پنج‌شنبه، د وږي ۱۹مه، ۱۴۰۵

د افغانستان د سوداګرۍ او پانګونې خونې د سټراټيژیکو چارو مرستیال ښاغلي مجیب‌الرحمن شېرزاد د کابل له ښاروال ښاغلي مولوي عبدالرشید راشد سره ليدنه او خبرې وکړې.

د ليدنې پرمهال د کابل ښار څلورمې ناحيې اړوند په تهیه مسکن کې د مېوې او سبزۍ مارکېټ سوداګرو او دوکاندارانو يو شمېر ستونزې مطرح او ورته د رسېدنې په موخه يې پر لارو چارو نظرونه تبادله شول.

د ناستې پرمهال د خونې د مديره پلاوي غړي الحاج نجابت حيدري او د مېوې او سبزیو مارکېټ د سوداګرو او دوکاندارانو استازو د دوکانونو د کرایې د ټاکلو او ورکړې، د مارکېټ د دویم پوړ د خونو کرایې، د دوکانونو د ملکیت او استفادې اړوند چارو او د کابل ښاروالۍ د مسئولینو له لوري د یو شمېر دوکانونو د مهرلاک کېدو په اړه خپلې ستونزې او اندېښنې له د ښاروالۍ مسئولینو سره شریکې کړې.

د مارکېټ استازو ټینګار وکړ، چې د یادو ستونزو حل او د سوداګرو او اړوندو دولتي مسئولینو ترمنځ د لا ښې همغږۍ رامنځته کول کولی شي، چې د سوداګریزو فعالیتونو د ښه تنظیم، د سوداګرو د کاري ستونزو کمېدو او د مارکېټ کاري چاپېریال ښه‌والي په برخه کې اغېزناک تمام شي.

د کابل ښاروال ښاغلي مولوي عبدالرشید راشد د سوداګرو او دوکاندارانو د ستونزو له اورېدو وروسته، د مطرح شویو موضوعاتو په اړه لازم وضاحتونه وړاندې کړل او د یادو ستونزو د مسئولانه څېړنې او حل پر اړتیا یې ټینګار وکړ.

د کابل ښاروال همدارنګه اړوندو مسئولینو ته لارښوونه وکړه، چې مطرح شوي موضوعات په هر اړخیز ډول وڅېړي او د نافذه اصولو او مقرراتو په چوکاټ کې د سوداګرو او دوکاندارانو د ستونزو حل لپاره لازم اقدامات وکړي.

د افغانستان د سوداګرۍ او پانګونې خونې د سټراټيژیکو چارو مرستیال ښاغلي مجیب‌الرحمن شیرزاد هم د سوداګرۍ او پانګونې خونې له لوري د خصوصي سکټور د ستونزو او مشروع غوښتنو د تعقیب او د سوداګرو او اړوندو دولتي ادارو ترمنځ د لا زیاتې همغږۍ پر دوام ټینګار وکړ.

د افغانستان د سوداګرۍ او پانګونې خونه تل هڅه کوي، چې د سوداګرو او پانګوالو ستونزې له قانوني لارو له اړوندو ادارو سره مطرح او تعقیب کړي او په هېواد کې د سوداګریزو فعالیتونو، پانګونې او د کاروبار پراختیا لپاره د مناسب چاپېریال د رامنځته کېدو ملاتړ کوي.