د عمر شیرین زاده آیوډین لرونکي مالګې د تولید او پروسس شرکت په کابل کې د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د مدیره پلاوي غړي ښاغلي خان جان الکوزي، د ریاست الوزرا اقتصادي معاونیت ستر سلاکار، د اقتصاد وزارت معین، د چارو ادارې پانګونې رئیس، د ننګرهار اتاق رئیس ښاغلي ګل مراد عرب، د هېواد سوداګرو او پانګوالو، د حکومت لوړ پوړو چارواکو او کورنیو رسنیو استازو په ګډون پرانیستل شو.

ښاغلي مهمند د ورته تولیدي فابریکو جوړول د کارموندنې، اقتصادي ودې او د هېواد پر ځان بسیاینې برخه کې مهم وګڼل او د کورنیو تولیداتو په کیفیت، تولیدي ظرفیت، مناسب قیمت او معیاري کولو یې ټینګار وکړ.

د سوداګرۍ اتاق لومړي مرستیال د کورنیو پانګوالو پر لا زیاتې پانګونې او د بهرنۍ پانګونې پر راجلبولو ټینګار وکړ او د پاکستان په کراچۍ بندر کې یې د سوداګریزو توکو د خلاصون په برخه کې د نړیوالې ټولنې د همکارۍ غوښتنه وکړه.

ښاغلي الکوزي د عمر شیرین زاده شرکت د پرانیستلو مبارکي ورکړه او دا یې د هېواد د اقتصادي ودې په لور یو ګام وباله. هغه د پاکستان له خوا د ځینو سوداګریزو توکو بندول د نړیوالو ترانزیتي قوانینو خلاف وبلل او د کورنیو تولیداتو د ملاتړ او کارولو په برخه کې یې د خپلې ژمنې ډاډ ورکړ.

د اقتصاد وزارت مرستیال د عمر شیرین زاده د آیوډین دارې مالګې د پروسس د فابریکې پرانیستل د کورنیو تولیداتو په برخه کې د ځان بسیاینې په لور یو ګام وباله او له کورنیو تولیداتو یې په استفادې ټینګار وکړ.

محترم امان الله شيرين زاده د ياد شوي شرکت په اړه معلومات ورکړل او زیاته يې کړه "دغه شرکت له څه باندې څلويښتو کلونو راهيسې په پاکستان کې فعاليت کوي او په هېواد کې د امنيت په ټينګښت او د سوداګرۍ او پانګونې اتاق په همکارۍ په هیواد کې د 5 ملیون ډالرو پانګونې سره تاسیس کړ." هغه د باکيفيته مالګې د توليد او د هېواد ټولو سيمو ته د لېږلو ډاډ ورکړ او د حکومت له مشرتابه يې وغوښتل چې د کورنيو صنايعو او توليداتو ملاتړ وکړي.

سه شنبه، لړم ۲مه، ۱۴۰۲

د افغانستان د سوداګرۍ او پانګونې اتاق عامل پلاوي سرپرست رئیس ښاغلي میرویس هوتک په داسی حال کې چې د نړیوالو اړیکو او صادراتو د پراختیا څانګې مسؤلینو هم حضور درلود، د هند په ممبۍ ښار کې د افغانستان له جنرال قونسلې آغلې ذکیه وردګ او د هندوستان له نومتو سوداګرو هر یو ښاغلي راجا توکار او ښاغلي چینتان دوشي سره آنلاین ناسته ترسره او د دواړو هېوادونو ترمنځ د پانګونې ګډو فرصتونو په اړه يې خبرې اترې وکړې.

آغلې وردک له افغان سوداګرو سره د ګډو پانګونو په برخه کې د هندي سوداګرو او پانګوالو د هڅونې او دغه راز د سیمې هېوادونو ته د وچې مېوې په ځانګړي ډول د افغان شیرین بویه د صادراتو په برخه کې د هندي سوداګرو د پانګونې یادونه وکړه او د افغانستان د سوداګرۍ او پانګونې اتاق عامل پلاوي سرپرست څخه يې په دې برخه کې د همکارۍ غوښتنه وکړه.

ښاغلي هوتک په افغانستان کې د پانګونې د فرصتونو یادونه وکړه او په افغانستان کې یې د پانګونې لپاره د هند د سوداګرو د هڅونې په برخه کې د افغانستان د قونسلګرۍ هڅې وستایلې او د دواړو هېوادونو د سوداګرو ترمنځ د سوداګریزو غونډو په جوړولو کې يې د اتاق د هر اړخیزو همکاریو ډاډ ورکړ.

سه شنبه، لړم ۲مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند د مدیره پلاوي دارلانشاء رئیس ښاغلي خان محمد سرفراز باز، د مدیره پلاوي نړیوالو اړیکو رئیس ښاغلي انجنیر سید جاوید برهان، د مدیره پلاوي غړو هر یو ښاغلي خان جان الکوزي، ضیاءالدین اچکزي او محمد داود یوسفزي، د عامل پلاوي سرپرست رئیس ښاغلي میرویس هوتک او کابل سوداګرۍ اتاق لومړي مرستیال ښاغلي احمد شاه حکیمي په افغانستان کې د ترکیې د سفارت له نوي شارژدافیر ښاغلي سینک اونال سره د ترکيې په سفارت کې لیدنه ترسره او د دواړو هېوادونو ترمنځ د سوداګریزو اړیکو پر پراختیا او ګډو پانګونو په اړه يې خبرې اترې وکړې.

ښاغلي مهمند او د اتاق مشرتابه پلاوي نورو غړو په افغانستان کې د ترکیې د سفارت نوي شارژدافیر ته د مبارکۍ ویلو ترڅنګ، د سوداګرۍ او پانګونې اتاق د فعالیتونو په تړاو، په افغانستان کې د پانګونې د فرصتونو، د پاکستان په کراچې بندر کې د افغان سوداګرو د شته ټرانزیټي ستونزو او د دوه اړخیزو ګټو پر یو لړ موضوعاتو خبرې وکړې او د دواړو هېوادونو ترمنځ د سوداګریزو او اقتصادي اړیکو پر پراختیا او ترکيې سفارت او اتاق ترمنځ په لا زیاتې همکارۍ ټینګار وکړ.

ښاغلي سینیک اونال د ترکیې سفارت ته د اتاق د مشرتابه د ورتګ هرکلی کولو ترڅنګ، د دواړو هېوادونو ترمنځ د سوداګرۍ پر پراختیا او د ګډو پانګونو يې ټینګار وکړ او زیاته یې کړه چې د دواړو هېوادونو ترمنځ د سوداګرۍ کچه ټیټه ده او د زیاتوالو لپاره يې باید هڅې وشي.
نوموړي د دواړو هېوادونو د خصوصي سکتورونو ترمنځ ګډې ناستې د سوداګرۍ او پانګونې د ودې لپاره مهمې وبللې او په دې برخه کې یې د همکارۍ ډاډ ورکړ.

دوشنبه، لړم۱، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند د اتاق د عامل پلاوی سرپرست رئیس ښاغلي میرویس هوتک او د عامل پلاوي پالیسۍ او تخنیکي مرستیال ښاغلي محمد انور عارفي په حضور کې د خیرخواه او اتفاق مارکیټونو د اتحاديې له رئیس ښاغلي محمد مختار شریفي سره لیدنه ترسره او د یادو مارکیټونو د چارو بشپړیدو او په پخوانیو اورلګیدنو کې زیانمنو شویو هټیوالو ته يې د ویش په اړه خبرې اترې وکړې.

ښاغلی شریفي د هېواد د سوداګرو او پانګوالو د ستونزو په حل کې د اتاق د دوامداره همکارۍ او د سن سکای شرکت له خوا د خیرخواه د لوی کمپلکس جوړولو پروژې ستاینه وکړه او د سوداګرو او هټیوالو لپاره د ډاډمن کاري چاپېریال په رامنځته کولو او زیانمنو هټیوالو او سوداګرو ته يې د دوکانونو په سپارلو ټینګار وکړ.   

ښاغلي مهمند ښاغلي شریفي ته د ښه راغلاست ویلو ترڅنګ، د افغانستان د سوداګرۍ او پانګونې اتاق د هېواد د خصوصي سکتور ملاتړې وباله او د سن اسکای ودانیز شرکت او دولت ترمنځ د شوي تړون په تطبیق او زیانمنو سوداګرو او هټیوالو ته د یادو دوکانونو په سپارلو يې ټینګار وکړ.

دوشنبه، لړم ۱، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند د مدیره پلاوي دارلانشاء رئیس ښاغلي خان محمد سرفراز باز، د مدیره پلاوي نړیوالو اړیکو رئیس ښاغلي انجنیر سید جاوید برهان، د مدیره پلاوي غړو هر یو ښاغلي خان جان الکوزي، ضیاءالدین اچکزي او محمد داود یوسفزي او د عامل پلاوي سرپرست رئیس ښاغلي میرویس هوتک د ملګرو ملتونو سرمنشي ځانګړي همغږۍ کوونکي ښاغلي فریدون سینیرلي اوغلو او ټیم سره يې د ترکيې په سفارت کې لیدنه ترسره او د خصوصي سکتور د شته ستونزو او ننګونو په اړه يې خبرې اترې وکړې.

ښاغلي فریدون سینیرلیي اوغلو په افغانستان کې د خپل او د خپل ملګري ټیم د څلور میاشتني پاتې کیدو او په ځانګړې توګه د خصوصي سکتور د شته ستونزو د څیړلو یادونه وکړه چې ملګرو ملتونو ته يې تری بشپړ راپور جوړ کړی دی او د افغانستان د سوداګرۍ او پانګونې اتاق له مشرتابه يې وغوښتل يې چې د خصوصي سکتور ستونزې ورسره شریکې څو د حل برخه کې د پام وړ ګامونه پورته کړی شي.  

ښاغلي مهمند د هېواد د خصوصي سکتور او سوداګرو د شته ستونزو په ځانګړي ډول د پاکستان د کراچۍ په بندر کې د افغان سوداګرو د ټرانزیټي ستونزو، د چاه بهار بندر نه د ګټې اخیستو او په دی لاره کې د شته ستونزو، بانکي ستونزو او د هېواد څخه بهر د سوداګرو د پیسو لیږد برخه کې شته ستونزو په اړه خبرې وکړې او د ملګرو ملتونو څخه د یادو ستونزو حل برخه کې د همکارۍ غوښتنه وکړه.

دوشنبه، لړم ۱، ۱۴۰۲