د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په کابل کې د یوناما دفتر د پروګرامونو له مسؤلې آغلې جولیني لینکي سره د اتاق په مرکزي دفتر کې لیدنه ترسره او د هېواد خصوصي سکتور ستونزو او ګډو همکاریو په اړه يې خبرې اترې وکړې.
 
ښاغلي مهمند د یوناما دفتر مسؤلینو ته د ښه راغلاست ویلو او د دغه دفتر له بشري مرستو څخه د مننې په ترڅ کې، د سوداګرۍ او پانګونې پر وړاندې پرتو ستونزو او ننګونو، د پانګونې د جلبولو، د افغان سوداګرو د بندو پیسو د خلاصون، د زیربناوو په جوړولو کې د مرستو جلبولو، د ویزو د نه ورکړې، د سیمې هېوادونو ته د سوداګرو د پیسو د لېږد لپاره د بانکي اسانتیاوو د نشتوالي او نورو اړوندو مسایلو په اړه خبرې وکړې او په دې برخه کې یې د یوناما دفتر له مسؤلینو د همکارۍ غوښتنه وکړه.

آغلې جولیني لینکي د اتاق مدیره پلاوي لومړي مرستیال د خبرو له اورېدو وروسته، د پورتنیو ستونزو د حل په موخه د دا ډول غونډو جوړول مهم وګڼل او د هېواد خصوصي سکتور غړو سره يې د یوناما دفتر د هر اړخیزې همکارۍ ډاډ ورکړ.

دوشنبه، غبرګولي ۲۲مه، ۱۴۰۲

د افغانستان د سوداګرۍ او پانګونې اتاق مدیره پلاوي غړي ښاغلي خان جان الکوزي په داسی حال کې چې د عامل پلاوي سرپرست رئیس ښاغلي میرویس هوتک، د صادراتو پراختیا او د دولت سره د اړیکو ډیپارټمنټونو مسؤلینو هم حضور درلود، د NEI ادارې د پروګرامونو له مسؤل ښاغلي نثار احمد سره لیدنه ترسره او د ګډو همکاریو په اړه يې خبرې وکړې.

ښاغلي الکوزي د کارموندنې، د صادراتو د ودې، د صادراتي توکو د پروسس شرکتونو کارکوونکو د ظرفیتونو د لوړولو، د کوچنیو متشبثینو د پېژندنې او نور اړوند مسایل بنسټیزې اړتیاوې وبللې او په دی برخه کې يې د اتاق د هر اړخیزې همکارۍ ډاډ ورکړ.

ښاغلي نثار احمد له NEI ادارې سره د اتاق د هر اړخیزې همکارۍ څخه د مننې په ترڅ کې، د اتاق له مشرتابه څخه وغوښتل چې د ښځینه متشبثینو او د کوچنیو او متوسطو متشبثینو په پیژندنه کې دې له دې ادارې سره همکاري وکړي، ترڅو NEI وکولای شي دوی ته د سوداګرۍ برخه کې مالي امکانات برابر کړي.

ښاغلي میرویس هوتک ښاغلي نثار احمد او ورسره ملګري ټیم ته د ښه راغلاست په ترڅ کې د اتاق د لاسته راوړنو او فعالیتونو په اړه هر اړخیز معلومات وړاندې کړل او زیاته یې کړه: د افغانستان د سوداګرۍ او پانګونې اتاق او د NEI ادارې ترمنځ باید د همکارۍ هوکړه لیک لاسلیک شي تر څو وکولای شو د سوداګرۍ بهیر ګړندی کولو ترڅنګ، د کوچنیو او متوسطو متشبثینو ملاتړ وکړو او په نورو مواردو کې هم اغیزمن ګامونه پورته کړو.

چهارشنبه، غبرګولي ۱۷مه، ۱۴۰۲

د افغانستان د سوداګرۍ او پانګونې اتاق عامل پلاوي سرپرست ښاغلي میرویس هوتک په داسی حال کې چې، د اتاق د نړیوالو اړیکو او دولت سره د اړیکو ډیپارټمنټونو مسؤلینو هم حضور درلود، د کار نړیوال سازمان له رئیس ښاغلي بهزاد سره لیدنه ترسره او په افغانستان کې يې د ماشومانو د سخت کار مخنیوي په اړه خبرې اترې وکړې.

ښاغلي بهزاد د ماشومانو سخت کار کول د کار نړیوال سازمان د اصولو او قوانینو خلاف کار وباله او د ماشومانو سخت کار کولو مخنیوي برخه کې يې د کار نړیوال سازمان سره د افغانستان د سوداګرۍ او پانګونې اتاق هر اړخیزه همکاري اړینه وبلله.
سربیره پردی، ښاغلي بهزاد په مرکز او ولایتونو کې د ماشومانو سخت کار کولو مخنیوي په موخه د عامه پوهاي کنفرانسونو او سیمینارونو جوړولو برخه کې د کار نړیوال سازمان لیوالتیا څرګنده کړه.

ښاغلي هوتک ښاغلي بهزاد او ورسره ټیم ته د ښه راغلاست ویلو او د اتاق د فعالیتونو او لاسته راوړنو په اړه د مفصلو معلوماتو ورکولو ترڅنګ وویل "د افغانستان د سوداګرۍ او پانګونې اتاق د هېواد خصوصي سکتور رسمي استازیتوب کوي او تل يې هڅه کړې چي خلکو ته د کاري فرصتونو رامنځته کولو ترڅنګ، د ماشومانو د سخت کار مخنیوي برخه کې د پام وړ فعالیتونه ترسره کړي."
سربیره پردی، ښاغلي هوتک د ماشومانو سخت کار کولو مخنیوي په موخه د عامه پوهاي ګډو کنفرانسونو او سیمینارونو جوړولو برخه کې د اتاق د همکارۍ ډاډ ورکړ.

دوشنبه، غبرګولي ۲۲مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسی حال کې چې، د سوداګرۍ او صنعت وزارت سرپرست ښاغلي نورالدین عزیزي، د اړوندو حکومتي ادارو مرستیالانو او رئیسانو او د هېواد یو شمیر سوداګرو او پانګوالو هم حضور درلود، د ټرانزیت ملي کمېټې پنځمه ناسته کې چې، د سوداګرۍ او صنعت وزارت په انګړ کې جوړه شوې وه ګډون وکړ.

ښاغلي نورالدین عزیزي ټولو حضوري او آنلاین ګډونوالو ته د ښه راغلاست ویلو ترڅنګ، د بهرنیو چارو وزارت لخوا د سون توکو او اوبلن ګاز ټرانزیټ لپاره جوړه شوې طرحې په اړه مفصل معلومات وړاندی کړل.

ښاغلي مهمند د افغانستان له لارې د سیمې هېوادونو ته د سون توکو او اوبلن ګاز ټرانزیټ د هېواد د عوایدو زیاتوالي برخه کې مهم وباله او یاده چاره يې د هېواد په سرحدي پولو کې د اوبلن ګاز او سون توکو زخیرو جوړولو او ټرانسپورت برخه کې د پانګونې لپاره ښه فرصت په توګه یاد کړ.

شنبه، غبرګولي ۱۳مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند د بلخ ولایت خوراکي توکو واردوونکو سوداګرو سره د لیدنې په ترڅ کې، د دوی د ستونزو په اړه خبرې اترې وکړې.

سوداګرو د خوراکي توکو د مالیاتو څیړنه، د ماليې وزارت لخوا د نوی کړنلارې رامنځته کیدل، د وزن لیږدوونکو ګاډو د تناژ کموالی، د مالیاتو نوي سیستم رامنځته کیدل او یو شمیر نور مسایل د اتاق له مشرتابه سره شریک او د خپلو ستونزو حل برخه کې يې د اتاق د مشرتابه د همکارۍ غوښتنه وکړه.

ښاغلي مهمند د خوراکي توکو واردوونکو ته د ښه راغلاست ویلو او د دوی د ستونزو اوریدو وروسته وویل "د افغانستان د سوداګرۍ او پانګونې اتاق د ټولو سوداګرو ګډ کور دی او موږ ژمنه کوو چې ستاسو ستونزې د اړوندو دولتي ادارو سره شریکې او د حل مناسبې لارې ورته ولټوو."

یکشنبه، غبرګولي ۲۱مه، ۱۴۰۲