سې‌شنبه، د چنګاښ ۲۳مه، ۱۴۰۵
د افغانستان، د روسیې د داغستان او تیومن ولایتونو او قزاقستان د سوداګرو او پانګوالو ترمنځ په ګډه (B2B) ناسته کې د څلور سوه او څلوېښت میلیون افغانیو په ارزښت سوداګریز هوکړه‌لیکونه لاسلیک شول.
د روسیې د داغستان او تیومن ولایتونو او قزاقستان ګډ سوداګریز پلاوی، چې د شنبې په ورځ کابل ته راغلی و، د دوشنبې په ورځ د افغانستان د سوداګرۍ او پانګونې په خونه کې له یو شمېر افغان سوداګرو او پانګوالو سره د سوداګریزو هوکړه‌لیکونو لاسلیک کولو لپاره په ګډه (B2B) ناسته کې ګډون وکړ.
یاده (B2B) غونډه د افغانستان د سوداګرۍ او پانګونې خونې د کنفرانسونو په تالار کې جوړه شوه، چې پکې د خونې له لوري د کورنیو تولیداتو او محصولاتو د ملاتړ مرستیال ښاغلي الحاج عبدالنافع بارکزي، د مدیره پلاوي غړي ښاغلي الحاج عبیدالله هوتک، د مالي او اداري چارو مرستیال او د عامل پلاوي د ریاست سرپرست ښاغلي زین‌الله حسني، د عامل پلاوي د پالیسۍ او تخنیکي چارو مرستیال ښاغلي احمد شکیل حازم او یو شمېر افغان سوداګرو او پانګوالو ګډون کړی و.
د روسيې او قزاقستان د ګډ سوداګریز پلاوي له لوري د روسیې د داغستان ولایت د صادراتو رئیس، د تیومن ولایت د سوداګرۍ خونې مرستیال او یو شمېر روسي او قزاقي سوداګرو او پانګوالو، چې د خوراکي توکو (غوړي، چای او غلو دانو)، ساختماني موادو او فلزاتو په برخو کې فعالیت لري، هم ګډون درلود.
ښاغلي الحاج عبدالنافع بارکزي د ګډ سوداګریز پلاوي غړو ته د ښه راغلاست ویلو ترڅنګ دا ډول ناستې د سوداګرۍ پراختیا، د پانګونې د زیاتوالي او د سوداګریزو فرصتونو د معرفي کولو لپاره اغېزناکې وبللې او د هېوادونو د اقتصادي ودې لپاره یې د دولتونو او خصوصي سکټور ګډه همکاري مهمه وبلله.
د روسیې د تیومن ولایت د سوداګرۍ خونې مرستیال ښاغلي الکسیویچ د افغانستان د سوداګرۍ او پانګونې خونې د مشرتابه او کارکوونکو د تود هرکلي او مېلمه‌پالنې مننه وکړه او د دې سفر پایلې یې ډېرې بریالۍ وبللې. نوموړي افغان سوداګرو ته بلنه ورکړه، چې روسیې ته سفر وکړي او ژمنه یې وکړه، چې هغوی به له روسي سوداګرو سره د لیدنو زمینه برابره کړي. ښاغلي الکسیویچ زیاته کړه، چې دا لیدنې به نه یوازې افغانستان ته د روسیې صادرات زیات کړي، بلکې روسیې ته به د افغاني توکو صادرات هم پراخ کړي. د هغه پر باور دا لیدنه به په راتلونکي کې د یوه ستر تاریخي اقتصادي پيوستون د پیل په توګه یاده او ونمانځل شي.
د (B2B) غونډې په پیل کې د افغان، روسي او قزاقي سوداګرو او پانګوالو ترمنځ لیدنې او خبرې ترسره شوې، چې په ترڅ کې یې دواړو لورو د خپلو سوداګریزو اړتیاوو، فرصتونو او ظرفیتونو په اړه د نظرونو تبادله وکړه.
د ناستې په پای کې د افغانستان او د روسیې د داغستان، تيومن او قزاقستان د سوداګرو او پانګوالو ترمنځ د ساختماني چارو، درملو، خوراکي توکو او کرنیزو خدمتونو په برخو کې د ۴۴۶ میلیون او ۶۲۰ زره افغانیو په ارزښت سوداګریز هوکړه‌لیکونه لاسلیک شول.

دوشنبه، د چنګاښ ۲۲مه، ۱۴۰۵