د افغانستان د سوداګرۍ او پانګونې اتاق عامل پلاوي سرپرست رئیس ښاغلي میرویس هوتک پاکستان ته د خپل کاري سفر په ترڅ کې په داسی حال کې چې، د افغان – پاک ګډ اتاق اجرائیوي رئیس ښاغلي نقیب الله صافي، د ننګرهار سوداګرۍ او پانګونې اتاق مشرتابه پلاوي غړو او د هېواد یو شمیر سوداګرو او پانګوالو يې ملتیا کوله د پاکستان د ساینسي او صنعتي څیړنیز مرکز PCSIR په علمي سیمنار کې د ګډون کولو ترڅنګ، د شته فرصتونو او ګډو همکاریو په اړه خبرې اترې وکړې.

ښاغلي هوتک په دغه علمي سیمینار کې چې د علمي او صنعتي مسایلو په ځانګړي ډول د کرنیزو او صنعتي تولیداتو او قیمتي ډبرو په اړه جوړ شوی و، د دغه ډول علمي سیمینارونو اهمیت ته په اشارې سره، په خیبر پښتونخوا صوبه کې د پانګونې د فرصتونو په اړه خبرې وکړې او د (PCSIR) ادارې له مسؤلین يې وغوښتل چې په خیبر پښتونخواه صوبه، ننګرهار  او لویه پکتیا ولایتونو کې د پانګونې فرصتونو ارزولو په موخه هوکړه لیک لاسلیک کړي.   

د خیبر پښتونخوا د علمي او صنعتي څیړنو (PCSIR) ادارې مسؤلینو د افغانستان د سوداګرۍ او پانګونې اتاق عامل پلاوي سرپرست رئیس د وړاندیزونو هرکلی وکړ او د ګډو پانګونو د ارزونې په برخه کې یې خپله همکاري څرګنده کړه.

شنبه، مرغومي ۹مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په داسی حال کې چې، د ایران لپاره افغان سوداګریز چاروال ښاغلي معین خوافي، د افغانستان نړیوال نندارتونونو مرکز رئیس ښاغلي محمد صابر لطیفي او د اتاق ستر سلاکار ښاغلي ډاکټر حسام الدین همراه يې ملتیا کوله دایران سوداګرۍ، صنعت او کانونو وزارت له معین ښاغلي ډاکټر موسوي سره لیدنه ترسره کړه.
 
ښاغلي مهمند د ایران هېواد د افغانانو د ښه او زوړ ګاونډي په توګه یاد کړ او افغان مهاجرینو ته یې د یاد هېواد له پاملرنې مننه وکړه. هغه په افغانستان کې د ایران د پانګونې حجم د جغرافیایی نژدیوالی او کلتوری مشترکاتو لرلو سربیره، لږ او کم وباله او په دغه هیواد کې یې د انرژۍ د تولید، کانونو، کرنې او روغتیا په برخو کې شته فرصتونه تشریح او د ایراني سوداګرو څخه يې وغوښتل چې په افغانستان کې پانګونه وکړي.

د اتاق مرستیال د دواړو هېوادونو لپاره د واخان ځمکني دهلېز د اهمیت په اړه د معلوماتو ورکولو پرمهال د دواړو هېوادونو ترمنځ د سوداګریزو اړیکو د پراختیا لپاره د سوداګریزو زونونو او د ګډ ترانسپورتي سیستم رامنځته کول مهم وبلل. هغه د ګډو نندارتونونو جوړولو او د ایراني سوداګرو لپاره په افغانستان کې د بازارونو او پانګونې د فرصتونو د لیدو او کتنې لپاره د لازمو شرایط برابرلو برخه کې د افغانستان د سوداګرۍ او پانګونې اتاق د مشرتابه د همکارۍ ډاډ ورکړ.

ښاغلي موسوي د اتاق لومړي مرستیال ته د ښه راغلاست ویلو او د هغه د خبرو د اوریدو وروسته، د خصوصي سکتور رول د هېوادونو په پرمختګ کې مهم وباله او د ګډو پانګونو لپاره د ایراني سوداګرو هڅولو برخه کې يې د هر اړخیزې همکارۍ ډاډ ورکړ.

ښاغلي مهمند او ورسره مل پلاوي د ایران د کرنې او معمارۍ ادارې له رئیس ښاغلي ډاکټر اشرفي، د سوداګرۍ پراختیا او صنعت کور سازمانونو له مسؤلینو سره هم جلا لیدنې ترسره کړې. هغه د کرنې سکتور یو له مهمو سکتورونو څخه وباله او د قوش تیپې کانال یې د افغانستان د کرنې د ودې لپاره یو له مهمو فرصتونو څخه وباله. نوموړي د يادې ادارې له مسؤلينو وغوښتل، چې د دواړو هېوادونو د سوداګرو د پیوستون، د فني او تخنیکي تجربو لیږد او  کرنې برخه کې د سوداګریز پلاوي استولو برخه کې همکاري وکړي.

ښاغلي مهمند د آفتاب شهر نندارتون د ترسره کولو، په افغانستان کې د صنعت کور ادارې د جوړېدو برخه کې د اتاق د همکارۍ او د طبي وسایلو او درملو برخه کې د پانګونې په اړه خبرې وکړې.

پنجشنبه، مرغومي ۷مه، ۱۴۰۲

د افغانستان د سوداګرۍ او پانګونې اتاق عامل پلاوي سرپرست رئیس ښاغلي میرویس هوتک پاکستان ته د خپل کاري سفر په ترڅ کې په داسی حال کې چې، د افغان – پاک ګډ اتاق اجرائیوي رئیس ښاغلي نقیب الله صافي، د ننګرهار سوداګرۍ او پانګونې اتاق مشرتابه پلاوي غړو او د هېواد یو شمیر سوداګرو او پانګوالو يې ملتیا کوله د خیبر پشتونخواه د ساینس، کرنې او صنعت لابراتوار رئیس ښاغلي جهانګیر خان سره د لیدنه ترسره او د یادې ادارې مختلفې برخې او څانګې يې مشاهده کړې.

ښاغلي هوتک د قیمتي ډبرو، درملو، کرنیزو او صنعتی محصولاتو کنترول او ارزونې برخه کې دیاد لابراتوار رول اړین وباله او د یاد لابراتوار له مسؤلینو يې وغوښتل چې افغانستان ته د خپلو فني او تخنیکي تجربو او شته ماشین آلاتو په لیږد کې بشپړه همکاري وکړي.

ښاغلي جهانګیر خان د ښاغلي هوتک د خبرو له اوریدو وروسته ژمنه وکړه چې، په افغانستان کې د یاد لابراتوار جوړولو په موخه به لازم ماشین آلات او توکي افغانستان ته ولیږدوي.

پنجشنبه، مرغومي ۷مه، ۱۴۰۲

د افغانستان د سوداګرۍ او پانګونې اتاق عامل پلاوي سرپرست رئیس ښاغلي میرویس هوتک پاکستان ته د خپل کاري سفر په ترڅ کې په داسی حال کې چې، د پاکستان پیښور ښار کې افغان قونسل او سوداګریز چاروال، د افغان – پاک ګډ اتاق اجرائیوي رئیس ښاغلي نقیب الله صافي، د ننګرهار سوداګرۍ او پانګونې اتاق مشرتابه پلاوي غړو او د هېواد یو شمیر سوداګرو او پانګوالو يې ملتیا کوله د پاکستان اتاقونو فدراسیون له مسؤلینو سره لیدنه ترسره کړه.

په دی ناسته کې، د دواړو هېوادونو اتاقونو ترمنځ د لا ډیرې کاري همغږۍ، ګډو نندارتونونو جوړولو، د سوداګرو ترمنځ د اړیکو زیاتولو، د دواړو هېوادونو سوداګرو لپاره د لازمو آسانتاوو رامنځته کولو، په تورخم، انګور اډه او خیبر پښتونخوا کې افغان سوداګرو ته د لازمو آسانتیاوو رامنځته کولو، له کراچۍ بندر څخه د افغان سوداګرو ۴۰۰ کانتینرونو خلاصون، افغان سوداګرو لپاره د ویزو صدور آسانتیاوو رامنځته کولو او د دواړو هېوادونو ترمنځ د سوداګرۍ پراختیا فرصتونو رامنځته کولو په اړه خبرې اترې او د نظر تبادله ترسره شوه.

پنجشنبه، مرغومي ۷مه، ۱۴۰۲

د افغانستان د سوداګرۍ او پانګونې اتاق عامل پلاوي سرپرست رئیس ښاغلي میرویس هوتک پاکستان ته د خپل کاري سفر په ترڅ کې په داسی حال کې چې، د پاکستان پیښور ښار کې افغان قونسل او سوداګریز چاروال، د افغان – پاک ګډ اتاق اجرائیوي رئیس ښاغلي نقیب الله صافي، د ننګرهار سوداګرۍ او پانګونې اتاق مشرتابه پلاوي غړو او د هېواد یو شمیر سوداګرو او پانګوالو يې ملتیا کوله د خیبر پشتونخواه پانګونې ادارې له مسؤلینو سره لیدنه ترسره او په دواړه هېوادونو کې د شته پانګه ایزو فرصتونو په اړه يې خبرې اترې وکړې.

ښاغلي هوتک په افغانستان کې د شته فرصتونو په اړه خبرې وکړې او دا یې په هېواد کې د پانګونې لپاره ښه فرصتونه وبلل. هغه په پاکستان کې د افغان سوداګرو لویه ستونزه په کراچۍ بندر کې د افغان سوداګریزو مالونو د څه باندې ۴۰۰ کانټینرونو بندېدل وښودل.
نوموړي د خيبر پښتونخوا د پانګونې ادارې له مسؤلينو وغوښتل، چې د افغان سوداګرو د سوداګريزو توکو په خلاصون کې ورسره همکاري وکړي او پاکستاني سوداګر او پانګوال وهڅوي، چې په بېلابېلو برخو په ځانګړې توګه په افغانستان کې د کانونو او کرنې په ميکانيزه کیدو برخه کې پانګونه وکړي.

د دې غونډې په پای کې د خیبر پښتونخوا د پانګونې ادارې مسؤلینو افغان سوداګرو ته په یاده صوبه کې د پانګونې د فرصتونو په اړه یو معلوماتي پریزنټیشن وړاندی کړ.

پنجشنبه، مرغومي ۷مه، ۱۴۰۲