ښاغلي محمد یونس مهمند، د افغانستان د سوداګرۍ او پانګونې اتاق لومړي مرستیال، د حکومت د یو شمېر وزیرانو او معینانو په حضور کې، د "د اسلامي نظام اقتصادي مسئولیتونه" تر عنوان لاندې څیړنیز سیمینار کې چې د حکومت د علومو اکاډمۍ له لوري جوړ شوی و، ګډون وکړ.
ښاغلي مهمند، په خپله وینا کې د افغانستان د سوداګرۍ او پانګونې اتاق لاسته راوړنې او هڅې د بهرنیو اقتصادي بنسټونو سره د اړیکو په ټینګښت کې ارزښتناکې وبللې او د حکومت له اقتصادي پروګرامونو څخه یې د خصوصي سکتور ملاتړ اعلان کړ.
محترم مهمند، د اسلامي بانکدارۍ له فعالیتونو څخه د ملاتړ ترڅنګ، د اسلامي بانکدارۍ ګټې د دودیزې بانکدارۍ په پرتله بیان کړې. هغه د افغانیو د ارزښت ساتنې، د صنعت، کرنې، او کانونو د سکتورونو په پراخولو او پانګونې ټینګار وکړ. نوموړي ډاډ ورکړ چې د سوداګرۍ او پانګونې اتاق به له سکتوري ادارو سره د اقتصادي ودې په برخه کې د رغنده طرحو په وړاندې کولو کې هر اړخیزه همکاري وکړي.
چهارشنبه، د ۱۴۰۳ کال د کب ۸مه
