د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په داسی حال کې چې، د هېواد یو شمیر هغو سوداګرو چې د بهر څخه سمنټ واردوي ملتیا کوله، د ماليې وزارت ګمرکونو له عمومي رئیس ښاغلي عبدالمتین سعید سره لیدنه ترسره، او د ګمرکي تعرفې لوړوالي په اړه يې خبرې اترې وکړې.

ښاغلي مهمند د سمنټو واردوونکو عمده ستونزه چې په توریدي سمنټو لوړه تعرفه ده، د ښاغلي سعید سره شریکه او له هغه يې غوښتنه وکړه چې، د یادې ستونزې حل برخه کې خپلې همکارۍ ونه سپموي.

ښاغلي سعید د ستونزو له اوریدو وروسته، د سمنټو واردوونکو څخه وغوښتل چې خپلې ستونزې په لیکلې بڼه د ګمرکونو عوایدو ریاست ته وسپاري څو د حل برخه کې کوټلي ګامونه پورته کړی شي.
نوموړي د رامنځته شویو ستونزو حل برخه کې، د خپلو هر اړخیزو همکاریو ډاډ ورکړ.

سه شنبه، لړم ۳۰مه، ۱۴۰۲

د افغانستان د سوداګرۍ او پانګونې اتاق په داسې حال کې چې د هېواد سوداګرو او پانګوالو ته د سوداګرۍ او پانګونې خدمتونه وړاندې کوي، تل یې هڅه کړې چې د خصوصي سکتور له لارې په بېړنیو حالاتو کې د هېواد اړمنو او زیانمنو خلکو ته بشري مرستې ورسوي.

د تورخم او سپین بولدک په لارو کې له راستنیدونکو کډوالو سره د سوداګرۍ اتاق د وروستیو مرستو په دوام، دا ځل د اتاق مدیره پلاوي غړي ښاغلي ضیاالدین اچکزي په مشرۍ په سپین بولدک کې له پاکستان څخه راستانه شویو کډوالو ته څه باندې ۷،۵ میلیونه افغانۍ نغدي مرسته او د مدیره پلاوي دارلانشاء رئیس ښاغلي خان محمد سرفراز باز په مشرۍ په تورخم کې توزیع کړه.

ښاغلي سرفراز باز د دغو مرستو د وېش پرمهال وویل "د افغانستان د سوداګرۍ او پانګونې اتاق د کډوالو او راستنیدونکو چارو د عالي کمېسیون په همغږۍ سره د دوو لارو څخه ۷۵۰ راستنیدونکو او کډوالو کورنیو ته ۷،۵ میلیونه افغانۍ په عادلانه او شفاف ډول ویشي.  
نوموړي زیاته کړه "اتاق تل هڅه کوي چې د خصوصي سکتور بشردوستانه مرستي اړمنو اوبیوزله هېوادوالو ته ورسوي."

ښاغلي باز د پاکستان د حکومت له خوا د افغان کډوالو اخراج د بشري حقونو او د کډوالۍ د قوانینو خلاف عمل وباله او د هېواد له ټولو سوداګرو او پانګوالو یې وغوښتل چې له خپلو راستنیدونکو هېوادوالو سره د مالي مرستو او خامو موادو د برابرولو لپاره لاس په کار شي. نوموړي همدارنګه د کډوالو او راستنیدونکو چارو د عالي کمیسیون د ښه کار او شفاف بهیر ستاینه وکړه.

شنبه، لړم ۲۷مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په داسی حال کې چې، د هرات ولایتي اتاق رئیس ښاغلي محمد یونس قاضي زاده، د فاریاب ولایتي اتاق رئیس ښاغلي سید فرید او د نفتي موادو او اوبلن ګاز اتحاديې رئیس ښاغلي سید کریم په حضور کې، د ماليې وزارت ګمرکونو له عمومي معین سره لیدنه ترسره او د سون توکو د بيې په اړه يې بحث او د نظر تبادله وکړه.

د افغانستان اوسني اقتصادي وضعیت په نظر کې نیولو سره، ښاغلي مهمند د سون توکو اوسنۍ بیې د هېواد له بنسټیزو ستونزو څخه وبللې او د ماليې وزارت ګمرکونو له عمومي معین څخه غوښتنه وکړه چې، د سون توکو مناسبې بيې په ټاکلو کې عملي ګامونه پورته کړي.

د ګمرکونو عمومي معین ښاغلي مهمند ته د ښه راغلاست ویلو ترڅنګ، د سون توکو نرخ ټاکلو برخه کې د خپلې هر اړخیزې همکارۍ ډاډ ورکړ.

سه شنبه، لړم ۳۰مه، ۱۴۰۲

د وروستیو خبرو اترو په پایله کې چې د افغان سوداګریز پلاوي او پاکستاني چارواکو ترمنځ ترسره شوې، د پاکستان حکومت موافقه وکړه چې د پاکستان په کراچۍ بندر کې د افغان سوداګرو شته ترانزیتي ستونزو یو برخه حل کړي.

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د اتاق مدیره پلاوي غړي او د افغان – پاک ګډ اتاق رئیس ښاغلي خان جان الکوزي او د اتاق عامل پلاوي سرپرست رئیس په داسی حال کې د هېواد یو شمیر سوداګرو يې ملتیا کوله د جمعې په ورځ د روان لمریز کال د لړم د میاشتې په ۲۶مه، د پاکستان سوداګرۍ وزارت له معین ښاغلي محمد صالح احمد فاروقي سره لیدنه ترسره، د دواړو هېوادونو د خصوصي سکتورونو ترمنځ د سوداګرۍ، ټرانزیټ او ګډې پانګونې د پراختیا په اړه د بحث تر څنګ، ښاغلي فاروقي د بانکي تضمینونو لری کولو، د افغان سوداګرو په ټرانزیټي توکو د ۱۰ سلنه ټکس کمولو او په کراچۍ بندر کې د متوقف شویو کانتینرونو څخه ۹۰ سلنه کانتینرونو ته د انتقال اجازې ورکولو خبر ورکړ.

ښاغلي مهمند او ښاغلي خان جان الکوزي د افغانستان د سوداګرۍ او پانګونې اتاق او د هېواد د خصوصي سکتور په استازیتوب خبرې وکړې او د پاکستان په کراچۍ بندر کې یې د افغان سوداګرو د ستونزو د حل په برخه کې د پاکستان له اقدام څخه مننه وکړه او دا یې د دواړو هېوادونو تر منځ د ټرانزیټي او سوداګریزو اړیکو د پراختیا لپاره مهمه وبلله او هیله یې څرګنده کړه، چې افغان سوداګر به په راتلونکي کې له ورته ستونزو سره مخ نه شي.

جمعه، لړم ۲۶مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په داسی حال کې چې، د مدیره پلاوي غړي ښاغلي خان جان الکوزي، د اتاق عامل پلاوي سرپرست رئیس ښاغلي میرویس هوتک، د ننګرهار ولایتي اتاق رئیس ښاغلي ګل مراد عرب او د افغان – پاک ګډ اتاق اجرائیوي رئیس ښاغلي نقیب الله صافي هم حضور درلود، د سویس هېواد له یو تن سوداګر ښاغلي سرلک سره د اتاق په مرکزي دفتر کې لیدنه ترسره او په افغانستان کې د (الم) په نوم د یو نوي بانک رامنځته کولو په اړه خبرې اترې وکړې.
 
ښاغلي سرلک د (الم) بانک د فعالیتونو، لاسته راوړنو او تاریخ په اړه مفصل معلومات وړاندې کړل او زیاته یې کړه "دغه بانک په سویس کې اوږده کاري تجربه لري او اوس غواړي په افغانستان کې د دې بانک نمایندګي جوړه کړي. نوموړي د ياد بانک په جوړېدو کې د اتاق د هر اړخيزو همکاريو غوښتنه وکړه.

ښاغلي مهمند د دغه ډول بانکونو جوړول د سیمې او نړۍ هېوادونو ته د پیسو د لېږد بهیر د چټکتیا، د سوداګرۍ د اسانتیا او د افغان سوداګرو او د سیمې د هېوادونو د سوداګرو ترمنځ د سوداګریز باور د فضا په رامنځته کولو کې مهم وبلل. همدارنګه ښاغلي مهمند د یاد بانک د جوړولو برخه کې د اتاق د هر اړخیزې همکارۍ ډاډ ورکړ.

یکشنبه، لړم ۲۸مه، ۱۴۰۲