د خصوصی سکټور اوچت غږ

08
شنبه, آگست
3 New Articles

زېرمتون

جمعه، د زمري ۱۶مه، ۱۴۰۵
 
د افغانستان د سوداګرۍ او پانګونې خونې د «فکر خونې» دویمه ناسته د «پیاوړی اقتصاد، اباد افغانستان» تر شعار لاندې د یو د پوهنتونونو د استادانو، اقتصادپوهانو، علمي او مسلکي شخصیتونو، د خونې د سلاکارانو او د مشرتابه پلاوي د غړو په ګډون د خونې په عمومي دفتر کې ترسره شوه.
د دې ناستې موخه د هېواد اقتصادي ننګونو ارزونه، له علمي او تخصصي نظریاتو څخه ګټه اخیستل او د کورني تولید د ودې، د پانګونې پراختیا، د صادراتو زیاتوالي، د کارموندنې او د افغانستان اقتصادي ځان‌بساینې لپاره د عملي لارو چارو برابرول و.
د ناستې په پیل کې د افغانستان د سوداګرۍ او پانګونې خونې عمومي رئیس ښاغلي الحاج سید کریم هاشمي ګډونوالو ته د ښه راغلاست ویلو ترڅنگ د پوهنتونونو استادانو، اقتصادپوهانو او متخصصینو د مسؤلانه ګډون له امله مننه وکړه.
نوموړي ټینګار وکړ، چې افغانستان تر بل هر وخت زیات، علمي افکارو، عملي حل‌لارو او د حکومت، خصوصي سکټور او علمي ټولنې ترمنځ رښتینې همکارۍ ته اړتیا لري.
د خونې عمومي رئیس وویل، چې یوازې د طبیعي سرچینو لرل د اقتصادي ودې او هوساینې تضمین نشي کولای، بلکې سالم مدیریت، کره پلان جوړونه او له ملي ظرفیتونو اغېزناکه ګټه اخیستنه د هېواد د دوامدار پرمختګ اساسي عوامل دي.
ښاغلي هاشمي زیاته کړه، چې د فکر خونې د غونډو موخه یوازې د نظرونو تبادله نه ده، بلکې هڅه کېږي، چې د هېواد د علمي او فکري کادرونو د پوهې، تجربې او تخصص پر بنسټ یو هر اړخیز اقتصادي سټراټیژیک سند ترتیب او د اسلامي امارت مشرتابه ته د ملي وړاندیز په توګه وړاندې شي.
نوموړي ټینګار وکړ، چې وړاندې کېدونکې طرحې او وړاندیزونه باید عملي، د پلي کېدو وړ او د افغانستان له ریښتینې شرایطو سره سمون ولري، څو د بې‌وزلۍ په کمولو، د کارموندنې په رامنځته کولو، د پانګونې په پیاوړتیا، د کورنیو تولیداتو په زیاتوالي، د صادراتو په پراختیا او د اقتصادي تړلتیا په کمولو کې اغېزناک رول ولوبوي.
د خونې عمومي رئیس همدارنګه د افغانستان پراخو اقتصادي ظرفیتونو، لکه طبیعي سرچینو او کانونو، حاصل‌خېزو ځمکو، مناسب ټرانزیټي موقعیت، ځوان بشري ځواک او د پانګونې فرصتونو ته په اشارې وویل، چې د حکومت او خصوصي سکټور د ګډې همکارۍ او منظمې برنامې له لارې د دغو ظرفیتونو اغېزناکه ګټه اخېستنه کولای شي د «پیاوړی اقتصاد، اباد افغانستان» شعار عملي کړي.
هغه له استادانو، اقتصادپوهانو او متخصصینو وغوښتل، چې په ملي احساس او مسؤلیت‌پالنې سره خپلې عملي او علمي طرحې او نظریات وړاندې کړي او ډاډ یې ورکړ، چې ټول وړاندیزونه به په منظم ډول راټول، په یوه هر اړخیز تخصصي سند کې به تنظیم او د اسلامي امارت اړوندو مسؤلینو ته به وسپارل شي.
ورپسې د افغانستان د سوداګرۍ او پانګونې خونې سلاکار ښاغلي ډاکټر احمد خسرو ضیا د فکر خونې جوړښت او موخې تشریح کړې او د حکومت او خصوصي سکټور ترمنځ یې د لا زیاتې همغږۍ او د علمي او تخصصي فعالیتونو د بنسټیز کولو پر اړتیا ټینګار وکړ.
همدارنګه د خونې سلاکار ښاغلي اذرخش حافظي د حکومت او خصوصي سکټور ترمنځ د ګډو لومړیتوبونو او حل‌لارو د ټاکلو لپاره د همغږۍ پر رامنځته کولو ټینګار وکړ او له استادانو او متخصصینو یې وغوښتل، چې خپلې علمي او تخصصي طرحې په لیکلي ډول وړاندې کړي.
په ناسته کې ګډونوالو استادانو، اقتصادپوهانو او متخصصینو هم د هېواد د اقتصادي ننګونو په اړه خپل نظرونه او وړاندیزونه شریک کړل او د اقتصادي پروګرامونو په جوړولو کې یې د علمي او تخصصي همکارۍ لپاره خپل چمتووالی څرګند کړ.
ګډونوالو د پوهنتونونو او څېړنیزو مرکزونو له علمي ظرفیتونو څخه پر ګټنې او د علمي ټولنې، خصوصي سکټور او اړوندو ادارو ترمنځ د همکارۍ پر پیاوړتیا هم ټینګار وکړ.
د ناستې په پای کې د ګډونوالو له علمي ونډې څخه مننه وشوه او د فکر خونې د غونډو پر دوام، د تخصصي وړاندیزونو پر ترتیب او د هغو د پایلو پر تعقیب ټینګار وشو.
د دغې ناستې ترسره کېدل د علمي شخصیتونو، اقتصادي فعالانو او اړوندو ادارو ترمنځ د همکارۍ د پیاوړتیا او د «پیاوړي اقتصاد، اباد افغانستان» د هدف د ترسره کېدو لپاره د اغېزناکو اقتصادي حل‌لارو د تیارولو په لاره کې یو مهم ګام ګڼل کېږي.

پنجشنبه، د زمري ۱۵مه، ۱۴۰۵
 
د فاریاب والي ښاغلي مولوي محمد حنیف حمزه د چهارشنبې په ماسپښین د افغانستان د سوداګرۍ او پانګونې خونې مرکزي دفتر ته تشریف راوړ او د خونې له عمومي رئیس ښاغلي الحاج سید کریم هاشمي سره یې لیدنه او خبرې وکړې.
په دې لیدنه کې د خونې عمومي رئیس د فاریاب والي ته د ښه راغلاست ترڅنګ، د خصوصي سکټور د پیاوړتیا، د سوداګریزو فعالیتونو د پراختیا او په فارياب کې د پانګونې د جلب لپاره د مناسبو فرصتونو پر برابرولو ټینګار وکړ. نوموړي همدارنګه ډاډ وښود، چې د افغانستان د سوداګرۍ او پانګونې خونه په فاریاب کې د اقتصادي ودې او پانګونې پراختيا لپاره هر اړخيزې همکارۍ ته چمتوو ده.
د فاریاب والي هم د افغانستان د سوداګرۍ او پانګونې خونې فعالیتونه او پروګرامونه وستايل، سوداګر او پانګوال یې د هېواد ارزښتمنه شتمني وبلله او د فاریاب د پراختیايي پروژو د پيل او په دغه ولایت کې د پانګونې لپاره د پانګوالو هڅونې په برخه کې یې د ځانګړې پاملرنې غوښتنه وکړه.
د لیدنې په پای کې دواړو لورو د ګډو همکاریو پر دوام، د خصوصي سکټور پر ملاتړ او د سوداګرۍ او پانګونې د پراختیا لپاره د لا زیاتو فرصتونو پر برابرولو ټینګار وکړ.

یکشنبه، د زمري ۱۱مه، ۱۴۰۵
 
د افغانستان د سوداګرۍ او پانګونې خونې د هېواد د کرنې او مالدارۍ په سکټور کې د خصوصي سکټور د ونډې د پیاوړتیا او ودې په موخه د کرنیزو محصولاتو د سوداګرۍ او پانګونې تخصصي کمېټه د یو شمېر سوداګرو، پانګوالو او د دې برخې د متخصصینو په غړیتوب جوړه کړه او دغه کمېټې د خونې د مدیره پلاوي د تخصصي کمېټو له ډلې څخه د یوې کمېټې په توګه په رسمي ډول خپل فعالیت پیل کړ.
دغه کمېټه د افغانستان د سوداګرۍ او پانګونې خونې د مرکزي دفتر د کنفرانسونو په تالار کې د خونې د ستراتیژیکو اړیکو د چارو مرستیال ښاغلي مجیب‌الرحمن شېرزاد، د خونې د مدیره پلاوي غړي او د کرنیزو محصولاتو د سوداګرۍ او پانګونې د تخصصي کمېټې رئیس ښاغلي الحاج مطیع الله ګردېزي، د خونې د مالي او اداري مرستیال او د عامل پلاوي سرپرست ښاغلي زین الله حسني او د کرنې سکټور د یو شمېر سوداګرو په ګډون خپله پرانیستونکې ناسته ترسره کړه.
په دې غونډه کې ښاغلي شېرزاد د کرنې د ودې په برخه کې د خصوصي سکټور پر ارزښت او رول ټینګار وکړ او ویې ویل، چې په دې سکټور کې د پانګونې لپاره د لازمو اسانتیاوو برابرول، د اصلاح شویو تخمونو د تولید او وېش پراختیا، د عصري او تخصصي لابراتوارونو جوړول، د افغانستان پر عضوي کرنیزو محصولاتو د پانګونې او ارزښت زیاتوالی، او همدارنګه د کرنیزو محصولاتو د پروسس او بسته‌بندۍ د بهیر عصري کول، د دې کمېټې له مهمو لومړیتوبونو څخه دي.
ښاغلي ګردېزي د خونې د مشرتابه له باور څخه مننه وکړه او کرنه او مالداري یې د هېواد د اقتصاد ملا تیر وباله. نوموړي ژمنه وکړه، چې د کمېټې له غړو او د دې برخې له متخصصینو سره په همکارۍ به د کرنیزو خدمتونو د پیاوړتیا، د پانګونې د زیاتوالي، د تولید د ودې او د دې سکټور د دوامدارې پراختیا لپاره اغېزناکې هڅې وکړي.
د ناستې په دوام کې، ښاغلی محمد طاهر شعیب د کمېټې د مرستیال او ښاغلی عبدالقاهر مهمند د منشي په توګه معرفي او په رسمي ډول خپلو دندو ته وګمارل شول.
د جوړ شوي پلان له مخې، دغه کمېټه به هره میاشت لږ تر لږه یوه منظمه ناسته د کرنې او مالدارۍ د سکټور د سوداګرو، پانګوالو او فعالانو په ګډون ترسره کوي، څو د دې سکټور ستونزې، فرصتونه او د پراختیا لارې چارې وڅېړل شي.
د یادونې وړ ده، چې د افغانستان د سوداګرۍ او پانګونې خونه دا مهال ۲۰ تخصصي کمېټې لري، چې هره یوه یې د بېلابېلو اقتصادي سکټورونو د متخصصینو او فعالانو په ګډون، د پانګونې د پراختیا، د کاري فرصتونو د رامنځته کولو، د عوایدو د زیاتوالي، د شته ستونزو د حل او د هېواد د اقتصادي فعالیتونو د ودې په موخه، په منظم ډول خپلې تخصصي غونډې ترسره کوي.

سې‌شنبه، د زمري ۱۳مه، ۱۴۰۵
 
د افغانستان د خصوصي سکټور او د اوزبېکستان اړوندو سکټوري مسؤلینو ترمنځ د سوداګریزو اړیکو د دوام او پراختیا په موخه د افغانستان د ټوکر واردوونکو اتحادیې یو شمېر سوداګرو او پانګوالو او د اوزبېکستان د ټوکر او نساجۍ سکټور فعالانو ترمنځ انلاین ناسته وشوه.
په دې ناسته کې د افغانستان له لوري د ټوکر واردوونکو اتحادیې رئیس ښاغلي الحاج عبیدالله هوتک او د افغانستان د سوداګرۍ او پانګونې خونې د عامل پلاوي د پالیسۍ او تخنیکي مرستیال ښاغلي احمد شکیل حازم ګډون کړی و او د اوزبېکستان له لوري د دغه هېواد د سوداګرۍ وزارت د سپکو صنعتونو مرستیال ښاغلي روح‌الله اکه له یو شمېر سوداګرو او پانګوالو سره، چې د اوبدلو او نساجۍ په سکټور کې فعالیت کوي، ګډون درلود.
د ناستې مهمې موضوعګانې د اوزبېکستان تولیدي فابریکو او صنعتي مرکزونو د لیدنې لپاره پلان جوړونه، په افغانستان کې د نساجۍ لویو فابریکو جوړول، د جامو د تولید یو شمېر فابریکو بیا فعالول او همدارنګه اوزبېکستان ته د افغانستان د پنبې صادرات او له اوزبېکستان څخه افغانستان ته د بېلابېلو ټوکرو او جامو واردات وو، چې په اړه یې هر اړخیز بحث او د نظرونو تبادله وشوه.
د ناستې په پای کې ښاغلي احمد شکیل حازم د افغان سوداګرو او پانګوالو لپاره د اوزبېکستان ویزو پر اسانولو ټینګار وکړ او زیاته یې کړه، چې دا به د دواړو هېوادونو ترمنځ د اقتصادي همکاریو د لا پیاوړتیا او دوامداره تعقیب لپاره مناسبه زمینه برابره کړي.
د اوزبېکستان د سوداګرۍ وزارت د سپکو صنعتونو مرستیال ښاغلي روح‌الله اکه هم افغان سوداګرو او پانګوالو ته بلنه ورکړه، څو د اوزبېکستان د نساجۍ صنعت لیدنه وکړي او د سفري اسانتیاوو د زیاتوالي په برخه کې یې د همکارۍ ډاډ ورکړ.

چهارشنبه، د زمري ۷مه، ۱۴۰۵
 
د افغانستان د سوداګرۍ او پانګونې خونې د تخصصي جوړښتونو د پیاوړتیا په موخه د خوراکي توکو تخصصي کمېټه په رسمي توګه پرانېستل شوه. د دې کمېټې د جوړېدو موخه د خوراکي توکو سکټور د ستونزو حل، د باکیفیته تولیداتو پراختیا او د کورني بازار د اړتیاوو پوره کولو لپاره د مناسبو اسانتیاوو رامنځته کول دي.
د پرانېستې په مراسمو کې، چې د خونې د کنفرانسونو په تالار کې د مدیره پلاوي غړو، سوداګرو او د خوراکي توکو سکټور د فعالانو په ګډون ترسره شوه، د خونې د سټراټيژیکو اړیکو مرستیال ښاغلي مجیب الرحمن شېرزاد د دې کمېټې تشکيلول د خوراکي توکو سکټور د ملاتړ، د محصولاتو د کیفیت لوړولو او د بازار وضعیت ښه‌والي لپاره مهم ګام وباله.
نوموړي وویل د باکیفیته او مناسب قیمت لرونکو خوراکي توکو برابرول، له نړېوالو معیارونو سره سم پروسس او بسته‌بندي او د سټراټيژیکو زېرمو رامنځته کول د دې کمېټې له مهمو لومړیتوبونو دي.
ورپسې د کمېټې رئیس او د مدیره پلاوي غړي ښاغلي الحاج وحیدالله عزیزي د خونې مشرتابه د باور له امله مننه وکړه او ژمنه یې وکړه، چې د خوراکي توکو سکټور د پراختیا، د خلکو اړتیاوو د پوره کولو او د سوداګرو ستونزو د حل لپاره به عملي هڅې وکړي.
هغه همدارنګه د کورنیو تولیداتو د پراختیا ترڅنګ د باکیفیته خوراکي توکو د وارداتو پر اسانولو ټینګار وکړ.
همدارنګه د مدیره پلاوي غړي ښاغلي یونس قاضي‌زاده د ښاغلي عزیزي د شلو کلونو کاري تجربې ستاینه وکړه او باور يې وښود، چې نوموړی د دې سکټور د مشرۍ وړتیا لري.
د غونډې په پای کې ښاغلي همایون خواجه‌زاده او عبدالواحد واحدي د کمېټې مرستیالانو، ابراهیم سخي‌زاده د منشي په توګه په رسمي ډول خپلې دندې پيل کړې.
د دې کمېټې پرانېستل د افغانستان د سوداګرۍ او پانګونې خونې له لوري د خوراکي توکو سکټور د ملاتړ، د محصولاتو د کیفیت لوړولو، د بیو متوازن ساتلو او د هېواد د خوراکي خوندیتوب د پیاوړتیا لپاره یو مهم ګام ګڼل کېږي.

سې‌شنبه، د زمري ۱۳مه، ۱۴۰۵

په نورستان ولایت کې د وروستیو ویجاړوونکو سېلابونو له امله، چې د ګڼو ځاني تلفاتو، مالي او د یاد ولایت اوسېدونکو ته د پراخو زیانونو سبب شول د افغانستان اسلامي امارت لوړپوړی پلاوی د ریاست‌الوزراء د اقتصادي مرستیال ښاغلي الحاج ملا عبدالغني برادر اخند په مشرۍ د وضعیت د ارزونې، له زیانمنو کورنیو سره د خواخوږۍ څرګندولو او د خلکو د بېړنیو اړتیاوو د څېړنې په موخه نورستان ولایت ته سفر وکړ.

ښاغلي الحاج ملا برادر د دې ویرجنې طبيعي پېښې له امله خپله ژوره خواشيني څرګنده کړه، د قربانيانو له کورنيو او ټولو زيانمنو شوو سره يې د خواخوږۍ او تسليت مراتب وړاندې کړل او ډاډ يې ورکړ، چې اسلامي امارت به د ټولو شته امکاناتو او ظرفيتونو په کارولو سره د زيانمنو د ستونزو د هواري، د بېړنيو مرستو د برابرولو او د دې طبيعي پېښې د ناوړه اغېزو د کمولو لپاره لازم اقدامات ترسره کړي.

ورپسې د افغانستان د سوداګرۍ او پانګونې خونې رئیس عمومي ښاغلي الحاج سید کریم هاشمي د دې ویرجنې پېښې د شهیدانو له کورنیو او د نورستان له ټولو خلکو سره خپله ژوره خواخوږي او تسلیت څرګند کړ او ټینګار یې وکړ ، چې د نورستان خلک د افغانستان د وجود نه بېلېدونکې او ارزښتمنه برخه ده او د افغانستان د سوداګرۍ او پانګونې خونه به په دغو سختو شرايطو کې د هغوی ترڅنګ ولاړه وي.

نوموړي د سيلابونو له امله شهیدو شوو هېوادوالو ته د لوی خدای (ج) له دربار څخه د مغفرت، ټپیانو ته د بشپړې او عاجلې روغتیا، او غمځپلو کورنیو ته د جمیل صبر دعا وکړه.
یاد پلاوي د دې سفر په ترڅ کې د سيلابونو له امله زيانمنې شوې سيمې له نږدې وکتلې او د اوښتو زيانونو او د خلکو د بېړنيو اړتياوو ارزونه يې وکړه.

همدارنګه د نورستان والي، د والي مرستیال، علماوو او د ولایت مخورو د افغانستان اسلامي امارت د یاد لوړپوړي پلاوي د سفر هرکلی او قدرداني وکړه.

همدارنګه د افغانستان د سوداګرۍ او پانګونې خونې د خپل ملي، اسلامي او بشري مسؤولیت د ادا کولو په موخه د خونې د مدیره پلاوي د غړو سخاوت صندوق له لارې ۶ میلیون او ۵۸۵ زره افغانۍ او د خونې عمومي رئيس له شخصي شتمنۍ څخه ۱ میلیون افغانۍ د سېلاب ځپلو کورنیو د ملاتړ لپاره مرسته وکړه.

مقالات دیگر...

  1. د غالیو پلورونکو اتحادیې له مرستیال سره د غالیو صنعت د پراختیا په اړه د افغانستان د سوداګرۍ او پانګونې خونې مشرتابه خبرې وکړې.
  2. بلخ ولایت ته د افغانستان د سوداګرۍ او پانګونې خونې د ولایتي چارو مرستیال او د اوزبېکستان د فرغانې والي سفر.
  3. د افغانستان د سوداګرۍ او پانګونې خونې مشرتابه د تېلو ټانک لرونکو ستونزې د احتکار مخنیوي او د لومړنیو توکو د بیو د کنټرول کمېسیون له غړو سره په مخامخ ناسته کې مطرح کړې.
صفحه1 از275