ښاغلي محمد یونس مهمند د افغانستان سوداګرۍ او پانګونې اتاق لومړي مرستیال او ښاغلي خیرالدین مایل احمدي د اتاق سوداګریز مرستیال، د ښاغلیو: شیرین آغا سخی د اتاق مالي رئیس، سید جاوید برهان د اتاق نړیوالو اړیکو رئیس، سید پرویز سادات هوفیانی او بهادر خیرخواه د اتاق مدیره پلاوي غړي، محمد انور عارفی د عامل پلاوي پالیسي او تخنیکي مرستیال، میرزمان پوپل د عامل پلاوي مالي او اداري مرستیال سرپرست، عتیقالله مؤمن زاده د ننګرهار اتاق رئیس، او د یو شمېر افغان سوداګرو په شتون کې د ازبیکستان هېواد د سوداګرۍ اتاق رئیس ښاغلي وهابوف دوران عبدالجلال اوغلو سره د اتاق په مرکزي دفتر کې لیدنه ترسره کړه، د سوداګریزو اړیکو په ښه والي او د نندارتونونو جوړېدو په اړه یې خبرې وکړې.
ښاغلي مهمند، ښاغلي وهابوف دوران عبدالجلال اوغلو ته ښه راغلاست وویل او د ازبیکستان له حکومت او سفارت څخه یې د اوږدو کلونو سوداګریزو نیکو اړیکو او افغان سوداګرو ته د ویزو اسانتیاوو د رامنځته کولو له امله مننه وکړه.
د اتاق لومړي مرستیال، افغانستان یې د جغرافیایي موقعیت له مخې د مرکزي آسیا هېوادونو او سویلي آسیا تر منځ د وصل نقطه وګڼله او همدارنګه، ازبیکستان یې د افغانستان او چین تر منځ د نښلولو نقطه وګڼله، او د دواړو هېوادونو تر منځ د سوداګریزو-اقتصادي اړیکو د پراختیا غوښتنه وکړه.
ښاغلي مهمند، د افغان- ترانس ریل پټلۍ د پروژې په اړه د افغانستان د سوداګرۍ او پانګونې اتاق ملاتړ اعلان کړ او دغه پروژه یې د افغانستان او ګاونډیو هېوادونو په ځانګړې توګه ازببکستان سره د سوداګریزو، اقتصادي او سیاسي اړیکو د پراختیا لپاره ښه فرصت وګاڼه.
ښاغلي اوغلو، د افغانستان سوداګرۍ او پانګونې اتاق مشرتابه پلاوي څخه د دې غونډې د جوړولو لپاره مننه وکړه او د ۲۰۲۴ کال د اګست په ۱۷ مه نېټه د ازبیکستان د سوداګرۍ اتاق له لوري په کابل کې د یوه نندارتون او سوداګریزې ناستې په اړه معلومات وړاندې کړل او وویل: په دغه نندارتون کې به د ازبیکستان له بېلابېلو سکتورونو څخه په ځانګړې توګه د نفت او ګاز، درملو، کیمیاوي موادو، اوسپنې، خامو موادو، غالیو او لاسي صنایعو په برخو کې له ۲۰۰ څخه زیات شرکتونه برخه واخلي. هغه، د افغانستان د سوداګرۍ او پانګونې اتاق له مشرانو څخه وغوښتل ترڅو افغان سوداګر وهڅوي چې په یاد نندارتون کې ګډون وکړي.
ښاغلي خیرالدین مایل، ازبیکستان یې د افغانستان پخوانی ملګری هېواد وګاڼه چې په بیلابیلو برخو: دیني، فرهنګي او ښه اقتصادي-سوداګریزو اړیکو ګډ ارزښتونه لري. هغه، د دواړو هېوادونو ترمنځ د اقتصادي، سوداګریزو او ترانزیتي اړیکو د پراختیا غوښتنه وکړه.
ښاغلي مایل، افغانستان یې د طبیعي سرچینو څخه غني هېواد وګاڼه او له ښاغلي اوغلو څخه یې وغوښتل چې د ازبیکستان سوداګر وهڅوي ترڅو له افغان سوداګرو سره په بېلابېلو سکتورونو په ځانګړې توګه د کانونو په برخه کې ګډې پانګونې وکړي.
ښاغلي سید جاوید برهان، د دې ډول نندارتونونو او سوداګریزو غونډو جوړول د دواړو هېوادونو تر منځ د سوداګریزو اړیکو د ښه والي او سوداګریزو تبادلې لپاره مهم وګاڼه، او د یاد نندارتون په برخه کې د افغانستان د سوداګرۍ او پانګونې اتاق د ملاتړ او همکارۍ ډاډ ورکړ.
یکشنبه، ۲۱ زمری ۱۴۰۳
