د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د مشرتابه پلاوي د نړیوالو اړیکو رییس ښاغلي انجنیر سید جاوید برهان، او د مشرتابه پلاوي غړي ښاغلي خانجان الکوزي، په داسې حال کې چې د صنعت او سوداګرۍ وزارت مرستیال ښاغلي احمدالله ذاهد، د مطهر درملیز روغتون رییس ښاغلي ابن محمد ناظري، ډاکټران او د خصوصي سکتور غړي هم حاضر وو، د مطهر درملیز روغتون د پرانیستې په غونډه کې ګډون وکړ.

ښاغلي مهمند، د مطهر درملیز روغتون د پرانیستې مبارکي وړاندې کړه او د هغو تجربه‌ لرونکو ډاکټرانو قدرداني وکړه چې په سختو حالاتو کې یې هېواد نه دی پرېښی او په روغتیايي برخو کې کار کوي. هغه، د خصوصي روغتونونو رول د ناروغانو ستونزو په حل او د روغتیا په برخه کې د ځان بسیاینې لپاره مهم وباله.

ښاغلي مهمند، هیله څرګنده کړه چې د روغتیا سکتور وده او د خصوصي روغتونونو معیاري او لوړ کیفیت خدمات به د خلکو باور ترلاسه کړي او ناروغان به له بهرنیو سفرونو او لوړ لګښتونو خلاص کړي.

نوموړي، له خصوصي روغتونونو غوښتنه وکړه چې د معیاري او ستندرد خدماتو ترڅنګ د درملو کیفیت ته پام وکړي او د خپلو خدماتو لګښتونه د خلکو اقتصاد ته په پام سره تنظیم کړي. هغه د خصوصي او دولتي روغتونونو ترمنځ همکاري د خلکو لپاره د معیاري خدماتو وړاندې کولو او د روغتونونو د ظرفیت لوړولو لپاره مهم وباله.

ښاغلي مهمند، د افغانستان د سوداګرۍ او پانګونې اتاق د خصوصي سکتور د استازي په توګه ژمنه وکړه چې د خصوصي روغتونونو ستونزو په حل او د دې سکتور په وده کې به د اړوندو دولتي ادارو سره په همغږۍ کار وکړي.

 

 

 

د افغانستان د سوداګرۍ او پانګونې اتاق لومړی مرستیال ښاغلی محمد یونس مهمند او د اتاق د مشرتابه پلاوي غړی ښاغلی خانجان الکوزی د ترکیې د سفیر او د هېواد د بېلابېلو ښوونځیو د زده کوونکو په ګډون، په کابل کې د افغان-ترک ښوونځیو د دویم ساینسي او ټکنالوژي نندارتون په پرانستغونډه کې ګډون وکړ.

ښاغلي مهمند، د ترکیې له سفارت او دولت څخه د افغانستان له خصوصي سکتور سره د ویزې د اسانتیاوو او د مرستو لپاره مننه وکړه او د داسې نندارتونونو رول یې د زده کوونکو د معاصرو ټکنالوژیو سره د بلدتیا، نوو تدریسي میتودونو وړاندې کولو، نوښتونو هڅونې، او د ښوونې او روزنې د سیستم په ښه‌والي او کیفیت لوړولو کې مهم وباله. همدارنګه یې د هېواد له ټولو زده کوونکو وغوښتل چې د معاصرو ټکنالوژیو سره ځان بلد کړي او په بیا رغونه کې فعاله ونډه واخلي.

ښاغلي مهمند زیاته کړه، "موږ غواړو چې ماشومان مو د اسلامي اصولو پر بنسټ تعلیم ترلاسه کړي." هغه د زده‌کوونکو لپاره د تعلیم د زمینې په برابرولو کې د افغانستان د سوداګرۍ او پانګونې اتاق د هر اړخیز ملاتړ ډاډ ورکړ.

 

 

 

 

 

ښاغلي محمد یونس مهمند، د افغانستان د سوداګرۍ او پانګونې اتاق لومړی مرستیال د ښاغلي میرزمان پوپل، د اتاق عامل پلاوي د مالي او اداري مرستیال سرپرست په حضور کې له ښاغلي جینک اونال، په افغانستان کې د ترکیې له سفیر سره لیدنه ترسره کړه او د سوداګرۍ او ترانزیټ په موضوعاتو یې خبرې وکړې.

ښاغلي مهمند، د ترکیې له سفیر څخه د همکارۍ او ملاتړ لپاره مننه وکړه او د دواړو هېوادونو ترمنځ د سوداګرۍ او ترانزیټ په برخو کې د شته ستونزو په اړه خبرې وکړې. هغه، د صادراتو لپاره د تعرفې د کموالي او د همکارۍ د هوکړه لیک لاسلیک غوښتنه وکړه او د افغانستان او ترکیې ترمنځ د سوداګرۍ په زیاتوالي ټینګار وکړ.

د اتاق لومړي مرستیال لاجورد لار د سوداګرۍ او ترانزیټ لپاره مهمه وبلله او وړاندیز یې وکړ چې دواړه حکومتونه باید د دې لارې فعالولو لپاره هلې ځلې وکړي.

ښاغلي جینک اونال د ښاغلي مهمند او ښاغلي پوپل تود هرکلی وکړ او په یادو موضوعاتو کې یې خپله خوښي څرګنده کړه. هغه وویل چې د لاجورد لارې په فعالولو خوښبین دی او د دې لار د بیا فعالولو لپاره یې د افغانستان له حکومت سره خبرې کړي. هغه همدارنګه د دواړو هېوادونو لپاره د تعرفې په کمولو باندې هم خبرې وکړې، او ښاغلي مهمند د افغانستان د صادراتي محصولاتو د معیاري کولو په برخه کې ډاډ ورکړ.

 

 

 

 

د افغانستان د سوداګرۍ او پانګونې اتاق لومړي مرستیال ښاغلی محمد یونس مهمند، په داسې حال کې چې د حکومت لوړپوړي چارواکي، د نړیوالو مؤسسو مسوولین او د هېواد سوداګر او پانګوال هم ګډون درلود، په کابل سرینا هوټل کې د افغانستان بانک له لوري د وړو پورونو په کنفرانس کې ګډون وکړ.

ښاغلي مهمند، د حکومت څخه د خصوصي سکتور په ځانګړي توګه د منځنیو او وړو متشبثینو د ملاتړ لپاره مننه وکړه او په شمال ختیځ زون کې د سوداګرۍ او پانګونې فرصتونو او ستونزو کنفرانس په اړه، چې په فیض آباد بدخشان کې د اتاق له خوا د پانګونې ستونزو او فرصتونو د راټولولو لپاره جوړ شوی و، ګډونوالو ته تفصیلي معلومات وړاندې کړل او دغه ډول کنفرانسونه یې د مالدارۍ او زراعتي برخو کې د منځنیو او وړو شرکتونو د ملاتړ لپاره مهم وبلل.

د اتاق لومړی مرستیال، د وړو پورونو رول د اقتصادي ودې او وړو او منځنیو سوداګریو لپاره ګټور وباله او د وړو پورونو د پلان د پلي کولو لپاره یې د واضحو میکانیزمونو پر جوړولو ټینګار وکړ. هغه، له هغو نړیوالو مؤسسو څخه وغوښتل چې په دې برخه کې فعالیت کوي، څو په دې برخه کې له کورنیو مؤسسو په ځانګړې توګه د افغانستان بانک سره هر اړخیزه همکاري وکړي.

ښاغلي مهمند، د داخلي تولیداتو د هڅونې پالیسۍ پلي کولو لپاره، د حکومت لخواه په هغو وارداتي توکو د تعرفو لوړول یې مهم او ګټور وباله چې همنوع یې په هېواد دننه تولیدیږي،او له کوچنیو او منځنیو سوداګرو او پانګوالو څخه یې وغوښتل چې په خپلو تولیداتو کې د کیفیت، ظرفیت او بیې په برخه کې جدي پاملرنه وکړي.

ښاغلي مهمند، په هغه جوړ شوي پنل کې هم ونډه واخیسته او د کوچنیو پورونو په اړتیا او د کوچنیو او منځنیو سوداګریو کې د یادو پورونو د رول په اړه یې خبرې وکړې.

 

 

 

 

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند او د اتاق د مشرتابه پلاوي د نړیوالو اړیکو رئیس ښاغلي انجنیر سید جاوید برهان، د عامل پلاوي مالی او اداري مرستیال محترم میرزمان پوپل په ګډون، د هالنډ یو ستر سوداګر او د هالنډ د اتاق استازي ښاغلي سمیر بیات او د (UNDP) دفتر یو شمېر مسئولینو سره په سرینا هوټل کې وکتل.

په دې ناسته کې ښاغلي سمیر بیات د هالنډ د سوداګرو او پانګوالو د افغانستان سره د پانګونې په برخه کې د لیوالتیا یادونه وکړه. هغه، وویل چې هالنډي سوداګر، افغانستان سره ګډو پانګونې ته لیواله دي. هغه زیاته کړه، د افغانستان او هالنډ د اتاقونو د اړیکو په ښه‌والي سره دا فرصتونه رښتیا کېدای شي. ښاغلي بیات څرګنده کړه چې په افغانستان کې د ډېرو برېښنايي پروژو مالي ملاتړ د (UNDP) له لارې کېږي. هغه ښاغلي محمد یونس مهمند او سید جاوید برهان ته بلنه ورکړه چې هالنډ ته سفر وکړي او د دواړو هېوادونو د تجارت او ګډو همکاریو د پراختیا په اړه خبرې وکړي.

ښاغلي مهمند، ښاغلي سمیر بیات او (UNDP) دفتر مسئولینو ته ښه راغلاست ووایه او په افغانستان کې د پانګونې پر شته فرصتونو خبرې وکړې. هغه وویل چې د ټولیز امنیت ټینګښت، د کوکنارو کښت بندول او د اداري فساد له منځه وړل په هېواد کې د پانګونې لپاره ښه چاپېریال رامنځته کړی. هغه له سمیر بیات او د (UNDP) دفتر څخه وغوښتل چې د اوسنیو شرایطو په پام کې نیولو سره بهرني پانګوال، په ځانګړي ډول هالنډي پانګوال، د افغانستان سره ګډې پانګونې وهڅوي.

د اتاق لومړي مرستیال د افغانستان او هالنډ د سوداګرۍ اتاقونو ترمنځ د اړیکو پر ښه‌والي ټینګار وکړ او زیاته یې کړه: موږ لیواله یو چې د دواړو هېوادونو اتاقونو ترمنځ د همکاریو له امله له اروپايي هېوادونو، په ځانګړي ډول هالنډ سره تجارت پراخ شي او اروپايي پانګوال د افغانستان په بېلابېلو سکتورونو کې پانګونې ته وهڅول شي. هغه د هالنډ له هېواد او د اتاق سره د سوداګریزو اړیکو د ښه‌والي لپاره د هر اړخیزې همکاري ژمنه وکړه.

ښاغلي سید جاوید برهان د دواړو هېوادونو د اتاقونو ترمنځ د اړیکو ښه‌والی نیک ګام وباله او په افغانستان کې د پانګونې پر ښه فرصتونو خبرې وکړې. هغه د (UNDP) له مرستې څخه د برېښنايي پروژو په مالي برخه کې مننه وکړه او هیله یې څرګنده کړه چې دا پروژې به د افغانستان ټولو ولایتونو کې پلي شي. ښاغلي برهان، د لوی سوداګر او د هالنډ د اتاق استازي په توګه د سمیر بیات له همکارۍ څخه مننه وکړه.

 

 

 

 

v