د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د اتاق پانګه ایزو چارو مرستیال ښاغلي عصمت الله وردګ، د اتاق نړیوالو اړیکو رئیس ښاغلي انجنیر سید جاوید برهان، د اتاق مدیره پلاوي غړي ښاغلي خان جان الکوزي، د لایف سټار شرکت رئیس ښاغلي محمد یوسف مهمند او د اتاق سلاکار ښاغلي سردار ولي پښتون د چین له نوموتي سوداګر ښاغلي وانګ سره د اتاق په مرکزي دفتر کې لیدنه ترسره او په افغانستان کې د پانګه ایزو فرصتونو او په دی برخه کې د اتاق د همکاریو په اړه یې خبرې اترې وکړې.

د اتاق لومړي مرستیال په هېواد کې د پانګونې شته فرصتونه په تفصیل سره بیان کړل او د ټولیز امنیت تامین، د کوکنارو د کښت مخنیوی او د اداري فساد له نه شتون یې په هېواد کې د پانګونې لپاره ښه فرصتونه وبلل او له ښاغلي وانګ څخه یې وغوښتل چې د افغانستان د کانونو په سکتور کې د شته فرصتونو له مخې پانګونه وکړي.
نوموړي له اړوندو دولتي ادارو سره د غونډو او ناستو په ترسره کولو کې د اتاق د هر اړخیزې همکارۍ ډاډ ورکړ.

ښاغلي عصمت الله وردګ د چینايي سوداګرو د ښه راغلاست پرمهال د هېواد د کانونو په اړه هر اړخیز معلومات وړاندې کړل او د هېواد په کانونو کې یې د بهرنیو پانګوالو پانګونه یوه اړتیا وګڼله.

ښاغلي وانګ د خپل شرکت د سوداګرۍ او پانګونې د فعاليتونو د بيانولو په ترڅ کې وويل چې د ده د سفر موخه د افغانستان د کانونو او په هغو کې د پانګونې په اړه د معلوماتو ترلاسه کول وو او د افغانستان د سوداګرۍ او پانګونې اتاق له مشرتابه څخه يې د کانونو د معرفي کولو او د اړوندو دولتي ادارو سره د غونډو جوړولو برخه کې د هر اړخیزې همکارۍ غوښتنه وکړه.

چهارشنبه، غبرګولي ۲مه، ۱۴۰۳

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په داسی حال کې چې، د اتاق مدیره پلاوي غړي ښاغلي ضیاءالدین اچکزي، د اتاق سلاکار ښاغلي عبدالکبیر قادري، د بلخ اتاق سلاکار ښاغلي اجمل احمدي، زلمي قادري او یو شمیر سوداګرو او پانګوالو يې ملتیا کوله د روسیې – اسلامي نړۍ په ۱۵م نړیوال اقتصادي کنفرانس کې ګډون وکړ.

په یاد کنفرانس کې چې د تاتارستان په کازان ښار کې جوړ شوی وو، د اسلامي همکاریو نړیوال سازمان غړو هېوادونو او روسیې ترمنځ د اقتصادي اړیکو پراختیا، زدکړو ودې، ټولنیزو، کلتوري او تخنیکي همکاریو زیاتوالي په اړه خبرې او بحثونه ترسره شول.

ښاغلي مهمند د تاتارستان له ولسمشر ښاغلي آر ان مینیخانوف او د دغه هېواد د سوداګرۍ اتاق له رئیس سره د کتنې په ترڅ کې چې د روسیې، اذربایجان، قزاقستان، تاجکستان، متحده عربي اماراتو او ترکیې اتاقونو رئیسانو هم حضور درلود، په افغانستان کې د پانګونې لپاره د شته فرصتونو او د سیمې د هېوادونو ترمنځ د سوداګریزو-اقتصادي اړیکو د پراختیا په اړه خبرې وکړې او د دغو اړیکو پر ټینګښت او پراختیا یې ټینګار وکړ.

د اتاق لومړي مرستیال د ټولیز امنیت شتون، د کوکنارو د کښت مخنیوی او په افغانستان کې د اداري فساد له نه شتون په هېواد کې د کرنې، کانونو او نورو زیربنایي پروژو برخه کې د پانګونې لپاره ښه فرصت وباله او د سیمې او نړۍ د هېوادونو ترمنځ يې پر اقتصادي اړیکو ټینګار وکړ.
نوموړي د سیمې د هېوادونو د اتاقونو له رئیسانو او د دغو هېوادونو له پانګوالو وغوښتل چې د خپلو هېوادونو سوداګر او پانګوال په افغانستان کې پانګونې ته وهڅوي.

نوموړي د سیمې او نړۍ هېوادونو ته د افغانستان د صادراتو د پام وړ زیاتوالي ته په اشارې سره، د تاتارستان، روسيې او منځنۍ آسیا هېوادونو ښارونه د افغانستان د وچې او تازه میوې او سبزیجاتو لپاره مناسب وګڼل.

د دغو ناستو په څنډه کې، ښاغلي مهمند او د هغه ټیم د افغان سوداګرو له هغو غرفو څخه چې په (Kazan Expo) کې يې افغاني محصولات نندارې ته ایښي وو لیدنه وکړه او د افغان سوداګرو او پانګوالو ستونزو حل برخه کې يې د افغانستان د سوداګرۍ او پانګونې اتاق د همکارۍ ډاډ ورکړ.

پنجشنبه، غويي ۲۷مه، ۱۴۰۳

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند د اتاق مدیره پلاوي غړي ښاغلي خان جان الکوزي په حضور کې، د افغانستان لپاره د ترکيې له سفیر ښاغلي جنک اونال سره د لیدنې په ترڅ کې، افغانستان ته د ترکش هوايي شرکت د الوتنو بیا پیل یو مثبت ګام وباله.

ښاغلي مهمند د ترکش هوایي شرکت الوتنو بیا پیل برخه کې د ترکيې سفارت هڅې او همکارۍ وستایلې او یاد شرکت يې د ټرانسپورټي خدمتونو وړاندی کولو برخه کې یو له مخکښو شرکتونو څخه وباله او د یاد شرکت د الوتنو بیا پیل یې د افغان خصوصي سکتور ودې او ترکیې سره د سوداګریزو راکړو ورکړو بهیر ګړندیتوب لپاره اړین وګاڼه.

دغه راز، ښاغلي مهمند د افغانستان هوايي خدماتو شته ستونزو حل برخه کې د افغانستان د سوداګرۍ او پانګونې اتاق د هڅو او همکاریو ډاډ ورکړ.

چهارشنبه، غبرګولي ۲مه، ۱۴۰۳

د نیمروز سوداګرۍ او پانګونې اتاق رئیس ښاغلي حاجي عبیدالله نورزي، د یاد اتاق لومړي مرستیال ښاغلي حاجي غلام محمد او ملي سوداګر ښاغلي حاجي محمد یوسف حبیب یار د بغلان ولایت وروستي سیلاب ځپلو د ۵۰۰ بوجۍ وړو، ۵۰۰ بوجۍ وریجو او ۵۰۰ بوشکو غوړیو بشردوستانه مرستې ترسره کړې.
دغه راز، د نظیر احمد نورزاد شرکت په بغلان ولایت کې د سیلاب له امله زیانمنو شویو کورنیو سره ۱۰،۰۰۰۰ سل زره افغانۍ نغدي مرستې وکړې.

سه شنبه، غويي ۲۵مه، ۱۴۰۳

د افغانستان د سوداګرۍ او پانګونې اتاق مدیره پلاوي غړي ښاغلي خان جان الکوزي او د صادراتو او پانګونې پراختیا ډیپارټمنټ مسؤل ښاغلي میرزمان پوپل د ترکيې هوايي کرښو کارګو له عمومي رئیس ښاغلي سرکان سونمز سره لیدنه ترسره او افغانستان ته د ترکيې د هوايي شرکتونو د الوتنو بیا پیل په اړه يې خبرې اترې وکړې.

ښاغلي سرکان د ترکش ایرلاین د الوتنو د بیا پیلولو خبر ورکولو ترڅنګ، د هندلینګ خدماتي شرکت چې د افغانستان د فضايي مدیریت مسؤلیت په غاړه لري د لا زیاتو آسانتیاوو په رامنځته کولو ټینګار وکړ او د سیمې او نړۍ هېوادونو ته د افغانستان د صادراتي جوپو د انتقال په برخه کې يې د ترکي هوايي شرکتونو د همکارۍ ډاډ ورکړ.

ښاغلي الکوزي د ښاغلي سرکان او ملګري ټیم ته د ښه راغلاست په ترڅ کې ترکیه له افغانستان سره د ګډو دیني او کلتوري ارزښتونو لرونکی هېواد وباله او د ملکي هوايي چلند او فضايي خدماتو ادارې سره يې د هوايي خدماتو تسهیل او آسانتیاوو رامنځته کولو برخه کې د اتاق د همکارۍ ژمنه وکړ.

دوشنبه، غويي ۳۱مه، ۱۴۰۳