د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په داسی حال کې چې د اتاق عامل پلاوي دولت سره د اړیکو ډیپارټمنټ مسؤل ښاغلي صمیم هاشمي يې ملتیا کوله، د هرات ولایتي اتاق سوداګریزو چارو مرستیال ښاغلي احمد سعید صدیقي، د مرکزي اتاق مدیره پلاوي غړي او د سون توکو کمېټې رئیس ښاغلي جان آقا صادقي، د افغانستان نوموتی سوداګر ښاغلي فیض محمد خوافي او د هېواد یو شمیر سوداګرو او پانګوالو سره د خوافي ګلوبل ګروپ سوداګریز ټولګي دفتر کې لیدنه ترسره کړه.
ښاغلي خوافي هرات ته د ښاغلي مهمند ورتګ یو نیک ګام وباله او د هېواد د خصوصي سکتور غړو ته یې د سوداګریزو خدمتونو د وړاندې کولو په برخه کې د دوی هڅې وستایلې.
ښاغلي خوافي د هغه هستوګنځي په اړه معلومات ورکړل چې د خوافي بنسټ له خوا د هرات په زنده جان ولسوالۍ کې د زلزله ځپلو لپاره جوړ شوي او زیاته یې کړه: د سلیمان خوافي خیریه بنسټ له خوا د (صد فامیلي) تر نامه لاندې جوړ شوی هستوګنځی په نړیوالو معیارونو برابر دی چې په دغه ولایت کې به د یو لړ مراسمو په ترڅ کې زلزله ځپلو ته تسلیم شي.
ښاغلي احمد سعید صدیقي د هرات ولایت د اقتصادي، سوداګریزو او پانګونې فعالیتونو او صنعتي پارکونو په اړه هر اړخیز معلومات وړاندې کړل او د سوداګریزې برخې ستونزې یې شریکې کړې.
د هرات ولایت سوداګرو او پانګوالو هر یو د خپل سوداګریز او صنعتي سکتور ستونزې او ننګونې د اتاق له لومړي مرستیال سره شریکې کړې او له اړوندو ادارو سره یې د حل په موخه د شریکولو غوښتنه وکړه.
ښاغلي مهمند د سوداګرو د ستونزو او خبرو د اورېدو پرمهال هرات د هېواد له تاریخي ولایتونو او له تمدن او معنوي ارزښتونو څخه برخمن ولایت وباله او د سلیمان خوافي خیریه بنسټ له لوري یې د زیانمنو شویو کورنیو لپاره د استوګنې د جوړېدو هرکلی وکړ.
ښاغلي مهمند د سوداګرو لپاره د لا زیاتو اسانتیاوو د رامنځته کولو په ځانګړي ډول یو واری د نغدو پیسو په شکل د مالیاتو ورکړې څخه خبر ورکړ او د هرات ولایت له سوداګرو يې وغوښتل چې د هېواد په آبادۍ او بیا جوړونه کې بی سارې هلې ځلې وکړي.
د يادې غونډې په څنډه کې د اتاق لومړي مرستيال د هرات ولايت د بوټانو او کڅوړو له بازار څخه هم ليدنه وکړه او له بېلابېلو غرفه لرونکو سره يې د هغوى د سوداګرۍ د وضعيت په اړه خبرې وکړې.
چهارشنبه، غبرګولي ۲۳مه، ۱۴۰۳
