د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند ترکيې ته د خپل کاري سفر په ترڅ کې، په داسی حال کې چې د اتاق سوداګریزو چارو مرستیال ښاغلي خیرالدین مایل احمدي، خدماتي مرستیال ښاغلي نصیر احمد عرب، د افغان-پاک ګډ اتاق رئیس او د مدیره پلاوي غړي ښاغلي خان جان الکوزي، د کابل اتاق مدیره پلاوي لومړي مرستیال ښاغلي احمد شاه حکیمي او کورنیو سوداګرو او پانګوالو يې ملتیا کوله په افغانستان کې د امریکا متحده ایالاتو د ماموریت شارژدافیرې آغلې کرن دیکر، د افغانستان لپاره د انګلستان سفارت شارژدافیر ښاغلي چترت دیکسن، د ایټالیې استازي، د امریکا متحده ایالاتو پراختیا نړیوالې ادارې (USAID) او د ۷۷ نړیوال شرکت رئیس ښاغلي سلیمان سره لیدنه ترسره کړه.
   
ښاغلي مهمند د هېواد د اوسنيو شرايطو په اړه مفصل معلومات وړاندې کړل او زیاته يې کړه "د افغانستان اقتصادي وضعيت د ډاډ وړ او په ټوليز ډول د امنيت تامين، د کوکنارو د کښت د مخنيوي، په هېواد کې د اداري فساد د پام وړ کموالى او واحد حکومتوالى، د پانګونې او سوداګرۍ چټکتیا لپاره ښه شرايط رامنځته کړي دي.
نوموړي د بهرنيو هېوادونو له استازو وغوښتل، چې د کوکنارو د کرکيلې پر وړاندې مبارزه کې له کروندګرو سره همکاري وکړي او د مناسبو بديلونو په لټه کې شي او بهرني پانګوال په افغانستان کې پانګونې ته وهڅوي.

د اتاق لومړي مرستیال د بهرنیو هېوادونو له خوا افغان سوداګرو ته د ویزو نه ورکول، د ټرانزیټ په برخه کې د مالونو د لېږد لپاره د معیاري لویو لارو نشتوالی او په هېواد کې خپلو بانکي زیرمو ته د سوداګرو او خلکو نه لاسرسی د افغانستان یو له بنسټیزو ستونزو څخه وبلل او د بهرنیو هېوادونو له استازو څخه يې وغوښتل چې د اوسنیو فرصتونو په پام کې نیولو سره د پورته یادو ستونزو په حل کې همکاري وکړي.
نوموړي په هېواد کې د بشردوستانه مؤسسو له خوا د عامه المنفعه پروژو پر تطبیق ټینګار وکړ.

افغان سوداګرو او پانګوالو د هېواد سوداګرو ته د لازمو اسانتیاوو د برابرولو په برخه کې د حکومت له هڅو خوښي څرګنده کړه او اوسنی چاپېریال یې د ګډې پانګونې لپاره مناسب وباله.

د لوېدیځو هېوادونو استازو د اتاق د لومړي مرستیال او افغان سوداګرو د خبرو له اورېدو وروسته، د افغانستان له خلکو سره د مرستو په رسولو او د یادو ستونزو د حل په برخه کې د همکارۍ ډاډ ورکړ.

شنبه، تلې ۸مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د اتاق سوداګریزو چارو مرستیال ښاغلي خیرالدین مایل احمدي، د اتاق دالانشاء رئیس ښاغلي خان محمد سرفراز باز، د اتاق مدیره پلاوي غړو هر یو ښاغلي خان جان الکوزي او احمد ضیاء عظیمي شینوزاده، د عامل پلاوي سرپرست رئیس ښاغلي میرویس هوتک، د اتاق عامل پلاوي تخنیکي او پالیسي مرستیال ښاغلي محمد انور عارفي، د کابل سوداګرۍ اتاق مشرتابه پلاوي غړو او د افغانستان د صرافانو سرتاسري اتحاديې غړو د مرکزي اتاق کنفرانسونو په تالار کې د جوړې شوې غونډې په ترڅ کې، د صرفانو سرتاسري اتحاديې نوي رئیس ته د مباکۍ ویلو ترڅنګ، د پخواني رئیس د هڅو ستاینه وکړه.
 
ښاغلي مهمند د دې اتحادیې مسؤلینو ته د ښه راغلاست پرمهال د پولي ثبات، سوداګرۍ په پراختیا او د هېواد د اقتصاد په وده کې د صرافانو رول مهم وګاڼه او د دې اتحادیې له ټولو مسوولینو یې وغوښتل چې د سوداګرو د پیسو لیږد برخه کې لا ډیرې آسانتیاوې رامنځته کړي.  

ښاغلي مایل د دې اتحادیې د ټاکنو او نوي مشرتابه ته د بریا مبارکي وویله او د هېواد له خصوصي سکتور سره یې د دغه سکتور د خدمتونو ستاینه وکړه. نوموړي له دې اړین او مهم صنف سره د اتاق د هراړخیزو همکاریو ډاډ ورکړ.

ښاغلي خان محمد سرفراز باز او خان جان الکوزي هم د دی اتحاديې فعالیتونه وستایل او د افغانیو د ارزښت د ثبات او ساتنې، د اقتصادي ودې او د پیسو د انتقال لپاره د اسانتیاوو په رامنځته کولو کې د دغې اتحادیې دنده او کړنې اړینې وبللې.

د صرافانو اتحاديې ویاند ښاغلي عبدالرحمن ځیرک په هېواد کې د سوداګرو او پانګوالو د ستونزو د حل برخه کې د افغانستان د سوداګرۍ او پانګونې اتاق هڅې وستایلې او هېوادوالو ته د ښو خدماتو وړاندی کولو برخه کې يې د صرافانو صنف د هڅو ډاډ ورکړ.

دوشنبه، تلې ۳مه، ۱۴۰۲

د افغانستان د سوداګرۍ او پانګونې اتاق عمومي رئیس ښاغلي توکل احمدیار، د اتاق لومړي مرستیال ښاغلي محمد یونس مهمند او د اتاق د مدیره پلاوي غړي ښاغلي عصمت الله وردګ، د افغانستان او پاکستان لپاره د نړیوال بانک (IFC) استازي ښاغلي زیشان شیخ، د امریکا متحده ایالاتو پراختیايي ادارې (USAID) او د آسیايې پراختیا بانک (ADB) له مسؤلینو سره په ترکیه کې په جوړه شوې ناسته کې د لیدنې ترڅنګ، د افغانستان خصوصي سکتور ستونزو او نړیوالو همکاریو په اړه یې خبرې اترې وکړې.

ښاغلي توکل احمدیار د دغې غونډې د جوړیدو د هرکلي په ترڅ کې د تمویل کوونکو له خوا د پراختیایي پروژو د پیسو د ورکړې په اړه خبرې وکړې او زیاته یې کړه "په افغانستان کې ډیرې پراختیایي پروژې چې د خصوصي سکتور له خوا پلې شوې وې یا نیمګړې پاتې دي چې پیسې يې باید د نړیوال بانک او پراختیايي بانک لخوا تحویل کړی شوی وې خو تر اوسه د بېلابېلو دلایلو له امله د دې پروژو پیسې نه دي ورکړل شوي او د هېواد خصوصي سکتور په دې برخه کې له ګڼو ننګونو سره مخ دی.
ښاغلي احمديار له نړيوال بانک او آسیا پراختيايي بانک څخه د يادې شوې ستونزې د هواري غوښتنه وکړه.

ښاغلي محمد یونس مهمند د سوداګریزو موخو لپاره بهرنیو هېوادونو ته د سوداګرو د پیسو د لېږد ستونزې ته په اشارې سره زیاته کړه "افغان سوداګر کولای شي خپلې پیسې د مرکزي اسیا درېیو هېوادونو (قزاقستان، ازبکستان او ترکمنستان) ته د بانک له لارې انتقال کړي خو نورو هيوادونو ته نه شي نه کولی چې، د بانک له لارې پیسې ولیږدوي.
نوموړي د سوداګرو د پیسو د انتقال په برخه کې د اسانتیاوو په رامنځته کولو کې د بانکونو او نړیوالو موسسو د همکارۍ غوښتنه وکړه.

ښاغلي عصمت الله وردګ د یوشمیر هغو شرکتونو ستونزو ته اشاره وکړه چې په دولت کې یې بېلابېلې پروژې بشپړې کړي او یا هم نیمګړې پاتې دي او لا هم د خپلو پیسو د ترلاسه کولو هڅې کوي خو ترلاسه کولی يې نه شي او دغه راز د ویزو د نه ورکولو په برخه کې د سوداګرو ستونزې یې یادې کړې.

په دې ناسته کې د نړیوال بانک، آسیا پرختیايي بانک او USAID مسؤلینو د افغانستان د سوداګرۍ او پانګونې اتاق د مشرتابه له خبرو اوریدلو وروسته ژمنه وکړه، چې د پراختیايي پروژو د تادیاتو په برخه کې به له اړوندو ادارو سره بحث او خبرې وکړي او یادې ستونزې ته به د حل مناسبه لاره بیامومي.

پنجشنبه، تلې ۶مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د مدیره پلاوي دارالانشاء رئیس ښاغلي خان محمد سرفراز باز، د اتاق مدیره پلاوي غړو هر یو ښاغلي خان جان الکوزي او احمد ضیاء عظیمي شینوزاده، د اتاق عامل پلاوي سرپرست ښاغلي میرویس هوتک، د کابل اتاق سوداګریزو چارو مرستیال ښاغلي همایون خواجه زاه، د افغان – پاک ګډ اتاق اجرائیوي رئیس ښاغلي نقیب الله صافي او د هېواد یو شمیر سوداګرو او پانګوالو د افغانستان لپاره د پاکستان د ځانګړي استازي ښاغلي آصف خان دراني او د افغانستان لپاره د پاکستان سفیر ښاغلي عبیدالله نظاماني سره د پاکستان په سفارت کې لیدنه ترسره، او د دواړو خواو ترمنځ د سوداګرۍ او ټرانزیټ په ستونزو يې خبرې اترې وکړې.

ښاغلي مهمند د پاکستان ځانګړي استازي ته ښه راغلاست ویلو ترڅنګ، د پاکستان په بندرونو کې یې د افغان سوداګرو د مالونو د ټرانزیټي ستونزو یادونه وکړه او د پاکستان له مشرتابه یې وغوښتل چې د افغان سوداګرو پر وړاندې د پرتو خنډونو په لرې کولو کې همکاري وکړي.
هغه له دغه هېواد څخه د افغان سوداګرو لپاره د پاکستان په کراچۍ بندر او نورو بندرونو کې د لازمو اسانتیاوو پر رامنځته کولو ټینګار وکړ.

ښاغلي خان جان الکوزي په افغانستان کې د سوداګرۍ او پانګونې په برخه کې د شته فرصتونو په ځانګړې توګه د هېواد د کانونو په سکتور کې د شته فرصتونو د تشریح کولو په ترڅ کې د دوه اړخیزې سوداګرۍ او پانګونې په برخه کې د شته ستونزو یادونه وکړه او زیاته يې کړه "د هېواد د صادراتي جوپو فزیکي پلټنه، د قرنطین د ادارې نوي شرایط، افغان سوداګرو ته د پاکستان د سوداګریزو ویزو د ورکړې ستونزې او د اومو موادو د انتقال په برخه کې ستونزې د دواړو هېوادونو ترمنځ د سوداګرۍ پر وړاندې له عمده مسایلو ګڼل کیږي.
نوموړي د ټرانسپورټي ستونزو په ځانګړي ډول د غلام خان بندر په برخه کې د لازمو اسانتیاوو او د روغتیا په برخه کې د اسانتیاوو پر رامنځته کولو او یو شمېر نورو مسایلو ټینګار وکړ.

ښاغلي آصف خان دراني د افغانستان د سوداګرۍ او پانګونې اتاق د مشرتابه له خبرو اورېدلو وروسته ژمنه وکړه چې په یادو برخو کې به شته ستونزو ته د حل لارو پیداکولو په موخه به لا زیاتې هڅې ترسره او د پاکستان له اړوندو ادارو سره په شریکه به ورته د حل مناسبې لارې چارې ولټوي.  

محترم عبیدالله نظاماني د سوداګرۍ په برخه کې د لازمو تدابیرو نیولو او افغان سوداګرو ته د سوداګریزو ویزو د ورکړې په برخه کې د خپلو هڅو ډاډ ورکړ او له افغان سوداګرو یې وغوښتل چې خپل ټول وړاندیزونه په لیکلي ډول د دغه هېواد سفارت ته وسپاري.

په دې غونډه کې د مرکزي اتاق سربیره، د کابل، کندهار، ننګرهار او خوست اتاقونو مشرتابه هم ګډون کړی و.

شنبه، تلې ۱، ۱۴۰۲

د افغانستان د سوداګرۍ او پانګونې اتاق د پالیسۍ او تخنیکي مرستیال ښاغلي محمد انور عارفي د دولت سره د اړیکو او غړو څانګو د مسؤلینو او غړو په شتون کې، د کنفرانسونو په تالار کې له یو شمېر ښځینه متشبثینو سره وکتل او د ښځینه متشبثینو لپاره د تخصصي کمیټې د جوړولو په اړه يې خبرې اترې وکړې.

ښاغلي عارفي د افغانستان د سوداګرۍ او پانګونې اتاق په هېواد کې د خصوصي سکتور د فعالیتونو یو مهم ملاتړی وباله او د یوې تخصصي کمېټې پر جوړولو یې ټینګار وکړ چې ښځینه متشبثې او د سوداګرۍ مسلکي کسان پکې شامل وي.
نوموړي د دې کمیټې د جوړیدو موخه د ښځینه متشبثینو او سوداګرو د ستونزو حل وګاڼه او له هغوی یې وغوښتل چې د افغانستان د سوداګرۍ اتاق د طرزالعملونو له مخې خپل مشران او غړي اتاق ته معرفي کړي.

متشبثې میرمنو د دغه ډول تخصصي کمیټې د جوړولو په برخه کې د اتاق د همکارۍ هرکلی وکړ او د یوې فعالې کمیټې په جوړولو یې ټینګار وکړ چې وکولای شي په اوسنیو شرایطو کې د افغان متشبثو میرمنو استازیتوب وکړي.

دوشنبه، تلې ۳مه، ۱۴۰۲