د نفتي توکو د کيفيت د کنټرول او په دې برخه کې د ستونزو د هواري په موخه د ریاست الوزرا اقتصادي معاونیت له لوري ګډه غونډه جوړه شوه، چې په کې د دولت لوړ پوړو چارواکو، د سکتوري وزارتونو مشرتابه او د افغانستان د سوداګرۍ او پانګونې اتاق سوداګریزو چارو مرستیال ښاغلي خیرالدین مایل احمدي ګډون وکړ.  

د ریاست الوزرا اقتصادي مرستيال په تيرو دوو کلونو کې دهېواد دسوداګرو او پانګوالو اقتصادي فعاليتونه مهم وبلل او ددغه سکتور د سوداګرو له خوا يې دبا کيفيته تيلو او ګازو په واردولو ټينګار وکړ.  .

ښاغلي مایل احمدي په هېواد کې د سوداګرو او پانګوالو لپاره د مناسب کاري چاپېریال د رامنځته کولو په برخه کې د دولتي چارواکو هڅې وستایلې او د تېلو او ګازو د کیفیت د کنټرول، مالیاتو، د شرکتونو د کارونې نوم او معیاري تصفیه خانو نشتوالی يې د سوداګرو عمده ستونزې وبللې او د هېواد ریاست الوزرا اقتصادي مرستیال څخه يې په یادو برخو کې د هر اړخیزې همکارۍ غوښتنه وکړه.

پنجشنبه، تلې ۲۷مه، ۱۴۰۲

سوداګرو، هټیوالو او د مرحوم فیض محمد خان ناصري مارکیټ څښتن ښاغلي عبدالله د هرات ولایت د وروستۍ زلزلې د قربانیانو سره د غمشریکۍ په موخه د افغانستان د سوداګرۍ او پانګونې اتاق مدیره پلاوي غړي ښاغلي ذکریا بریالي په حضور کې د یوې رڼې پروسې په ترڅ کې له لسو زرو څخه د زیاتو نارینه، ښځینه او طفلانه ژمنۍ جامې راټولې او هرات ولایت ته يې واستولې.

ښاغلي ذکریا بریالي د فیض محمد خان ناصري مارکیټ د هټیوالو او سوداګرو د بشري مرستو د ستایلو په ترڅ کې د هرات ولایت د وروستۍ زلزلې له قربانیانو سره د هېواد د خصوصي سکتور مرستې مهمې وبللې او د هېواد له ټولو سوداګرو او پانګوالو يې وغوښتل چې د هرات ولایت زلزله ځپلو سره د بشردوستانه مرستو په ترسره کولو کې خپل اړین رول ولوبوي.

دوشنبه، تلې ۲۴مه، ۱۴۰۲

د افغانستان د سوداګرۍ او پانګونې اتاق مدیره پلاوي غړي ښاغلي خانجان الکوزي او د عامل پلاوي پالیسۍ او تخنیکي مرستیال ښاغلي محمد انور عارفي د ترکيې هېواد د (T&A) ګروپ اف کمپنیز مدیره پلاوي له غړي ښاغلي حسین ګنای سره لیدنه ترسره او د ګډو پانګونو او سوداګرۍ پراختیا په اړه يې خبرې اترې وکړې.  

ښاغلي ګنای په ترکیه او یو شمیر افریقايي او اسیایي هیوادونو کې د (T&A) د شرکتونو د فعالیتونو او پانګونې په اړه معلومات وړاندې کړل او د کانونو او تولیداتو په برخو کې په ځانګړې توګه د لبنیاتو د پروسس په برخه کې یې د یادې ادارې د ګډې پانګونې په اړه خوښي څرګنده کړه. نوموړي په دې برخه کې له یادې ادارې سره د اتاق د هر اړخیزې همکارۍ غوښتنه وکړه.

ښاغلي الکوزي ښاغلي حسین ګنای او د هغه ټیم ته د ښه راغلاست په ترڅ کې د ترکیې له هېواد او خلکو سره د افغانانو د اوږدمهاله او تاریخي اړیکو او همدارنګه یې د دواړو هېوادونو د سوداګرو د ګډو پانګونو په اړه خبرې وکړې اود  سوداګرۍ پراختیا، ګډې پانګونې، د ټرانزیټي ستونزو پر حل او افغان سوداګرو لپاره د ویزې د ورکړې اسانتیاوو په رامنځته کولو يې ټینګار وکړ. نوموړي د سوداګریزو اړیکو غښتلتیا او ګډون پانګونو برخه کې د اتاق د همکارۍ ډاډ ورکړ.

ښاغلي عارفي اتاق د یوې خپلواکې ادارې په توګه یاد کړ او له اړوندو ادارو سره یې د سوداګریزو اړیکو او ګډې پانګونې د پراختیا په موخه د اتاق د تخنیکي همکارۍ چمتووالی څرګند کړ.

دوشنبه، تلې ۲۴مه، ۱۴۰۲

د افغانستان د سوداګرۍ او پانګونې اتاق د سیمې هېوادونو سره د سوداګرۍ پراختیا، کورنیو تولیداتو معرفت او د صادراتو زیاتوالي په موخه د ایران – افغانستان سوداګریز مرکز سره هوکړه لیک لاسلیک کړ.

ددی هوکړه لیک پربنسټ د افغانستان د سوداګرۍ او پانګونې اتاق او د ایران – افغانستان سوداګریز مرکز به د ګډو نندارتونونو جوړولو، په دی نندارتونونو کې د افغانستان او ایران تولیداتو پیژندګلوۍ، د دواړو هېوادونو سوداګرو ترمنځ د ګډو ناستو برابرولو او د ګډون پانګونو لپاره د دواړو هېوادونو پانګوالو هڅولو برخه کې یو د بل سره همکاري کوي.

دغه هوکړه لیک د اتاق عامل پلاوي د پالیسۍ او تخنیکي مرستیال او سرپرست ښاغلي محمد انور عارفي او د ایران – افغانستان سوداګریز مرکز رئیسې آغلې سمانه عبدالحی راضي په واسطه د اتاق په مرکزي دفتر کې لاسلیک شو.

دوشنبه، تلې ۲۴مه، ۱۴۰۲

د افغانستان د سوداګرۍ او پانګونې اتاق عامل پلاوي د پالیسۍ او تخنیکي چارو مرستیال ښاغلي محمد انور عارفي، د عامل پلاوي د نړیوالو اړیکو مسؤل ښاغلي امید غفورزي په حضور کې د دییک سازمان بهرنیو اړیکو له رئیس ښاغلي مصطفی ایرول سره لیدنه ترسره او په هېواد کې يې د پانګونې د فرصتونو په اړه خبرې وکړې.

ښاغلي عارفي د ترکیې سوداګریز پلاوي د راتګ هرکلی وکړ او ترکیه یې دوست او د ګډو دیني او کلتوري ارزښتونو لرونکی هیواد وباله.
نوموړي په هېواد کې د پانګونې په برخه کې شته فرصتونه تشریح کړل او په بېلابېلو برخو کې یې د ترکیې د سوداګرو د ګډې پانګونې د رامنځته کولو غوښتنه وکړه.

ښاغلي مصطفی ایرول په افغانستان کې د لویو پروژو د تطبیق لپاره د عمومي شرایطو له برابرولو څخه خوښي څرګنده کړه او د روغتیا، کرنې، انرژۍ او مخابراتو په برخو کې یې خپل پلانونه له ښاغلي عارفي سره شریک کړل.
نوموړي په یادو برخو کې د لویو پروژو د تطبیق لپاره د شرایطو د رامنځته کولو په موخه د اتاق د همکارۍ غوښتنه وکړه.

دوشنبه، تلې ۲۴مه، ۱۴۰۲