د افغانستان د سوداګرۍ او پانګونې اتاق عمومي رئیس ښاغلي توکل احمدیار د اتاق عامل پلاوي سرپرست رئیس ښاغلي میرویس هوتک او د څارنې پلاوي منشي ښاغلي عبدالمتین قلندري په حضور کې، د بامیانو ولایت له یو شمېر ښځینه متشبثینو سره وکتل او د هغوی د سوداګریزو فعالیتونو په اړه یې خبرې اترې وکړې او نظرونه یې تبادله کړل.

د بامیانو ولایت د سوداګرۍ او پانګونې اتاق د مدیره پلاوي مرستیالې مېرمن مهتاب رحیمي د دغه ولایت د ښځینه متشبثینو په استازیتوب د بامیانو ولایت د سوداګرۍ او پانګونې اتاق د فعالیتونو او لاسته راوړنو په اړه معلومات وړاندې کړل او د مرکز اتاق له مشرتابه څخه یې وغوښتل چې د یاد ولایتي اتاق ودانۍ په ساختماني او ترمیمي برخه او ښځو په ملاتړ کې ورسره همکاري وکړي.

ښاغلي توکل احمدیار د بامیانو ولایت سوداګرو میرمنو راغونډیدو ته ښه راغلاست ووایه او بامیانو ولایت يې د هیواد یو له سیاحتی ځایونو څخه یاد کړ.

ښاغلي احمدیار په دې ولایت کې د سوداګرو ښځو هڅې وستایلې او د بامیانو ولایت د سوداګرۍ اتاق د جوړولو او ترمیم په برخه کې یې د مرکزي اتاق د همکارۍ او د دغه ولایت د خصوصي سکتور د ملاتړ ډاډ ورکړ.

ښاغلي عبدالمتین قلندري د بامیان ولایت ښځینه متشبثینو ته د ښه راغلاست ویلو په ترڅ کې د دغه ولایت د کورنیو تولیداتو په زیاتوالي او د بامیانو ولایت د سوداګرو لخوا د تولیدي فابریکو په جوړولو باندې ټینګار وکړ.

سه شنبه، چنګاښ ۲۷مه، ۱۴۰۲

د افغانستان د سوداګرۍ او پانګونې اتاق د امام ابوحنیفه (رح) په دویم ملي او نړیوال نندارتون کې د پاکستان د سوداګریز پلاوي له ګډون څخه د مننې په موخه، د اتاق په مرکزي دفتر کې غونډه وکړه چې پکې د افغانستان د سوداګرۍ او پانګونې اتاق عمومي رئیس ښاغلي توکل احمدیار، د څارنې پلاوي منشي ښاغلي عبدالمتین قلندري، د مدیره پلاوي غړي او د افغان-پاک ګډ اتاق رئیس ښاغلي خانجان الکوزي او د مرکزي اتاق عامل پلاوي سرپرست رئیس ښاغلي میرویس هوتک، د پاکستان سوداګریز پلاوي او د هېواد یو شمیر مطرح سوداګرو هم حضور درلود.

ښاغلي توکل احمدیار د پاکستان سوداګریز پلاوي د ښه راغلاست په ترڅ کې د امام ابوحنیفه رحمه الله په نندارتون کې د هغوی د ګډون قدرداني وکړه او د دواړو هېوادونو ترمنځ د سوداګریزو اړیکو پر ښه والي او د دوه اړخیزه پانګونې د بهیر په چټکتیا یې ټینګار وکړ. هغه پاکستان د ګډو ديني او کلتوري ارزښتونو د دوست هېواد په توګه ياد کړ او له هغوى يې وغوښتل چې د دواړو هېوادونو ترمنځ د ګډو نندارتونونو په جوړولو کې همکاري وکړي.

د اتاق عمومي رئيس د پاکستان له سوداګرو وغوښتل چې د افغان سوداګرو لپاره د ویزو د ورکړې په برخه کې د اسانتیاوو برابرولو په موخه، د پاکستان د حکومت له اړوندو چارواکو سره خبرې وکړي.

ښاغلي عبدالمتین قلندري د پاکستان سوداګرو ته د ښه راغلاست په ترڅ کې د دواړو هېوادونو ترمنځ شته سوداګریز فرصتونه تشریح کړل او له دغو فرصتونو څخه یې په استفادې ټینګار وکړ.

ښاغلي خانجان الکوزي له پاکستاني پانګوالو وغوښتل چې د دواړو هېوادونو په لویو ښارونو کې د سوداګریزو اړیکو د ښه والي او د نندارتونونو د جوړولو په برخه کې د پانګونې د بهیر د ګړندي کولو لپاره همکاري وکړي.

د پاکستان د سوداګرۍ پلاوي د امام ابوحنیفه رحمه الله په دویم نندارتون کې د افغانستان د سوداګرۍ او پانګونې اتاق له خوا د پاکستان د سوداګریز پلاوي له بلنې مننه وکړه او ژمنه یې وکړه، او ژمنه يې وکړه چې د ویزو د صدور موضوع به د خپل حکومت له اړوندو ادارو سره شریکه او د حل مناسبې لارې چارې ورته ولټوي.

سه شنبه، چنګاښ ۲۷مه، ۱۴۰۲

د افغانستان د صنایعو او سوداګرۍ وزارت د افغانستان د سوداګرۍ او پانګونې اتاق په همکارۍ د سیمې د هېوادونو د سوداګریزو پلاوو څخه د امام ابو حنیفه (رح) په دویم ملي او نړیوال نندارتون کې د ګډون له امله د مننې کولو په موخه، د دوشنبې په ماښام د چنګاښ په ۲۶مه، په کابل سټار هوټل کې ملمستیا جوړه کړه چې پکې د بهرنیو چارو وزارت سرپرست ښاغلي امیر خان متقي، د افغانستان د سوداګرۍ او پانګونې اتاق عمومي رئیس ښاغلي توکل احمدیار، د مدیره پلاوي سوداګريزو چارو مرستیال ښاغلي خیرالدین مایل احمدي، خدماتي چارو مرستیال ښاغلي نصیر احمد عرب، د دارلانشاء رئیس ښاغلي خان محمد سرفراز باز، مالي رئیس ښاغلي شیرین آغا سخي، د نړیوالو اړیکو رئیس ښاغلي انجنیر سید جاوید برهان، د مدیره پلاوي غړو هر ښاغلي خان جان الکوزي، ذکریا بریالي، احمد ضیاء عظیمي شینوزاده او احمد شکیب احمدیار، د اتاق څارنې پلاوي رئیس ښاغلي عبدالحامد حمیدي، د اتاق عامل پلاوي سرپرست رئیس ښاغلي میرویس هوتک، د سوداګرۍ او صنایعو وزارت مرستیال ښاغلي قدرت الله جمال، د هېواد یو شمیر مطرح سوداګرو، او د پاکستان، ترکيې، او ترکمنستان هېوادونو سوداګریزو پلاوو پکې ګډون درلود.

د صنعت او سوداګرۍ وزارت مرستیال د هېواد له کورنیو تولیداتو څخه د ملاتړ او ګټې اخیستنې، په سوداګریزو قوانینو کې د لازمو اسانتیاوو او یو لړ نورو سوداګریزو مسایلو په اړه د صنعت او سوداګرۍ وزارت پلانونه تشریح کړل او له بهرنیو پانګوالو یې وغوښتل چې په افغانستان کې په بیلابیلو سوداګریزو او تولیدي سکتورونو کې پانګونه وکړي.

د هېواد د بهرنیو چارو وزارت سرپرست د اتاق له خوا د امام ابوحنیفه (رح) د دویم نندارتون د جوړېدو قدرداني وکړه او په دې برخه کې یې د سوداګرۍ اتاق د هڅو ستاینه وکړه. نوموړي له کورنيو صنعتونو ملاتړ، د هېواد د کانونو استخراج، د ترانزيټي وضعيت ښه والي او د لويو پروژو پلي کول د حکومت د اقتصادي تګلارې مهمې مسئلې وبللې او ډاډ يې ورکړ، چې په هېواد کې د پانګونې او سوداګرۍ لپاره عمومي شرايط برابر دي.

د بهرنیو چارو وزارت سرپرست کورنیو او بهرنیو سوداګرو ته د ویزې د خدمتونو د اسانتیا، د سیمې او نړۍ د هېوادونو ترمنځ د سوداګریزو اړیکو د ښه والي او د نړیوالې سوداګرۍ د ودې په برخه کې د دغه وزارت د هڅو په اړه خبرې وکړې او د یادو هېوادونو له سوداګرو څخه یې وغوښتل چې د سیمې د واقعیتونو په پام کې نیولو سره باید د هیواد موجوده شرکتونه په افغانستان کې پانګونه وکړي.
محترم خانجان الکوزي د هېواد د خصوصي سکټور د هراړخیز ملاتړ له امله د حکومت د رهبرۍ له هڅو مننه وکړه او د هېواد د سترو ملي پروژو د تطبیق په برخه کې یې د خصوصي سکتور د همکارۍ ډاډ ورکړ.
ښاغلي الکوزي د منځنۍ اسیا له هېوادونو وغوښتل چې د سیمې د هېوادونو ترمنځ د اقتصادي دهلېز په جوړولو سره د دغه زون په اقتصادي وده او پراختیا کې ونډه واخلي.

په دغه میلمستیا کې ښاغلي توکل احمدیار د بهرنیو چارو وزارت له سرپرست، د صنایعو او سوداګرۍ وزارت له مرستیال او د سیمې د هېوادونو له سوداګرو پلاوي سره چې د امام ابوحنیفه (رح) په دویم نندارتون کې یې ګډون کړی وو، د جلا کتنو په ترڅ کې، د سوداګرۍ د پراختیا، د پانګونې د راجلبولو او د ګډو پانګونو او همدارنګه د سوداګرو لپاره د ویزې د ورکړې د اسانتیاوو د رامنځته کولو په اړه هر اړخیر بحثونه وکړل.

سه شنبه، چنګاښ ۲۷مه، ۱۴۰۲

د افغانستان د سوداګرۍ او پانګونې اتاق د امام ابوحنیفه (رح) د نندارتون د پرانېستې تر څنګ د کورنیو او بهرنیو سوداګرو او پانګوالو د پیوستون او د سیمې د هېوادونو ترمنځ د سوداګریزو اړیکو د ښه کولو په هدف کابل سرینا هوټل کې د ګڼو سوداګرو او کورنیو او بهرنیو پانګوالو په ګډون د سوداګریزو اړیکو کنفرانس هم جوړ کړ.

په دغه کنفرانس کې د افغانستان د سوداګرۍ او پانګونې اتاق عمومي رئیس ښاغلي توکل احمدیار، د مدیره پلاوي لومړي مرستیال ښاغلي محمد یونس مهمند، د مدیره پلاوي سوداګريزو چارو مرستیال ښاغلي خیرالدین مایل احمدي، خدماتي چارو مرستیال ښاغلي نصیر احمد عرب، د دارلانشاء رئیس ښاغلي خان محمد سرفراز باز، مالي رئیس ښاغلي شیرین آغا سخي، د نړیوالو اړیکو رئیس ښاغلي انجنیر سید جاوید برهان، د مدیره پلاوي غړو هر ښاغلي خان جان الکوزي، ذکریا بریالي، جان آقا صادقي، فواد احمد دوست، احمد ضیاء عظیمي شینوزاده او احمد شکیب احمدیار، د اتاق څارنې پلاوي رئیس ښاغلي عبدالحامد حمیدي، د اتاق عامل پلاوي سرپرست رئیس ښاغلي میرویس هوتک، د کابل سوداګرۍ او پانګونې اتاق مدیره پلاوي لومړي مرستیال ښاغلي محمد احمد شاه حکیمي او د پاکستان، ترکیې، ایران او ترکمنستان هېوادونو مطرح سوداګرو هم حضور درلود.
 
ښاغلي توکل احمدیار په دغه کنفرانس کې د کورنیو او بهرنیو مېلمنو په ځانګړي ډول د پاکستان، ترکیې او ترکمنستان د سوداګریزو هیئتونو حضور ته ښه راغلاست ووایه او د هغوی ګډون یې د سوداګریزو او اقتصادي اړیکو د پیاوړتیا په برخه کې د ژورې مینې او ژمنتیا نښه وبلله.
نوموړي افغانستان د بې ساري طبيعي زېرمو او ډېرو اسانتياوو، د سوداګرۍ او پانګونې په برخه کې د لوړ ظرفيت لرونکي هېواد په توګه ياد کړ او د سوداګرۍ د چاپېريال د ښه والي او د بهرنۍ پانګونې د جلبولو لپاره يې تدبيرونه نيولي دي.

ښاغلي احمدیار زیاته کړه "د سوداګریزو اړیکو دغه کنفرانس د معلوماتو د تبادلې، د سوداګریزو اړیکو د رامنځته کولو او ګډې پانګونې لپاره یو ښه فرصت دی. الحمدلله افغانستان اوس په سیمه کې یو له باثباته هیوادونو څخه شمیرل کیږي او له حکومت څخه یې مننه وکړه چې د فساد د له منځه وړلو، د سوداګرۍ او پانګونې د قوانینو د اسانتیا او د امنیت د تامین په برخه کې یې جدي اقدامات کړي دي."
د سوداګرۍ اتاق عمومي رئيس د دغه کنفرانس له ټولو ګډونوالو څخه مننه وکړه او هيله يې څرګنده کړه، چې د دغه پروګرام په ترڅ کې به د نويو سوداګريزو اړيکو د رامنځته کولو، د تجربو د لېږد او د ګډو همکاريو د زياتوالي زمينه برابره شي.

ښاغلي محمد یونس مهمند په دې کنفرانس کې له ټولو ګډونوالو څخه مننه وکړه او له بهرنیو سوداګرو یې وغوښتل چې په بېلابېلو برخو په ځانګړې توګه د ټرانسپورټ سکتور، د انرژۍ په تولید او د سیمې د هېوادونو ترمنځ د ترانزیت د پیاوړتیا په برخه کې پانګونه وکړي.
د اتاق مدیره پلاوي لومړي مرستيال د امام ابوحنيفه (رح) د نندارتون او د سوداګريزو اړيکو د کنفرانس په جوړولو کې د اتاق له عامل پلاوي رئيس او کارکوونکو څخه مننه وکړه.
ښاغلي مهمند له افغان سوداګرو سره د ګاونډیو هېوادونو په ځانګړې توګه پاکستان، ایران، ترکیې او ترکمنستان د هر اړخیزو همکاریو قدرداني وکړه.

ښاغلي خیرالدین مایل احمدي د امام ابوحنیفه (رح) په نندارتون کې د سیمې د هېوادونو له سوداګریزو هیئتونو څخه د مننې په ترڅ کې د سوداګریزو اړیکو کنفرانس د سوداګرو د یو بل سره د پیوست کولو په برخه کې ګټور وباله او له بهرنیو سوداګرو یې وغوښتل په بېلابېلو سکټورونو کې د پانګونې په برخه کې له افغان سوداګرو سره په ګډه کار وکړي.

خان جان الکوزي د دغه کنفرانس ټولو ګډونوالو ته د ښه راغلاست په ترڅ کې د افغان – پاک ګډ اتاق د همکاریو او لاسته راوړنو یادونه وکړه او په بېلابېلو برخو کې یې له شته فرصتونو څخه په استفادې ټینګار وکړ.

دغه راز په دغه کنفرانس کې د صنعت او سوداګرۍ، کانونو او پټرولیم، ښار جوړونې او کور جوړونې، عامې روغتیا وزارتونو او د ملي تدارکاتو ادارې استازو د پانګونې د شته فرصتونو او ممکنو امکاناتو په اړه خپل معلوماتي او منظم پریزنټیشنونه وړاندې کړل. د کانونو په سکټور کې اسانتیاوې، د عامه او خصوصي مشارکت او همدارنګه د دې وزارتونو لخوا پلي شوي پروژې ګډونوالو ته وړاندې شوې.

یکشنبه، چنګاښ ۲۵مه، ۱۴۰۲

د افغانستان د سوداګرۍ او پانګونې اتاق عمومي رئیس ښاغلي توکل احمدیار په داسې حال کې چې له ده سره د سوداګرۍ اتاق سوداګریزو چارو مرستیال ښاغلي خیرالدین مایل احمدي او د عامل پلاوي سرپرست رئیس ښاغلي میرویس هوتک يې هم ملتیا کوله د امام ابوحنيفه (رح) د ملي او نړيوال نندارتون له بېلا بېلو غرفو او له کورنيو او بهرنيو توليداتو څخه يې ليدنه وکړه او له يو شمېر نندارچيانو سره يې خبرې اترې وکړې.

ښاغلي توکل احمدیار د دغه ډول ستر نندارتون له جوړېدو څخه د خوښۍ په څرګندولو سره د ډول نندارتون جوړېدل د هېواد د اقتصادي ودې او پرمختګ لپاره یو ګام وباله او له خلکو یې وغوښتل چې د افغاني تولیداتو په کارولو او پېرلو سره د هېواد له تولیداتو څخه ملاتړ وکړي. په دې کتنه کې نوموړي له یو شمېر نندارچیانو او د ګډون کوونکو شرکتونو له مسوولینو سره د تولیداتو په برخه کې د دوی د ستونزو په اړه خبرې وکړې او د دوی د ستونزو په حل کې یې د سوداګرۍ اتاق د همکارۍ ډاډ ورکړ.

دوشنبه، چنګاښ ۲۶مه، ۱۴۰۲