د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند محترم لیو بیگنان، د "Suzhou HLC Elevator" شرکت رئیس، او محترم امام الدین امانزاده، د "فضا لفت" تخنیکي او تولیدي خدماتو شرکت رئیس سره د اتاق په مرکزي دفتر کې لیدنه ترسره او د ګډو پانګوونو او ګمرکي ستونزو په اړه یې خبرې وکړې.

ښاغلي لیو، په افغانستان کې د "Suzhou HLC Elevator" شرکت فعالیتونه تشریح کړل او د ساختماني خامو موادو په وارداتو باندې لوړ ګمرکي محصول یې یوه اساسي ستونزه وبلله. هغه د اتاق له مشرتابه وغوښتل چې د ګمرکاتو له معینیت سره په همغږۍ کې د ګمرکي محصول په کمولو او په افغانستان کې د شرکت د پروژو په تطبیق کې ورسره مرسته وکړي.

ښاغلي مهمند، د ښاغلي لیو خبرې واورېدې او په هېواد کې یې د پانګونې لپاره عمومي شرایط مساعد وبلل.
نوموړي له ښاغلي لیو څخه وغوښتل چې په افغانستان کې د ساختماني موادو په تولید کې پانګونه وکړي او د ځمکې او ځینو اړوندو موضوعاتو په برابرولو کې یې د اړینو اسانتیاوو د برابرولو ژمنه یې وکړه.

د سوداګرۍ او پانګوونې اتاق لومړي مرستیال یادونه وکړه چې په نږدې راتلونکي کې به په کابل ښار کې د افغانستان د سوداګرۍ او پانګوونې اتاق لخوا یوه نندارتون جوړ شي او د یاد شرکت مسؤلین یې په دې نندارتون کې د ګډون او د خپلو محصولاتو د نندارې ته وړاندې کولو لپاره راوبلل.

دوشنبه، چنګاښ ۲۵مه، ۱۴۰۳

د افغانستان د سوداګرۍ او پانګونې اتاق عامل پلاوي مالي او اداري مرستیال ښاغلي میرزمان پوپل، د افغان مخابراتي شرکت نړیوالو اړیکو رئیس ښاغلي محمد امین امیري او د اتاق عامل پلاوي د نړیوالو اړیکو او غړو سره د اړیکو ډيپارټمنټ مسؤلینو په حضور کې د سا ایران شرکت له استازو سره آنلاین غونډه وکړه او د انټرنیټي خدماتو د کارونې او د هغوی د کیفیت او ظرفیت لوړولو په برخه کې د دوه اړخیزو همکاریو په اړه بحث او خبرې وکړې.

د سا ایران شرکت مسئولینو د دې شرکت د فعالیتونو په اړه معلومات وړاندې کړل او زیاته یې کړه چې سا ایران انټرنیټي خدماتو شرکت د انټرنیټي خدماتو په عرضه کولو کې فعالیت کوي چې د نړیوالو معیارونو په پام کې نیولو سره په ایران کې بازارونو ته خدمات وړاندې کوي. هغوی د افغان بازارونو ته د انټرنیټ عرضه کولو په برخه کې خپله لیوالتیا څرګنده کړه او له ښاغلي پوپل څخه یې وغوښتل چې افغان انټرنیټي خدماتو شبکې وهڅوي چې د سا ایران شرکت څخه انټرنیټ واخلي.

ښاغلي میر زمان پوپل، د ننني نړۍ پرمختګ د عصري تکنالوژۍ او د انټرنیټي خدماتو سرعت پورې تړلی وباله او د کیفیت لرونکو او مناسبو قیمت لرونکو انټرنیټي خدماتو په عرضه یې ټینګار وکړ.
نوموړي ژمنه وکړه چې د یاد شوي شرکت په بازار موندنه او په افغانستان کې د پلور مارکېټ په موندلو کې به له سا ایران شرکت سره همکاري وکړي.

یکشنبه، چنګاښ ۲۴مه، ۱۴۰۳

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د ریاست الوزراء اقتصادي مرستیال، د چارو ادارې عمومي رئیس، د اتاق مدیره پلاوي مالي رئيس ښاغلي شیرین آغا سخي، د کرنې، اوبو لګونې او مالدارۍ وزارت سرپرست، سوداګرو او صادرونکو په حضور کې د صادراتو ملي ورځې لمانځغونډه او د کال غوره صادرونکي ستایلو کنفرانس کې چې د سوداګرۍ او صنعت وزارت له لوري جوړ شوی وو، ګډون وکړ.

د اتاق لومړي مرستیال د صادراتو ملي ورځې په پار د حکومت مشرتابه، د خصوصي سکتور غړو، سوداګرو، پانګوالو او هېوادوالو ته مبارکۍ ویلو ترڅنګ، د یادې لمانځغونډې جوړولو لپاره د صنعت او سوداګرۍ وزارت څخه مننه او خوښي څرګنده کړه.
نوموړي په تېرو ۳ کلونو کې په مختلفو سکتورونو کې د پرمختګونو یادونه وکړه او د ټرانزیټ، سوداګرۍ او پانګونې جلب برخه کې يې د اړندو ادارو د لازمې همکارۍ او ملاتړ قدرداني وکړه.

دغه راز، ښاغلي مهمند د هېواد په اقتصادي ودې او رغښت کې د صادراتو رول اړین وباله او د ټولو هغو صادرونکو چې د صادراتو پراختیا او په نړیوالو بازارونو کې یې د افغاني محصولاتو د پیژندګلوۍ برخه کې زیار ویستلی ستاینه وکړه.
نوموړي د صادراتو ودې او نړیوالو بازارونو ته د افغان سوداګرو او پانګوالو لاسرسي برخه کې د خصوصي سکتور پلانونه او پروګرامونه تشریح کړل او د حکومت له مشرتابه یې وغوښتل چې د تل په څیر د خصوصي سکتور څخه ملاتړ وکړي.

ښاغلي مهمند د هېواد په مختلفو نقطو کې د معیاري سړو خونو پر جوړولو د ټینګار کولو ترڅنګ، د کرنې وزارت له سرپرست څخه وغوښتل چې په دی برخه کې د هېواد سوداګرو او پانګوالو سره لازمه همکاري وکړي.

پنجشنبه، چنګاښ ۲۱مه، ۱۴۰۳