همدارنګه د خونې د مرکزي دفتر د کنفرانسونو په تالار کې په جلا غونډه کې، چې د افغانستان د سوداګرۍ او پانګونې خونې د عمومي رئیس ښاغلي الحاج سید کریم هاشمي، د پالیسۍ او له حکومت سره د اړیکو مرستیال الحاج میراجان سلیمان‌خېل، د ټولنیزو او فرهنګي چارو مرستیال الحاج حبیب الله عمر، د خدماتو مرستیال الحاج عنایت الله صدیق‌زي، د کورنیو تولیداتو او محصولاتو د ملاتړ مرستیال الحاج عبدالنافع بارکزي، د مدیره پلاوي د دارالانشاء رئیس الحاج ذبیح الله عمرخېل، د مدیره پلاوي غړي الحاج یحیی پښتون، د مالي او اداري چارو مرستیال او د عامل پلاوي د ریاست سرپرست زین‌الله حسني، د عامل پلاوي د پالیسۍ او تخنیکي چارو مرستیال احمد شکیل حازم او د خونې د یو شمېر کارکوونکو په ګډون جوړه شوې وه، ښاغلی مجیب الرحمن شېرزاد د سټرټیژیکو اړیکو د مرستیال او هم‌مهاله د مدیره پلاوي د غړي په توګه د دې ادارې کارکوونکو ته معرفي شو.

ښاغلي هاشمي، ښاغلي شېرزاد ته د سټراټيژیکو اړیکو د مرستیال په توګه د ټاکل کېدو مبارکي وویله او د دې بست رامنځته کول یې د خونې د کاري ظرفیت د لوړولو او پیاوړتیا لپاره اړین او اغېزناک وبلل.

ښاغلي شېرزاد په خپلو خبرو کې د خونې مشرتابه د باور مننه وکړه، چې نوموړی یې د دې مسؤلیت لپاره وړ بللی دی. هغه ژمنه وکړه، چې د خونې د سیمه‌ییز او نړیوال مقام د لوړولو لپاره به خپلې ټولې هڅې وکړي او په دې برخه کې یې د خونې د ټولو مشرتابه غړو د همکارۍ غوښتنه وکړه.

د یادونې وړ ده، چې ښاغلی مجیب الرحمن شېرزاد د هېواد له ملي سوداګرو دی او د لوړو زده‌کړو ترڅنګ پراخ مسلکي ظرفیت هم لري. نوموړی د مديرت په برخه کې له پاکستان او له سويس څخه په پراختيايي پاليسۍ کې ماسټري لري او له جاپان څخه د اداري پراختيا په برخه کې فيلوشيپ لري. ښاغلي شيرزاد د شلو کلونو کاري تجربې په لرلو سره په بېلابېلو مهمو دولتي ادارو کې د معینیت تر کچې دندې کړې دي.