د افغانستان د سوداګرۍ او پانګونې اتاق مشرتابه پلاوي د نړیوالو اړیکو رئیس ښاغلی سیدجاوید برهان، او د عامل پلاوي د مالي او اداري مرستیال سرپرست ښاغلی میرزمان پوپل د حقوقي مشاور ښاغلي عبدالسلام کوهي او د دولت سره د اړیکو د څانګې مسؤول ښاغلي صمیم هاشمي په حضور کې، د قیمتي او نیمهقیمتي ډبرو د کمیټې له رئیس ښاغلي ملک فیصل او د هغه له همکار ټیم سره د اتاق په تالار کې وکتل او د هغوی ستونزې یې واورېدې.
ښاغلي پوپل د قیمتي او نیمهقیمتي ډبرو صادرونکو ته د ښه راغلاست ویلو ترڅنګ، د دې ناستې اساسي هدف د دې سکتور د نظریاتو او ستونزو راټولول وبلل او د هغوی ګډون یې د امام ابو حنیفه (رح) په څلورمه ملي او نړیواله نندارتون کې د خپلو محصولاتو د معرفي لپاره مهم وباله. نوموړي ګډونوالو ته د هغه همکارۍ تفاهملیک په اړه معلومات ورکړل چې ټاکل شوې ده ډېر ژر د سوداګرۍ او پانګونې اتاق او د معادنو او پټرولیم وزارت ترمنځ د معدندارانو د سوداګریزو اسانتیاوو د رامنځته کولو په موخه لاسلیک شي، او له ښاغلي فیصل څخه یې وغوښتل چې خپلې ټولې ستونزې او طرحې په لیکلې بڼه د تفاهملیک د بډای کولو لپاره خونې ته وسپاري.
ښاغلي فیصل خپلې عمده ستونزې د قیمتي او نیمهقیمتي ډبرو د صادراتو لپاره د یو مشخص میکانیزم د نشتوالي او د معادنو په استخراج کې د سوداګرو لپاره د اسانتیاوو د نشتوالي په برخه کې بیان کړې. نوموړي د اتاق د مشرتابه پلاوي وغوښتل چې د یادو ستونزو د حل، د معیاري بازارونو د موندلو، او د دغه سکتور د سوداګرو د ملي او نړیوالو نندارتونونو سره د معرفي په برخه کې ورسره نوره همکاري وکړي.
ښاغلي برهان د سوداګرۍ او پانګونې اتاق د خصوصي سکتور او دولت ترمنځ د اړیکو پل وباله او د صادراتو په برخه کې یې د معیاري میکانیزم نشتون د سترې ستونزې په توګه یاد کړ. نوموړي له د دې سکتور ټولو سوداګرو وغوښتل چې خپلې ټولې طرحې او وړاندیزونه په ګډه توګه د صادراتو د اسانتیاوو او ستونزو د دوامداره حل لپاره د خونې له عامل پلاوي سره شریک کړي، څو له څېړنې او بډای کولو وروسته یې د اتاق مشرتابه د اړوندو دولتي چارواکو سره شریک کړي.
دوشنبه، د ۱۴۰۴ کال د غبرګولي ۵مه
