ښاغلي محمد یونس مهمند، د افغانستان د سوداګرۍ او پانګونې اتاق لومړي مرستیال، تېره چهارشنبه هندوستان ته د خپل سفر پر مهال، په هندوستان کې د افغانستان سفارت له سرپرست ښاغلي ابراهیم خیل سره وکتل او د افغان سوداګرو د ستونزو په اړه یې بحث او نظرونه تبادله کړل.

ښاغلي مهمند، په هندوستان کې د افغان سوداګرو د ستونزو د حل په برخه کې د افغانستان سفارت د سرپرست د ښې همکارۍ له امله مننه وکړه، او د افغان سوداګرو او هلته مېشتو افغانانو د ځینو موجوده ستونزو په اړه یې خبرې وکړې. نوموړي له ښاغلي ابراهیم خیل څخه وغوښتل چې په دې برخه کې لا زیاته همکاري وکړي. هغه د افغانستان د سفارت له سرپرست څخه وغوښتل چې له افغان سوداګرو سره د ملاقات زمینه برابره کړي، ترڅو اتاق وکولی شي د دوی ستونزې د ریاست الوزراء، د صنعت او سوداګرۍ وزارت، د مالیې وزارت او د افغانستان د حکومت له نورو اړوندو ادارو سره شریکې کړي او د حل لپاره یې لازم اقدامات ترسره کړي.

ښاغلي ابراهیم خیل، د افغانستان د سوداګرۍ او پانګونې اتاق لومړي مرستیال د راتګ هرکلی وکړ، او په هندوستان کې د افغان سوداګرو د ستونزو د حل په برخه کې د افغانستان د سفارت له فعالیتونو او ترسره شویو اقداماتو په اړه معلومات ورکړل. نوموړي ښاغلي مهمند ته ډاډ ورکړ چې د افغان سوداګرو د ستونزو د رفع کولو لپاره به هر اړخیزه همکاري و کړي.

 

 

 

 

د افغانستان د سوداګرۍ او پانګونې اتاق، د ترانسپورتي شرکتونو د ستونزو د حل او د هغو موټر چلوونکو لپاره د موقتي اسنادو د ترلاسه کولو د مناسبو لارو موندلو په موخه، چې د افغان سوداګرو مالونه پاکستان ته انتقالوي، ناسته ترسره کړه.

یاده ناسته د اتاق د کنفرانسونو په تالار کې د ښاغلي محمد یونس مهمند، د سوداګرۍ او پانګونې اتاق د لومړي مرستیال، ښاغلي شیرین آغا سخي، د اتاق د مشرتابه پلاوي د مالي رئیس، ښاغلي میر زمان پوپل، د عامل پلاوي د مالي او اداري مرستیال، ښاغلي نقیب الله صافي، د افغان-پاک ګډ اتاق اجرائیوي رئیس، ښاغلي میر افغان صافي، د ترانسپورت د شورا رئیس، او ګڼ شمېر سوداګرو او پانګوالو په حضور کې ترسره شوه.

په پیل کې، ښاغلي پوپل د ترانسپورت سکتور غړو ته ښه راغلاست ووایه او د دې ناستې اساسي هدف یې د پاکستان د حکومت د وروستي تصمیم په اړه د ترانسپورتي شرکتونو نظریات او وړاندیزونه راټولول وبلل. نوموړي وویل چې د پاکستان حکومت له موټر چلوونکو او کلینرانو څخه د پاسپورت او ویزې غوښتنه کړې، چې دې مسئلې د افغان سوداګرو ترانسپورتي فعالیتونه له ستونزو سره مخ کړي. هغه له ټولو ګډونوالو وغوښتل چې خپلې طرحې د ستونزو د حل لپاره له اتاق سره شریکې کړي.

ښاغلي مهمند، د ترانسپورت رول یې د ترانزیټ په وده، د سوداګرۍ او اقتصاد پیاوړتیا، د تجارتي توکو تبادله، د لګښتونو کمښت، د کاري فرصتونو ایجاد، د امنیت او سیمه‌ییزو همکاریو پیاوړتیا، د سیاسي اړیکو پراختیا، د ترانسپورتي پالیسیو همغږي، د زیربناوو او ټکنالوژۍ وده، د دوامداره پرمختګ ملاتړ، او د پولو اقتصادي وده کې مهم وباله. نوموړي له سوداګرو وغوښتل چې د یادو ستونزو د حل لپاره خپل نظریات له اتاق سره شریک کړي.

ښاغلي مهمند ټینګار وکړ چې د خصوصي سکتور غړي او اړوند حکومتي ادارې باید پرله‌پسې ناستې ترسره کړي، څو د موټر چلوونکو او کلینرانو د پاکستان ته د داخلېدو مناسب حل لارې پیدا شي. هغه د اتاق عامل پلاوي ته لارښوونه وکړه چې د افغان سوداګرو ټولې ترانسپورتي ستونزې وڅېړي او د حل لپاره اقدام وکړي. نوموړي، ګډونوالو ته ډاډ ورکړ چې د سوداګرۍ او پانګونې اتاق به د پاکستان د حکومت د وروستي اقدام (د ویزې د لګولو پرېکړې) په اړه د سوداګرو او ترانسپورتي شرکتونو طرحې له اړوندو حکومتي چارواکو سره شریکې کړي.

په ناسته کې ګډونوالو سوداګرو او ترانسپورتي شرکتونو د پاکستان د حکومت د وروستي تصمیم په اړه خپل نظریات وړاندې کړل. هغوی د پاکستان او نورو ګاونډیو هیوادونو لخوا د ویزې د اسانتیاوو نه شتون د سوداګرۍ او ترانسپورتي فعالیتونو په وړاندې لوی خنډ وباله او له اتاق څخه یې وغوښتل چې د دې ستونزو د حل لپاره جدي اقدامات وکړي.

 

 

 

 

ښاغلي ضیاءالدین اچکزی، د افغانستان د سوداګرۍ او پانګونې اتاق د مشرتابه پلاوي غړی، د ایران اصفهان ښار ته د خپل سفر په ترڅ کې، چې یو شمېر مطرح افغان سوداګر یې ملتیا کوله، له یو شمېر ایرانی سوداګرو سره چې د بېلابېلو سکتورونو استازیتوب یې کاوه، وکتل او د دواړو هېوادونو ترمنځ د ګډو پانګونو پر پراختیا یې ټینګار وکړ.

ښاغلي اچکزي، ایرانی سوداګرو ته د افغانستان د اوسنیو فرصتونو او د پانګونې په برخه کې د حکومت له لوري رامنځته شویو اسانتیاوو په اړه معلومات ورکړل او هغوی یې وهڅول، چې له افغان سوداګرو سره په بېلابېلو برخو، په ځانګړي ډول د لمریزې برېښنا تولید، د اصلاح شویو تخمونو تولید، د کرنې میکانیزه کول او د شنو خونو جوړول، کې ګډې پانګونې وکړي.

ایراني سوداګرو، ښاغلي اچکزي او ورسره مل پلاوي راتګ ته د ښه راغلاست ویلو تر څنګ، ډاډ ورکړ، چې چمتو دي له افغان سوداګرو سره د افغانستان په بېلابېلو اقتصادي سکتورونو کې ګډې پانګونې وکړي.

 

 

 

د افغانستان د سوداګرۍ او پانګونې اتاق، د خصوصي سکتور د ستونزو د حل په موخه او د بېلابېلو سکتورونو لپاره د تخصصي کمیټو د جوړولو د لړۍ په دوام، د برښنايي وسایلو تخصصي کمیټه او د یادې کمیټې مشرتابه غړي د ښاغلي محمد یونس مهمند، د سوداګرۍ او پانګونې اتاق د لومړي مرستیال، ښاغلي میر زمان پوپل، د اتاق د عامل پلاوي د مالي او اداري مرستیال، ښاغلي عبدالسلام کوهي، د اتاق حقوقي سلاکار او د یادې کمیټې د ګڼو غړو په حضور کې وټاکل.

یاد غونډه د اتاق د کنفرانسونو په تالار کې ترسره شوه، چې په پیل کې ښاغلي پوپل د ګډون کوونکو سوداګرو حضور ته ښه راغلاست ووایه، د اتاق د تخصصي کمیټو د جوړولو په اړه یې معلومات ورکړل، او له هغوی یې وغوښتل چې وروسته له دې خپلې ستونزې د دې کمیټې له لارې له اتاق سره شریکې کړي. نوموړي د سوداګرۍ او پانګونې اتاق د خصوصي سکتور ملاتړی وباله او ویې ویل چې اتاق د حکومت، بهرنیو مرستندویانو، او د سیمې او نړۍ د خصوصي سکتور استازو ترمنځ د اړیکو پُل دی.

ورپسې، ښاغلي مهمند د هېواد د اوسني وضعیت په اړه خبرې وکړې او د اتاق د نړیوالو اړیکو یادونه یې وکړه. نوموړي د سوداګرو د پیسو د لېږد ستونزې او د خصوصي سکتور د پیسو کنګل کېدل له لویو خنډونو څخه وبلل، چې د خصوصي سکتور د ودې مخه نیسي. هغه د دې پیسو آزادېدل د اقتصاد د ودې، د هیواد د بیا رغونې، او د خلکو لپاره د کاري فرصتونو د ایجاد لپاره اړین وبلل.

همداراز، ښاغلي مهمند د ګاونډیو هیوادونو له لوري د ګمرکي ستونزو رامنځته کول د نړیوالو تجارتي قوانینو خلاف وبلل، خو د ایران، چین، او ترکیې له لوري د ویزو ورکولو اسانتیاوې یې د تجارتي اړیکو د ښه والي نښه وبلله. هغه د حکومت د مشرتابه له لارښوونو څخه ملاتړ څرګند کړ، چې په ګډه باید لوی سهامي شرکتونه جوړ شي، او له ټولو الکترونیکي شرکتونو یې وغوښتل چې په ګډه یو لوی برښنايي تولیدي شرکت په هېواد کې جوړ کړي.

د سوداګرۍ او پانګونې اتاق لومړي مرستیال د خصوصي سکتور د هڅو ستاینه وکړه، چې د خلکو لپاره د کار زمینه برابروي او د افغانستان بانک سره د افغانۍ د ارزښت په ساتلو کې مرسته کوي. نوموړي له سوداګرو وغوښتل چې په خپلو راکړو ورکړو کې له افغانۍ څخه استفاده وکړي، او ګډونوالو ته یې ډاډ ورکړ چې اتاق به د هغو سوداګرو لپاره د ځمکې د وېش په برخه کې هر اړخیزه همکاري وکړي، چې غواړي تولیدي فابریکې جوړې کړي.

ښاغلي مهمند، د برښنايي وسایلو رول د خلکو د ژوند د کیفیت په لوړولو، د انرژۍ د انتقال او ویش، او د نوې تکنالوژۍ په برخه کې مهم وباله، او له سوداګرو یې وغوښتل چې خپلې واردات د نړیوالو معیارونو مطابق برابر کړي.

په دې غونډه کې، ښاغلی محمد ابراهیم رسولی د برښنايي وسایلو د کمیټې د رئیس، او ښاغلي عبدالحمید حمیدي او مرتضی اسحاقزي د دې کمیټې د مرستیالانو په توګه وټاکل شول.

ښاغلي رسولی د دې غونډې د جوړولو په برخه کې د سوداګرۍ او پانګونې اتاق له همکاریو څخه مننه وکړه، د دې کمیټې له لارې د ستونزو د شریکولو او له اتاق سره د همغږۍ ژمنه یې وکړه، او له مشرتابه یې وغوښتل چې د برښنايي وسایلو د سکتور د غړو لپاره په ملي او نړیوالو نندارتونونو کې د ګډون اسانتیاوې برابرې کړي.

 

 

 

ښاغلی ضیاءالدین اچکزی، د افغانستان د سوداګرۍ او پانګونې اتاق د مشرتابه پلاوي غړی،اصفهان ښار ته د خپل سفر پر ترڅ کې، چې یو شمېر افغان سوداګر او پانګوالو یې ملتیا کوله د اصفهان د سوداګرۍ او صنایعو اتاق له رئیس سره ولیدل.

په دې ناسته کې د دواړو هېوادونو د سوداګرو ترمنځ د سوداګریزو اړیکو پر پراختیا او ګډو پانګونو په اړه خبرې وشوې.

ښاغلي اچکزي، پر ګډو پانګونو ټینګار وکړ او د اصفهان د سوداګرۍ او صنایعو اتاق رئیس څخه یې وغوښتل چې ایراني سوداګر وهڅوي، څو له افغان سوداګرو سره په بېلابېلو تولیدي برخو، په ځانګړي ډول د ماهي روزنې، د خصوصي سکتور د خدماتي کارکوونکو د ظرفیت لوړونې، د معیاري سړو خونو جوړولو او د افغانستان د شنو خونو د جوړولو په برخو کې ګډې پانګونې وکړي.

د اصفهان د سوداګرۍ او صنایعو اتاق رئیس ښاغلي اچکزي او ورسره مل پلاوي ته هرکلي وکړ، او ډاډ یې ورکړ چې د ایراني سوداګرو د تشویق، افغان سوداګرو ته د سوداګریزو اسانتیاوو برابرولو، او د دواړو هېوادونو سوداګرو ترمنځ د نظریاتو د تبادلې په برخو کې به هر اړخیزه همکاري وکړي.