د افغانستان سوداګرۍ او پانګونې اتاق د بشري سرچینو امریت، د هېواد د پوهنې وزارت په همکارۍ، د اجیرو کارکوونکو د سواد او پوهې د لوړولو په موخه شپږ میاشتنۍ سواد زده کړې پروګرام پيل کړ. د دې پروګرام په پرانست مراسمو کې د اتاق عامل پلاوي مالي او اداري مرستیال سرپرست ښاغلي میرزامان پوپل، حقوقي سلاکار، مالي سرمفتش، او د اتاق د بیلابیلو څانګو مسوولانو شتون درلود.
ښاغلي میرزمان پوپل د دې پروګرام اړتیا او پیل په اړه خبرې وکړې، او زیاته یې کړه: د علم زده کړه پر هر عاقل مسلمان فرض ده او د علم او پوهې ترلاسه کول او کافي سواد درلودل د یو ادارې د کارکوونکو لپاره اساسي اړتیا ګڼل کېږي. هغه، د دې پروګرام مسوولانو ته د زده کړو او د پروګرام د ښه پرمختګ په برخه کې لازمې لارښوونې ورکړې.
