چهارشنبه، د زمري ۲۸مه، ۱۴۰۵

د افغانستان د سوداګرۍ او پانګونې خونې عمومي رئیس الحاج سيد کريم هاشمي، د خونې د نړیوالو اړیکو د چارو مرستیال الحاج ابراهیم محب، نورو مرستیالانو او د مدیره پلاوي غړو د افغانستان د سوداګرۍ او پانګونې خونې په کوربه‌ توب جوړې شوې مېلمستیا کې، چې د کرنې، اوبو لګولو او مالدارۍ وزارت معین ښاغلي مولوي صدراعظم عثماني، د صنعت او سوداګرۍ وزارت معین احمدالله زاهد او یو شمېر نورو چارواکو په حضور کې جوړه شوې وه، د ایران اسلامي جمهوریت د جهاد کشاورزۍ له وزیر ښاغلي غلام رضا نوري قزلجه، د نوموړي له مل پلاوي او په کابل کې د ایران اسلامي جمهوریت له سفیر ښاغلي علیرضا بیګدلي سره وکتل او دواړو لورو د افغانستان او ایران ترمنځ د اقتصادي، سوداګریزو او پانګونې همکاریو پر پراختیا او پیاوړتیا ټینګار وکړ.

په دې ناسته کې د افغانستان د سوداګرۍ او پانګونې خونې عمومي رئیس ښاغلي الحاج سید کریم هاشمي د ایران اسلامي جمهوریت لوړپوړي پلاوي ته د ښه راغلاست ویلو ترڅنګ، د دواړو هېوادونو ترمنځ پر پخوانیو اړیکو، تاریخي، کلتوري او اقتصادي پیوندونو يادونه وکړه او ویې ویل، چې افغانستان او ایران د متقابلو اقتصادي همکاریو د پراختیا لپاره پراخ ظرفیتونه لري.

ښاغلي هاشمي د کرنې، خوراکي صنایعو، کانونو، انرژۍ، ټرانزیټ، تولید او بشري ځواک په برخو کې د افغانستان شته ظرفیتونو ته په اشارې د سوداګرۍ د کچې لوړولو، د ګډو پانګونو جذب، د ګډو شرکتونو رامنځته کولو، د پوهې او ټکنالوژۍ د شريکولو، د بدلون او پروسس کوونکو صنایعو پراختیا او په افغانستان کې دننه د ارزښت زیاتولو لپاره له دې ظرفیتونو پر اغېزناکې استفادې ټینګار وکړ.

د افغانستان د سوداګرۍ او پانګونې خونې عمومي رئیس همدارنګه د نوې کرنیزې او اوبو لګولو ټکنالوژۍ او میتودونو د د شريکولو، د کرنیزو محصولاتو د پروسس او بدلون، د تولیدي ماشینونو، بسته‌ بندۍ او د ارزښت ځنځیرونو د پراختیا په برخو کې د عملي همکاریو پر پراختیا ټینګار وکړ او څرګنده یې کړه، چې په دغو برخو کې د ایراني شرکتونو او پانګه‌والو همکاري کولای شي په افغانستان کې د کورني تولید ودې او د نویو اقتصادي فرصتونو رامنځته کېدو ته زمینه برابره کړي.

نوموړي همدارنګه د دواړو هېوادونو د اقتصادي فعالانو لپاره د لا زیاتو اسانتیاوو د رامنځته کولو پر اهمیت ټینګار وکړ او د افغانستان او ایران له اړوندو ادارو څخه یې وغوښتل، چې د سوداګرو او پانګه‌والو لپاره د ویزو اسانتیا، سوداګریزو پلاوو تګ راتګ، د توکو ټرانزیټ، د بانکي تعاملاتو او اړیکو د اسانتیا، ګمرکي چارو او د سوداګریزو بندرونو له ظرفیتونو څخه د لا اغېزناکې استفادې په برخو کې لازمې اسانتیاوې رامنځته کړي.

ښاغلي هاشمي ټینګار وکړ، چې د سوداګرۍ او پانګونې فعالیتونو لپاره د مناسب او د اټکل وړ چاپېریال رامنځته کول کولای شي د خصوصي سکټور باور زیات، دوه اړخیزه سوداګري پراخه او د دواړو هېوادونو ترمنځ د دوامدارو اقتصادي همکاریو د رامنځته کېدو زمینه برابره کړي.

ورپسې د ایران اسلامي جمهوریت د جهاد کشاورزۍ وزیر ښاغلي غلام رضا نوري قزلجه، د امارتي چارواکو، د افغانستان د سوداګرۍ او پانګونې خونې د مشرتابه او د هېواد د سوداګرو له خوا د تود هرکلي او مېلمه‌پالنې له امله د مننې ترڅنګ، د دواړو هېوادونو ترمنځ د دوستانه او پخوانیو اړیکو پر اهمیت ټینګار وکړ.

د ایران د جهاد کشاورزۍ وزیر د افغانستان د سوداګرۍ او پانګونې خونې د عمومي رئیس له لوري د اقتصادي او سوداګریزو اړیکو د پراختیا په اړه مطرح شوې وړاندیزونه مهم او د تعقیب وړ وبلل او پر عملي او پايله ورکوونکو همکاريو يې د دواړو هېوادونو ترمنځ د شته ظرفیتونو د بدلولو پر اړتیا ټینګار وکړ.

ښاغلي قزلجه همدارنګه د ایران د اقتصادي او سوداګریزو شرایطو وروستیو بدلونونو او تحوولاتو ته په اشارې وویل، چې په ځینو برخو کې په ځانګړې توګه د خوراکي توکو، لومړنیو موادو، ودانيزو توکو او روغتیايي محصولاتو د صادراتو په برخه کې د همکاریو پراختیا او د افغانستان د بازار اړتیاوو پوره کولو لپاره لا زیات فرصتونه برابر شوي دي.

نوموړي همدارنګه د ایران په سوداګریزو بندرونو، ګمرکي چارو او بانکي تعاملاتو کې د رامنځته شویو نویو اسانتیاوو یادونه وکړه او د افغانستان د خصوصي سکټور پر استفادې یې له موجودو فرصتونو څخه ټینګار وکړ.

د ایران اسلامي جمهوریت د جهاد کشاورزۍ وزیر همدارنګه په نږدې راتلونکي کې د افغانستان او ایران ترمنځ د یوه ځانګړي سوداګریز کمېسیون د رامنځته کېدو خبر ورکړ او ویې ویل، چې دغه کمېسیون به د دواړو هېوادونو د متخصصینو او کارپوهانو په ګډون د سوداګرۍ او پانګونې توافقاتو او هوکړو د منظم تعقیب زمینه برابره کړي.

نوموړي هیله څرګنده کړه، چې د دغه میکانیزم په رامنځته کېدو سره به د دواړو هېوادونو ترمنځ توافق شوي موضوعات د خبرو اترو او تفاهم له مرحلې څخه وړاندې ولاړ شي، په مشخصو عملیاتي او اجرائیوي پروګرامونو به بدل شي او د افغانستان او ایران ترمنځ د سوداګریزو او اقتصادي اړیکو د پراختیا بهیر به لا چټک شي.

په دې لیدنه کې د افغانستان د صنعت او کانونو خونې رئیس ښاغلي الحاج احمد نبي‌زاده، د کرنې او کسبګرو خونو مرستیالانو او یو شمېر سوداګرو او پانګه‌والو هم ګډون کړی و.

د ایران اسلامي جمهوریت له لوري، د دغه هېواد د جهاد کشاورزۍ وزارت اقتصادي مرستیال ښاغلي اکبر فتحي، د جهاد کشاورزۍ وزارت د نړیوالو چارو عمومي رئیس حسن مؤمني، د ایران د کرنیزو څېړنو، زده‌کړو او ترویج سازمان رئیس غلام رضا ګل‌محمدي او د ایران د جهاد کشاورزۍ وزارت د عامه اړیکو رئیس سید سجاد حسيني په دې ناسته کې ګډون کړی و.