د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د اتاق مالي رئیس ښاغلي شیرین آغا سخي او د مدیره پلاوي غړو هر یو ښاغلي خان جان الکوزي او ضیاءالدین اچکزي د سپین بولدک اتاق رئیس ښاغلي عبدالهادي، د ټوکر اتحاديې له رئیس ښاغلي حاجي عبیدالله او د هېواد یو شمیر سوداګرو سره د اتاق په مرکزي دفتر کې لیدنه ترسره او د دوی د شته ستونزو او حل لارو په اړه يې خبرې اترې وکړې.

سوداګرو خپلې شته ستونزې په کراچۍ بندر کې د افغان سوداګرو د مالونو د درې سوه کانټینرونو د بندېدو، ترانسپورتي ستونزو او له بندر عباس څخه تر افغان پولې پورې د کرایې زیاتوالي، د ګمرکونو ستونزې او نورې ستونزې اتاق له مشرتابه سره شریکې او یادو ستونزو ته د حل مناسبو لارو چارو غوښتنه يې وکړه.  

ښاغلي الکوزي پاکستان ته د اتاق د مشرتابه د تېر سفر یادونه وکړه چې په پایله کې یې شاوخوا درې زره کانټینرونه چې په کراچۍ بندر کې بند پاتې وو، خوشې شول او د اتاق د هڅو په دوام یې د نورو هغو کانتینرونو چې په برښنايي وسایلو، د موټر پرزو او خوراکي موادو بار دي د خلاصون ډاډ ورکړ.   

ښاغلي مهمند سوداګرو ته د ښه راغلاست ویلو او د هغوی د ستونزو اورېدو وروسته زیاته کړه "اتاق تل هڅه کړې چې د هېواد د سوداګرو ستونزې د هېواد له اړوندو مسوولینو سره شریکې کړي او د دوی د ستونزو د حل په ترڅ کې د هېواد سوداګرو ته لا ډېرې اسانتیاوې برابرې کړي."
نوموړي زياته کړه، چې نن يې د پاکستان په کراچۍ بندر کې د درې سوه کانټينر مالونو د بندېدو د ستونزې په اړه له دولتي چارواکو سره خبرې کړې او په پام کې ده، چې د يو شمېر دولتي چارواکو سره به د یادو ستونزو څیړلو او ورته د حل لارو پیداکولو په موخه ناستې وکړي.

ښاغلي شیرین اغا سخي د مالیې وزارت له خوا د رامنځته شوې نوې کړنلارې په اړه معلومات ورکړل او زیاته یې کړه "دغه وزارت به یوه نوې کړنلاره جوړه کړي چې له مخې به یې له ټولو سوداگریزو توکو څخه دوه سلنه اضافي مالیه راټولیږي.

ښاغلي ضیاالدین اچکزي د سپین بولدک اتاق له مشرتابه سره په جلا ناسته کې ژمنه وکړه چې د دوی ستونزې به له اړوندو ادارو سره شریکوي او د حل په موخه به یې هڅې کوي.

سه شنبه، لیندۍ ۲۱مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په داسی حال کې چې، د اتاق عامل پلاوي سرپرست رئیس ښاغلي میرویس هوتک او د نړیوالو اړیکو ډيپارټمنټ مسؤل ښاغلي امید غفورزي يې ملتیا کوله، د افغانستان لپاره د ایران سفارت سوداګریزې آتشې ښاغلي حسین روستايي سره لیدنه ترسره او د دواړو هېوادونو ترمنځ د سوداګریزو اړیکو په اړه يې خبرې اترې وکړې.

ښاغلي روستايي د سیمې او نړۍ د سوداګرو ترمنځ د نندارتون او سوداګریزې غونډې په اړه چې په نږدې راتلونکي کې د ایران د سوداګرۍ اتاق او د ایران د صنعت او سوداګرۍ وزارت له خوا په تهران کې جوړیږي، تفصیلي معلوماتو وړاندی کولو ترڅنګ، د افغانستان د سوداګرۍ اتاق له مشرتابه يې وغوښتل چې، په یاد نندارتون کې د ګډون په موخه، افغان سوداګر او پانګوال وهڅوي.  

ښاغلي مهمند په هېواد کې د سوداګرۍ او پانګونې شته فرصتونه، سوداګریزې اړیکې او په تېرو څو کلونو کې د افغانستان او ایران د ګڼو ناستو لاسته راوړنې مهمې وبللې او د دواړو هېوادونو ترمنځ یې د سوداګرۍ پر پراختیا د ټنګار کولو ترڅنګ، په یاد نندارتون کې د افغان سوداګرو او پانګوالو هڅولو برخه کې د اتاق د هر اړخیزې همکارۍ ډاډ ورکړ.  

سربیره پردی، ښاغلي مهمند د دغه شان نندارتونونو او کنفرانسونو جوړول د سوداګرۍ د ودې او د هېواد د توليدي محصولاتو د معرفي کولو لپاره يو ښه چانس وباله او د اتاق عامل پلاوي مسؤلینو ته يې دنده ورکړه چې، د هیواد د بیلابیلو تولیدي، سوداګریزو او خدماتي سکتورونو د اتحادیو مشرانو او مسؤلینو ته بلنه ورکړي او د یاد نندارتون په اړه ورته هر اړخیز معلومات وړاندی کړي.

چهارشنبه، لیندۍ ۱۵مه، ۱۴۰۲

د افغانستان د سوداګرۍ او پانګونې اتاق عامل پلاوي سرپرست رئیس ښاغلي میرویس هوتک، د افغانستان نړیوال نندراتون مرکز رئیس ښاغلي محمد صابر لطیفي، د اتاق حقوقي سلاکار ښاغلي عبدالسلام کوهي، د عامه اړیکو او صادراتو پراختیا ډیپارټمنټونو مسؤلینو د روغتیايي محصولاتو نندارې ته د کیښودو په موخه د "ابو علی سینا" په نوم نندراتو جوړولو په هکله، مقدماتي ناسته ترسره کړه.

ښاغلي هوتک د نندارتون جوړولو څرنګوالي په اړه مفصل معلومات وړاندی او د اتاق د مختلفو ډیپارټمنټونو مسؤلینو څخه وغوښتل چې، د نوم لیکنې پروسې چټکتیا، د ملاتړ کوونکو جلب او جذب، کورنیو او نړیوالو شرکتونو، د بازار موندنې ټیم رامنځته کولو او یو شمیر نورو اړوندو مسایلو برخه کې یو د بل سره لازمه همکاري ترسره کړي.

شنبه، لیندۍ ۱۸مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په داسی حال کې چې، د اتاق عامل پلاوي سرپرست ښاغلي میرویس هوتک، د کندهار سوداګرۍ او پانګونې اتاق رئیس ښاغلي محمد صدیق مهمند، د مرکزي اتاق ستر سلاکار ښاغلي حاجي شرف الدین او د هرات ولایتي اتاق اجرائیوي مدیر ښاغلي یوسف امین يې ملتیا کوله د افغانستان لپاره د چین له سفیر ژاوشینګ سره لیدنه ترسره، او د سوداګریزو اړیکو پراختیا، پانګونې فرصتونو او افغان سوداګرو ستونزو په اړه يې خبرې اترې وکړې.

ښاغلي محمد یونس مهمند د هرات ولایت زلزله ځپلو سره د چین بشردوستانه مرستې او د هرات او کندهار ولایتي اتاقونو مشرتابه پلاوو رابلل وستایل او په افغانستان کې د شته پانګه ایزو فرصتونو، د دواړو هېوادونو ترمنځ د ځمکني دهلیز رامنځته کولو له لارې د سوداګریزو راکړو ورکړو زیاتوالي او د افغان سوداګرو ویزو ستونزو یادونه يې وکړه.
نوموړي د ټولیز امنیت تامین، د فساد له منځه تلل او د کوکنارو د کښت مخنیوی په افغانستان کې د پانګونې ښه فرصتونه وبلل او د چین له سفیر څخه یې وغوښتل چې افغان سوداګرو ته د ویزو د ورکړې د ستونزې د حل په برخه کې لا زیاتې اسانتیاوې رامنځته کړي او چیني سوداګر په افغانستان کې بیلا بیلو سکتورونو کې پانګونې ته وهڅوي.  

ښاغلي محمد صدیق مهمند په کندهار کې د پانګونې د فرصتونو، له چین سره د سوداګرۍ په پراختیا کې د دغه ولایت د سوداګرو د لېوالتیا او افغان سوداګرو ته د ویزو د ترلاسه کولو په برخه کې د ستونزو په اړه خبرې وکړې او د چین سفیر ته یې بلنه ورکړه چې کندهار ته سفر وکړي او له نږدې د یاد ولایت د پانګونې فرصتونه وګوري.

ښاغلي یوسف امین له چین سره د هرات ولایت پراخو سوداګریزو اړیکو، له چین څخه د خامو موادو په واردولو کې د هرات د تولیدي فابریکو اړتیاوو پوره کولو او له هغه هېواد سره د هرات د سوداګرو د ویزې ستونزې ته اشاره وکړه او دغه راز یې له چین څخه د افغانستان صادراتو ته د ترجیحي تعرفو د ورکړې له امله مننه وکړه.

ښاغلي هوتک د ګډو نندارتونونو جوړولو په ځانګړي ډول په چین کې د افغاني محصولاتو د نندارتون په ترسره کولو او د اتاق د کارکوونکو د ظرفیتونو په لوړولو باندې د ټینګار کولو ترڅنګ، له دغه هېواد سره د پخوانیو همکاریو د دوام په اړه زیاته کړه چې پخوا د چین سفارت د اتاق په رسمي مکتوب او د سوداګریزو شرکتونو د بلنې له مخې هره اونۍ د هېواد لس تنه سوداګرو ته ویزې ورکولې او نوموړي د دې پروسې د دوام غوښتنه وکړه.

ښاغلي ژاوشینګ د اتاق مشرتابه ته د ښه راغلاست په ترڅ کې د هرات له زلزله ځپلو سره د چين د مرستو پر دوام او د سوداګريزو اړيکو پر پراختيا ټينګار وکړ او په آمو سیند او نورو ولايتونو کې يې د چين د پانګونې يادونه وکړه. نوموړي د ویزې د ورکړې په اړه وویل "د چین سفارت به هڅه وکړي چې افغان سوداګرو ته د ویزې د ورکړې په برخه کې لا زیاتې اسانتیاوې رامنځته کړي."

د چین سفیر زیاته کړه چې یو چینایي پانګوال په افغانستان کې د جلغوزیو د پروسس په برخه کې پانګونې ته لېواله دی او ژمنه یې وکړه چې نور چینايي پانګوال به هم په افغانستان کې پانګونې ته وهڅوي. همدارنګه، د چین سفیر کندهار او هرات ولایتونو ته د خپل سفر په اړه ډاډ ورکړ.

دوشنبه، لیندۍ ۱۳مه، ۱۴۰۲

د  افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د کابل سواګرۍ او پانګونې اتاق لومړي مرستیال ښاغلي احمد شاه حکیمي، د معمار ودانیز شرکت عامل پلاوي رئیس ښاغلي نجیب الله پاینده، د ښار جوړونې او مسکن وزارت د دفتر ریاست مقام، د ښاري چارو رئیس او د هېواد سوداګرو او پانګوالو د معمار ودانیز شرکت تولیداتو معرفۍ کنفرانس کې ګډون وکړ.
 
ښاغلي نجیب الله پاینده د یاد شرکت د فعالیتونو او لاسته راوړنو په اړه چې د کاینات ګروپ شرکت یوه برخه ده، هر اړخیز معلومات وړاندې کړل او زیاته یې کړه "د کاینات ګروپ شرکت په ۲۰۰۲ زیږدیز کال کې په هېواد کې خپل فعالیت پیل کړی او په ودانیزو او سړک جوړونې برخه کې يې په ټول افغانستان کې بیلابیلې پروژې تطبیق کړي دي.  

ښاغلي مهمند د افغانستان اقتصادي وضعیت د ښه کېدو په حال کې وباله او په هېواد کې یې د امنیت د ټینګښت، د کوکنارو د کښت مخنیوی او د اداري فساد له منځه تلل په هېواد کې د پانګونې مناسب فرصتونه وبلل او د کاینات ګروپ له مسؤلینو یې وغوښتل چې، په هیواد کې د زیربنایي پروژو د تطبیق په برخه کې ډیره پانګونه وکړي.

د اتاق لومړي مرستیال د افغانیو د بیې ثبات د کورنیو او بهرنیو سوداګرو او پانګوالو په پانګونې پورې تړلی وباله او د سیمې او نړۍ له هېوادونو سره یې د ټرانزیټي او سوداګریزو اړیکو د پراختیا غوښتنه وکړه.

چهارشنبه، لیندۍ ۱۵مه، ۱۴۰۲