د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د اتاق مدیره پلاوي غړي او د افغان – پاک ګډ اتاق رئیس ښاغلي خان جان الکوزي او د اتاق عامل پلاوي سرپرست رئیس په داسی حال کې د هېواد یو شمیر سوداګرو يې ملتیا کوله پاکستان ته د رسمي سفر ترڅ کې چې مشري يې د افغانستان د سوداګرۍ او صنعت وزارت سرپرست کوله د پاکستان سوداګرۍ وزارت له معین ښاغلي محمد صالح احمد فاروقي سره لیدنه ترسره، او په کراچۍ بندر کې يې د افغان سوداګرو ټرانزیټي ستونزې ورسره شریکې او د یادو ستونزو د حل غوښتنه يې وکړه.

ښاغلي مهمند او ښاغلي الکوزي د پاکستان په کراچۍ بندر کې د افغان سوداګرو د ټرانزیټي ستونزو په اړه چې په پایله کې یې له ۳۰۰۰ څخه د زیاتو کانتینرونو د تګ راتګ مخه نیول شوې او ډیر شمیر مالي زیانونه يې سوداګرو ته اړولي دي خبرې وکړې او له پاکستاني چارواکو یې وغوښتل چې ژر تر ژره بند شوي کانټینرونه له مالي جریمې پرته خوشې کړي.
نوموړو دغه راز وړاندیز وکړ چې د شته ټرانزیټي ننګونو د حل او د لا زیاتو اسانتیاوو د رامنځته کولو لپاره باید د دواړو هېوادونو له خوا پر یوه عملي او مناسب میکانیزم کار وشي، څو په راتلونکي کې ورته ستونزې رامنځته نه شي.

د پاکستان د سوداګرۍ وزارت مرستیال د افغانستان د سوداګرۍ او پانګونې اتاق د مشرتابه پلاوي د خبرو له اورېدو وروسته ډاډ ورکړ چې په راتلونکو ناستو کې چې ټاکل شوې ده سبا او بله ورځ د افغانستان د سوداګرۍ او صنعت وزارت سرپرست، د افغانستان د سوداګرۍ او پانګونې اتاق مشرتابه پلاوي او پاکستاني چارواکو په حضور کې ترسره شي په پورته یادو موضوعاتو به بحث او د نظر تبادله ترسره شي.

چهارشنبه، لړم ۲۴مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند د اتاق په مرکزي دفتر کې د قیمتي او نیمه قیمتي ډبرو د صادرونکو شرکتونو له استازو سره وکتل او د یادو شرکتونو پر فعالیت د لوړې ماليې په اړه یې خبرې اترې وکړې.  

د قیمتي او نیمه قیمتي ډبرو صادرونکو د قیمتي ډبرو په ځانګړي ډول د لاجوردو په صادراتو باندې د لوړې مالیې د زیاتوالي په برخه کې خپلې ستونزې د اتاق له مشرتابه سره شریکې کړې او د پورته ذکر شویو ډبرو په صادراتو باندې د لوړې مالیې د کمولو په برخه کې يې د اتاق د مشرتابه د هر اړخیزې همکارۍ غوښتنه وکړه.

ښاغلي مهمند د قیمتي او نیمه قیمتي ډبرو د صادرونکو شرکتونو استازو ته د ښه راغلاست پرمهال د افغانستان د سوداګرۍ او پانګونې اتاق د هېواد د ټولو سوداګرو او پانګوالو ګډ کور وباله او په دې برخه کې یې د اتاق د هر اړخیزې همکارۍ ډاډ ورکړ.

چهارشنبه، لړم ۱۷مه، ۱۴۰۲

د افغانستان د سوداګرۍ او پانګونې اتاق سوداګریزو چارو مرستیال ښاغلي خیرالدین مایل احمدي، د مدیره پلاوي مالي رئیس ښاغلي شیرین آغا سخي او د عامل پلاوي پالیسۍ او تخنیکي مرستیال ښاغلي محمد انور عارفي د وچو شیدو واردوونکو سره لیدنه ترسره او د ګمرکي تعرفې پر لوړوالي يې خبرې اترې وکړې.

د وچو شیدو واردوونکو د مالیې وزارت د ګمرکونو معینیت له خوا د وچو شیدو پر وارداتو د ګمرکي تعرفې د زیاتوالي په اړه خپلې ستونزې د اتاق له مشرتابه سره شریکې کړې او د حل په برخه کې یې د اتاق د هر اړخیزې همکارۍ غوښتنه وکړه.

ښاغلي احمدي د افغانستان د سوداګرۍ او پانګونې اتاق د هېواد د خصوصي سکتور یو مهم ملاتړی وباله او له واردوونکو یې وغوښتل، چې خپل وړاندیزونه او ستونزې په لیکلي ډول اتاق ته وړاندې کړي، څو اتاق وکولای شي د دوی ستونزې له اړوندو دولتي ادارو سره شریکې کړي.

ښاغلي شیرین آغا سخي د کورنیو تولیداتو څخه ګټه اخیستنه د هېواد د هېواد د ځان بسیاینې په لور یو ګام وباله او د پورتنیو ستونزو د حل په موخه یې د اتاق د هر اړخیزې همکارۍ ډاډ ورکړ.

سه شنبه، لړم۲۳مه، ۱۴۰۲

د افغانستان د سوداګرۍ او پانګونې اتاق سوداګریزو چارو مرستیال ښاغلي خیرالدین مایل احمدي د اتاق د کنفرانسونو په تالار کې د وچې او تازه مېوې، درملو او ټوکر له یو شمېر صادرونکو او واردونکو سره لیدنه ترسره او د هندوستان سره د سوداګرۍ برخه کې يې د هغوی د ستونزو په اړه خبرې اترې وکړې.

د بېلابېلو سکتورونو استازو له هند څخه افغان سوداګرو ته د ویزې د ورکړې د اسانتیاوو نشتوالی، د هندي سوداګرو له خوا د افغان سوداګرو د پیسو نه ورکول، هېواد ته د هندي درملو واردولو ته د پوره لاسرسي نشتوالی او د دواړو هېوادونو ترمنځ د سوداګریز باور نشتوالی سترې ننګونې وبللې او د یادو ستونزو او ننګونو حل برخه کې يې د اتاق د همکارۍ غوښتنه وکړه.

ښاغلي خیرالدین مایل احمدي د هېواد د خصوصي سکتور غړو ته د ښه راغلاست او د هغوی د ستونزو د اورېدو وروسته، د یوې داسې کمیټې په جوړولو ټینګار وکړ چې د وارداتو او صادراتو ټول سکتورونه په کې ګډون ولري او له یادو سوداګرو څخه یې وغوښتل چې خپل استازي په لیکلې بڼه اتاق معرفي تر څو د دوی د ستونزو د حل لپاره عملي ګامونه پورته کړی شي.

چهارشنبه، لړم ۱۷مه، ۱۴۰۲

د افغانستان د سوداګرۍ او پانګونې اتاق سوداګریزو چارو مرستیال ښاغلي خیرالدین مایل احمدي او د مدیره پلاوي غړي ښاغلي ضیاءالدین اچکزي په داسی حال کې چې، د زابل، لوګر، بلخ او هرات ولایتي اتاقونو مشرتابه او یو شمیر سوداګرو او پانګوالو هم حضور درلود، د ازبکستان سوداګرۍ اتاق لومړي مرستیال ښاغلي اسلام سره آنلاین ناسته ترسره او د دواړو هېوادونو ترمنځ د سوداګریزو اړیکو په اړه يې خبرې اترې وکړې.

ښاغلي اسلام د دواړو هېوادونو د سوداګرو ترمنځ د سوداګریزې ناستې په اړه چې ټاکل شوې په نږدې راتلونکي کې د ازبکستان د سوداګرۍ اتاق له خوا په تاشکند کې جوړه شي، هر اړخیز معلومات وړاندې کړل او په یاده ناسته کې د ګډون په موخه د افغان سوداګرو او پانګوالو د هڅولو او افغان سکتورونو د معرفي کولو په برخه کې د اتاق د هر ړخیزې همکارۍ غوښتنه وکړه.  

ښاغلي خیرالدین مایل د دا ډول غونډو جوړول د دواړو هېوادونو د سوداګرو ترمنځ د سوداګریزو اړیکو د پراختیا، ګډې پانګونې، د کورنیو تولیداتو د معرفي کولو او همدارنګه د صادراتو او وارداتو د زیاتوالي په برخه کې اړینې وبللې او په یاده ناسته کې د ګډون په موخه د افغان سوداګرو او پانګوالو د هڅولو ډاډ ورکړ.

دوشنبه، لړم ۲۲مه، ۱۴۰۲