د افغانستان د سوداګرۍ او پانګونې اتاق عمومي رئیس الحاج سید کریم هاشمي د هلمند، ننګرهار، کنړ، لغمان او یو شمېر نورو ولایتونو د سادات قوم له مشرانو سره په خپل دفتر کې وکتل.
په دې لیدنه کې ښاغلیو: سید فرهاد اکبري، سید عبدالاحد آغا او سید نور هاشمي د سادات قوم په استازولۍ خبرې وکړې، د افغانستان د سوداګرۍ او پانګونې د اتاق د رهبرۍ له کړنو او لاسته راوړنو یې ملاتړ څرګند کړ، او د سادات قوم د خلکو یو شمېر شته ستونزې یې هم یادې کړې. هغوی د دغو ستونزو د حل په برخه کې د اتاق له عمومي رئیس د همکارۍ غوښتنه وکړه.
ښاغلي الحاج سید کریم هاشمي له دوی څخه د مننې تر څنګ وویل، چې د هېواد د ټولو اقوامو ملاتړ او همغږي د خصوصي سکتور د پرمختګ لپاره مهم ارزښت لري. نوموړي ډاډ ورکړ چې د سادات قوم یادې ستونزې به د اړوندو حکومتي چارواکو سره شریکې کړي او د حل لپاره به جدي هڅې وکړي.
شنبه، د تلې ۲۶مه، ۱۴۰۴
