د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په داسی حال کې چې، د مدیره پلاوي غړي ښاغلي محمد داود یوسفزي، د کابل سوداګرۍ او پانګونې اتاق لومړي مرستیال ښاغلي احمد شاه حکیمي او د اتاق سلاکار امید حیدري په حضور کې، د هرات ولایت د سبزیو او تازه میوې له رئیس ښاغلي حاجي اسحاق سره د لیدنې په ترڅ کې، د یاد ولایت د تازه میوو او سبزیو لپاره د مارکیټ جوړولو په اړه يې خبرې اترې وکړې.

ښاغلي اسحاق د هرات ولایت د تازه میوو او سبزیو د څلورو مارکیټونو یادونه وکړه او د میوو او سبزیجاتو د یوه لوی مارکیټ جوړیدل چې په نړیوالو معیارونو برابر دي او سړې خونې، پروسس او بسته بندي په کې شامل دي اړین وباله. نوموړي د اتاق له مشرتابه وغوښتل، چې د ياد مارکېټ د جوړولو لپاره د ځمکې د تخصيص په برخه کې له اړوندو حکومتي ادارو سره په همغږۍ همکاري وکړي.

ښاغلي مهمند ښاغلي اسحق او ورسره ملګري ټیم ته د ښه راغلاست په ترڅ کې په هرات ولایت کې د میوو او سبزیو د یوه لوی مارکیټ د جوړولو لپاره د ځمکې په تخصیص او د اړوندو ادارو سره په همغږۍ او د سړو خونو په جوړولو کې د اتاق د همکارۍ ډاډ ورکړ. نوموړي د هرات او غزني په ګډون د هېواد بېلابېل ولایتونو کې د زېرمه کولو او صادرلو په موخه د سړو خونو جوړول مهم وبلل.
نوموړي د هېواد له ټولو سوداګرو او پانګوالو وغوښتل چې په ګډه د لمریزې انرژۍ په کارولو سره د معیاري سړو خونو په جوړولو کې ونډه واخلي.

د اتاق لومړي مرستیال له ښاغلي اسحق څخه وغوښتل چې خپل وړاندیزونه او ستونزې په لیکلې بڼه اتاق ته وسپاري، تر څو دغه اتاق وکولای شي د ځمکو د استملاک او عملي کار په اړه له اړوندو دولتي ادارو سره خبرې وکړي.

شنبه، لیندۍ ۱۱مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په داسی حال کې چې د عامل پلاوي پالیسۍ او تخنیکي مرستیال ښاغلي محمد انور عارفي او د ملي شفاء درملیز شرکت رئیس ښاغلي نثار احمد تره کي هم حضور درلود، د ملي شفاء درملیز شرکت څخه چې یو څه موده وړاندی د اورلګیدنې په پایله کې زیانمن شوی وه، لیدنه ترسره کړه.

ښاغلي نثار احمد تره کي د سوداګرۍ او پانګونې اتاق لومړي مرستیال او ورسره ملګري پلاوي د دغه شرکت څخه د لیدنې په ترڅ کې د یاد شرکت د فعالیتونو، تولیداتو او د اور لګېدنې له امله د رامنځته شویو زیانونو په اړه هر اړخیزو معلوماتو وړاندې کولو ترڅنګ، د یاد شرکت د مالي زیان اندازه له  ۵۰۰ زره امریکایی ډالرو څخه زیاته اټکل کړه.

ښاغلي مهمند د ملي شفاء درملیز شرکت تولیدات د روغتیا سکتور لپاره اړین وبلل او اور لګیدنه يې ستر زیان وګاڼه.
نوموړي د نورو تولیدي فابریکو له مسوولینو وغوښتل چې د خپلو فابریکو امنیت ته جدي پاملرنه وکړي او د ورته پېښو مخنیوی وکړي او د هېواد له خصوصي سکتور په ځانګړي ډول له تولیدي سکتور سره د همکارۍ په برخه کې یې د اتاق د هر اړخیزې همکارۍ ډاډ ورکړ.

چهارشنبه، لیندۍ ۸مه، ۱۴۰۲

د افغانستان د سوداګرۍ او پانګونې اتاق د چارو د ښه والي او د ولایتي اتاقونو د ستونزو د حل په موخه انلاین غونډه وکړه، چې د عامل پلاوي سرپرست ښاغلي میرویس هوتک، حقوقي سلاکار، مالي مفتش، د مرکزي اتاق د ډیپارټمنټونو مسؤلینو او د ولایتي اتاقونو اجرائیوي مسؤلینو په کې ګډون درلود.

ښاغلي هوتک د ولایتي اتاقونو رول د غړو په جلب او جذب او د هېواد خصوصي سکتور ته د خدمتونو په وړاندې کولو کې مهم وباله او خصوصي سکتور غړو ته د خدمتونو د وړاندې کولو، د دوی د ستونزو هواري لپاره د مرکزي اتاق سره د منظمو اړیکو نیولو، د حکومتي فرامینو تطبیق، په کار کې چټکتیا، د اتاق د عوایدو زیاتوالي او د مرکزي اتاق مسؤلینو سره د اقتصادي طرحو شریکولو برخه کې لازمې لارښوونې وکړې.  

په دې ناسته کې، د ولایتي اتاقونو یو شمېر عامل مدیرانو، حقوقي سلاکار او د دې اتاق د بېلابېلو څانګو مسوولینو د یو شمېر نورو سوداګریزو موضوعاتو او ویناوو تر څنګ د خپلو کاري څانګو او د اساسنامې په رڼا کې د ولایتي اتاقونو د فعالیتونو په اړه خبرې اترې وکړې.

شنبه، لیندۍ ۱۱مه، ۱۴۰۲

د افغانستان د سوداګرۍ او پانګونې اتاق د سوداګریزو توکو لیږد، ټرانزیټ او سوداګرۍ پراختیا او په دی برخه کې د بدیلو لارو موندلو په موخه "د واخان دهلیز د سیمې له هېوادونو سره د سوداګرۍ او ټرانزیټ یوه بدیله لاره" جوړ چې د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د اتاق مالي رئیس ښاغلي شیرین آغا سخي، د عامل پلاوي سرپرست رئیس ښاغلي میرویس هوتک، د اندخوی او هلمند ولایتي اتاقونو رئیسانو، د پکتیا، بدخشان او تخار ولایتي اتاقونو اجرائیوي آمرینو، د ټوکر، تازه میوې، قیمتي او نیمه قیمتي ډبرو اتحادیو رئيسانو او غړو، د هېواد سوداګرو او پانګوالو او کورنیو او بهرنیو رسنیو په کې ګډون درلود.
   
ښاغلي مهمند د دغه کنفرانس ټولو ګډونوالو ته د ښه راغلاست په ترڅ کې د افغانستان د جغرافیایي موقعیت او د ټرانزیټ او سوداګرۍ د پراختیا په برخه کې د شته فرصتونو په اړه خبرې وکړې او د هېواد د اقتصادي او سوداګریزې ودې په برخه کې یې د بدیلو لارو پیدا کول مهم وګڼل.

ښاغلي مومند د واخان ځمکني دهلېز اهمیت او له چین سره د هغه نښلونې ته په اشارې سره زیاته کړه "د واخان ځمکني دهلېز له لارې له چین څخه د وارداتي مالونو لېږد په کم لګښت او په کم وخت کې ترسره کېږي او د دواړو هېوادونو ترمنځ د سوداګریزو او اقتصادي اړیکو د پیاوړتیا بنسټ جوړوِي.
سربېره پردی، دغه دهلېز د منځنۍ اسیا له ځینو هېوادونو او ایران سره د چین او افغانستان د نښلولو نقطه ګڼل کېدای شي.

د سوداګرۍ او پانګونې اتاق لومړي مرستیال د سیمې له هېوادونو سره د اقتصادي او سوداګریزو اړیکو د ښه والي غوښتونکی شو او له دولتي چارواکو یې وغوښتل چې د واخان دهلېز د جوړولو په برخه کې عملي ګامونه پورته کړي.

ښاغلي شیرین آغا سخي په کراچۍ بندر کې د افغان سوداګرو د ستونزو په اړه خبرې وکړې او د یادو ستونزو د حل په برخه کې یې د اتاق د هڅو په اړه خبرې وکړې. هغه د هېواد اقتصادي پرمختګ په ترانزیتي لارو پورې تړلی وباله او د یادو لارو په جوړولو کې یې د هېواد د خصوصي سکتور مشرتابه د همکارۍ ډاډ ورکړ.

دغه راز په دې کنفرانس کې د جامو، تازه میوو او قیمتي ډبرو د اتحادیې رئیسانو په یو شمېر ګاونډیو هېوادونو کې د خپلو ستونزو په اړه خبرې وکړې او د دوی د ستونزو د کمولو او همدارنګه د هېواد د سوداګرۍ د پراختیا لپاره یې د بدیلو لارو پیدا کول مهم وبلل.

سه شنبه، لیندۍ ۷مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په داسی حال کې چې، د اتاق سوداګریزو چارو مرستیال ښاغلي خیرالدین مایل احمدي، د اتاق مالي رئيس ښاغلي شیرین آغا سخي، د اتاق مدیره پلاوي غړي ښاغلي محمد داوود یوسفزي، د اندخوی ولایتي اتاق رئیس ښاغلي عبدالمجید نیازي او د هېواد یو شمیر سوداګرو او پانګوالو يې ملتیا کوله، د چارو ادارې له عمومي رئیس سره لیدنه ترسره او د مالیاتي ستونزو حل په اړه يې خبرې اترې وکړې.

ښاغلي مهمند د اوسپنې پټلۍ د ریاست له خوا د ۱۳۹۵ او ۱۳۹۶ کلونو د دوه چنده مالیاتو د ورکړې په برخه کې د سوداګرو ستونزې د چارو ادارې له عمومي رئیس سره شریکې او له هغه يې وغوښتل چې د سوداګرو ستونزو د حل مناسبې لارې چارې ولټوي.
نوموړي له يادې ادارې سره د اتاق او خصوصي سکتور د هر اړخيزو همکاريو ژمنه وکړه.

د چارو ادارې عمومي رئيس د سوداګرو لپاره د خدمتونو او اسانتياوو برابرول د دولتي سکتورونو دنده وبلله او د هېواد د سوداګرو او پانګوالو د ستونزو په حل کې يې د همکارۍ ډاډ ورکړ.

پنجشنبه، لیندۍ ۹مه، ۱۴۰۲