ښاغلي محمد یونس مهمند د افغانستان د سوداګرۍ او پانګونې اتاق لومړي مرستیال، په کابل کې د چین ولسي جمهوریت د ۷۵ مې کلیزې د لمانځنې په مراسمو کې چې د چین سفارت په مقر کې جوړ شوې وو، ګډون وکړ.

په دې مراسمو کې مهمو شخصیتونو لکه د افغانستان د صنعت او سوداګرۍ وزیر ښاغلي نورالدین عزیزی، په کابل کې د مېشتو هېوادونو سفیران، د بهرنیو ادارو لکه یوناما، UNDP، UNICEF، او د اسلامي هېوادونو سازمان استازي په افغانستان کې هم شتون درلود.

په پیل کې د چین ولسي جمهوریت سفیر د خپل هېواد د اقتصادي لاسته راوړنو په اړه خبرې وکړې چې په تېرو ۷۵ کلونو کې ترلاسه شوي او په تېرو درېو کلونو کې یې د چین او افغانستان ترمنځ د همکارۍ وروستي پرمختګونه یاد کړل. ورپسې، د افغانستان د صنعت او سوداګرۍ وزیر ښاغلي نورالدین عزیزی د افغانستان او چین ترمنځ د اقتصادي او سوداګریزو همکاریو د پراختیا اهمیت په ګوته کړ او له چین څخه یې غوښتنه وکړه چې د واخان د ځمکني دهلیز د کار په چټکتیا کې لا ډېره همکاري وکړي.

ښاغلي محمد یونس مهمند، هم په دې مراسمو کې د چین د ولسي جمهوریت سفیر ته د دې هېواد د بنسټ اېښودنې کلیزه مبارکي وویله او د دواړو هېوادونو ترمنځ د سوداګریزو همکاریو په پیاوړتیا ټینګار وکړ. هغه، همدارنګه د چین سفیر ته بلنه ورکړه چې د خپل ټیم سره په دریم ملي او نړیوال نندارتون امام ابوحنیفه (رح) کې چې په نږدې راتلونکي کې جوړېږي، ګډون وکړي.

سربېره پر دې، ښاغلي مهمند، په دې مراسمو کې د جاپان له سفیر، د قطر د سفارت له اقتصادي سلاکار، او د روسیې، ازبیکستان، قزاقستان، ایران سوداګریز کونسلانو او نورو ګډونوالو سره لنډې خبرې وکړې.

یکشنبه، تلې ۸مه، ۱۴۰۳

ښاغلي محمد یونس مهمند د افغانستان د سوداګرۍ او پانګونې اتاق لومړي مرستیال، په داسې حال کې چې انجنیر سید جاوید برهان، د اتاق د نړیوالو اړیکو رئیس، ښاغلی خانجان الکوزی، د مشرتابه پلاوي غړی، او ښاغلی صمیم هاشمي، د اتاق د دولت سره د اړیکو د دیپارتمنت مسوول یې ملتیا کوله، د هیواد د کرنې، اوبولګولو او مالدارۍ وزارت له سرپرست ښاغلي عطاالله عمري سره وکتل او د مېوې د سوداګرو ستونزو او د حل لارو په اړه یې خبرې وکړې.

ښاغلي مهمند، د کرنې وزارت د مشرتابه تل‌پاتې هڅو څخه د مننې ترڅنګ، د مېوې د سوداګرو اوسني مشکلات په ځانګړي ډول، د افغانستان د صادراتي توکو په وړاندې په سرحدي لارو کې خنډونه، د معياري سړو خونو نشتون او د زراعتي محصولاتو لپاره په بهرنیو بازارونو کې مناسب مارکیټ نشتوالی یاد کړل او له وزارت یې غوښتنه وکړه چې د مېوې د سوداګرو د ستونزو د حل په برخه کې همکاري وکړي.

ښاغلي مهمند، د امام ابوحنیفه (رح) نندارتون چې په نږدې راتلونکي کې به جوړ شي، په اړه معلومات ورکړل او د وزارت مشرتابه ته یې بلنه وکړه چې په دې نندارتون کې ګډون او خبرې وکړي.

ښاغلي خانجان الکوزي، د حکومت وروستۍ پرېکړې څخه د کورنیو مېوې په ټولو مراسمو کې د کارونې په اړه مننه وکړه او د سوداګرو ستونزې یې په کورني او بهرني سطحه په ځانګړې توګه په بندرونو کې په تفصیل سره تشریح کړې، او د کرنې وزارت څخه یې غوښتنه وکړه چې د صادراتو په برخه کې د اړوندو ادارو سره په همغږۍ عملي ګامونه پورته کړي.

ښاغلي عمري د اتاق د مشرتابه خبرې واورېدې او یادې ستونزې یې مهمې وبللې او ژمنه یې وکړه چې په جدي ډول به ورته رسیدنه وکړي.

یکشنبه، تلې ۸مه، ۱۴۰۳

ښاغلي محمد یونس مهمند د افغانستان د سوداګرۍ او پانګونې اتاق لومړي مرستیال، پداسې حال کې چې ښاغلي خانجان الکوزی د اتاق د مشرتابه پلاوي غړي، حاجي میرویس حاجي زاده د کرنې او مالدارۍ اتاق مرستیال، حاجي نجابت حیدري د مېوو ټولنې رئیس، حاجي اختر او د یو شمېر تازه مېوو سوداګر یې ملتیا کوله، د بهرنیو چارو وزارت له سیاسي معین، ښاغلي شیرمحمد عباس ستانکزي سره وکتل او د مېوو سوداګرو د صادراتو او وارداتو په برخه کې پر ستونزو او په حل لارو خبرې او نظریات تبادله کړل.

ښاغلي مهمند، د حکومت د مشرتابه د تلپاتې هڅو په ځانګړې توګه د بهرنیو چارو وزارت د مقام د هڅو قدرداني وکړه چې د نړۍ په ځانګړي توګه له ګاونډیو هېوادونو سره یې اړیکې ښې کړي. هغه د مېوو سوداګرو ستونزې لکه: په پاکستان کې د افغانستان ټولو صادراتي توکو ته خنډونه، د هند هېواد له لوري د ویزې نه ورکول، د کورنیو توکو د ترانزیټ په برخه کې د اسانتیاوو نشتون او له سیمه‌ییزو هېوادونو سره د سوداګرۍ په چټکتیا کې د همغږۍ نشتون د سوداګرو لویې ستونزې یادې کړې او د بهرنیو چارو وزارت له مقام څخه یې وغوښتل چې د خصوصي سکتور د اهمیت په پام کې نیولو سره د دې ستونزو حل ته له ډیپلوماټیکو لارو رسیدنه وکړي.

د اتاق لومړي مرستیال، د خپل سفر په اړه چې روسیې ته تللې وو خبرې وکړې او د ولادي واستوک بندري ښار اهمیت یې روښانه کړ، دغه ښار یې له ختیځې آسیا په ځانګړې توګه له جاپان، چین او کوریا سره د افغانستان د هوایي او بحري ترانزیټ د وصل نقطه وبلله او د بهرنیو چارو وزارت همکاري یې د دې مهم امر د تحقق په برخه کې اړین وباله.

ښاغلي مهمند، د امام ابوحنیفه (رح) د نندارتون په اړه چې په نږدې راتلونکي کې به ترسره شي معلومات ورکړل او د بهرنیو چارو وزارت او د دې وزارت له سیاسي معین څخه یې غوښتنه وکړه چې په دې نندارتون کې ګډون او خبرې وکړي.

ښاغلي خانجان الکوزي، د حکومت د وروستۍ پرېکړې چې په ټولو مراسمو کې د کورنیو مېوو د کارونې په اړه شوی قدرداني وکړه او د سوداګرو ستونزې یې په داخلي او بهرني سطحه په تفصیل سره تشریح کړې. هغه له سیاسی معینیت څخه وغوښتل چې د اړوندو ادارو په همغږۍ د ګډو غونډو په ترسره کولو سره دې ستونزو ته د حل لاره پیدا کړي.

د تازه مېوو سوداګرو هر یو په وار سره د مېوو او سړو خونو په اړه معلومات وړاندې کړل او د سوداګرۍ او ترانزیت په برخه کې د سرحدونو د ستونزو د حل لپاره یې د پراخو همکاریو غوښتنه وکړه.

ښاغلي شیرمحمد عباس ستانکزي، د اتاق مشرتابه او مېوو سوداګرو خبرې واورېدې او ژمنه یې وکړه چې یاد شوي موضوعات به له حکومتي مشرتابه سره شریکوي تر څو یې حل ته لارې چارې پیدا شي.

یکشنبه، تلې ۸مه ۱۴۰۳