د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په داسی حال کې چې، د اتاق عامل پلاوي سرپرست رئیس ښاغلي میرویس هوتک او د نړیوالو اړیکو ډيپارټمنټ مسؤل ښاغلي امید غفورزي يې ملتیا کوله، د افغانستان لپاره د ایران سفارت سوداګریزې آتشې ښاغلي حسین روستايي سره لیدنه ترسره او د دواړو هېوادونو ترمنځ د سوداګریزو اړیکو په اړه يې خبرې اترې وکړې.

ښاغلي روستايي د سیمې او نړۍ د سوداګرو ترمنځ د نندارتون او سوداګریزې غونډې په اړه چې په نږدې راتلونکي کې د ایران د سوداګرۍ اتاق او د ایران د صنعت او سوداګرۍ وزارت له خوا په تهران کې جوړیږي، تفصیلي معلوماتو وړاندی کولو ترڅنګ، د افغانستان د سوداګرۍ اتاق له مشرتابه يې وغوښتل چې، په یاد نندارتون کې د ګډون په موخه، افغان سوداګر او پانګوال وهڅوي.  

ښاغلي مهمند په هېواد کې د سوداګرۍ او پانګونې شته فرصتونه، سوداګریزې اړیکې او په تېرو څو کلونو کې د افغانستان او ایران د ګڼو ناستو لاسته راوړنې مهمې وبللې او د دواړو هېوادونو ترمنځ یې د سوداګرۍ پر پراختیا د ټنګار کولو ترڅنګ، په یاد نندارتون کې د افغان سوداګرو او پانګوالو هڅولو برخه کې د اتاق د هر اړخیزې همکارۍ ډاډ ورکړ.  

سربیره پردی، ښاغلي مهمند د دغه شان نندارتونونو او کنفرانسونو جوړول د سوداګرۍ د ودې او د هېواد د توليدي محصولاتو د معرفي کولو لپاره يو ښه چانس وباله او د اتاق عامل پلاوي مسؤلینو ته يې دنده ورکړه چې، د هیواد د بیلابیلو تولیدي، سوداګریزو او خدماتي سکتورونو د اتحادیو مشرانو او مسؤلینو ته بلنه ورکړي او د یاد نندارتون په اړه ورته هر اړخیز معلومات وړاندی کړي.

چهارشنبه، لیندۍ ۱۵مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند د اتاق عامل پلاوي سرپرست رئیس ښاغلي میرویس هوتک او د پالیسۍ او تخنیکي مرستیال ښاغلي محمد انور عارفي په ملتیا د لوی نظارت اقتصاد سکتور له رئیس ښاغلي محمد نعمان ابو طیب سره د لیدنې په ترڅ کې،  هغه ته د اتاق د فعالیتونو او لاسته راوړنو په اړه معلومات وړاندی کړل.

ښاغلي مهمند د افغانستان د سوداګرۍ او پانګونې اتاق یوه خپلواکه، غیر سیاسي، غیر انتفاعي اداره وبلله چې له ۹۰ کلونو ډیرې مودې راهیسې د هېواد سوداګرو او پانګوالو ته سوداګریز خدمات وړاندې کوي. نوموړي د افغانستان د سوداګرۍ او پانګونې اتاق رول د اقتصادي ودې او پراختیا، زیربنایي پروژو تطبیق او کار موندنې په برخه کې مهم وباله او د سوداګرۍ او پانګونې په برخه کې یې له اړوندو دولتي ادارو سره د اتاق د همکارۍ ډاډ ورکړ.

ښاغلي ابو طیب د سوداګرۍ او پانګونې اتاق لاسته راوړنې وستایلې او د لوی نظارت ادارې، فعالیتونو او مسوولیتونو په اړه یې هر اړخیز معلومات وړاندې کړل او د سوداګرۍ اتاق له مشرتابه څخه یې وغوښتل چې، د هېواد سوداګرو او پانګوالو ته د سوداګریزو او پانګه ایزو خدماتو وړاندی کولو برخه کې د حکومت د مشرتابه د فرامینو تطبیق ته جدي پاملرنه وکړي.

شنبه، لیندۍ ۱۱مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په داسی حال کې چې، د اتاق عامل پلاوي سرپرست ښاغلي میرویس هوتک، د کندهار سوداګرۍ او پانګونې اتاق رئیس ښاغلي محمد صدیق مهمند، د مرکزي اتاق ستر سلاکار ښاغلي حاجي شرف الدین او د هرات ولایتي اتاق اجرائیوي مدیر ښاغلي یوسف امین يې ملتیا کوله د افغانستان لپاره د چین له سفیر ژاوشینګ سره لیدنه ترسره، او د سوداګریزو اړیکو پراختیا، پانګونې فرصتونو او افغان سوداګرو ستونزو په اړه يې خبرې اترې وکړې.

ښاغلي محمد یونس مهمند د هرات ولایت زلزله ځپلو سره د چین بشردوستانه مرستې او د هرات او کندهار ولایتي اتاقونو مشرتابه پلاوو رابلل وستایل او په افغانستان کې د شته پانګه ایزو فرصتونو، د دواړو هېوادونو ترمنځ د ځمکني دهلیز رامنځته کولو له لارې د سوداګریزو راکړو ورکړو زیاتوالي او د افغان سوداګرو ویزو ستونزو یادونه يې وکړه.
نوموړي د ټولیز امنیت تامین، د فساد له منځه تلل او د کوکنارو د کښت مخنیوی په افغانستان کې د پانګونې ښه فرصتونه وبلل او د چین له سفیر څخه یې وغوښتل چې افغان سوداګرو ته د ویزو د ورکړې د ستونزې د حل په برخه کې لا زیاتې اسانتیاوې رامنځته کړي او چیني سوداګر په افغانستان کې بیلا بیلو سکتورونو کې پانګونې ته وهڅوي.  

ښاغلي محمد صدیق مهمند په کندهار کې د پانګونې د فرصتونو، له چین سره د سوداګرۍ په پراختیا کې د دغه ولایت د سوداګرو د لېوالتیا او افغان سوداګرو ته د ویزو د ترلاسه کولو په برخه کې د ستونزو په اړه خبرې وکړې او د چین سفیر ته یې بلنه ورکړه چې کندهار ته سفر وکړي او له نږدې د یاد ولایت د پانګونې فرصتونه وګوري.

ښاغلي یوسف امین له چین سره د هرات ولایت پراخو سوداګریزو اړیکو، له چین څخه د خامو موادو په واردولو کې د هرات د تولیدي فابریکو اړتیاوو پوره کولو او له هغه هېواد سره د هرات د سوداګرو د ویزې ستونزې ته اشاره وکړه او دغه راز یې له چین څخه د افغانستان صادراتو ته د ترجیحي تعرفو د ورکړې له امله مننه وکړه.

ښاغلي هوتک د ګډو نندارتونونو جوړولو په ځانګړي ډول په چین کې د افغاني محصولاتو د نندارتون په ترسره کولو او د اتاق د کارکوونکو د ظرفیتونو په لوړولو باندې د ټینګار کولو ترڅنګ، له دغه هېواد سره د پخوانیو همکاریو د دوام په اړه زیاته کړه چې پخوا د چین سفارت د اتاق په رسمي مکتوب او د سوداګریزو شرکتونو د بلنې له مخې هره اونۍ د هېواد لس تنه سوداګرو ته ویزې ورکولې او نوموړي د دې پروسې د دوام غوښتنه وکړه.

ښاغلي ژاوشینګ د اتاق مشرتابه ته د ښه راغلاست په ترڅ کې د هرات له زلزله ځپلو سره د چين د مرستو پر دوام او د سوداګريزو اړيکو پر پراختيا ټينګار وکړ او په آمو سیند او نورو ولايتونو کې يې د چين د پانګونې يادونه وکړه. نوموړي د ویزې د ورکړې په اړه وویل "د چین سفارت به هڅه وکړي چې افغان سوداګرو ته د ویزې د ورکړې په برخه کې لا زیاتې اسانتیاوې رامنځته کړي."

د چین سفیر زیاته کړه چې یو چینایي پانګوال په افغانستان کې د جلغوزیو د پروسس په برخه کې پانګونې ته لېواله دی او ژمنه یې وکړه چې نور چینايي پانګوال به هم په افغانستان کې پانګونې ته وهڅوي. همدارنګه، د چین سفیر کندهار او هرات ولایتونو ته د خپل سفر په اړه ډاډ ورکړ.

دوشنبه، لیندۍ ۱۳مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په داسی حال کې چې، د مدیره پلاوي غړي ښاغلي محمد داود یوسفزي، د کابل سوداګرۍ او پانګونې اتاق لومړي مرستیال ښاغلي احمد شاه حکیمي او د اتاق سلاکار امید حیدري په حضور کې، د هرات ولایت د سبزیو او تازه میوې له رئیس ښاغلي حاجي اسحاق سره د لیدنې په ترڅ کې، د یاد ولایت د تازه میوو او سبزیو لپاره د مارکیټ جوړولو په اړه يې خبرې اترې وکړې.

ښاغلي اسحاق د هرات ولایت د تازه میوو او سبزیو د څلورو مارکیټونو یادونه وکړه او د میوو او سبزیجاتو د یوه لوی مارکیټ جوړیدل چې په نړیوالو معیارونو برابر دي او سړې خونې، پروسس او بسته بندي په کې شامل دي اړین وباله. نوموړي د اتاق له مشرتابه وغوښتل، چې د ياد مارکېټ د جوړولو لپاره د ځمکې د تخصيص په برخه کې له اړوندو حکومتي ادارو سره په همغږۍ همکاري وکړي.

ښاغلي مهمند ښاغلي اسحق او ورسره ملګري ټیم ته د ښه راغلاست په ترڅ کې په هرات ولایت کې د میوو او سبزیو د یوه لوی مارکیټ د جوړولو لپاره د ځمکې په تخصیص او د اړوندو ادارو سره په همغږۍ او د سړو خونو په جوړولو کې د اتاق د همکارۍ ډاډ ورکړ. نوموړي د هرات او غزني په ګډون د هېواد بېلابېل ولایتونو کې د زېرمه کولو او صادرلو په موخه د سړو خونو جوړول مهم وبلل.
نوموړي د هېواد له ټولو سوداګرو او پانګوالو وغوښتل چې په ګډه د لمریزې انرژۍ په کارولو سره د معیاري سړو خونو په جوړولو کې ونډه واخلي.

د اتاق لومړي مرستیال له ښاغلي اسحق څخه وغوښتل چې خپل وړاندیزونه او ستونزې په لیکلې بڼه اتاق ته وسپاري، تر څو دغه اتاق وکولای شي د ځمکو د استملاک او عملي کار په اړه له اړوندو دولتي ادارو سره خبرې وکړي.

شنبه، لیندۍ ۱۱مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د مدیره پلاوي غړي ښاغلي خان جان الکوزي او د عامل پلاوي سرپرست رئیس ښاغلي میرویس هوتک د کندهار سوداګرۍ او پانګونې اتاق رئیس ښاغلي محمد صدیق مهمند او د پکتیکا سوداګرۍ او پانګونې اتاق رئیس ښاغلي ضیاءالحق وزیرزي سره لیدنه ترسره، او د یادو ولایتي اتاقونو د فعالیتونو، لاسته راوړنو او خدماتو څرنګوالي په اړه يې خبرې اترې وکړې.

ښاغلي محمد صديق مهمند د کندهار د سوداګرۍ او پانګونې اتاق د فعاليتونو او لاسته راوړنو او د دغه ولايت د سوداګرو او پانګوالو د شته ستونزو په اړه معلومات وړاندې کړل او د مرکزي اتاق له مشرتابه يې وغوښتل چې د سوداګرو د شته ستونزو په حل کې همکاري وکړي.

ښاغلي ضیاالحق وزیرزي د پکتیکا د سوداګرۍ او پانګونې اتاق د پکتیکا ولایت د سوداګرو لپاره د سوداګریزو خدمتونو د وړاندې کولو په برخه کې یو له فعالو اتاقونو څخه وګاڼه او د یاد اتاق د شته ستونزو یادونه یې وکړه.
نوموړي د مرکزي اتاق له مشرتابه وغوښتل، چې د پکتیکا ولایت د سوداګرۍ او پانګونې اتاق لپاره د ځمکې د اخیستلو او ودانیزو چارو په برخه کې د بودیجې تخصیص ته جدي پاملرنه وکړي.

ښاغلي محمد یونس مهمند د کندهار او پکتیکا اتاقونو د رئیسانو د خبرو له اوریدو وروسته د یادو اتاقونو بی سارې هلې او ځلې او نه مخینه لرونکي فعالیتونه وستایل او ژمنه یې وکړه چې د یادو اتاقونو د ستونزو په حل کې به هر ډول همکاري کوي.
نوموړي د افغانستان د سوداګرۍ او پانګونې اتاق له سرپرست څخه وغوښتل، چې د پکتیکا د سوداګرۍ اتاق د وضعیت څېړلو په موخه دې یاد ولایت ته یو پلاوی واستوي.

دوشنبه، لیندۍ ۱۳مه، ۱۳۰۲