د افغانستان د سوداګرۍ او پانګونې اتاق د امام ابوحنیفه (رح) د نندارتون د پرانېستې تر څنګ د کورنیو او بهرنیو سوداګرو او پانګوالو د پیوستون او د سیمې د هېوادونو ترمنځ د سوداګریزو اړیکو د ښه کولو په هدف کابل سرینا هوټل کې د ګڼو سوداګرو او کورنیو او بهرنیو پانګوالو په ګډون د سوداګریزو اړیکو کنفرانس هم جوړ کړ.

په دغه کنفرانس کې د افغانستان د سوداګرۍ او پانګونې اتاق عمومي رئیس ښاغلي توکل احمدیار، د مدیره پلاوي لومړي مرستیال ښاغلي محمد یونس مهمند، د مدیره پلاوي سوداګريزو چارو مرستیال ښاغلي خیرالدین مایل احمدي، خدماتي چارو مرستیال ښاغلي نصیر احمد عرب، د دارلانشاء رئیس ښاغلي خان محمد سرفراز باز، مالي رئیس ښاغلي شیرین آغا سخي، د نړیوالو اړیکو رئیس ښاغلي انجنیر سید جاوید برهان، د مدیره پلاوي غړو هر ښاغلي خان جان الکوزي، ذکریا بریالي، جان آقا صادقي، فواد احمد دوست، احمد ضیاء عظیمي شینوزاده او احمد شکیب احمدیار، د اتاق څارنې پلاوي رئیس ښاغلي عبدالحامد حمیدي، د اتاق عامل پلاوي سرپرست رئیس ښاغلي میرویس هوتک، د کابل سوداګرۍ او پانګونې اتاق مدیره پلاوي لومړي مرستیال ښاغلي محمد احمد شاه حکیمي او د پاکستان، ترکیې، ایران او ترکمنستان هېوادونو مطرح سوداګرو هم حضور درلود.
 
ښاغلي توکل احمدیار په دغه کنفرانس کې د کورنیو او بهرنیو مېلمنو په ځانګړي ډول د پاکستان، ترکیې او ترکمنستان د سوداګریزو هیئتونو حضور ته ښه راغلاست ووایه او د هغوی ګډون یې د سوداګریزو او اقتصادي اړیکو د پیاوړتیا په برخه کې د ژورې مینې او ژمنتیا نښه وبلله.
نوموړي افغانستان د بې ساري طبيعي زېرمو او ډېرو اسانتياوو، د سوداګرۍ او پانګونې په برخه کې د لوړ ظرفيت لرونکي هېواد په توګه ياد کړ او د سوداګرۍ د چاپېريال د ښه والي او د بهرنۍ پانګونې د جلبولو لپاره يې تدبيرونه نيولي دي.

ښاغلي احمدیار زیاته کړه "د سوداګریزو اړیکو دغه کنفرانس د معلوماتو د تبادلې، د سوداګریزو اړیکو د رامنځته کولو او ګډې پانګونې لپاره یو ښه فرصت دی. الحمدلله افغانستان اوس په سیمه کې یو له باثباته هیوادونو څخه شمیرل کیږي او له حکومت څخه یې مننه وکړه چې د فساد د له منځه وړلو، د سوداګرۍ او پانګونې د قوانینو د اسانتیا او د امنیت د تامین په برخه کې یې جدي اقدامات کړي دي."
د سوداګرۍ اتاق عمومي رئيس د دغه کنفرانس له ټولو ګډونوالو څخه مننه وکړه او هيله يې څرګنده کړه، چې د دغه پروګرام په ترڅ کې به د نويو سوداګريزو اړيکو د رامنځته کولو، د تجربو د لېږد او د ګډو همکاريو د زياتوالي زمينه برابره شي.

ښاغلي محمد یونس مهمند په دې کنفرانس کې له ټولو ګډونوالو څخه مننه وکړه او له بهرنیو سوداګرو یې وغوښتل چې په بېلابېلو برخو په ځانګړې توګه د ټرانسپورټ سکتور، د انرژۍ په تولید او د سیمې د هېوادونو ترمنځ د ترانزیت د پیاوړتیا په برخه کې پانګونه وکړي.
د اتاق مدیره پلاوي لومړي مرستيال د امام ابوحنيفه (رح) د نندارتون او د سوداګريزو اړيکو د کنفرانس په جوړولو کې د اتاق له عامل پلاوي رئيس او کارکوونکو څخه مننه وکړه.
ښاغلي مهمند له افغان سوداګرو سره د ګاونډیو هېوادونو په ځانګړې توګه پاکستان، ایران، ترکیې او ترکمنستان د هر اړخیزو همکاریو قدرداني وکړه.

ښاغلي خیرالدین مایل احمدي د امام ابوحنیفه (رح) په نندارتون کې د سیمې د هېوادونو له سوداګریزو هیئتونو څخه د مننې په ترڅ کې د سوداګریزو اړیکو کنفرانس د سوداګرو د یو بل سره د پیوست کولو په برخه کې ګټور وباله او له بهرنیو سوداګرو یې وغوښتل په بېلابېلو سکټورونو کې د پانګونې په برخه کې له افغان سوداګرو سره په ګډه کار وکړي.

خان جان الکوزي د دغه کنفرانس ټولو ګډونوالو ته د ښه راغلاست په ترڅ کې د افغان – پاک ګډ اتاق د همکاریو او لاسته راوړنو یادونه وکړه او په بېلابېلو برخو کې یې له شته فرصتونو څخه په استفادې ټینګار وکړ.

دغه راز په دغه کنفرانس کې د صنعت او سوداګرۍ، کانونو او پټرولیم، ښار جوړونې او کور جوړونې، عامې روغتیا وزارتونو او د ملي تدارکاتو ادارې استازو د پانګونې د شته فرصتونو او ممکنو امکاناتو په اړه خپل معلوماتي او منظم پریزنټیشنونه وړاندې کړل. د کانونو په سکټور کې اسانتیاوې، د عامه او خصوصي مشارکت او همدارنګه د دې وزارتونو لخوا پلي شوي پروژې ګډونوالو ته وړاندې شوې.

یکشنبه، چنګاښ ۲۵مه، ۱۴۰۲

د کابل – کندهار لويې لارې د ارغندي سیمې څخه تر دراني بازار پوری د بیارغونې کارونه د یو لړ مراسمو په ترڅ کې، د حکومت د لوړ پوړو چارواکو، د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند او د سیمې مخورو په ګډون پیل شول.

ښاغلي مهمند د کابل - کندهار لویې لارې په اړه چې مرکز او جنوب لویدیځ ولایتونه سره نښلوي او د هیواد له مهمو لویو لارو څخه بلل کیږي یادونه وکړه چې د دې لویې لارې اساسي رغونه به د ناروغانو، مسافرو او د کرنیزو محصولاتو لکه تازه میوو لیږد لپاره لازمې آسانتیاوې رامنځته کړي.

ښاغلي مهمند د افغانستان اسلامي امارت ریاست الوزرا اقتصادي مرستیال څخه د دغه شان سترو پروژو د تطبیق له امله مننه وکړه او د دغه ډول پروژو په تطبیق کې یې د هېواد د خصوصي سکتور د غړو د همکارۍ ډاډ ورکړ. نوموړي په تېرو څو مياشتو کې د هېواد د صادراتو د زياتوالي اعلان وکړ او د ده په وينا "د لويو لارو د حالت په ښه والي سره به د هېواد صادرات زيات شي."

د سوداګرۍ او پانګونې اتاق لومړي مرستيال د دې لويې پروژې د قراردادي شرکتونو له مسوولينو وغوښتل، چې په خپل مسلک کې صداقت او امانت وساتي او د يادو لويو لارو په بيارغونه کې له يو بل سره په همغږۍ کار وکړي.

دغه پروژه به د میدان وردګو ولایت د ارغندي له سیمې څخه تر دراني بازار پورې د ۲۷ کیلومترو په واټن کې په معیاري بڼه ورغول شي.

شنبه، چنګاښ ۲۴مه، ۱۴۰۲

د امام ابوحنیفه (رح) دویم ملي او نړیوال نندارتون د ۷ ورځو لپاره د (۱۴۰۲ کال د چنګاښ له ۲۵ تر ۳۱) د لوړ پوړو دولتي چارواکو، د افغانستان د سوداګرۍ او پانګونې اتاق مشرتابه پلاوي، د سیمې د یو شمېر هېوادونو د سفیرانو او سوداګریزو استازو، د مختلفو اتاقونو رئیسانو او د سوداګرو، پانګوالو او د ملي او نړیوالو رسنیو په حضور کې په کابل ښار کې پرانیستل شو.

دغه نندارتون د سوداګرۍ او صنعت وزارت او د حکومت سکتوري وزارتونو، د کانونو او صنعت اتاق، د ښځو اتاق، د کسبګرو اتاق او د کرنې او مالدارۍ اتاق په همکارۍ د افغانستان نړیوال نندراتونونو مرکز کې جوړ چې د افغانستان د سوداګرۍ او پانګونې اتاق عمومي رئیس ښاغلي توکل احمدیار، د مدیره پلاوي لومړي مرستیال ښاغلي محمد یونس مهمند، د مدیره پلاوي سوداګريزو چارو مرستیال ښاغلي خیرالدین مایل احمدي، خدماتي چارو مرستیال ښاغلي نصیر احمد عرب، د دارلانشاء رئیس ښاغلي خان محمد سرفراز باز، مالي رئیس ښاغلي شیرین آغا سخي، د نړیوالو اړیکو رئیس ښاغلي انجنیر سید جاوید برهان، د مدیره پلاوي غړو هر ښاغلي خان جان الکوزي، ذکریا بریالي، جان آقا صادقي، فواد احمد دوست، احمد ضیاء عظیمي شینوزاده او احمد شکیب احمدیار، د اتاق څارنې پلاوي رئیس ښاغلي عبدالحامد حمیدي، د اتاق عامل پلاوي سرپرست رئیس ښاغلي میرویس هوتک، د کابل سوداګرۍ او پانګونې اتاق مدیره پلاوي لومړي مرستیال ښاغلي محمد احمد شاه حکیمي او د یاد اتاق مدیره پلاوي نورو غړو په حضور کې پرانیستل شو.
 
ښاغلي احمدیار د امام ابوحنیفه (رح) د دویم ملي او نړیوال نندارتون د ترسره کیدو د اهمیت په اړه د وینا په ترڅ کې وویل: د امام ابوحنیفه (رح) نندارتون د افغانستان د سوداګرۍ او پانګونې اتاق په نوښت د هېواد د سوداګریزو او اقتصادي فعالیتونو ملاتړ او پراختیا په موخه هر کال په لاره اچول کېږي، دا نندارتون په افغانستان کې لومړنی او ستر نندارتون دی، چې د لومړي ځل لپاره یې کورنیو، سیمه ییزو او نړیوالو سوداګرو او صنعتکارانو ته د ګډون او نظرونو تبادلې زمینه برابره کړې ده.
د اتاق عمومي رئیس د مناسبو خدمتونو او باکیفیته محصولاتو د وړاندې کولو په برخه کې د افغانستان د خصوصي سکټور د جدي هڅو یادونه وکړه او د ده په وینا، په دې برخه کې د یوې غیر دولتي او غیر انتفاعي موسسې په توګه چې له دولت سره اوږه په اوږه کار کوي، پراخ دولتي ملاتړ ته اړتیا لري.

هغه زیاته کړه "اتاق توانېدلی چې په رامنځته شویو بحرانونو کې د حکومت او خلکو تر څنګ ودرېږي، له همدې امله حکومت باید د خصوصي سکتور د پیاوړتیا لپاره لاندې تدابیر په نظر کې ونیسي: د هېواد له سوداګریزو او اقتصادي ټولنو سره په همغږۍ د سوداګرو، پانګوالو او صنعتکارانو د امنیت د تامین په موخه د یوه خودکفا، تولیدي او صادراتي افغانستان په ځانګړې توګه د قیمتي ډبرو، تازه او وچو میوو د صادراتو په برخه کې د پالیسۍ جوړول، د هېواد زعفران، لاسي صنايع، طبي بوټي، غالۍ او نور سوداګريز توکي د سيمې او نړۍ بازارونو ته وړاندې کول؛ د ګمرکي اسنادو په پروسه کې د رياستونو د بيروکراسۍ ختمول، د سيمه ييزو معيارونو سره سم د ګمرکونو بيارغونه او جوړول، د بهرنۍ پانګونې د راجلبولو لپاره د اړوندو قوانينو تعديل.

ښاغلي محمد یونس مهمند د امام ابوحنیفه (رح) د دویم نندارتون په اړه هر اړخیز معلومات وړاندې کړل او د ټولو ګډون کوونکو سکتورونو، د پاکستان، ایران، ترکیې او ترکمنستان د سوداګریزو هیئتونو او د اړوندو دولتي ادارو څخه یې د ګډون له امله مننه وکړه.
ښاغلي مهمند افغانستان په سیمه کې یو ترانزیتي هیواد وباله او له حکومتي چارواکو یې وغوښتل چې د ټرانزیټ قانون ژر تر ژره عملي کړي څو په دې برخه کې شته ستونزې هوارې شي.
هغه له بهرنیو سوداګرو او پانګوالو وغوښتل چې د زیربنایي پروژو په پلي کولو کې له افغان سوداګرو سره په ګډه پانګونه وکړي.

د مدیره پلاوي لومړي مرستيال په هېواد کې دننه د پانګونې د جلب لپاره شرايط مناسب وګڼل او په ټول هېواد کې يې د امنيت د تامين، د اداري فساد د پام وړ کموالى او په ټول هېواد کې د کوکنارو د کښت د مخنيوي اعلان وکړ. ښاغلي مهمند د افغانستان د سوداګرۍ او پانګونې اتاق د ۱۸ پوړیزې پروژې د بیا پیلولو په برخه کې د دولت له مشرتابه څخه وغوښتل چې د دغه بنسټ سره بشپړه همکاري وکړي او د هېواد د خصوصي سکتور په مشرۍ د دغې سترې پروژې د کار د پیل اجازه ورکړي.

د ریاست الوزرا اقتصادي مرستیال د دغه شان ستر نندارتون په جوړولو کې د افغانستان د سوداګرۍ او پانګونې اتاق هڅې وستایلې او د دغه ډول نندارتونونو جوړول یې د کورنیو تولیداتو د معرفي کولو لپاره مهم وبلل. نوموړي په هېواد کې د لويو پروژو د پيل په ځانګړي ډول د سالنګ لويې لارې د معياري بيارغونې او د کابل-کندهار د لويې لارې د اساسي بيارغونې په اړه معلومات وړاندې کړل او په اقتصادي برخه کې يې د حکومت راتلونکي پلانونه بيان کړل.

د صنایعو او سوداګرۍ وزارت سرپرست د افغانستان د سوداګرۍ او پانګونې اتاق له خوا د دغه ډول ستر نندارتون جوړول د هېواد د اقتصادي ودې او پرمختګ په لور یو ګام وباله او دغه نندارتون ته یې د سیمې له هېوادونو څخه د سوداګریزو پلاوو د رابللو له امله د دغه اتاق له مشرتابه مننه وکړه. هغه له ټولو کورنیو او بهرنیو پانګوالو وغوښتل چې د صنعت، سوداګرۍ او کرنې په برخو کې ګډه پانګونه وکړي.

په افغانستان کې د اروپايي ټولنې شارژدافیر مېرمن رفیلا لودیس د هېواد د کارموندنې او اقتصادي ودې په برخه کې د خصوصي سکټور رول مهم وباله او د افغانستان له خصوصي سکټور سره یې د خپلو مرستو او همکاریو ډاډ ورکړ.

د کرنې وزارت سرپرست د هېواد د کرنیزو محصولاتو په معرفي کولو کې د نندارتونونو رول مهم وباله او د دغه ډول ستر نندارتون د جوړېدو هرکلی یې وکړ. نوموړي د هېواد له سوداګرو وغوښتل، چې د هېواد د تازه مېوو د صادراتو او کرنيزو محصولاتو په برخه کې لا ډېرې هڅې وکړي.

په دغه ستر نندارتون کې د سیمې د هېوادونو استازو لکه: د پاکستان د سوداګرۍ د پراختیا ادارې رئیس محترم زبیر موتي والا، د افغانستان – ترکیې د سوداګرۍ د شورا رئیس سلیمان سیلیو خبرې وکړې او د دغه شان ستر نندارتون د جوړېدو هرکلی یې وکړ.

یکشنبه، چنګاښ ۲۵مه، ۱۴۰۲

د افغانستان د سوداګرۍ او پانګونې اتاق عمومي رئیس ښاغلي توکل احمدیار په داسی حال کې چې، د عامل پلاوي سرپرست رئیس ښاغلي میرویس هوتک او مدیره پلاوي غړي ښاغلي احمد شکیب احمدیار يې ملتیا کوله د امام ابوحنیفه (رح) دویم ملي او نړیوال نندارتون ساحې څخه لیدنه ترسره او د یاد نندارتون د لا ښه جوړولو برخه کې يې د عامل پلاوي کارکوونکو ته لازمې لارښوونې وکړې.

ښاغلي میرویس هوتک د نندارتون د کاري پرمختګ او د بېلابېلو برخو په اړه چې په کې ګډون کوي  هر اړخیز معلومات وړاندې کړل.

د اتاق عمومي رئیس د امام ابو حنیفه (رح) د دویم نندارتون د تر سره کولو په برخه کې د افغانستان د سوداګرۍ او پانګونې اتاق د کارکوونکو هڅې وستایلې او مسوولینو ته یې د دغه نندارتون د ښه جوړېدو په موخه لازمې لارښوونې هم ورکړې.

توکل احمدیار د دغه شان ستر نندارتون جوړېدل د هېواد د اقتصادي ودې او پرمختګ په برخه کې یو مثبت ګام وباله او د دغه نندارتون په ښه شان جوړیدو یې ټینګار وکړ. نوموړي د اتاق له ټولو کارکوونکو وغوښتل، چې د نندارتون په جوړولو کې له يو بل سره همغږي او خپل فعاليتونه له مخکې له ټاکل شوي پلان سره سم ترسره کړي.

پنجشنبه، چنګاښ ۲۲مه، ۱۴۰۲

د افغانستان د سوداګرۍ او پانګونې اتاق عمومي رئیس ښاغلي توکل احمدیار، د مدیره پلاوي غړو هر یو ښاغلي خان جان الکوزي، سید پرویز سادات هوفیاني، ذکریا بریالي، جان آقا صادقي او احمد شکیب احمدیار په داسی حال کې چې، د اتاق عامل پلاوي سرپرست رئیس ښاغلي میرویس هوتک، د څارنې پلاوي منشي ښاغلي عبدالمتین قلندري او د کابل سوداګرۍ او پانګونې اتاق مدیره پلاوي لومړي مرستیال ښاغلي احمد شاه حکیمي يې ملتیا کوله د امام ابو حنیفه (رح) دویم ملي او نړیوال نندارتون د جوړیدو له ځای څخه لیدنه ترسره او د یاد نندارتون د پرانیستې مراسمو د په ښه ډول ترسره کیدو په موخه يې د عامل پلاوي کارکوونکو ته لازمې لارښوونې وکړې.

ښاغلي هوتک د کار د پرمختګ او د دغه نندارتون د ترسره کیدو لپاره د لازمو تیاریو په اړه د اتاق مشرتابه ته هر اړخیز معلومات وړاندې کړل.

د اتاق عمومي رئیس او مدیره پلاوي نورو غړو د امام ابوحنیفه (رح) د دویم نندارتون په ترسره کولو کې د افغانستان د سوداګرۍ او پانګونې اتاق د کارکوونکو له هڅو خوښي څرګنده کړه او د پرانیستې مراسمو او سوداګریز پیوستون د په ښه ډول جوړولو برخه کې یې مسؤلینو ته لازمې وکړې.

شنبه، چنګاښ ۲۴مه، ۱۴۰۲