د افغانستان د سوداګرۍ او پانګونې اتاق عمومي رئیس ښاغلي توکل احمدیار او د اتاق د دارلانشاء رئیس ښاغلي خان محمد سرفراز باز په داسی حال کې چې، د هېواد یو شمیر سوداګرو يې ملتیا کوله د قطر سوداګرۍ اتاق لخوا دوی ته او د نورو اسلامي هېوادونو اتاقونو رئیسانو ته په جوړه کړې شوې ملمستیا کې ګډون وکړ.

ددی ملمستیا او ناستې په ترڅ کې، د اسلامي هېوادونو اتاقونو ترمنځ د همکارۍ او په نږدې راتلونکي کې د کنفرانس جوړیدو په اړه خبرې اترې وکړې.

شنبه، لیندۍ ۲۵مه، ۱۴۰۲

د افغانستان د سوداګرۍ او پانګونې اتاق عامل پلاوي سرپرست رئیس ښاغلي میرویس هوتک د نړیوال بانک، UNDP او ILO له مسؤلینو سره آنلاین ناسته ترسره او په هرات ولایت کې د زلزله ځپلو سکتورونو ملاتړ په اړه يې خپل نظرونه مطرح او خبرې اترې وکړې.

د نړیوال بانک، UNDP او ILO مسؤلینو د کوچنیو او منځنیو متشبثینو د ملاتړ خبر ورکړ او د افغانستان د سوداګرۍ او پانګونې اتاق څخه يې وغوښتل چې د هرات ولایت په زلزله کې د ځپل شویو منځنیو او کوچنیو متشبثینو په پیژندنه کې ورسره مرسته وکړي.

ښاغلي هوتک په هرات ولایت کې خصوصي سکتور ته د رسیدلو زیانونو په اړه د معلوماتو ورکولو ترڅنګ، د درندو او سپکو صنایعو، زعفرانو، وچې میوې، لاسي صنایعو، بانکونو او ودانیو برخه کې هرات یو ستر تولیدي ولایت وباله.

همدارنګه، نوموړي د هرات ولایت خصوصي سکتور ستونزو او فرصتونو پیژندلو په موخه د یو کنفرانس په جوړولو د ټینګار کولو ترڅنګ، نړیوالو ادارو سره په هرات کې ولایت کې د زیانمنو سکتورونو په پیژندلو کې د همکارۍ ډاډ ورکړ.

چهارشنبه، لیندۍ ۲۲مه، ۱۴۰۲

د بلخ سیمه ایز حکومت چارواکو، خصوصي سکتور غړو او د ازبکستان سوداګریز پلاوي په بلخ کې ولایت کې، د سوداګریزو اړیکو پراختیا او ګډون پانګونو رامنځته کولو په موخه، ګډه ناسته جوړه کړه چې، د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د اتاق سوداګریزو چارو مرستیال ښاغلي خیرالدین مایل احمدي، د بلخ ولایت مقام، د ازبیکستان سوداګریزو پلاوي، د بلخ ولایتي اتاق سرپرست، د نفتي موادو اتحاديې رئیس ښاغلي مؤمن ضیايي او یو شمیر سوداګرو او پانګوالو ګډون درلود.

ښاغلي مهمند ازبیکستان یو دوست، ښه ګاونډی او د ګډو دیني او کلتوري ارزښتونو لرونکی هېواد وباله او د سوداګرۍ او ګډې پانګونې پراختیا یې د دواړو هېوادونو په ګټه وګڼله.  
نوموړي ازبیکستان ته د افغانستان د صادراتو پر زیاتوالي او د روغتیا په برخه کې د ګډې پانګونې پر رامنځته کولو ټینګار وکړ او په دې برخه کې یې د افغانستان د خصوصي سکتور د مشرتابه د همکارۍ ډاډ ورکړ.

ښاغلي مایل احمدي د افغانستان په اقتصادي وده او پرمختګ کې د ازبیکستان رول مهم وباله او ژمنه یې وکړه چې د سوداګرۍ او پانګونې د اړیکو د ښه والي په برخه کې به لا زیاتې هڅې وکړي.

شنبه، لیندۍ ۲۵مه، ۱۴۰۲

د افغانستان د سوداګرۍ او پانګونې اتاق خصوصي سکتور ته د سوداګریزو خدماتو وړاندی کولو او بهرنیو پانګونو جلبولو په سلسله کې، دا ځل د افغان او ترکي سوداګرو ترمنځ د سوداګریزو پیوستون ناسته جوړه چې پکې، د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د مدیره پلاوي مالي رئیس ښاغلي شیرین آغا سخي، د مدیره پلاوي غړو هر یو ښاغلي خان جان الکوزي، محمد ګردیزي او محمد داود یوسفزي، د اتاق عامل پلاوي سرپرست رئیس ښاغلي میرویس هوتک، د افغانستان لپاره د ترکي سفارت سوداګریزو چاروال ښاغلي امره قبیل، د پکتیکا، لوګر او خوست ولایتي اتاقونو رئیسانو، افغان او ترکي مطرح سوداګرو او پانګوالو ګډون درلود.

ښاغلي مهمند په کابل کې د ترکیې سفیر او ورسره ملګري پلاوي ته د ښه راغلاست ویلو ترڅنګ، ترکیه د افغانستان پخوانی دوست هېواد وباله او د دواړو هېوادونو ترمنځ یې د سوداګریزو او اقتصادي اړیکو پر پراختیا ټینګار وکړ.

د اتاق لومړي مرستیال په هېواد کې د امنیت ټینګښت، د اداري فساد له منځه تلل او د کوکنارو د کښت مخنیوی په افغانستان کې د پانګونې لپاره ښه فرصتونه وبلل او د دواړو هېوادونو له سوداګرو او پانګوالو څخه یې وغوښتل چې په بېلابېلو برخو په ځانګړي ډول په افغانستان کې د کان کیندنې، د کرنې میکانیزه کیدو او د بریښنا په تولید کې ګډې پانګونې وکړي.

ښاغلي امره، افغانستان ته د ترکیې د سوداګریز پلاوي د سفر موخه د دواړو هېوادونو ترمنځ د سوداګرۍ او پانګونې پراختیا، په افغانستان کې د کرنې او مالدارۍ میکانیزه کیدل، د بیخ بنسټیزو پروژو پلي کول او همدارنګه د افغان سوداګرو او پانګوالو سره د سوداګریز پیوستون ناسته وبلله.

ښاغلي شیرین اغا سخي افغانستان ته د ترکیې د سوداګریز پلاوي سفر د سوداګریزو اړیکو او پانګونې د پیاوړتیا په برخه کې یو مهم ګام ګڼلو ترڅنګ، ترکیه یې یو دوست او ورور هېواد وباله او د دواړو هېوادونو ترمنځ یې د ښو سوداګریزو او اقتصادي اړیکو پر درلودلو ټینګار وکړ.

ښاغلي الکوزي د دا ډول غونډو جوړول د دواړو هېوادونو د سوداګرو ترمنځ د ګډې پانګونې لپاره یو ښه فرصت وباله او زیاته يې کړه چې د افغان سوداګرو یوه لویه ستونزه له ترکیې څخه د ویزو د ورکړې په برخه کې د اسانتیاوو نشتوالی دی.

ښاغلي هوتک په افغانستان کې د سوداګرۍ او پانګونې لپاره مناسبو شرایطو ته د اشارې کولو ترڅنګ، له ترکي سوداګرو او پانګوالو وغوښتل چې په افغانستان کې شته فرصتونو ته په پام سره، پانګونه وکړي.

سه شنبه، لیندۍ ۲۱مه، ۱۴۰۲

د افغانستان د سوداګرۍ او پانګونې اتاق عمومي رئیس ښاغلي توکل احمدیار په داسی حال کې چې، د اتاق عامل پلاوي نړیوالو اړیکو رئیس ښاغلي امید غفورزي يې ملتیا کوله، د قطر ۲۰۲۳ نړیوال نندارتون څخه لیدنه ترسره کړه.

دغه نندارتون چې د قطر په پلازمېنه دوحه ښار کې به ۶ میاشتې دوام وکړي د افغانستان په ګډون کابو  ۸۰ هېوادونو خپل تولیدات نندارې ته ایښي دي. سږ کال یو شمېر افغان سوداګرو د هېواد محصولات لکه: غالۍ، وچه مېوه، زعفران او لاسي صنایع نندارې ته وړاندې کړي دي.

ښاغلي احمديار د نورو هېوادونو د توليداتو د ليدنې پر مهال د افغان سوداګرو له غرفو څخه هم ليدنه وکړه، د هېواد د سوداګرو ستونزې او وړانديزونه يې واورېدل او د حل په برخه کې يې د افغانستان د سوداګرۍ او پانګونې اتاق د همکارۍ او د راتلونکي کال په نندراتون کې د افغان سوداګرو د پراخ ګډون ډاډ ورکړ.

جمعه، لیندۍ ۲۴مه، ۱۴۰۲