د کابل – کندهار لويې لارې د ارغندي سیمې څخه تر دراني بازار پوری د بیارغونې کارونه د یو لړ مراسمو په ترڅ کې، د حکومت د لوړ پوړو چارواکو، د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند او د سیمې مخورو په ګډون پیل شول.

ښاغلي مهمند د کابل - کندهار لویې لارې په اړه چې مرکز او جنوب لویدیځ ولایتونه سره نښلوي او د هیواد له مهمو لویو لارو څخه بلل کیږي یادونه وکړه چې د دې لویې لارې اساسي رغونه به د ناروغانو، مسافرو او د کرنیزو محصولاتو لکه تازه میوو لیږد لپاره لازمې آسانتیاوې رامنځته کړي.

ښاغلي مهمند د افغانستان اسلامي امارت ریاست الوزرا اقتصادي مرستیال څخه د دغه شان سترو پروژو د تطبیق له امله مننه وکړه او د دغه ډول پروژو په تطبیق کې یې د هېواد د خصوصي سکتور د غړو د همکارۍ ډاډ ورکړ. نوموړي په تېرو څو مياشتو کې د هېواد د صادراتو د زياتوالي اعلان وکړ او د ده په وينا "د لويو لارو د حالت په ښه والي سره به د هېواد صادرات زيات شي."

د سوداګرۍ او پانګونې اتاق لومړي مرستيال د دې لويې پروژې د قراردادي شرکتونو له مسوولينو وغوښتل، چې په خپل مسلک کې صداقت او امانت وساتي او د يادو لويو لارو په بيارغونه کې له يو بل سره په همغږۍ کار وکړي.

دغه پروژه به د میدان وردګو ولایت د ارغندي له سیمې څخه تر دراني بازار پورې د ۲۷ کیلومترو په واټن کې په معیاري بڼه ورغول شي.

شنبه، چنګاښ ۲۴مه، ۱۴۰۲

د افغانستان د سوداګرۍ او پانګونې اتاق عامل پلاوي سرپرست  رئیس ښاغلي میرویس هوتک په داسی حال کې چې، د اتاق عامل پلاوي نړیوالو اړیکو ډیپارټمنټ مسؤل امید غفورزي او د عامه اړیکو ډيپارټمنټ مسؤل ښاغلي جان آقا نوید هم حضور درلود، د پراختیا برخه کې د ملګرو ملتونو د ځانګړي استازي له مرستیال آغلې ډینیل انډرس سره لیدنه ترسره او د اتاق فعالیتونو، د امام ابوحنیفه (رح) دویم ملي او نړیوال نندراتون جوړوو، د سوداګرو ښځو ګډون او د سوداګرۍ او پراختیا برخه کې د نړیوالو ادارو رول په اړه خبرې اترې وکړې.

ښاغلي هوتک د امام ابوحنیفه (رح) دویم ملي او نړیوال نندراتون، په دی برخه کې لازم چمتووالي، ګډون کوونکو سکتورونو، سوداګرو ښځو او یو شمیر نورو مسایلو په اړه مفصل معلومات وړاندی او د پراختیا برخه کې د ملګرو ملتونو د ځانګړي استازي له مرستیال وغوښتل چې په یاد نندراتون کې د ګډون کولو له لارې د نندارتون ملاتړ وکړي.

آغلې انډرس د ښځو د تشبثاتو ملاتړ برخه کې د افغانستان د سوداګرۍ او پانګونې اتاق هڅې وستایلې او د ښځو د کاروبار په وړاندی د شته ننګونو په اړه يې خبرې وکړې او د ښځو د تشبثاتو او کاروبار څخه د ملاتړ برخه کې يې د ملګرو ملتونو د ملاتړ ډاډ ورکړ.

آغلې انډرس د امام بوحنیفه (رح) دویم ملي او نړیوال نندارتون د جوړیدو هرکلی وکړ او ورته نندارتونونه يې د کورنیو تولیداتو په ځانګړې توګه د ښځو لاسي صنایعو پيژندګلوۍ برخه کې اړین وبلل.

سه شنبه، چنګاښ ۲۰مه، ۱۴۰۲

د افغانستان د سوداګرۍ او پانګونې اتاق عمومي رئیس ښاغلي توکل احمدیار په داسی حال کې چې، د عامل پلاوي سرپرست رئیس ښاغلي میرویس هوتک او مدیره پلاوي غړي ښاغلي احمد شکیب احمدیار يې ملتیا کوله د امام ابوحنیفه (رح) دویم ملي او نړیوال نندارتون ساحې څخه لیدنه ترسره او د یاد نندارتون د لا ښه جوړولو برخه کې يې د عامل پلاوي کارکوونکو ته لازمې لارښوونې وکړې.

ښاغلي میرویس هوتک د نندارتون د کاري پرمختګ او د بېلابېلو برخو په اړه چې په کې ګډون کوي  هر اړخیز معلومات وړاندې کړل.

د اتاق عمومي رئیس د امام ابو حنیفه (رح) د دویم نندارتون د تر سره کولو په برخه کې د افغانستان د سوداګرۍ او پانګونې اتاق د کارکوونکو هڅې وستایلې او مسوولینو ته یې د دغه نندارتون د ښه جوړېدو په موخه لازمې لارښوونې هم ورکړې.

توکل احمدیار د دغه شان ستر نندارتون جوړېدل د هېواد د اقتصادي ودې او پرمختګ په برخه کې یو مثبت ګام وباله او د دغه نندارتون په ښه شان جوړیدو یې ټینګار وکړ. نوموړي د اتاق له ټولو کارکوونکو وغوښتل، چې د نندارتون په جوړولو کې له يو بل سره همغږي او خپل فعاليتونه له مخکې له ټاکل شوي پلان سره سم ترسره کړي.

پنجشنبه، چنګاښ ۲۲مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په کابل کې د ترکيې سفیر له مرستیال سره لیدنه ترسره، او د امام ابو حنیفه (رح) په دویم ملي او نړیوال نندارتون کې يې د ترکي سوداګرو ګډون څرنګوالي او د ترکي سوداګرو ته د لازمو آسانتیاوو برابرولو په اړه يې خبرې اترې وکړې.

ښاغلي مهمند د امام ابوحنیفه (رح) دویم ملي او نړیوال نندارتون، ګډون کوونکو شرکتونو او کورنیو او بهرنیو ادارو په اړه د مفصلو معلوماتو وړاندی کولو ترڅنګ، د حکومت لخوا د یاد نندارتون د بشپړ امنیت ډاډ ورکړ.
نوموړي په یاد نندارتون کې د ترکي سوداګرو د ګډون هرکلی وکړ او د مرستیال سفیر څخه يې وغوښتل چې د افغان او ترکي سوداګرو د اړیکو غښتلتیا او په هېواد د شته پانګه ایزو فرصتونو څخه د ګټې اخیستنې برخه کې خپله فعاله ونډه ادا کړي.

د ترکيې مرستیال سفیر د دی ستر نندارتون جوړلو په پار د افغانستان د سوداګرۍ او پانګونې اتاق مشرتابه پلاوي هڅې وستایلې او په یاد نندارتون کې يې د ترکي سوداګرو د پراخه ګډون ډاډ ورکړ.

شنبه، چنګاښ ۱۷مه، ۱۴۰۲

د افغانستان اسلامي امارت ریاست الوزار اقتصادي مرستیال ښاغلي ملا عبدالغني برادر، د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د ټولګټو وزارت سرپرست وزیر ښاغلي محمد عیسی ثاني، د اتاق د مدیره پلاوي سوداګریزو چارو مرستیال ښاغلي خیرالدین مایل احمدي، د میدان وردګو ولایت والي ښاغلي قاري بختیار، د پروان والي ښاغلي مولوي عبدالله، د بغلان والي ښاغلي مولوي عبدالرحمن، د اتاق د مدیره پلاوي دارلانشاء رئیس ښاغلي خان محمد سرفراز باز، د اتاق مدیره پلاوي مالي رئیس ښاغلي شیرین آغا سخي، د مدیره پلاوي غړو هر یو ښاغلي ذکریا بریالي او سید پرویز سادات هوفیاني، د اتاق سلاکار ښاغلي حاجي اجمل، او د ډیر شمیر سوداګرو او د سیمې مخورو په حضور کې، د یو لړ مراسمو په ترڅ کې، د سالنګ لويې لارې بیا جوړونې کار پیل شو.
 
ښاغلي عبدالغني برادر د سالنګ لويې لارې پروژه يوه له سترو پروژو څخه وبلله چې د هېواد شمالي او جنوبي ولايتونو سره نښلوي او له قراردادي شرکتونو څخه يې وغوښتل چې د کار کيفيت او سرعت ته په کتو د دغې لويې لارې اهميت ته جدي پاملرنه وکړي.

ښاغلي برادر د قراردادي شرکتونو ترمنځ د لازمې همغږۍ او دوه اړخيزو همکاريو پر رامنځته کولو ټينګار وکړ او په دې برخه کې يې د حکومت د هر اړخيزې مرستې او همکارۍ ډاډ ورکړ.

ښاغلي محمد یونس مهمند د سالنګ لویې لارې د بیارغونې د پیل له امله د افغانستان ټول ولس ته مبارکي وویله او دغه لویه لاره یې د هېواد تر ټولو لوی ترانزیتي سړک یاد کړ چې د هېواد سویلي او شمالي ولایتونه او همدارنګه د منځنۍ اسیا او جنوبي اسیا هېوادونه سره نښلوي. نوموړي د سترو پروژو د تطبیق په برخه کې د هېواد د خصوصي سکتور د همکارۍ ډاډ ورکړ او د دغې سترې پروژې د تطبیق په برخه کې یې د قراردادي شرکتونو تر منځ په صداقت او همغږۍ ټینګار وکړ.

ښاغلي مهمند په بغلان ولایت کې د سوداګرۍ او پانګونې اتاق د جوړېدو په اړه د بغلان ولایت د سوداګرو غوښتنه یاده کړه او د حکومت له مشرتابه یې وغوښتل چې د افغانستان د سوداګرۍ او پانګونې اتاق سره یې په جوړېدو کې همکاري وکړي.
ښاغلي خیرالدین مایل احمدي د سالنګ لویه لاره له اقتصادي او ټولنیز اړخه یوه له مهمو لارو څخه وبلله او د دې لویې لارې بیارغونه یې د اقتصادي ودې او پرمختګ په برخه کې ارزښتناکه وبلله. هغه له قراردادي شرکتونو وغوښتل چې د دې سترې پروژې د تطبیق کیفیت او سرعت ته پام وکړي.

دغه لویه پروژه ۸۰ کیلومتره اوږدوالی لري، چې د پروان له جبل سراج څخه تر د بغلان تر دوشاخ پورې غځیږي او د "وزیرزي ګلوبل ګروپ" او "میر ودان ساختماني انجینرۍ شرکت" په نومونو د دوو لویو ساختماني شرکتونو له خوا رغول کیږي.

پنجشنبه، چنګاښ ۲۲مه، ۱۴۰۲