ښاغلي آرین زلگی عظیمي، د افغانستان د سوداګرۍ او پانګونې اتاق د پانګونې مرستیال، له ښاغلي محمد یونس مهمند، د اتاق پخواني لومړي مرستیال، ښاغلي خانجان الکوزی او ښاغلي سلطان محمد صافي د اتاق د مشرتابه پلاوي پخواني غړو او ښاغلي احمد شاه حکیمي د کابل ولایت اتاق لومړي مرستیال او ښاغلي الحاج محمد رفیع عظیمي او ښاغلي میر افغان صافي ملي سوداګرو سره د اتاق په مرکزي دفتر کې وکتل.

ښاغلي مهمند د اتاق د پخوانۍ مشرتابه د غړو په استازیتوب، ښاغلي عظیمي ته د پانګونې د مرستیال په توګه د ټاکل کېدو مبارکي وویله او ډاډ یې ورکړ چې خپلې تجربې به د اتاق له نوي مشرتابه سره د کاري چارو د ښه والي په برخه کې شریکوي.

ښاغلي عظیمي د تېرې شپږ کلنې مودې په اوږدو کې د اتاق د پخوانۍ مشرتابه د غړو د کړنو او خدمتونو قدرداني وکړه، د هغوی د همکارۍ او د کاري تجربو د شریکولو د ژمنې هرکلی یې وکړ او دغه همکاري یې د خصوصي سکتور د ستونزو په حل کې ګټوره وبلله.

 

 

 

د افغانستان د سوداګرۍ او پانګونې اتاق د نوي مشرتابه پلاوي لومړۍ غونډه، د ښاغلي الحاج سید کریم هاشمي د مشرتابه لاندې او د ښاغلو: آرین زلګي عظیمي د پانګونې مرستیال، عنایت الله صدیقي د خدماتو مرستیال، خلیل خیرخواه د مالي رئیس او یو شمېر نورو د مشرتابه پلاوي د غړو په ګډون، د اتاق په مرکزي دفتر کې چې په شهرنو کابل کې موقعیت لري، ترسره شوه.

ښاغلي الحاج سید کریم هاشمي، د نوي رهبري غړو ته د ښه راغلاست او مبارکۍ تر څنګ وویل: هغه باور چې د خصوصي سکتور له لوري پر موږ شوی دی، باید په سمه توګه د هغوی د خدمت لپاره وکارول شي او د هغوی ستونزو ته باید ژر تر ژره رسېدنه وشي. نوموړي ټول تاجران د اتحاد او یووالي پر لور هڅولي او د کارموندنې پر رامنځته کولو او د هېواد د بې وسه خلکو د مرستې پر اهمیت یې ټینګار وکړ.

ښاغلي هاشمي، خپل پروګرامونه د نفتي سهامي شرکتونو جوړول، کانونو استخراج او نورو سکتورونو په برخه کې بیان کړل او زیاته یې کړه: موږ باید د اوسنیو فرصتونو څخه په ګټې اخیستنې سره خپلو هېوادوالو ته د کار زمینې برابرې کړو.

ښاغلي محمد ولي امیني، د اتاق د عامل پلاوي رئیس، د اتاق د اوسني وضعیت او جایګاه په اړه معلوماتي پریزینټیشن وړاندې کړ او د وضعیت د ښه والي لپاره یې بدیلې لارې هم مطرح کړې.

په دې ناسته کې، د اتاق د عمومي رئیس د وړاندیز پر بنسټ، یو نوی بانکي حساب جوړ شو چې د بیړنیو حالاتو او طبیعي پېښو پر مهال د اغېزمنو او اړمنو کسانو سره مرسته وکړي. همدارنګه د نوي مشرتابه پلاوي غړو ژمنه وکړه چې په ګډه به ۱،۱۶۰،۰۰۰ امریکايي ډالر په دغه حساب کې زېرمه کړي.

 

 

 

 

ښاغلي عنایت الله صدیقي زی، د افغانستان د سوداګرۍ او پانګونې اتاق د خدماتو مرستیال، د ښاغلي آرین زلګي عظیمي د پانګونې د مرستیال په حضور کې، د اتاق په مرکزي دفتر کې د اتاق د مشرتابه پلاوي له غړو او د عامل پلاوي له کارکوونکو سره تعارفي ناسته ترسره کړه.

 

 

 

د افغانستان د سوداګرۍ او پانګونې اتاق عمومي رئیس ښاغلی سید کریم هاشمي، د اتاق د پانګونې مرستیال ښاغلی حاجي آرین زلگی عظیمي، د پالیسي او حکومت سره د اړیکو مرستیال ښاغلی میراجان سلیمان خیل او د هېواد د یو مطرح تاجر ښاغلی مایل خیرخواه په ګډون، د چین د خلکو جمهوریت د سفارت له تجارتي او اقتصادي مسؤل ښاغلي ماچنګ ګوانګ سره په کابل کې وکتل او د دواړو هېوادونو د تجارتي اړیکو د پیاوړتیا په اړه خبرې او نظرونه تبادله شول.

ښاغلي هاشمي چین د افغانستان ښه تجارتي دوست او اقتصادي همکار وباله او ټینګار یې وکړ چې د چین پانګه‌وال، د ماشینري تولید فابریکې لرونکي او متخصصین دې افغان سوداګرو سره په ګډو پانګونو کې په ځانګړي ډول د معادن د استخراج او د حرارتي برېښنا په تولید کې معرفي شي.

نوموړي د اتاق او د چین د سفارت اقتصادي برخې نیکې اړیکې د دواړو هېوادونو د تجارتي راکړې ورکړې په زیاتوالي کې مهمې وبللې او د اتاق له هر اړخیزې همکارۍ یې ډاډ ورکړ.

ښاغلي چنګ ګوانګ د چین د تاجرانو د چمتووالي یادونه وکړه چې په بېلابېلو سکتورونو کې په ځانګړې توګه د معادن په استخراج، د طبي تجهیزاتو او د کرنې په میکانیزه کولو کې پانګونه وکړي، او ژمنه یې وکړه چې د ښاغلي هاشمي ټول وړاندیزونه او نظریات به د چین له لوړپوړو حکومتي چارواکو سره شریک کړي او د دغه هېواد تاجران به د افغان سوداګرو سره د ګډو پانګونو لپاره وهڅوي.

 

 

 

د افغانستان د سوداګرۍ او پانګونې خونې رهبري پلاوی د دې زلزلې د قربانیانو پاتې شویو کورنیو او زیانمنو شوو سره خپله غمشریکی او تسلیت څرګندوي، له الله تعالی (ج) څخه د شهیدانو لپاره جنت الفردوس، د ټپیانو لپاره عاجله شفا او د پاتې شویو لپاره صبر غواړي.

د افغانستان د سوداګرۍ او پانګونې خونه د هېواد له شریفو خلکو سره ولاړه ده او ځان مکلف بولي چې په دې سختو شېبو کې د زیانمنو شویو خلکو لاسنیوی وکړي.

له ټولو درنو سوداګرو او پانګوالو څخه هیله کوو چې د خپلې وسې سره سم د زیانمنو کورنیو لپاره عاجلې او ضروري مرستې برابرې کړي. موږ باور لرو چې د یووالي او همکارۍ له لارې کولای شو خپل ایماني او اسلامي مسوولیت د دغو زیانمنو هېوادوالو په وړاندې ترسره کړو.

د خونې رهبري پلاوي د وروستي پېښې او د زلزله ځپلو سره د مرستو په اړه خپله فوق العاده ناسته په مرکزي دفتر کې ترسره کړه او ژمنه یې وکړه چې د خصوصي سکتور مالي مرستې راټولې کړي او د اړوندو حکومتي ادارو په همغږۍ یې د ختیځو ولایتونو زلزله ځپلو او قربانیانو ته ورسوي.