوراکي توکو د نرخونو د ټاکلو لپاره یو ښه فرصت وباله او په یادو برخو کې یې د کسبګرو اتاق د هراړخیزو همکاریو ډاډ ورکړ.

ښاغلي الکوزي په بازار کې د خوراکي توکو د کنټرول په برخه کې د یاد کمېسیون له مسؤلینو څخه مننه وکړه او د خامو موادو د کیفیت د کنټرول په خاطر یې د هېواد په ګمرکونو کې د معیاري لابراتوارونو جوړولو ټینګار وکړ.

شنبه، مرغومي ۳۰مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند او د اتاق عامل پلاوي سرپرست رئیس ښاغلي میرویس هوتک د وچې او تازه میوې صادرونکو سره په مرکزي دفتر کې د لیدنې په ترڅ کې، د بار وړونکو موټرونو د کرایې لوړوالي په اړه خبرې اترې وکړې.

صادرونکو د ټرانسپورټ وزارت له خوا له یوې اونۍ راهیسې د بار وړونکو موټرونو د کرایو لوړوالی ستونزه یاده کړه او د حل په موخه يې خپل استازي د افغانستان د سوداګرۍ او پانګونې اتاق ته معرفي کړل.

ښاغلي مهمند د وچې او تازه میوې صادرونکو ته د ښه راغلاست ویلو وروسته، د هغوی څخه وغوښتل چې خپل ستونزې د رسمي غوښتنلیک له لارې چې د دوی جوازونه او لازم اسناد ورسره ضم وي د اتاق اړوند ډیپارټمنټ ته وسپاري څو اتاق يې د حل په برخه کې کوټلي ګامونه پورته کړي.

دوشنبه، سلواغې ۲مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند د صنعتي پارکونو تر څیرمه د کابل ښار د سړو خونو څخه لیدنه وکړه څو د هېواد د میوو خوندیتوب څرنګوالی کنترول او ارزوي.

ښاغلي مهمند د دغو سړو خونو له جوړونکو څخه د مننې ترڅنګ د مېوو او سبزیجاتو په ښه زېرمه کولو کې د دوی ونډه مهمه وبلله او په نورو ولایتونو کې یې د ورته سړو خونو پر جوړولو ټینګار وکړ.
نوموړي د هېواد تازه مېوې د غوره کيفيت لرونکې وبللې او له خلکو يې وغوښتل، چې د کرنې پراختیا او بزګرانو ملاتړ په موخه د کورنیو میوو څخه ګټه پورته کړي.  

ښاغلي مهمند د مالیې وزارت له مشرتابه څخه وغوښتل چې د هېواد د کرنیزو محصولاتو د ملاتړ په موخه له نورو هېوادونو څخه د مېوو په ځانګړي ډول د مڼو پر وارداتو موسمي تعرفې وضع کړي، څو د ورته مېوو د واردولو مخه ونیول شي.

د اتاق لومړي مرستیال د تازه مېوې له ټولو سوداګرو وغوښتل چې د هېواد په څلورو لویو زونونو کې د هر ډول مېوو او سبزیجاتو لپاره د معیاري سړو خونو د جوړولو لپاره چې برېښنايې لګښت يې له ډبرو سکرو څخه تامین شي، د جوړولو لپاره خپلې مټې راونغاړي.

شنبه، مرغومي ۳۰مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د افغانستان اسلامي امارت ریاست الوزراء اقتصادي مرستیال، د ماليې وزارت سرپرست، د افغانستان بانک سرپرست، د اقتصاد وزارت مرستیال، د دولتي شرکتونو غښتلتیا او انسجام ادارې مشرتابه پلاوي غړي ښاغلي احمد جان بلال، د ملي پراختیا شرکت رئیس، د حکومت لوړ پوړو چارواکو، د تازه میوې اتحاديې رئیس ښاغلي اختر محمد او د هېواد پیژندل شویو سوداګرو او پانګوالو د دولتي شرکتونو غښتلتیا او انسجام خپلواکې ادارې پرانستې مراسمو کې ګډون وکړ.

ښاغلي مهمند د دولتي شرکتونو غښتلتیا او انسجام خپلواکې ادارې له جوړېدو څخه د مننې او ملاتړ په ترڅ کې په دغو شرکتونو کې د خلکو، دولت او د هېواد د خصوصي سکتور پر ګډې پانګونې باندې ټینګار وکړ.
نوموړي د افغانستان له ټولو دولتي ادارو او خلکو وغوښتل، چې د هېواد له کرنيزو محصولاتو په ځانګړې توګه له تازه مېوې څخه ګټه پورته کړي څو د بزګرانو او سوداګرو د هڅونې او ملاتړ سبب شي.  

احمد جان بلال خلکو ته د کاري فرصتونو رامنځته کول، د باکیفیته محصولاتو او خدماتو وړاندې کول، د ملي بودیجې تمویل، د سالمې سیالۍ رامنځته کول، د احتکار مخنیوی او د خصوصي سکتور د پانګونې لپاره د زمینې برابرول د دولتي شرکتونو غښتلتیا او انسجام خپلواکې ادارې موخې وبللې او په دی برخه کې يې د خصوصي سکتور هر اړخیزې همکارۍ غوښتنه وکړه.

د ریاست الوزارء اقتصادي مرستيال د دولتي شرکتونو د ارزښت او د ملي بودجې په تمويل کې د هغوى د رول په اړه خبرې وکړې او زياته يې کړه "په تېر وخت کي د حکومت ۶۰ سلنه ملي بودیجه د دولتي شرکتونو لخوا تمویل کیده؛ یاد ستر ظرفیت ته په کتو اوسنی حکومت غواړي چې دولتي شرکتونو یو ځل بیا فعال او ګټې اخیستو ته چمتو کړي."

یکشنبه، سلواغې ۱، ۱۴۰۲