یک‌شنبه، د تلې ۱۹مه، ۱۴۰۵

 

د افغانستان د سوداګرۍ او پانګونې خونې عمومي رئیس ښاغلي الحاج سید کریم هاشمي د افغان–امریکا د سوداګرۍ ګډې خونې له رئیس ښاغلي جیفري ګریکو او د یادې خونې له یو شمېر غړو سره د افغانستان د سوداګرۍ او پانګونې خونې په مرکزي دفتر کې ولیدل او د اقتصادي همکاریو د پراختیا، سوداګریزو اړیکو پیاوړتیا او د پانګونې فرصتونو په اړه یې ورسره خبرې وکړې.

ښاغلي الحاج سید کریم هاشمي د مېلمه پلاوي د هرکلي ترڅنګ د دواړو هېوادونو خصوصي سکټورونو ترمنځ د اړیکو پر پیاوړتیا ټینګار وکړ او د لویو اقتصادي پروژو د تمویل لپاره یې د کورنیو او بهرنیو پانګوالو په ګډون د لویو سهامي شرکتونو رامنځته یوه اغېزناکه لاره وبلله.

نوموړي د افغانستان اقتصادي ظرفیتونو ته په اشارې سره له امریکایي سوداګرو او پانګوالو وغوښتل، چې د بېخبناوو او صنعت په برخو کې په ځانګړې توګه د نفتو د چاڼ، د کان کيندنې او پروسس او په نورو سترو تولیدي پروژو کې پانګونه وکړي.

په ورته مهال د افغان–امريکا د سوداګرۍ خونې رئیس ښاغلي جیفري ګریکو د افغانستان سوداګرۍ او پانګونې خونې د هڅو ستاینې ترڅنګ د امام ابوحنیفه (رح) پنځم ملي او نړیوال نندارتون ترسره کول او په کې يې د سوداګرو، صنعتکارانو او د ګاونډ او سیمې هېوادونو د استازو پراخ ګډون د افغانستان د اقتصادي ظرفیتونو د معرفي کولو او د سوداګریزو اړیکو د پراختیا لپاره یو ارزښتناک ګام وباله.

ښاغلي ګریکو همدارنګه د سوداګریزو همکاریو پیاوړتیا په موخه د اقتصادي موضوعاتو په اړه د تخصصي بحثونو او پنلونو جوړول، په سیمه‌ییزو او نړیوالو کنفرانسونو کې د سوداګرو ګډون او د نړۍ له اقتصادي بنسټونو سره د اړیکو پراختیا وړاندیز کړه.

د ناستې په پای کې د افغان–امریکا د سوداګرۍ ګډې خونې یو شمېر غړو هم د سوداګریزو اړیکو د پراختیا او د ګډو پانګونو د فرصتونو په اړه خپل نظرونه او وړاندیزونه شریک کړل.