د افغانستان د سوداګرۍ او پانګونې اتاق عامل پلاوي سرپرست رئیس ښاغلي میرویس هوتک د یوې انلاین غونډې په ترڅ کې په داسې حال کې چې د اتاق د مختلفو ډیپارټمنټونو مسؤلینو هم حضور درلود، په هندوستان کې د افغان جنرال قونسلې آغلې ذکیه وردګ سره د دواړو هېوادونو ترمنځ د سوداګرۍ د فرصتونو او ننګونو په اړه بحث او د نظرونو تبادله وکړه.

ښاغلي هوتک د امام ابوحنیفه (رح) د دویم ملي او نړیوال نندارتون په اړه د معلوماتو وړاندی کولو ترڅنګ، په نږدې راتلونکي کې په بامیان ولایت کې د ښځو د لاسي صنایعو د نندارتون د جوړولو په اړه خبرې وکړې او په ممبۍ کې يې د افغانستان له قونسل څخه وغوښتل چې افغان او هندي سوداګر او پانګوال وهڅوي څو په دې نندارتون کې ګډون وکړي.

ښاغلي هوتک په افغانستان کې د پانګونې د ښه فرصتونو یادونه وکړه او د افغان سوداګرو ستونزو په ځانګړې توګه د ویزو د ترلاسه کولو په برخه کې او په ممبۍ کې د هندي سوداګرو سره د افغان سوداګرو یو لړ سوداګریزو ستونزو ته په اشارې سره یې د حل په برخه کې د افغانستان د قونسلګرۍ د همکارۍ غوښتنه وکړه.

مېرمن وردګ د هند په ممبۍ ښار کې د افغان سوداګرو د ستونزو د حل په برخه کې د خپلو هڅو ډاډ ورکړ او زیاته یې کړه، چې د افغان او هندي سوداګرو ترمنځ د ستونزو د حل په موخه د انلاین ناستو په جوړولو سره به خپلې هیڅ ډول مرستې او همکارۍ ونه سپموي.
نوموړې د افغان سوداګرو د ويزو د ترلاسه کولو ستونزې په اړه وويل: دا موضوع يې په ډهلي کې د افغانستان د سفارت له لارې له هندي چارواکو سره شريکه کړې او هڅه به وکړي چې ياده ستونزه هواره کړي.

چهارشنبه، زمري ۲۱مه، ۱۴۰۲

د افغانستان د سوداګرۍ او پانګونې اتاق د مدیره پلاوي لومړي مرستیال ښاغلي محمد یونس مهمند د هلمند د سوداګرۍ اتاق د مدیره پلاوي له رئیس ښاغلي محمد یحی پښتون هلمندي او د دې ولایت له یو شمېر مخورو سوداګرو سره وکتل او د هغوی ستونزې او وړاندیزونه یې واوریدل.

د هلمند سوداګرۍ او پانګونې اتاق رئیس او سوداګرو خپلې ستونزې او وړاندیزونه ښاغلي مهمند ته وړاندې کړل او د دوی د ستونزو په حل کې یې د مرکزي اتاق له مشرتابه د هر اړخیزې همکارۍ غوښتنه وکړه. دوی له اتاق څخه وغوښتل، چې په دغه ولایت کې د پنبې د پروسس د فابریکې په جوړولو او دغه راز د خپلو تولیداتو لپاره په بهر کې د بازار موندنې په برخه کې همکاري وکړي.  

ښاغلي مهمند ښاغلي هلمندي او ورسره سوداګرو ته د ښه راغلاست پرمهال د هلمند ولایت د سوداګرو د فعالیتونو او لاسته راوړنو قدرداني وکړه او د سوداګرۍ د بهیر پر چټکتیا، د سوداګریزو خدمتونو او پانګونې پر معیاري کولو، هېواد څخه د باندی د سوداګریزو توکو پر صادرولو او ځینو نورو مسایلو ټینګار وکړ.

ښاغلي مهمند په هلمند ولایت کې د پنبې د پروسس د فابریکې د جوړېدو هرکلی وکړ او د سوداګرۍ او پانګونې د بهیر د لا ښه والي په موخه یې د هلمند د سوداګرو او پانګوالو د همغږۍ غوښتنې کولو ترڅنګ، د سوداګریزو خدماتو وړاندی کولو برخه کې يې د مرکزي اتاق د هر اړخیزې همکارۍ ډاډ ورکړ.

دوشنبه، زمري ۱۶مه، ۱۴۰۲

د افغانستان د سوداګرۍ او پانګونې اتاق د کاري چارو د ښه والي او د ولایتي اتاقونو د شته ستونزو د حل په موخه د اتاق عامل پلاوي سرپرست رئیس ښاغلي میرویس هوتک او حقوقي سلاکار ښاغلي عبدالسلام کوهي، د عامل پلاوي مختلفو ډیپارټمنټونو آمرینو او د ولایتي اتاقونو اجرائیه مدیرانو په ګډون آنلاین ناسته ترسره کړه.

ښاغلي هوتک د دې غونډې ګډونوالو ته د ښه راغلاست په ترڅ کې د سوداګریزو چارو د ښه والي، په ټول هېواد کې د خصوصي سکتور غړو ته د خدمتونو وړاندې کولو او د ولایتي اتاقونو د ستونزو په حل کې د دا ډول غونډو جوړول مهم وبلل. د خصوصي سکتور غړو ته د خدمتونو د وړاندې کولو په برخه کې د مرکزي او ولایتي اتاقونو د کارکوونکو د شپو او ورځو هلو ځلو او په ځانګړي ډول د امام ابوحنیفه (رح) په دویم ملي او نړیوال نندارتون کې د ټولو ولایتونو د غړو د ګډون په برخه کې د دوی هڅې وستایلې.
سربیره پردی، د هېواد د صادراتو د زیاتوالي، ولایتي اتاقونو د ستونزو د حل، د لا زیاتو غړو جذبولو، د کارکوونکو د ظرفیت د لوړولو او نورو کاري مسایلو په برخه کې د مرکزي اتاق پر هڅو ټینګار وکړ.

حقوقي سلاکار ښاغلي عبدالسلام کوهي او د مخلتفو ډیپارټمنټونو آمرینو په اړوندو څانګو کې د حقوقي ستونزو او د لا ښه خدمتونو د وړاندې کولو په اړه خبرې وکړې.

د ولایتي اتاقونو اجرائیه مدیرانو په خپل وار سره خبرې وکړې او د دې ډول انلاین غونډو د هرکلي ترڅنګ یې د کاري چارو ښه والي په موخه يې خپلې مشخصې طرحې او وړاندیزونه مطرح کړل او د ستونزو حل په برخه کې یې د افغانستان د سوداګرۍ او پانګونې اتاق له عامل پلاوي څخه د لا زیاتې پاملرنې غوښتنه وکړه.

چهارشنبه، زمري ۱۸مه، ۱۴۰۲

د افغانستان د سوداګرۍ او پانګونې اتاق عمومي رئیس ښاغلي توکل احمدیار او د اتاق مدیره پلاوي سوداګریزو چارو مرستیال ښاغلي خیرالدین مایل احمدي د قزاقستان د صدراعظم مرستیال او د افغانستان د سوداګرۍ او صنعت وزارت سرپرست په ملتیا د قزاقستان د آستانه سوداګرۍ اتاق له رئیس سره لیدنه ترسره او د دواړو هېوادونو ترمنځ د سوداګرۍ پراختیا او د داوړو اتاقونو ترمنځ د همکارۍ زیاتوالي په اړه يې خبرې اترې وکړې.

په دې کتنه کې دواړو لورو د دواړو خونو ترمنځ د سوداګرۍ، پانګونې او ګډو همکاریو د پراختیا غوښتنه وکړه او د افغانستان د سوداګرۍ او پانګونې اتاق مشرتابه د افغانستان-قزاقستان د ګډې خونې پر جوړېدو او د د دواړو هیوادونو ترمنځ د سوداګرۍ د پلاوي پر سفر ټینګار وکړ.

پر دې سربېره په دې ناسته کې د افغانستان او قزاقستان د سوداګرو ترمنځ په بېلابېلو سوداګریزو برخو کې هم تفاهم وشو.

شنبه، زمري ۱۴مه، ۱۴۰۲

د افغانستان د سوداګرۍ او پانګونې اتاق عامل پلاوي سرپرست رئیس ښاغلي میرویس هوتک د افغانستان لپاره د ملګرو ملتونو د ښځو د اقتصادي پروګرامونو له مشرې آغلې لورا میسینا سپری نانس ویمانا او میرمن مهری میرزاد چې د ملګرو ملتونو د ښځو د پیاوړتیا او اقتصادي پروګرامونو له کارپوهانو څخه دي، په خپل دفتر کې وکتل او په افغانستان کې یې د ښځو لپاره د ملګرو ملتونو د کاري پروګرامونو او د اتاق د همکاریو په اړه بحث او خبرې وکړې.

ښاغلي هوتک د افغانستان د سوداګرۍ او پانګونې اتاق د فعالیتونو او په ځانګړې توګه د ښځو د متشبثینو د ملاتړ په برخه کې د څو کلونو د فعالیتونو په اړه معلومات ورکړل او په دې برخه کې یې په ملي او نړیوالو نندارتونونو کې د ښځینه متشبثینو ګډون، د غړیتوب ترلاسه کولو او یو لړ نورو خدماتو په برخه کې ځانګړي امتیازات ورکول او یو شمیر نور مسایل یاد کړل.
نوموړي په نږدې راتلونکي کې د باميانو ولايت د ښځو د توليداتو د يوه نندارتون د جوړولو اعلان وکړ او د افغانستان لپاره يې د ملګرو ملتونو د ښځو د اقتصادي پروګرام له مسوولينو وغوښتل چې د ښځو د تصديو له فعاليتونو سره ځانګړې مرسته وکړي او د سبسایډي په پام کې نيولو سره دوی سره مرسته وکړي چې د هوا له لارې خپل توليدات صادر کړي.

د سوداګرۍ او پانګونې اتاق سرپرست د ښځو د متشبثینو د فعالیتونو د ملاتړ په موخه د لا زیاتې همکارۍ او همغږۍ په موخه د افغانستان د سوداګرۍ او پانګونې اتاق او د افغانستان لپاره د ملګرو ملتونو د ښځو د اقتصادي پروګرام تر منځ د همکارۍ د یو تفاهم لیک د لاسلیک غوښتنه وکړه.

د افغانستان لپاره د ملګرو ملتونو د اقتصادي پروګرامونو مسوولینو هر یو په خپل وار سره خبرې وکړې، د افغانستان د سوداګرۍ او پانګونې اتاق د ښځو د تشبثي فعالیتونو په ځانګړې توګه د امام ابو حنیفه (رح) ملي او نړیوال نندارتون کې د ښځو د پراخ ګډون په برخه کې د افغانستان د سوداګرۍ او پانګونې اتاق له ملاتړ څخه مننه وکړه.
دوی د اتاق له سرپرست رئیس څخه وغوښتل، چې د دواړو څانګو ترمنځ د همکاريو د هوکړه ليک متن ترتيب او د نهايي په موخه دوى ته واستوي.

دوشنبه، زمري ۱۶مه، ۱۴۰۲