د افغانستان لپاره د ایران جمهوري ریاست ځانګړي استازي او سفیر په ایران کې د افغان – ایران ګډ اتاق غرفو څخه د لیدنې پر مهال، د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د افغان – ایران ګډ اتاق رئیس ښاغلي میراجان سلیمان خیل، د اتاق مدیره پلاوي غړي ښاغلي جان آقا صادقي، په ایران کې د افغانستان سوداګریز چاروال ښاغلي معین خوافي او د هرات ولایتي اتاق نړیوالو اړیکو رئیس ښاغلي سید جمال الدین هاشمي سره لیدنه ترسره او د سوداګرۍ پراختیا، ګډو پانګونو او شته ننګونو او ستونزو حل په اړه يې خبرې اترې وکړې.

ښاغلي مهمند د افغان – ایران ګډ اتاق پروګرامونه او فعالیتونه په تفصیل سره بیان کړل او د افغانستان له خصوصي سکتور څخه د ملاتړ په برخه کې یې د ایران د دوامداره همکاریو ستاینه وکړه.
نوموړي د دواړو هېوادونو ترمنځ د ګډې پانګونې د فرصتونو د تشریح په ترڅ کې د دواړو هېوادونو د ګټو لپاره له دغو فرصتونو څخه د استفادې په برخه کې د ایران د سکتوری ادارو د لازمو همکاریو غوښتنه وکړه.

ښاغلي کاظمي قومي د دواړو هېوادونو د سوداګریزو اړیکو د اهمیت په بیانولو سره زیاته کړه: د ایران اسلامي جمهوریت هڅه کوي چې د افغانستان، ایران او چین ترمنځ یو نړیوال کنسرسیوم جوړ کړي چې د درې واړو هېوادونو له اقتصادي ودې سره مرسته وکړي.
د یادولو وړ ده، چې د افغان – ایران ګډ اتاق څه د پاسه ۷۰ افغان سوداګر او پانګه وال د ایران ایکسپو په نړیوال نندارتون کې د غرفو د ترلاسه کولو او خپلو سوداګریز محصولاتو نندارې ته د کیښودو په موخه، معرفي کړي دي.

سه شنبه، غويي ۱۱مه، ۱۴۰۳

د ازبکستان هېواد د رسمي بلنې په ترڅ کې، د افغانستان د سوداګرۍ او پانګونې اتاق مدیره پلاوي غړي ښاغلي ضیاءالدین اچکزي، د اتاق د صادراتو او پانګونې پراختیا ډیپارټمنټ مسؤل ښاغلي میرزمان پوپل، د کابل سوداګرۍ او پانګونې اتاق مرستیال ښاغلي انجنیر جلیل حریف، د لوګر ولایتي اتاق رئیس ښاغلي مولوي یعقوب شرافت او د هېواد له یو شمیر سوداګرو څخه جوړ سوداګریز پلاوي چې مشري يې د افغانستان د سوداګرۍ او پانګونې اتاق سوداګریزو چارو مرستیال ښاغلي خیرالدین مایل احمدي کوله، د ازبکستان تولیداتو نندارتون او د یاد هېواد له یو شمیر تولیدي فابریکو څخه لیدنه ترسره کړه.

ښاغلي مایل احمدي او ورسره ملګري ټیم یې ازبکستان ته د رسیدو سره سم د ترمز بندري ښار د سنتر کارګو او تاسیساتو څخه لیدنه وکړه او وروسته د تاشکند نندارتون د لیدو لپاره هغه ښار ته ولاړ.

د اتاق مشرتابه پلاوي او سوداګرو او پانګوالو د چهارشنبې په ورځ د غويي د میاشتې په ۵مه، د ياد شوي نندارتون د پرانېستې په مراسمو کې د ګډون کولو ترڅنګ، د یاد نندارتون له یو شمیر تولیدي غرفو څخه لیدنه ترسره کړه.

دغه راز د اتاق مشرتابه، افغان سوداګرو او پانګوالو د دغه نندارتون په څنډه کې د پنجشنبې په ورځ په تاشکند ښار کې د دواړو هېوادونو د سوداګرو او پانګوالو ترمنځ په جوړه شوې ناسته کې ګډون وکړ. په پیل کې، د ازبکستان د سوداګرۍ او پانګونې اتاق رئیس د افغانستان د سوداګرۍ او پانګونې اتاق مشرتابه پلاوي، سوداګرو او پانګوالو ته ښه راغلاست ووایه او د سوداګرۍ د پراختیا او د سوداګرۍ او ټرانزیټ په برخه کې د لا زیاتو اسانتیاوو د رامنځته کولو په اړه خبرې وکړې او د دواړو هېوادونو ترمنځ یې د اړیکو پر پیاوړتیا ټینګار وکړ.

ښاغلي مایل احمدي د دواړو هېوادونو د سوداګرو او پانګوالو ترمنځ د سوداګرۍ او ګډې پانګونې د پراختیا په اړه خبرې وکړې او په دې برخه کې یې د لا زیاتو اسانتیاوو غوښتنه وکړه.

همدارنګه ښاغلي جلیل حریف او محمد نبي افغان د سوداګرو او ټرانسپورټي شرکتونو په استازیتوب د سوداګرۍ او ټرانزیټ په برخه کې د شته ستونزو په اړه خبرې وکړې او خپل نظریات او وړاندیزونه یې د ازبکستان د حکومت له مسؤلینو سره شریک کړل.
د سوداګریز پیوستون (B2B) کنفرانس په پای کې، د خوراکي توکو او روغتیا برخه کې د دواړو لورو ترمنځ هوکړه لیکونه لاسلیک شول.
د دغه سفر په ترڅ کې، د هېواد د سوداګرۍ اتاق مشرتابه، سوداګرو او پانګوالو د تاشکند ښار له یو شمېر تولیدي فابریکو او صنعتي تاسیساتو څخه لیدنه وکړه.

پنجشنبه، غويي ۶مه، ۱۴۰۳

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند ایران ته د خپل سفر په ترڅ کې، په داسی حال کې چې، د اتاق مدیره پلاوي ښاغلي جان آقا صادقي، د ایران لپاره د افغانستان سوداګریز چاروال ښاغلي معین خوافي، د افغان – ایران ګډې خونې رئيس ښاغلي سلیمان خیل، د هرات ولایتي اتاق نړیوالو اړیکو رئیس ښاغلي هاشمي، د مرکزي اتاق بشري سرچینو مسؤل ښاغلي نجیب الله فضلي، متشبثو ښځو او د هېواد یو شمیر سوداګرو او پانګوالو يې ملتیا کوله، د افغان – ایران سوداګرو ترمنځ د سوداګریز پیوستون ناسته کې ګډون وکړ او د دواړو هېوادونو ترمنځ د سوداګریزو اړیکو پراختیا او ګډو همکاریو په اړه يې خبرې اترې وکړې.

په یاده ناسته کې، د ایران سوداګرۍ او صنعت اتاق رئیس ښاغلي خلیل قیام او د افغان – ایران سوداګرۍ اتاق رئیس ښاغلي محمود سیادت هم ګډون درلود.

ښاغلي قیام د اتاق لومړي مرستیال او د ناستې ګډونوالو ته د ښه راغلاست ویلو وروسته، د افغانستان له لوري د ایران په سوداګریزو توکو د تعرفې کمول د دواړو هېوادونو ترمنځ د سوداګریزو اړیکو پراختیا لپاره یو ښه فرصت وباله او ډاډ يې ورکړ چې ایراني پانګوال به په افغانستان کې پانګونې ته وهڅوي.

ښاغلي مهمند د افغانستان اوسنی وضعیت د پانګونې لپاره مناسب وباله او د ایران سوداګرۍ اتاق له رئیس څخه وغوښتل چې ایراني پانګوال په افغانستان کې د کانونو او کرنې میکانیزه کیدو برخه کې افغان پانګوالو سره ګډې پانګونې ته وهڅوي.

دوشنبه، غويي ۱۰مه، ۱۴۰۳

د افغانستان د سوداګر ۍ او پانګونې اتاق د سیمې او نړۍ هېوادونو سره د سوداګرۍ پراختیا په موخه، د افغان – قزاق سوداګرو ګډه ناسته جوړه، چې د افغانستان د سوداګرۍ او پانګونې اتاق مدیره پلاوي غړي ښاغلي خان جان الکوزي، د مدیره پلاوي غړي ښاغلي محمد داود یوسفزي، د عامل پلاوي پالیسۍ او تخنیکي مرستیال ښاغلي محمد انور عارفي، د اتاق د حقوقي او نړیوالو چارو ستر سلاکار ښاغلي قلندر رحیمي او د دواړو هېوادونو د خوراکي توکو او پټرولیم سکتورونو مسؤلینو په کې ګډون درلود.

ښاغلي خان جان الکوزي د دې غونډې ګډونوالو ته د ښه راغلاست په ترڅ کې د قزاقستان هېواد له افغانستان سره د مذهبي او فرهنګي مشترکاتو او همدارنګه ټرانزیټي، سوداګریزو، صنعتي او سیاسي اړیکو له پلوه پخوانی دوست وباله او د دواړو هېوادونو تر منځ يې د سوداګریزو او ټرانزیټي اړیکو پر لا پیاوړتیا یې ټینګار وکړ.

ښاغلي الکوزي د افغانستان اوسنی وضعیت له منځنۍ اسیا سره د سویلي اسیا د نښلولو لپاره یو ښه فرصت وباله او د دواړو هېوادونو د خصوصي سکتور له مسؤلینو یې وغوښتل چې د ټرانزیټ، کانونو او نورو بېلابېلو برخو کې همکاري او ګډه پانګونه وکړي.

ښاغلي داوود یوسفزي او محمد انورعارفي په افغانستان کې د پانګونې د فرصتونو په اړه د قزاقستان سوداګرو ته هراړخیز معلومات ورکړل او افغان سوداګرو ته یې د قزاقستان له خوا د ویزې د ورکړې، سوداګرۍ او ټرانزیټ په برخه کې د لا زیاتو اسانتیاوو رامنځته کولو غوښتنه وکړه.
دوی د یو معیاري ځمکني دهلیز پر جوړولو ټینګار وکړ چې د دواړو هېوادونو ټول کورني تولیدات په چټکۍ سره صادر او وارد شي.

د قزاقستان سوداګرو په قزاقستان کې د افغان سوداګرو د سوداګریزو ستونزو د حل او د ګډې پانګونې په برخه کې د خپل چمتووالي ډاډ ورکړ.

چهارشنبه، غويي ۵مه، ۱۴۰۳

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند ایران ته د خپل رسمي سفر په ترڅ کې، په داسی حال کې چې، د اتاق مدیره پلاوي ښاغلي جان آقا صادقي، د ایران لپاره د افغانستان سوداګریز چاروال ښاغلي معین خوافي، ملي سوداګر ښاغلي سلیمان خیل، د هرات ولایتي اتاق نړیوالو اړیکو رئیس ښاغلي هاشمي، د مرکزي اتاق بشري سرچینو مسؤل ښاغلي نجیب الله فضلي، متشبثو ښځو او د دهېواد یو شمیر سوداګرو او پانګوالو يې ملتیا کوله، د ایران ایکسپو شپږمې ناستې په پرانیست غونډه کې ګډون وکړ او د نندارتون د مختلفو غرفو او محصولاتو څخه يې لیده کاته وکړل.

په یاد نندارتون کې، د ایران اسلامي جمهوریت ولسمشر، د بهرنیو هېوادونو لوړ پوړو چارواکو، د ایران صنعت او سوداګرۍ وزیر او د ایران سوداګرۍ اتاق رئیس هم ګډون درلود.

د ایران ولسمشر د اسیا د هېوادونو په تېره بیا د افغانستان ترمنځ د سوداګرۍ او پانګونې لپاره د ښه چاپېریال په رامنځته کولو ټینګار وکړ او د دواړو لورو د سوداګرۍ او پانګونې د سکتور له مسوولینو یې وغوښتل چې په دې برخه کې لا زیاتې هڅې وکړي.

ښاغلي مهمند د افغان سوداګرو او پانګوالو له یوې ډلې سره د دغه نندارتون له بېلابېلو برخو څخه د لیدنې پر مهال د خراسان رضوي ولایت له چارواکو سره وکتل او د دواړو لورو د سوداګرو ترمنځ یې د پانګونې په برخه کې، د لازیاتو اسانتیاو او د صادراتو او وارداتو بهیر برخه کې د چټکتیا رامنځته کولو په اړه د نظر تبادله او بحثونه ترسره کړل.

ښاغلي مهمند دغه راز، د ایران د سوداګرۍ اتاق له رئیس سره د یوې جلا کتنې په ترڅ کې، د سوداګریزو همکاریو د لا پراختیا، د دواړو هېوادونو د سوداګرو ترمنځ د ګډې پانګونې د رامنځته کولو، د اقتصادي، ټرانزیټي او سوداګریزو اړیکو پر پراختیا ټینګار وکړ.

یکشنبه، غويي ۹مه، ۱۴۰۳